Biiblʋ ˈnaan Satan an ‘ˈˈbhiiɛ ˈbhlʋa-kɩnnyʋa ˈˈdhru i.’ (Gbɔˈwlʋdhɩ- 12:9) Ɔmɔn -e ɔɔˈ -ziisaɩn- ˈse ˈbɔn -a -ˈye Ɲɔnsoa aˈ Ghlu nɩan Biiblʋ -gwlɩˈˈ de. Ɩan pooɛ ɲʋn ˈsrɛ i -wɛeˈ ʋʋ ˈye ka nʋn ɲʋn -ˈmɛan an, ʋʋ ˈse ˈmɛn, ʋʋ -nɩɛn- ˈe ˈkmʋn -dhee -ˈnʋʋn ˈdhi. -Ka ɩan nʋan ɛɛˈ nʋn sʋn ɛn, ɛmɛn- -aa jhi ˈjhea.

ˈDhe ˈˈɲɩnsʋn anˈ -da -duuˈˈ ˈdhi ɛ, ɲʋn ˈnaan -bho ɲɔn ˈmɛn ɛnˈ, dhɛ -ɛɛ -ˈghlʋ ˈe ɔ ˈmʋn -ɛɛ mun ˈe ˈkmʋn -dhee -ˈnʋʋn ˈdhi. Ʋʋ ˈnaan ˈbhlʋkuu- mʋn- -an -ˈmɛn, -zuu nɩan ˈe ɔ mʋn ɛn, ʋanˈ ˈmɛn ˈˈdhe ʋn se ˈbhɛɛ- ʋn ˈye ˈmɛn -ke.

ˈKlaa Ɲɔnsoa aˈ Ghlu ˈse dhɛ -ˈnɛn ˈtmʋn. Biiblʋ ˈnaan ɲiɔn se -zuu ˈbhle. -Ka Ɲɔnsoa nʋan ɲankɔn- -ɲiɔn- Adan anˈ nʋn sʋn ɛn, Biiblʋ ˈtmʋɛnˈ. Ʋn ˈnaan: “Sewwɛɛankɔn Nyɔsoa nʋʋe nyiɔ baeˈ -nɩ a ˈbhlʋa- kɩn, ɔ po ˈkmʋnɩfɩɛˈ ˈdheɔ ˈmla -wɛˈ nyiɔ nɩ ˈkmʋnɩfɔɔdhɛ.” (Gbɔ I Deˈan 2:7) Ɲɔnsoa ˈse -zuu ˈdhe Adan ˈmʋn po, Adan -nɩɛn- -fɔɔndhɛ-.

 Nmian -nɩɛn- -fɔɔndhɩ- -ke.—Gbɔ I Deˈan 1:20, 21, 24, 30.

Biiblʋ ˈnaan -bho ɲɔn ˈmɛn ɛnˈ, dhɛ ˈˈoo dhɛ ɛˈ ˈghlʋ ˈe ɔ ˈmʋn ɛɛˈ mun -da -dhee -ˈnɔɔn. Ɲɔn -ˈmɛan an, ɔ ˈmɛɛnˈ. Ɔ se ˈbhɛɛ- dheeˈka ɔ ˈye ɲɔn dhɛ -nʋʋn. -Ka ʋn nʋan ɛɛˈ ˈtmʋnsʋn ɛn, ˈka ka:

• “Ɲɔn nʋan dhɛsaʋn- ɛn, ɔmɔn- -ɔn mun ˈmɛn-.”—Ézékiel 18:4.

• ‘-Bho ɲɔn ˈmɛn ɛnˈ, [...] ɔɔˈ kpa ˈˈghwlii.’—Psaume 49:17.

• -Bho ɲɔn ˈmɛn ɛnˈ, “ˈdhe ˈbhlʋ ˈmʋn ɔ ˈghlʋa a, ˈdhe ɔɔ mun dhe, ɔɔ ˈkpa ˈbhlʋ. ˈDhe ɛɛˈ -zɔn tu ˈdhi ɛ, ɔɔˈ tɔˈinaandhɩ a ˈmɛɛnˈ.”—Psaume 146:4.

