Ɲʋn -dhee -ˈnʋʋn -nɩn ˈkmun ˈjɛɛn-, ˈˈjhriɛ se ˈbhɛɛ- ɛ ˈye ˈjhe! Ʋbʋ- ɲɔn ɔn ˈdhaa -zii. -Zii ˈjɛɩn nɩnˈ -wɛeˈ -ziisaɩn- nɩn- ˈo. Ɲʋn -an -ˈmɛan da ˈbhlʋa ˈˈkpe ɛ, ʋbʋ- -a -ˈkpa -zii?

ˈˈƖɩn-, ɲʋn -ˈmɛan an, ʋaˈ ˈkpa -zii. -Bho ɲɔn ˈmɛn ɛnˈ, ɔ se ˈkmʋn -nɩn -da -dhee -ˈnɔɔn. Ka -a nʋn ɛɛˈ jhibho- sʋn -ɛn? Ɛ Biiblʋ- -ˈtmʋɛn. Biiblʋ -nɩɛn- ˈsɛɛ- -ɛ -ˈghlʋ ˈe Ɲɔnsoa bho. Ɲɔnsoa aˈ ˈɲnɩn -nɩn Zoova. Zoova nʋn ɲiɔn. -Bho ɲɔn ˈmɛn ɛnˈ, dhɛ ɔɔ ˈkpa a, Ɔ jhibhɛˈ -kajɔɔnka.—Psaume 83:18; 2 Timotee 3:16.

Biiblʋ ˈnaan ˈbhlʋ Ɲɔnsoa nʋn -wɛeˈ ɔ man -glɔɲiɔn- kɔan ɲan. Ɔɔˈ ˈɲnɩn -nɩn Adan. (Gbɔ I Deˈan 2:7) Ɲɔnsoa poɔ ˈbho -Bɔyaˈˈ -deɩn- dhueˈ ˈdhi, ɲɔn ɔn ˈdhaa ˈbho Edɛnɩn -gle. -Bho Adan ˈˈdu Zoova aˈ ˈtee ˈˈjhriɛ -dhe ɛˈ, -ˈmɛn ɔ ˈse ˈmɛn in, ɔɔ muɛn ˈkmʋn -nɩn ˈzɩan -dhe. ˈKlaa Adan nʋan dhɛsaʋn- ɛn, Ɲɔnsoa -ghluɛ- ˈe ɔ bho ɔ ˈnaan: “-ˈYe ˈdhe ˈbhlʋ we dhe mu -da -a -zaa ʋn ɛ. Dhɛnʋɛ -mɔ baeˈ -wɛˈ -an mue ˈdhe baeˈ we dhe mu-.”—Gbɔ I Deˈan 3:19.

Dhɛ Ɲɔnsoa ˈtmʋan -ˈnɛn, dhɛ ɛ ˈdha -a? -Bho -a -ˈyeɛ iˈŋwɔn -ˈmɛn -a dee- -aaˈ ˈˈjɛ dɩ nɩn in: -Da Zoova ˈsea ˈbhlʋ ˈmʋn ˈˈdhuo- ɔ ˈsea Adan nʋn ke -dhe ɛ, -ˈmɛn dɔ -nɩn -ɛn? Ɔ se -da ˈˈoo da -nɩn. Ɔ se -zuu nɩn- ˈdhe jhaʋn ˈdhi. Ɔ se inɩn-. -Da Zoova ˈnaan Adan an muɛn ˈe “ˈbhlʋ we dhe -mu” ɛn, dhɛ ɛ ˈdhaa -mɛn -nɩn ɔɔ muɛn ˈmɛn-. Ɔ ˈse ka nʋn ɔɔ muɛn  -zuu ˈkpa- ˈdhe jhaʋn ˈdhi. Adan ˈmɛan an, ɔ se inɩn- -dheeˈka. Dhɛbhleɛ ɛ, -ka ˈzɔn -e glu nɩan an, ˈkamɔn- ˈkmʋn -nɩɛn- -e ˈmɛan nɩn-.

ˈˈDhe ɲʋn -ˈnʋʋn -ʋa- -ˈmɛan -ke ˈdhe? Ʋʋ se inɩn- -ke? -Ka Biiblʋ ˈdhaa ˈka ka:

• “[Nmian -e -glɔɲiɔn- -e] ʋaˈ klɛɛ ɛ muɛn -da nɩan dhueˈ. Ʋaˈ klɛɛ ˈghlʋɛ ˈe ˈbhlʋ ˈmʋn, ˈdhe ˈbhlʋ ˈmʋn ʋaˈ klɛɛ ɛ mun dhe.”—Ecclésiaste 3:20.

