ˈCƖAANDHƐ- 38
Aʋ ˈˈdu aʋaˈ ˈkmʋn anˈ dɩ ʋn -nɩɛn- Ɲɔnsoa aˈ -baanˈ-
Dhɛ -a nɩan ˈkmʋn ɛn, ɛɛ nʋɛnˈ -a ˈbhɛɛˈ -a ˈye dhɩ -duuˈˈ aˈ trɔnˈ dhi. -Bho -aa sa ˈe ˈkledɩ ˈdhi cɛɛn mɔn -dhe ɛˈ, dhɩ -ˈnɩɩn -nɩn ˈo -ɩn ˈbhɛɛ -ɩn ˈye -aʋ ˈmʋnan inˈ po. -Ka ˈkmʋn Zoova ˈˈɲɩn -aʋ ˈdha dhɛ ˈdhe -a ˈˈjhri ˈdhe ɛ, -kawɛ -a ˈbhɛɛ -a ˈyeɛ -to -ɛ? Dhɛwɛ- -ɛɛˈ dɩ gblein ˈkmʋn ˈye dhɛ ˈdha ˈdhe -a ˈjhri ˈdhe -ɛ?
1. Dhɛɛdɩ- ˈkmʋn ˈye dhɛ ˈdha ˈdhe -a ˈˈjhri ˈdhe -ɛ?
Zoova, -aaˈ ˈˈBho kman -aaˈ dɩ -ɔɔ nʋɛn -wɛeˈ -a -nɩn ˈkmʋn, ɛɛˈ dɩ ˈkmʋn ˈye dhɛ ˈdha ˈdhe -a ˈˈjhri ˈdhe. Ɔmɔn- “ˈkmʋnɩɛn ˈghwlʋ ˈe bho,” ˈˈdhe -ɔ nʋn dhɩ aˈ klɛɛ nɩan ˈkmʋn. (Psaume 36:9) “Ɔmɔn- -ɔn ˈˈɲɩn ɲʋn anˈ klɛɛ ˈkmʋn -e -feɛˈ -e dhɩ aˈ klɛɛ.” (Actes 17:25, 28) Dhɩ ˈyeɛ nʋn -wɛeˈ -a ˈyea ˈkmʋn -nɩn ɛn, Zoova ˈˈɲɩn -aʋ ˈmɛn. Ɛ se ɛɛˈ ˈsʋ ɔɔ nʋn -nɩn, ɔɔ nʋɛnˈ -ke -wɛeˈ -a ˈye ˈkmʋn anˈ trɔnˈ dhi.—Zro Actes 14:17.
2. -Ka ˈkmʋn Zoova ˈˈɲɩn -aʋ ˈdha dhɛ ˈdhe -a ˈˈjhri ˈdhe ɛ, ka -a ˈye ɛɛˈ -to sʋn nʋn -ɛn?
-Ɛ tbha ˈo -zɔn -manˈ ˈdhou ˈbhlea -manˈ ˈˈkwli ˈˈkpe -ɛ -jhɛɛa ˈzɩan an, Zoova ˈˈduɛ -man dɩ. ˈDhe Ɲɔnsoa aˈ -zuu aˈ ˈsaa ˈmʋn ɛn, dhɛ Davidɩ nɩan Ɲɔnsoa aˈ dhbhonʋin- dhueˈ ˈtmʋan ɛ ka: “-Da ˈɩn ˈsea ku ke ˈdhe ˈman ˈdhou ˈdhi ɛ, -ˈjhe ˈʋn ˈmɛn.” (Psaume 139:16) -Aaˈ ˈkmʋn ˈdha dhɛ ˈdhe Zoova ˈˈjhri ˈdhe. (Zro Matthieu 10:29-31.) -Bho ɲɔn ˈsɔɛ ˈˈdhe ɔ ˈdhbha ɔɔˈ ˈˈjɛ -aeˈˈ ɔ ˈdhbha ɲɔn ɔnˈ, ɛɛ kpʋɛn Zoova -glʋˈ. a (Exode 20:13) -Bho -aa sa dhɩ ˈyea -aʋ ˈmɛan bho -jha nʋn -aeˈˈ -a se dhɩ kpɔˈˈ po ˈˈdhe -a ˈye ɲʋn -ˈnʋʋn anˈ ˈkmʋn anˈ dɩ ˈˈdu ɛˈ, ɛɛ kpʋɔn -glʋˈ -ke. ˈKlaa -bho -aa sa -aaˈ ˈkmʋn -ˈgwlɩi ˈsroo ˈˈdhe -aa sa ɲʋn -ˈnʋʋn anˈ ˈkmʋn ŋwɔn ˈjhe ɛˈ, -aa toɛˈ -ka -baanˈ- nɩan ˈkmʋn ˈdha dhɛ ˈdhe -a ˈˈjhri ˈdhe.
