Da ˈbhlʋa ˈˈkpe ɛ, -ka ɲʋn an nʋan nmɔn ˈjhe sʋn se dhɛ dhueˈ -nɩn. -Bho ɲʋn -ˈnʋʋn ˈye nmɔn ˈnan anˈ, ɛ nɩn -bho ʋʋ -nɩn ʋaˈ dhaiˈˈ -ˈˈwe ˈkpa -da dhueˈ ɛˈ -ˈNʋʋn ˈnaan ʋʋ ˈse nmɔn ˈnan in -flɛ. Ɲʋn -ˈnʋʋn -nɩn ˈo -ke -ʋa- zii ɔɔˈ ˈnaan -jieˈˈ. Dhɛwɛ- Biiblʋ ˈtmʋn ˈdhe nmɔn ˈnan- anˈ dɩ ˈdhi -ɛ?

1. Nmɔn ˈnan- -nɩɛn- dhɛsaʋn-?

Biiblʋ ˈse ka nʋn nmɔn ˈnan- -nɩɛn- dhɛsaʋn-. -Bho Biiblʋ a sa -baanˈ- Ɲɔnsoa nʋan -aʋ ˈˈdhrui aˈ dɩ ˈtmʋn ɛnˈ, ʋan ˈtmʋɛn nmɔn ɔnˈ dɩ -ke. Ʋn ˈnaan “nmɔn ɔn poɛ -glɔɲiɔn ɔnˈ -pɛɛ ˈmʋnan in.” (Psaume 104:14, 15) Ɲʋn kpʋan ˈo Ɲɔnsoa ˈˈbun in -ʋaˈ dɩ Biiblʋ a ˈtmʋan, ʋaˈ -ˈnʋʋn ˈnan nmɔn ˈmɛn -ke.​—1 Timothée 5:23.

2. ˈSrɩn -wɛ Biiblʋ a ˈˈɲɩn ɲʋn -an ˈnan nmɔn -ɔn?

ˈDhe Zoova ˈˈjhriɛ ˈdhe ɛ, ɲʋn -an ziia nmɔn ˈnan- -jieˈˈ -e ɲʋn kman nmɔn ˈnan dɩ a nʋɛn dhɛsaʋn-. (Galates 5:21) Ɔɔˈ Ghwlu ˈnaan: “-Manˈ nɩn ˈe ɲʋn -an ziia nmɔn ˈnan- -jieˈˈ ˈɲnɩn bho -dhe.” (Proverbes 23:20) -ˈMɛn -bho -a -nɩn dhueˈ -mɔnˈ -dhe ɛˈ, -aa ˈnan -e nmɔn -dhe ˈsʋ ɔ ˈye -aʋ nʋn, ɔ ˈye -aaˈ tɔˈinaansʋn -e -ghwlusʋn -e dhɩnʋnsʋn ˈˈjhrii ˈˈbhee- -aeˈˈ ɔ ˈye -aʋ ˈghwɛ po. -Bho -a se nmɔn ɲwɛnˈˈ ˈbhɛɛ- ɛˈ, ɛ nmɔn ˈo dhi -a ˈye ɔɔˈ ˈnan dɩ ˈbhɔ.

3. Dhɩ ɲʋn -ˈnʋʋn za ˈo ˈdhe nmɔn ˈnan- anˈ dɩ ˈdhi ɛ, -kawɛ -a ˈyɩ ˈjhe -ɛ?

-Bho ɲɔn ɔn sa ˈbɔn ɔ ˈye nmɔn ˈnan -aeˈˈ ɔ ˈse nmɔn ˈnan- in ɛnˈ, ɛ -nɩɛn- ˈdhe ɔ ˈkwa. -ˈMɛn -bho ɲɔn ˈnaan ɔɔ muɛn -ˈgwlɩi ˈsrooˈ- ˈbho nmɔn ˈnan anˈ, -a ˈseɔ dɩ ˈˈbhli -kpa i. ˈˈDhe -bho ɲɔn ˈse ˈbɔn ɔ ˈye nmɔn ˈnan anˈ, -a ˈseɔ ˈˈmlan ˈnɛn in nmɔn ˈnan dɩ. (Romains 14:10) -Bho nmɔn ˈnan- ˈbho ɲʋn -ˈnʋʋn ˈˈjhibhaˈ ˈbhɛɛˈ ɛ ˈyʋbʋ dhɛsaʋn- ˈˈdhrui nʋn ɛnˈ, -ˈmɛn -a ˈseɔ ˈnan in. (Zro Romains 14:21.) Dhɛ -aa ˈbɔan in ɛn ‘ɛ se -aaˈ ˈˈjɛ ɛˈ ˈbɔɔndhɩ -nɩn, ˈklaa ɲʋn -ˈnʋʋn anˈ -nɩn.’—Zro 1 Corinthiens 10:23, 24.

 KPA DHƐ I ˈŊWƆƐN ƝAN

4. -ˈYe nmɔn ˈnan -aeˈˈ ˈseɔ ˈnan- in?

