ˈCƖAANDHƐ- 42
Dhɛwɛ- Biiblʋ a ˈtmʋn ˈdhe ɲɔn -nɩn ɲɔn sea ˈˈbhli ˈˈtii- -e ˈˈbhlitiiɛ- ɛˈ dɩ ˈdhi -ɛ?
ˈDhe ɲʋn -ˈnʋʋn ˈˈbhli ɛ, ɲɔn -nɩn ɲɔn sea ˈˈbhli ˈˈtii- se ˈbhɛɛ- ɔ ˈye -bɔyaˈˈ ˈjhe. ˈKlaa ɲʋn -ˈnʋʋn -nɩn ɲɔn ˈˈtii- ˈˈbhli -wɛeˈ -ʋʋ se ˈmʋnan in -nɩn, ˈˈdhe ɲʋn -ˈnʋʋn -nɩn ɲɔn se ˈˈbhli ˈˈtii- -ʋʋ -nɩn ˈmʋnan in. -Ka ɛ ˈjhe ɛ -nɩn ɛnˈ, Biiblʋ ˈnaan -nɩn ɲɔn ˈˈtii- ˈˈbhli -e -nɩn ɲɔn se ˈˈbhli ˈˈtii- -nɩɛn- Ɲɔnsoa aˈ -baanˈ-.
1. Ɲɔn -nɩn ɲɔn sea ˈˈbhli ˈˈtii- ɛ, dhɩjɛɩn- -wɛ ɔɔ ˈjhee ˈbho -ɛ?
Biiblʋ ˈnaan: “-Bho ɲɔn -nɩn ɲɔn ˈˈtii- ˈˈbhli ɛˈ, ɛ nɩn dhɛjɛɛn-, ˈklaa -bho ɲɔn -nɩn ɲɔn se ˈˈbhli ˈˈtii- ɛˈ, ɛ ˈˈpaaˈ.” (Zro 1 Corinthiens 7:32, 33, 38.) Dhɛɛdɩ- Biiblʋ ˈnaan -bho ɲɔn -nɩn ɲɔn se ˈˈbhli ˈˈtii- “ɛ ˈˈpaaˈ” -a? Dhɛ ɔ sea ˈɲnɔn -aeˈˈ -kʋan ˈbhle ɛ, ɛ ˈbhɛɛˈ ɛ ˈyeɔ ˈˈkpeiflɔɛn- -duuˈˈ ˈˈɲɩn. Ɛɛˈ kpɔ dhueˈ -mɛn -nɩn, ɔ ˈbhɛɛˈ ɔ ˈye -da ˈsrʋ -aeˈˈ ˈbhlʋɩ- ˈsrɩ ˈdhii mun ɔ ˈye -bɔyaˈˈ bo bhla. ˈBho -ˈmɛn ˈdhe ɛ, ɔ ˈbhɛɛˈ ɔ ˈye nɔnˈˈ -duuˈˈ ˈmʋn ˈˈdhuo- ɔ ˈye -jhbhɛɛ nɩan ˈo ɔmɔn -e Zoova ˈɲnɩn in -kuu.
2. Ɲʋn ˈˈtiia ˈˈbhli ɛ, dhɩjɛɩn- -wɛ ʋa ˈjhee ˈbho -ɛ?
-Ka ɲɔn -nɩn ɲɔn sea ˈˈbhli ˈˈtii- ɔɔ ˈjheea ˈbho dhɩjɛɩn ɛn, ˈkamɔn- ɲʋn ˈˈtiia ˈˈbhli a ˈjhee ʋaˈ ˈˈbhlitiiɛ- dhɩjɛɩn ˈdhi -ke. Biiblʋ ˈnaan “aʋ -nɩn ˈsɔɔn ˈˈpaaˈ ɛ ye -nɩn dhueˈ -zii.” (Ecclésiaste 4:9) ˈƝnɔn -e -kʋan- -ʋa- ˈˈdua Biiblʋ aˈ ˈsrɩn ˈˈjhriɛ ʋbʋ ɛɛ ˈdha ˈe bho gblein. Kletiɛn -ˈˈwe poa dhɛ -jiɛˈ cɛn ghwlu ʋʋ ˈye bha aˈ dɩ -kman, ʋʋ ˈye bha ŋwɔn ˈjhe ˈˈdhe ʋʋ ˈye bha ˈbhle -dhɛ -dhɛ. Ʋaˈ -pɛɛ ˈbhlʋ ɛ ye ɲʋn sea dhɛ -jiɛˈ -po ˈˈdhe -ʋʋ nɩan -da dhueˈ -zii. Ɛɛ nʋɛnˈ ʋaˈ ˈˈɲnuun an yea ˈflɛ ˈmʋn in de ˈbho ˈˈgbuzɔnˈ.