KPA DHƐ I ˈŊWƆƐN ƝAN
-Ka -a ˈbhɛɛa -a ˈyeɛ -to -ka ˈkmʋn ˈdha dhɛ ˈdhe -a ˈˈjhri ˈdhe ɛ, ɛmɛn- -aa mun ˈjhe-.
3. ˈˈDu -manˈ kuzɔinflɔɛn- ɛnˈ dɩ
Ɲɔn dea ɔɔˈ ˈkmʋn Zoova kwa a, ɔ ˈˈɲɩɔn ɔɔˈ ˈkmʋn anˈ klɛɛ ˈmɛn. Ɛ nɩn -ka ɔɔˈ ˈˈɲɩan Ɲɔnsoa ɔɔˈˈ ɲiɔnjhɔɛ ɛˈ klɛɛ ɛ ˈyea ˈsraa -nɩn ɛn. Zro Romains 12:1, 2, -ˈmɛn aʋ ˈtmʋn ideedɩ- nɩn anˈ dɩ:
-
Dhɛwɛ- ˈye ʋn ˈˈtun ˈˈdhe -ˈye -manˈ kuzɔinflɔɛn- ɛnˈ dɩ ˈˈdu -ɛ?
-
-Kawɛ -ˈbhɛɛˈ -ˈye nʋn ˈˈdhe -ˈye -manˈ kuzɔinflɔɛn- ɛnˈ dɩ ˈˈdu -ɛ?
4. Aʋ ˈsroo- aʋaˈ ˈˈjɛ -e ɲʋn -ˈnʋʋn anˈ ˈkmʋn -ˈgwlɩi
Biiblʋ a poɛ -aʋ ˈkpɩ -a ˈye dhɩ ˈbhɛɛa -ɩn ˈyea dɩ ˈyea -aaˈ ˈjɛ -e ɲʋn -ˈnʋʋn dhɛsaʋn ˈˈdhrui nʋn bho -tɛɛn. Po ˈo VIDEO -wɛeˈ dhɩ -ˈnɩɩn -ˈbhɛɛa -ˈyea nʋn ˈˈdhe -ˈyeɛ -to -ka -man ˈsrooa -ˈgwlɩi ɛ, -ˈyɩ jhibho-.
Zro Proverbes 22:3, -ˈmɛn aʋ ˈtmʋn dɩ nɩn anˈ dɩ. Ka -ˈye ɛɛˈ -to sʋn nʋn -ka -man ˈsrooa -ˈgwlɩi...
-
ˈbho ŋmɛin -ɛn?
-
ˈdhe dhbhoˈˈ -ɛ?
-
-bho -man sa ˈplʋ ˈˈjhrii za -a?
-
-bho -aa sa kamiɔn tbha -aeˈˈ -a-nɩn ˈe kamiɔn ˈdhi -ɛ?
5. -ˈJhe ˈˈjhu nɩan ˈe ˈdhou ˈdhi ɔˈ ˈkmʋn ŋwɔn
ˈDhe bhleghwlu ˈdhi ɛ, Davidɩ ˈnaan Zoova a ŋmʋɛn ˈˈjhu -dhee ˈsea ghwlu ke ɔɔˈ ˈkmʋn -e ɔɔˈ ˈbhɔasʋn jha. Zro Psaumes 139:13-17, -ˈmɛn aʋ ˈtmʋn ideedɩ- nɩn anˈ dɩ:
-
ˈDhe Zoova ˈˈjhri ˈdhe ɛ, -dawɛ ɲiɔn ɔnˈ ˈkmʋn an dee -ɛ, ɛ zɔn ɲʋn ˈbhlea ɔɔˈ ˈˈkwli -aeˈˈ zɔn ɔ ˈghwlʋʋa?