-Ka nmiin ɛnˈ ˈmɛan nɩan an, ˈkamɔn- ɲiɔn ɔnˈ ˈmɛan nɩn-. Biiblʋ aˈ ˈˈjhri -ˈnɩɩn -nɩn ˈo -ɩan- toɛ. (Ecclésiaste 3:19, 20) Ɲʋn -ˈmɛan an, ʋʋ se dhɛ ˈˈoo dhɛ ˈˈɩjhibho-. (Ecclésiaste 9:5,10) -ˈMɛn -bho ɲɔn ˈmɛn ɛnˈ, dhɛ ˈˈoo dhɛ ɛˈ ˈghlʋ ˈe ɔ ˈmʋn.

-Bho ɲʋn zro Biiblʋ aˈ klɛɛ ˈdhii ɛˈ, ʋanˈ -da -ˈyea ka nʋn ɲʋn -ˈmɛan -nɩɛn- ˈkmʋn -da -dhee -ˈnɔɔn ɔn, ˈbho se nɩn-. Ɲɔn -ˈmɛan an, ɔ se “ˈˈkwiezriˈˈ” ˈbhle. Biiblʋ ˈse -globho- ɔˈ dɩ ˈtmʋn. Satan -e ɔɔˈ -ziisaɩn- -an po dhɩ -ˈnɩn ˈdhe ɲʋn anˈ ˈˈdhru  ˈdhi. ˈˈƝɩnsʋn- -ɩan- bhla ˈo Satan -e ɔɔˈ -ziisaɩn- ˈdhe ˈdhe sɩ -ˈnɩn ˈdhi ɛ, Zoova ˈɲɩn ˈmʋn ˈmɛn.—Iiˈˈbhlaadhɩ- 6:16-19; 1 Timotee 4:1, 2.

Satan an jhiiɛ dhɩziʋn dhi -ke -wɛeˈ ɔɔ poo ɲʋn ˈsrɛ i. Ɲʋn -an muan ˈe dhɩziʋn- bho ɛ, ˈbho ʋbʋ -e dhɩziʋn- mʋn anˈ ˈˈjɛ -gwlɩˈˈ ɛ, ɲɔn -ˈmɛan an, ɔ ˈbhɛɛˈ ɔ ˈye ˈe ɲʋn bho -ghlu. ˈKlaa -ka -a -ˈjheɛ ˈdhe Biiblʋ ˈdhi ɛ, ɛɛˈ dhɛ tu se ˈbhɛɛ- ɛ ˈye -nʋɛn-.—Ecclésiaste 9:5, 6, 10.

Ɔɔ po dhɩziʋn- ghlu dheinˈˈ -ɛn? Ɛ -ziisaɩn-! -Bho ɲɔn nɩn- ˈkmʋn ɛnˈ, ɩn ˈbhɛɛˈ ɩn ˈyeɔ ˈˈjhriɛ ˈˈkpei -kpʋʋn. -Ka ɔɔ nʋan ˈe ɲʋn bho -ghlu sʋn oo, -ka ɔɔˈ ˈˈjɛ mɔn nɩan oo, ɔɔˈ dhɩ -nʋnsʋn oo, ɛmɛn- -e dhɩ ɔ jhibha oo, ɩn jhibho- dhɩ -ˈnɩn anˈ klɛɛ ˈmɛn. Ɛɛˈ dɩ -wɛeˈ ɩan sraan ɲʋn -ˈmɛan.—1 Samuel 28:3-19.

ˈˈKwiezriˈˈ aˈ -bo ɲʋn an bhla a, ɩmɩn- Satan an jhii dhi -kenɛnˈ -wɛeˈ ɔɔ poo ɲʋn ˈsrɛ i ˈdhe ɲʋn -ˈmɛan anˈ dɩ ˈdhi. -Bo nɩan kaˈ a, ɩan zaa ɲʋn anˈ ˈˈdhru jeˈ ˈsʋ dhɩ Biiblʋ a ˈtmʋan an, ʋa dɩ -gwlɩˈˈ dheeˈka.—2 Timotee 4:4.

ˈNɔn Ɲʋnjhre- -bhlʋaˈ a, ɲʋn -duuˈˈ ˈnaan ɲʋn -an -ˈmɛan an, ʋa ˈjhʋbʋ ˈmɛn -da -dhee -ˈnɔɔn. Ɛmɛn- -ɛnˈ -bo ʋa bhla. ˈKlaa aʋ -naan tɔˈ i: ‘-Bho ɲɔn ˈmɛn -wɛeˈ ɔ ˈbhɛɛ ɔ ˈye dhe jhi ˈdhee, dhɛɛdɩ- ɔɔˈ jhi ˈo ɔ ˈˈbhli, ˈˈdhe ɔmɔn -e ɔɔˈ ˈcɛ ɛˈ ˈˈti -da dhueˈ, ˈsʋ ɔɔ ˈˈmaan ʋbʋ ˈˈjhrii -ɛ?’