• “Ɲʋn -ˈmɛan se dhɛ ˈˈoo dhɛ ˈˈɩjhibho-.”—Ecclésiaste 9:5.

• “Ʋaˈ ɲʋndɩkmaan- -e ʋaˈ ɲʋmʋɲɩɛn- -e ʋaˈ -gwlɛnˈ -gwɛ i.”—Ecclésiaste 9:6.

• “ˈDhe glu -man muan an, dhbho se ˈe nɩn-, poodɩ se ˈe nɩn-, dhɛjhibhɛ- se ˈe nɩn-, tɔˈ se ˈe nɩn-.”—Ecclésiaste 9:10.

• “Ɔɔ muɛn ˈe ɔɔˈ ˈbhlʋ ˈzɔn ˈdhe. Ɛɛˈ -zɔn tu ɛ, ɔɔˈ tɔˈinaandhɩ a ˈmɛɛnˈ”—Psaume 146:4.

 Dhɛ Biiblʋ ˈtmʋan an, ɛɛˈ ˈŋwɔɛn- -kman ˈˈɩn ˈdhe- bho? Bhɛ -nɩn ˈan anˈ, -ˈmɛn -naan dɩ nɩn tɔˈ i. ˈBho ˈˈgbuzɔnˈ ɔn, ɲmau- -ɔɔ ˈbɔn ˈghwɛi -wɛeˈ -ɔɔ ˈˈdu ˈˈgbuzɔncɛ ɛˈ dɩ. -Bho ɲmau- -ˈnɔn ˈmɛn ɛnˈ, ɔɔˈ ˈɲnɔn -e ˈˈɲnuun an ˈjheɛ ˈkle. -Zɔn -dhee -ˈnɔɔn ʋaˈ ˈjheɛ ʋaˈ dhiɛ. -Bho ɲmau- -ˈnɔn ˈbhle ˈmʋɲɛʋn -dhe ɛ, ʋʋ ˈbhɛɛˈ ʋʋ ˈye ɔɔˈ ˈcɛ ˈkle ˈˈdu. Dee- -manˈ ˈˈjɛ i bhla: ‘-Bho ɲɔn ˈmɛn ˈˈdhe ɔɔ sa -zuu ˈkpa ˈdhe- ɛˈ, dhɛɛdɩ- -wɛeˈ ɲmau- -ˈnɔn -ɲnaan ɔɔˈ ˈcɛ ɛˈ dɩ ˈˈduɛ- i -ɛ? Dhɛɛdɩ- ɔɔ ˈˈtai ɔɔˈ ˈmʋɲɛʋn dhi ʋa ˈˈdu ɔɔˈ ˈɲnɔn -e ˈˈɲnuun ˈkle -ɛ?’ Dhɛ nɩan ˈo ɛ, ɛmɛn- -nɩn Biiblʋ a ˈtmʋɛn tɔˈdɩ-. ˈˈJhu -ˈnɔn se inɩn- dheeˈka, ɔ se dhɛ -nʋɛn- ˈbhɛɛ-.—Psaume 115:17.

-ˈMɛn ɲʋn -ˈmɛan an, ʋʋ ˈse ˈkmʋn dhe -jhi i dheeˈka? ˈˈƖɩn-, ɛ se ˈan nɩn-. -Aa muɛn ɲʋn -ˈmɛan anˈ ˈkmʋndhejhiɛ- ɛˈ dɩ ˈtmʋn- ˈdhe ɲan. ˈKlaa dhɛ -ˈyea iˈŋwɔn ɔn, ɛmɛn- -nɩn, ɲʋn -ˈmɛan se dhɛ -man nʋan jhibho-. Ʋʋ se ˈbhɛɛ- ʋʋ ˈye -ʋn ˈjhe, ʋʋ ˈye -man ghlu ˈŋwɔn, ʋʋ se ˈbhɛɛ- -ke ʋʋ ˈye ˈdhe- bho -ghlu. Ʋaˈ -faʋn- ˈbhɔ ˈe ˈdhi -nɩɛn-, ʋʋ se ˈbhɛɛ- ʋʋ ˈye -ʋn dhɛ -nʋʋn. ˈˈDhe ʋʋ se ˈbhɛɛ- ʋʋ ˈye -ʋn sʋn bho po mɔn -ke.—Ecclésiaste 9:4; Isaïe 26:14.