ˈDhe Israɛkɔʋn- anˈ nɔnˈˈ ɔn, Zoova -toɛ- ˈo ˈtee ˈdhe ˈɲnʋnkpaoˈ ˈbhlea ˈˈkwli -e ˈˈjhu nɩan ˈdhe ʋn ˈdhi ɔɔˈ dɩ. Zro Exode 21:22, 23, -ˈmɛn aʋ ˈtmʋn ideedɩ- nɩn anˈ dɩ:
-
-Bho ɲɔn seɛ ˈsɔ -wɛeˈ ɔ nʋɛn ˈˈjhu nɩan ˈdhe ɔɔˈ ˈdhou ˈdhi ˈmɛn ɛnˈ, ka Zoova a ˈjheɔ -ɔ?
-
Ɲɔn ˈsɔɛ ˈˈdhe -ɔ ˈdhbha ɲɔn, ka Zoova a ˈjheɔ -ɔ? b
-
-Ka Zoova a nʋan ˈkmʋn ˈjhe sʋn ɛn, -kawɛ ɛ -nɩn ˈbhoo- -gwlɩˈˈ -ɛ?
ˈDhe dɩ -ˈnɩɩn ˈdhi ɛ, ˈɲnʋnkpaoˈ -ʋn jhibhi -ka ˈkmʋn ˈdha dhɛ ˈbhɛɛˈ ʋn ˈye ka nʋn ˈˈkwlibhozaaˈ aˈ ˈsʋ ˈbhɛɛ -ɛ ˈyʋ ˈe dɩ ˈdhi -za. Zro Isaïe 41:10, -ˈmɛn aʋ ˈtmʋn ideedɩ- nɩn anˈ dɩ:
-
-Bho ɲʋn ˈnɛn ˈɲnʋnkpaoˈ ˈˈmlan -wɛeˈ ʋn ˈye ˈo ʋanˈ ˈˈkwli -za aˈ, ɲɔnwɛ- ʋn ˈye sʋnbhopoɛ i dee- -ɛ? Dhɛɛdɩ- -ɛ?
ƝƲN -ˈNƲƲN ˈNAAN: “-Bho ˈɲnʋnkpaoˈ ˈbɔn, ʋn ˈbhɛɛˈ ʋn ˈye ˈo ʋanˈ ˈˈkwli -za -aeˈˈ ʋn ˈyeɛ i ˈˈtai-, ʋmʋn- ɛɛˈ dɩ -nɩn ˈe ˈkwa.”
-
Dhɛɛdɩ- deɛ -gwlɩˈˈ -ka ˈɲnʋnkpaoˈ ˈbhlea ˈˈkwli -e ʋanˈ ˈˈjhu nɩan ˈdhe ʋn ˈdhi ˈdha dhɛ ˈdhe Zoova ˈˈjhri ˈdhe -ɛ?
DHƐWƐ- ˈCƖAN-?
ˈKmʋn -nɩɛn- Ɲɔnsoa aˈ -baanˈ-, ɛɛˈ dɩ Biiblʋ a poɛ -aʋ ˈkpɩ -a ˈye ʋanˈ dɩ -kman, -a ˈyʋ dhɛ ˈdhaa- ˈˈdhe -a ˈye ʋanˈ dɩ ˈˈdu. ˈSrɩn -ˈnɩn -mɩn -a ˈye ˈˈjhriɛ ˈˈdu ˈdhe -aaˈ ˈˈjɛ ɛˈ ˈkmʋn -e ɲʋn -ˈnʋʋn anˈ ˈkmʋn anˈ dɩ ˈdhi.
Dhɛwɛ- -ˈŋwɔn in -ɛn?