ˈBho ɛ ˈdhe -ke ɛ, ɛ ˈbhɛɛˈ ɛˈye ɲʋn ˈsɔɔn ɔnˈ goɛ- nɩn-. Dɩ aˈ kpɔ dhueˈ -ɩan- toɛ ɛ, ɩn ka: Kletiɛn ˈsɔɔn ɔn bhla bo ˈbho -glɔ dhueˈ ˈdhi. Ʋʋ ˈjheɛ geaˈˈ dhueˈ -ɔɔ nʋbʋ ˈdhe. ˈKa ɔ nʋbʋ ˈdhe nan- nan- ˈsʋ ɛɛ ˈbhɔɔa ˈbho ɛ, ʋʋ deeɔ i. Ʋʋ deeɔ i ɛ, ɔ ˈnaan ˈdhe kletiɛn -ˈˈwe nɩan ˈsɔɔn ˈˈklun ɛn, dhueˈ nɩn- ɔɔˈ ˈdhoudhi -ɔ -ˈmɛan. -Kɛ sea tɔˈdɩ nɩn- ɛn, ʋʋ ˈtmʋɔnˈ -tmʋn -tmʋn ʋʋ ˈye sea. Geaˈˈ ˈnaan ɔ se ˈo ˈŋwɔɔn-. Aʋ -naan tɔˈ i, -bho geaˈˈ -ˈnɔn mun ŋmɛinˈˈ ˈdhee, kɔ ˈye ˈdha -a? Kɔ ˈye ˈdha ˈdhe ɔɔˈ ˈcɛ -e -glɔʋn- sia ˈo bho -ɛ?

Ɲʋn -ˈnʋʋn an jha jhɩ, -ˈnʋʋn ˈjheɛ dhɩ, ʋa ˈŋwɔn ghlu. Dhɩ ʋa ˈjhea a, ɩan nʋɛnˈ -zɔn -ˈnɔɔn ʋa naan ˈdhe -faʋn- ˈdhi zɔn ˈˈoo zɔn. Marɛnɩn -ˈˈtia ˈnɔn Ɲʋnjhre- -bhlʋaˈ a, ʋan ˈŋwɔn ʋanˈ ˈˈnan -ɲnɔnkpaoˈ -ˈmɛan anˈ ghlu ˈˈmaʋn -ʋan- ghwee ʋ. -Bho ʋan sa ghlu -ˈnʋn ˈŋwɔn ˈsʋ ʋan ˈˈghwɔɔɛ ˈˈjhai, ɛɛ za ɲʋn anˈ klɛɛ ˈˈɲɩnɔn ˈdhe ˈˈgbu. Ɛɛ ˈbhɔɔa ˈbho ɛ, ɛ poɛ Marɛnɩn -dan ˈˈdaʋn ˈˈjhri.

-Bho ɛ nɩn- ɲʋn -ˈmɛan -ʋa- sa dhejhi ˈdhe- ɛˈ, ʋʋ ˈbhɛɛˈ ʋʋ ˈye ʋaˈ ɲʋn faʋnˈ po? ˈˈƖɩn-, ʋʋ se ˈbhɛɛ- ʋʋ ˈye ɛɛˈ dhɛ tu nʋn. Ɛ -ziisaɩn- -an po ɲʋn faʋnˈ ʋa ˈdhaa ˈˈkwiezriˈˈ.

ˈKlaa -zɔn -ˈnɔɔn ɲʋn -ˈnʋʋn ˈnaan ʋaˈ ɲɔn ɔnˈ ˈˈkwiezriˈˈ ˈtmʋʋn ʋbʋ dhɩ ʋʋ ˈyea nʋn -wɛeˈ ʋaˈ ˈkmʋn ˈyea -kajɔɔnka nɩn- ˈmɛn. Bo ɔˈ kpɔ dhueˈ ka: ˈƝnɔnkpao dhueˈ ɲɔn ɔn ˈdhaa Gbase, -ʋn nɩan ˈe Siera Leɔnɩn -bhlʋaˈ a, ʋan pooai ˈdhe-. Ʋn ˈnaan ʋn jha jha ˈsʋ ɛ, ʋanˈ ˈˈbho -ˈmɛan mɔn- ʋn ˈjhe. Ɔ -tɔɔn ʋn tu dhueˈ -ʋanˈ ŋwɩn ʋn ˈye cɛn, ʋn ˈye pla ˈˈdhe ʋn ˈye ˈnan. Ɔ ˈnaan -bho ʋan sa kwɛin -ˈnɩn nʋn ɛnˈ, ʋn nɩn- ɲɔn ɔnˈ ghlu -dhe. Ʋn nʋan kaˈ ˈjɛɛn- ɛn, ʋanˈ ˈghwɛ ˈbhɔɔˈ.