3. -Kawɛ Zoova a ˈjhe ˈˈbhlitiiɛ -ɛ?
-Da Zoova poa Adan -e Ɛvʋ -da dhueˈ ɛ, ɔ ˈnaan: “Ɲmau ɔ muɛn ˈbho ɔɔˈ ˈˈbho -e ˈdhou ˈˈbun ˈghwlʋ- ˈˈdhe ɔ ˈye ˈbho ɔɔˈ ˈɲnɔn ˈˈbun in kpʋn.” (Genèse 2:24) Zoova a ˈbɔn ˈɲnɔn -e -kʋan ˈye bha aˈ dɩ -kman, ʋʋ ˈye ˈo bha ˈˈbun in kpʋn ˈdhe ʋaˈ ˈkmʋn anˈ klɛɛ ˈdhi. Ɲʋn ˈˈtiia ˈˈbhli ɛ, -bho ʋaˈ dhueˈ nʋn ˈɲnɩnzanˈ- anˈ, ʋʋ ˈbhɛɛˈ ʋʋ ˈye ˈˈɩ ciɛn-, ˈkamɔn- ɔ ˈdha. -Bho ɛɛˈ dhɛ tu -nʋʋɛn- ɛnˈ, ɲɔn -ɔɔˈ ˈɲnɔn -aeˈˈ -ɔɔˈ -kʋan nʋan ˈɲnɩnzanˈ- an, -bho ɔ ˈbɔn ɔnˈ, ɔ ˈbhɛɛˈ ɔ ˈye ɔɔˈ dhɛsaʋn ˈˈkpe ˈghwlʋ -aeˈˈ ɔ ˈbhɛɛˈ ɔ ˈye ka nʋn, ʋʋ ˈye ˈˈɩ ciɛn-. a (Matthieu 19:9) Zoova ˈse ˈbɔn kletiɛn ˈye ˈɲnʋnkpaeˈ -duuˈˈ ˈbhle.—1 Timothée 3:2.
KPA DHƐ I ˈŊWƆƐN ƝAN
-Bho -nɩn ɲɔn ˈˈtii- ˈˈbhli -aeˈˈ -nɩn ɲɔn se ˈˈbhli ˈˈtii- ɛˈ, dhɩ -ˈbhɛɛa -ˈyea nʋn -wɛeˈ -ˈyea -bɔyaˈˈ ˈjhe ˈˈdhe -ˈyea Zoova ˈmʋnan in po ɛ, ɩmɩn- -aa mun ˈcɩan-.
4. -Bho -nɩn ɲɔn se ˈˈbhli ˈˈtii- ɛˈ, -ˈbhɛɛˈ -ˈye dhɩ -duuˈˈ nʋn
ˈDhe Zezi ˈˈjhriɛ ˈdhe ɛ, -nɩn ɲɔn se ˈˈbhli ˈˈtii- -nɩɛn- -baanˈ-. (Matthieu 19:11, 12) Zro Matthieu 4:23, -ˈmɛn aʋ ˈtmʋn ideedɩ- nɩn anˈ dɩ:
-
Dhɛ Zezi -nɩn ɲɔn sea ˈˈbhli ˈˈtii- ɛ, ka ɛ nʋn ɔnˈ sʋn bho -po sʋn ˈdhe ɔɔˈ ˈˈBho ɔˈ dhbho nʋanˈ -e ɲʋn anˈ sʋn bho -poaˈ -a?
Dhɩ Zezi nʋan ˈdhe ɔɔˈ ˈkmʋn ˈdhi ɛ, kletiɛn -ˈˈwe -nɩn ɲɔn sea ˈˈbhli ˈˈtii- ɛ, ʋʋ ˈbhɛɛˈ ʋʋ ˈyɩ -sraan -ke ˈˈdhe ʋʋ ˈye ˈmʋnan ˈjhe. Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
Kletiɛn -ˈˈwe -nɩn ɲɔn sea ˈˈbhli ˈˈtii- ɛ, dhɛwɛ- ʋʋ ˈbhɛɛ ʋʋ ˈye nʋn -ɛ ˈye ˈo dhɛjɛɛn po ˈdhe ʋaˈ ˈkmʋn ˈdhi -ɛ?