-
Dhɛɛdɩ- -glɔɲiɔn ɔnˈ ˈkmʋn ˈdha dhɛ ˈdhe Zoova ˈˈjhri ˈdhe -ɛ?
-
-Bho ɲɔn ˈsɔɛ -wɛeˈ ɔ -za ɲɔn ˈnɔn ˈkmʋn ɛnˈ, -kawɛ Zoova a ˈjheɛ -ɛ?
-
Dhɛɛdɩ- ˈkmʋn ˈdha dhɛ ˈdhee- ˈˈjhri ˈdhe -ɛ?
ˈBƆN DHƖ -ˈNƖƖN ANˈ I ˈŊWƆAN IN
Ka -a ˈye Zoova ˈsɛ -po sʋn nʋn ˈkmʋn ɔ ˈˈɲɩn -aʋ ʋanˈ dɩ -ɛ?
-Bho ˈɲnʋnkpaoˈ -za ˈo ˈˈkwli ɛˈ, Zoova a ˈghwlʋ ʋanˈ dhɛsaʋn ˈˈkpe ˈmɛn? Ideedɩ- nɩn anˈ ˈdhezaaˈ -nɩɛn- ˈdhe ˈsɛɛ- nɛn ˈdhi.
“L’avortement: qu’en dit la Bible?” (Dɩ ˈghwlʋa ˈo ɛntɛɛnɛtɩ ˈˈkpe ɛ)
-Kawɛ Zoova aˈ ˈkmʋn ˈjhe sʋn ˈbhɛɛ ɛ ˈye -aʋ sʋn bho po ˈˈdhe -a ˈye ˈo ˈplʋjhrizaadhɩ ˈjɛɩn -za -a?
“‘Sports de l’extrême’: doit-on faire abstraction des risques?” (Réveillez-vous!, 8 octobre 2000)
Ɲɔn -ɔɔ ˈbɔan -ɔ ˈyea ɔɔˈ ˈˈjɛ ˈkmʋn -za ˈˈdhe -ɔɔ naan ɛɛˈ dɩ tɔˈ ˈˈkpe i jheejhee ɛ, -kawɛ Biiblʋ ˈbhɛɛˈ ʋn ˈyeɔ sʋn bho po -ɛ?
a Ɲʋn ˈˈzrua, Zoova a ˈˈduɛ ʋaˈ dɩ. (Psaume 34:18) Ɲʋn -ʋa- ˈjhea ʋaˈ ˈˈjɛ ŋwɔn ˈˈdhe -ʋa- ˈbɔan -ʋʋ ˈyea ʋaˈ ˈkmʋn ˈˈjhriikʋaanˈˈ an, ɔ jhibho- dɩ ʋʋ nɩan ˈe ˈdhi ˈmɛn ˈˈdhe ɔɔ ˈbɔn ɔ ˈyʋbʋ sʋn bho po. -Ka Zoova aˈ ɲʋnsʋnbhopoɛ- ˈdha dhɛ -bho -ˈyeɛ i ˈŋwɔn ɔnˈ, -ˈmɛn zro ˈcɩaandhɛ- “Je veux mourir — Est-ce que la Bible peut m’aider si j’ai des idées suicidaires?” ˈdhii. Ɛ -nɩɛn- ˈdhe ˈˈBɔn dhɩ -ˈnɩɩn anˈ i ˈŋwɔan in” ɛnˈ ˈfɔ bho.
b Ɲʋn za ˈo ˈˈkwli -dhe ɛ, ʋaˈ kpa ʋaˈ ˈˈjɛ dɩ ˈˈbhli -dhe ɛɛˈ zi -e -jieˈˈ -dhe, Zoova ˈbhɛɛˈ ɔ ˈye dhɛ ʋʋ nʋan anˈ ˈgɩn ˈŋwɔɔn-. -Bho -ˈye dhɩ -ˈnɩɩn jhibho- ɛˈ, mun -da ɲʋn ˈcrea “L’avortement: qu’en dit la Bible?” ˈdhe “ˈBɔn dhɩ -ˈnɩɩn anˈ i ˈŋwɔan in” ɛnˈ ˈfɔ bho.