ˈƝnɔnkpaoˈ dhueˈ ˈnaan -ʋanˈ -kʋan- -ˈmɛan an, ɔmɔn- ˈˈmaʋn ʋn -de i ˈsʋ -ɔ jhi ʋn ˈjhe. Ɔ -nmɔn ˈˈjhrii ˈjɛɛn-, ɔ pa dhɛˈ ˈjɛɛn-.

 Dhɩ ɲʋn an ˈjhea -ˈnɩn, ɩn -nɩɛn- dhɩjɛɩn- ˈbho ʋbʋ -gwlɩˈˈ. Ɩn ˈbhɛɛˈ ɩn ˈye ˈe Ɲɔnsoa bho ˈghlʋ? ˈˈƖɩn-, ɩanˈ ˈghlʋ ˈe ɔ bho. Zoova -nɩɛn- “tɔˈdɩ- Ɲɔnsoa.” (Psaume 31:5) Ɔ se ˈbhɛɛ- ɔ ˈye -aʋ ˈsrɛ i-poo. -Ziisaɩn- anˈ ˈsʋ -ɩan- nʋn kaˈ.

-Ziisaɩn- -ˈnɩɩn -nɩn ˈo -ɩn -nmɔn ˈdhi ŋwɔn? ˈˈƖɩn-. Ɩanˈ klɛɛ ɛˈ ɲʋn sʋn bho -poɛ- -nɩɛn- ˈdhiŋwɔɲniɛn- ˈzɔn. -Da Ɲɔnsaʋn- ɔn ghlua ˈe Ɛvʋ bho ˈdhe- ɛ, ɔ -kpʋʋn ˈˈdhai sʋnˈ. (Gbɔ I Deˈan 3:1) ˈKlaa ʋn poa ɔɔˈ ghlu dheinˈˈ bho -wɛeˈ dhɛ ɔ ˈtmʋan ʋn nʋɛn ɛn, kɛ nʋn ʋanˈ dɩ -ɛ? Ʋn ˈmɛɛnˈ.

-Bho ɲɔn ɔn sa ˈbɔn ɔ ˈye ɲɔn ˈsrɛ i-poo -wɛeˈ ɔ ˈyeɔ dhɛ ˈkwa -za a, ɔɔ ˈbɔn ɔɔˈ -jhbhɛɛ- i. Ɲɔn ɔn ˈjhe ɛɛˈ dhɛ tu ˈmɛn jheejhee. Ɛ nɩn ji -paa ˈbhlaa ku ˈmʋn. -Ka Ɲɔnsoa aˈ Ghlu ˈdhaa -ke ɛ, ˈka ka: “Sataan ˈdjɛkpaa zaa Nyɔsoaa zɔnplia dhbhoozuu.”—2 Kolɛntɩ 11:14.

ˈZɩan an, Ɲɔnsoa aˈ -jhii jhɩ -e -zii dhi -wɛeˈ ɔɔˈ ghlu ˈe ɲʋn bho. Ɔɔ jhiiɛ Biiblʋ i. Ʋmʋn- -ˈbhɛɛ -ʋn -ˈyeɛ nʋn -wɛeˈ ɲɔn “ˈye ˈgba, ɔ ˈye ˈˈi ˈgba ɔ ˈye nʋʋdhɛ ˈdjɛ klɛɛkpɛ nʋ.”—2 Timotee 3:17.

Zoova -kman -aaˈ dɩ, ɛmɛn- -ɛn nʋɛn -wɛeˈ ɔɔ zela -abʋ -glʋˈ -a -ˈye Ɲɔnsaʋn- ɔnˈ ˈgbaadhɩ bho -tɛɛn. -Ka -ziisaɩn- ˈɲɩan -aʋ- ˈmʋn ɛn, ɔ jhibhiˈ.