Jhibhodɩ-
-Zɩn ɲɔn ˈyea ˈbhle ˈˈdhe ɔ -nɩn ɲɔn ˈyea ˈˈbhli ˈˈtii- ɛ, Biiblʋ ˈse ɩanˈ dɩ ˈtmʋn. Biiblʋ a poɛ ɲʋn ˈkpɩ ɲʋn ˈye “-goaˈˈ nɔnˈˈ i zi”, dhɛbhleɛ ˈdhe ɛɛˈ nɔnˈˈ tu ˈdhi ɛ, -nɩn eɲmau- -aeˈˈ ˈɲnʋnkpaoˈ ˈpɛn in ɛnˈ ˈtʋn ziɛ -jieˈˈ. Ɛ ˈbhɛɛˈ ɛ ˈyeɛ nʋn ɔ ˈse ˈo ˈɲnɔn ˈdhɔɛe -aeˈˈ -kʋan ˈdhɔɛe -za i.—1 Corinthiens 7:36.
5. -Za ˈo ɲɔn -nɩn -ˈyea ˈˈbhli ˈˈtii- ˈdhe ˈˈjhriicɛɛn ˈmʋn
Ɲɔn -nɩn -ˈyea ˈˈbhli ˈˈtii ɔˈ ˈbho -za aˈ -kɔn dɩ ˈjɛɛn- dhɛbhleɛ -ˈyeɛ nʋn kpɔ dhueˈ gbai ˈdhe -manˈ ˈkmʋn ˈdhi. Zro Matthieu 19:4-6, 9, -ˈmɛn aʋ ˈtmʋn ideedɩ- nɩn anˈ dɩ:
-
Dhɛɛdɩ- kletiɛn ˈse i telɛ- i ˈdhe dhɛ -jiɛˈˈ -poɛ- ɛˈ dɩ ˈdhi -ɛ?
Biiblʋ a poɛ ʋn sʋn bho -wɛeˈ kplɩn ˈdhɔɛe ɲɔn -nɩn -ˈyea ˈˈbhli ˈˈtii- ˈyea ˈbhle ɛ, -ˈyɩ jhibho-. -Bho ɔ ˈbhle kplɩn anˈ klɛɛ -mɔnˈ -dhe ɛˈ, -jɩn kɔan dɩ ɛ, ɩmɩn -nɩn ɔ ˈye Zoova aˈ dɩ -kman. b Zro 1 Corinthiens 7:39 -e 2 Corinthiens 6:14. -ˈMɛn aʋ ˈtmʋn ideedɩ- nɩn anˈ dɩ:
-
Dhɛɛdɩ- ɲʋn -an ˈˈɲɩan Zoova ˈye ˈˈbhli ˈˈtii ˈbho ʋaˈ ˈsʋ ˈɲnɩn -ɛn?
-
-Bho -nɩn ɲɔn sea Zoova aˈ dɩ -kman ˈˈtii- ˈˈbhli ɛˈ, ka ɛɛ mun -nɩn ˈbho Zoova -gwlɩˈˈ -ɛ?
-Bho ɲʋn po nmian ˈsɔɔn sea dhɛ dhueˈ -nɩn -da dhueˈ ˈˈdhe ɩan sa dhɛ ˈjri ɛˈ, ɩan muɛn -sea-. ˈKamɔn- -ke, -bho kletiɛn -nɩn ɲɔn sea Zoova aˈ -Bobhlai -nɩn po dhɛ -jiɛˈ ɛɛ muɛn ˈˈɩ -kman.
6. -ˈJhe ˈˈbhlitiiɛ -ka Zoova a nʋan ɛɛˈ ˈjhe sʋn
ˈDhe Israɛ ˈbhlʋaˈ tɛnˈˈ -dhe ɛ, ɲʋn -ˈnʋʋn an za ʋaˈ ˈɲnɔn ˈkwla ʋaˈ ˈˈjɛ ɛˈ ˈbɔndhɩ aˈ dɩ. Zro Malachie 2:13, 14, 16, -ˈmɛn aʋ ˈtmʋn ideedɩ- nɩn anˈ dɩ:
-
-Bho ɲʋn ˈˈtiia ˈˈbhli aˈ dhueˈ se ˈɲnɩnzanˈ- nʋn -wɛeˈ ʋʋ ˈye i -ciɛn- ɛnˈ, dhɛɛdɩ- ɛɛ ɲaan Zoova i -ɛ?
ˈKamɔn- -ke ˈɲnɩnzanˈ- -nʋɛn- -e ˈˈɩ -ciɛn ɛn jha -jɔn ˈsea dhɛsaʋn nʋn -e ˈˈɲnuun ˈkledɩ- -duuˈˈ bho.
Po ˈo VIDEO, -ˈmɛn aʋ ˈtmʋn ideedɩ- nɩn anˈ dɩ.
-
-Bho ɲɔn -nɩn ˈˈtiia ˈˈbhli se Zoova aˈ -Bobhlai -nɩn ɛnˈ, -kawɛ -ˈbhɛɛ -ˈye nʋn ˈˈdhe ˈflɛ ˈye ˈdhe aʋ bho ˈˈgbuzɔnˈ -nɩn -ɛn?
7. ˈSrɩn Zoova a ˈˈɲɩan ɲʋn ˈdhe ˈˈbhli ˈˈtiiɛ ɛˈ dɩ ˈdhi ɛ, ˈˈduɩ ˈˈjhriɛ
-Bho ɲɔn ˈye ˈsrɩn Zoova a ˈˈɲɩan ɲʋn ˈdhe ˈˈbhli ˈˈtiiɛ ɛˈ dɩ ˈdhi ˈˈjhriɛ ˈˈdu ɛˈ, ɛɛ deeɛ ˈkpɩ -duuˈˈ dhi. c ˈKlaa Zoova a poɛ ɲʋn -an ˈˈduɩ ˈˈjhriɛ ˈˈniman-. Po ˈo VIDEO.
Zro Hébreux 13:4, -ˈmɛn aʋ ˈtmʋn ideedɩ- nɩn anˈ dɩ:
-
-Bhoo -gwlɩˈˈ ˈdhee, ˈsrɩn Zoova toa ˈo ˈdhe ˈˈbhlitiiɛ- ɛˈ dɩ ˈdhi ɛ, dhɛɛdɩ- ɲʋn ˈbhɛɛˈ ɲʋn ˈyɩ ɲwɔn ˈjhe -ɛ? Dhɛɛdɩ- -man ˈdha -kaˈ -a?
ˈBhlʋɩ aˈ -da -duuˈˈ ˈdhii ɛ, ˈbhlʋɩbhleʋn an ˈbɔn ɲʋn -an ˈˈtiia ˈˈbhli -e ɲʋn -an cianˈ ˈye ʋaˈ ˈɲnɩn ˈsɛɛ ˈdhi po. Zoova a ˈbɔn kletiɛn -ˈˈwe ˈye ˈtee nɩan ˈo ʋaˈ ˈbhlʋa ˈdhi ɲwɔn ˈjhe. Zro Tite 3:1, -ˈmɛn aʋ ˈtmʋn ideedɩ- nɩn anˈ dɩ:
-
-Bho aʋ -nɩn ɲɔn ˈˈtii- ˈˈbhli ɛˈ, aʋ mun ˈo ˈbhlʋɩbhleʋn ˈˈjhibhaˈ ˈmɛn?
-BHO ƝƆN ˈNAAN: “Dhɛɛdɩ- ɲʋn ˈye dhɛ -jiɛˈ -po -ɛ? -Bho -a se dhɛ -jiɛˈ -po ˈˈdhe -a -nɩn -da dhueˈ ɛˈ, ka ɛɛ nʋn -ɛn?”
-
Ka -man mun ˈdha -a?
DHƐWƐ- ˈCƖAN-?
-Bho -nɩn ɲɔn se ˈˈbhli ˈˈtii- aeˈˈ -nɩn ɲɔn ˈˈtii ˈˈbhli ɛˈ, ɛ -baanˈ- -ɔ ˈghwlʋ ˈe Zoova bho. -ka -ˈye -nɩn ɛnˈ, -bho -man muɛn ˈmʋnan -e -pɛɛ ɛˈ bhluaˈ ˈjhe-.
Dhɛwɛ- -ˈŋwɔn in -ɛn?
-
Ɲɔn -nɩn ɲɔn sea ˈˈbhli ˈˈtii- ɛ, dhɩwɛ- ɔ ˈbhɛɛ ɔ ˈye nʋn -ɛn?
-
Dhɛɛdɩ- Biiblʋ ˈnaan ɲɔn -ɔn ˈˈɲɩan Zoova aˈ ˈsʋ -nɩn -a ˈye dhɛ -jiɛˈˈ -po -ɛ?
-
-Bho ɲʋn ˈsɔɔn poa dhɛ -jiɛˈˈ ˈye ˈˈɩ -ciɛn- ɛnˈ, Biiblʋ ˈnaan dhɛwɛ- -ˈyeɛ nʋn -ɛn?
ˈBƆN DHƖ -ˈNƖƖN ANˈ I ˈŊWƆAN IN
Dhɛwɛ- dhɛjiɛpoɛ- “ˈdhe Bhlei ɔˈ ˈsʋ ˈmʋn” ˈdha -a?
“Questions des lecteurs” (La Tour de Garde, 1er juillet 2004)
Videe -mɩɩnˈˈ ˈsɔɔn nɩn ˈbhɛɛ ɩn ˈye -aʋ sʋn bho po ˈdhe bha aˈ kplɩn anˈ ˈcɩaan -e ˈˈbhlitiiɛ- ɛˈ dɩ ˈdhi.
Dhɛ -ˈyea nʋn -bho -man sa ˈbɔn -nɩn ɲɔn ˈye ˈˈbhli ˈˈtii- ɛ (11:53)
Dhɛ -ɛɛˈ dɩ ˈdhoudhi dhueˈ ˈnaan dhɩ Zoova ˈˈɲɩɔn -ziia dhɩ ɔ za kwa i ɛ, ɛmɛn- -man mun ˈjhe-.
Dhɛ ˈɩn tbha -pɛɛ ɛˈ -dhe -mɛn -nɩn ʋan muɛn tɔˈdɩ ˈŋwɔɔn- (1:56)
Dhɩwɛ- ɲɔn -ɔn ˈbɔan -ɔ -nɩn ɲɔn ˈyea ˈˈɩ -ciɛn- -aeˈˈ i zela- ˈye tɔˈ ˈˈkpei -naan?
“Honore ‘ce que Dieu a uni’” (La Tour de Garde, décembre 2018)
a Dhebhɔɔjhibhodhɛ- 4 ɛɛ ˈtmʋɛn dhɩ ˈbhɛɛ -ɩn ˈyeɛ nʋn ˈˈdhe ʋʋ ˈyea i zela- ɩanˈ dɩ, -bho ʋaˈ dhueˈ se ˈɲnɩnzanˈ- nʋn -mɔnˈ -dhe ɛˈ.
b ˈDhe ɲʋn -ˈnʋʋn ˈˈbhli ɛ, ˈˈɲnuunbhleʋn- -an za ˈo ɲɔn -nɩn ʋaˈ ˈˈjhu ˈyea ˈˈbhli ˈˈtii-. -Bho ɛ -nɩn -kaˈ ˈdhe aʋ ˈˈbhli ɛˈ, ˈˈɲnuunbhleʋn- kman ʋaˈ ˈˈɲnuun anˈ dɩ ɛ, ɛ se ˈghwɛi -e dhbho ɲɔn ʋaˈ ˈˈjhu ˈyea ˈˈbhli ˈˈti ˈbhlea -mɩn ʋʋ ˈye jha -ŋmʋn -nɩn, ˈklaa ɔɔˈ Zoova aˈ dɩkman- -mɛn ʋʋ ˈye jha -ŋmʋn.
c -Bho -nɩn ɲɔn -nɩn -da dhueˈ -weɛˈ aʋ se dhɛ -jiɛˈˈ -po ɛˈ, -bho aʋ ˈye ˈˈɩ ciɛn- -aeˈˈ aʋ ˈye dhɛ -jiɛˈˈ -po ɛˈ, ɛ -nɩɛn- ˈdhe -manˈ ˈsʋ ˈkwa.