Ka Zezi ɔ nʋn nmɔn ɔnˈ ˈjhe sʋn -dhe -ɛ? -Bho -ˈyeɛ jhibho- ɛˈ, -a ˈtmʋn-jhriiˈ- kɔan ɲan ɔ nʋan anˈ dɩ. Zro Jean 2:1-11, -ˈmɛn aʋ ˈtmʋn ideedɩ- nɩn anˈ dɩ:

• Ka Zezi ɔ nʋan nmɔn -e ɲʋn -an ˈnan nmɔn ˈjhe sʋn ɛn, dhɛwɛ- -jhriiˈ- ɔ nʋan an tɔɔn -abʋ ˈdhe ɛɛˈ dɩ ˈdhi -ɛ?

• Dhɛ Zezi ˈsea ka nʋn nmɔn ˈnan- -nɩɛn- dhɛsaʋn- ɛn, ka kletiɛn ˈye ɲɔn -ɔn ˈnan nmɔn ˈjhe -ɛ?

-Bho kletiɛn ˈbhɛɛ ɔ ˈye nmɔn ˈnan anˈ, ɛ -kɔn dɩ ɔ ˈye -ˈgwlɩi ˈsroo- ˈbho ɛɛˈ nʋn anˈ. Zro Proverbes 22:3, -ˈmɛn tbha ˈo Biiblʋ aˈ ˈsrɩn ˈˈkpe aʋ ˈye dɩ nɩn anˈ dɩ ˈtmʋn:

• -ˈYe kamiɔn tbha -aeˈˈ -ˈye dhbho nʋn ˈbho maanziin ˈˈkpe.

• A ˈbhleɛ ˈˈkwli.

• -Manˈ dɔsrɔi ˈnaan -manˈ ˈnan -e nmɔn -dhe.

• Se -manˈ ˈˈjɛ ˈˈŋwɛn ˈbhɛɛ- ˈbho nmɔn ˈnaan.

• ˈBhlʋɩbhleʋn ˈnaan ɲɔn ɔnˈ ˈnan -e nmɔn -dhe.

• Ɲɔn -nɩn -man nan ˈse ˈbɔn ɔ ˈye nmɔn ˈnan, ˈkledɩ- ɔɔ ˈjhea nmɔn ɔnˈ dɩ.

-Man ˈbɔn -ˈye ɲʋn nmɔn ˈˈɲɩn ˈbho fɛtɩ -aeˈˈ ˈbho ˈˈbhli ˈˈtii- zɔn ˈˈkpe? -Bho -ˈye ˈe ideedɩ nɩn -za aˈ, po ˈo VIDEO.

Zro Romains 13:13 -e 1 Corinthiens 10:31, 32. -Bho gwɛ Biiblʋ aˈ ˈˈjhri nɩn ˈdhii -zroaˈ aˈ, -ˈmɛn aʋ ˈtmʋn ideedɩ- nɩn anˈ dɩ:

• Ka Biiblʋ aˈ ˈsrɩn nɩn anˈ ˈˈjhriɛ ˈˈduɛ ˈbhɛɛ ɛ ye ʋn sʋn bho po ˈˈdhe dhɛ -ˈyea ˈo -za -ˈyea nʋn ˈye Zoova ˈtʋn nʋn -ɛn?

 5. ˈSroo- nmɔn ˈnan- -ˈgwlɩi

-Bho -man sa ˈbɔn -ˈye nmɔn ˈnan anˈ, -manˈ ˈˈmae- dɩ nɩn bho -dhe: -Bho Zoova ˈse ka nʋn nmɔn ˈnan- -nɩɛn- dhɛsaʋn- -mɔnˈ -dhe ɛˈ, ɔɔˈ -jieˈˈ -ziiɛ- -nɩɛn- dhɛsaʋn-. Dhɛɛdɩ- -ɛ? Zro Osée 4:11, 18, -ˈmɛn aʋ ˈtmʋn ideedɩ- nɩn anˈ dɩ:

• -Bho ɲɔn -zii nmɔn ˈnan- -jieˈˈ ɛˈ, dhɛwɛ- ɛ ˈbhɛɛ ɛ ˈye ˈo po -ɛ?

-Kawɛ -a ˈbhɛɛ -a ˈye nʋn ˈˈdhe -a ˈse nmɔn ˈnan- -jieˈˈ -zi i -ɛ? Nmɔn -a ˈbhɛɛa -a ˈyea ˈnan ˈˈdhe -a ˈsea dhɛ -jieˈˈ -zii ɛ, ɔmɔn- -a ˈye ˈnan. Zro Proverbes 11:2, -ˈmɛn aʋ ˈtmʋn ideedɩ- nɩn anˈ dɩ:

• -A ˈye nmɔn -a ˈbhɛɛa -a ˈyea ˈnan anˈ -disʋn jhibho-. Dhɛɛdɩ- -ɛ?

6. Bho ɲɔn ɔn sa nmɔn ˈnan- -jieˈˈ zii ɛˈ, dhɛwɛ- ˈyeɔ sʋn bho po ˈˈdhe ɔ ˈye ɛɛˈ dhɛ tu bho ˈbhɔ -ɔ?

 DHƐWƐ- ˈCƖAN-?

Zoova ˈˈɲɩn -aʋ nmɔn ˈmɛn -wɛeˈ ɔ ˈye -aʋ ˈmʋnan in po. ˈKlaa -bho -aa sɔ -jieˈˈ zii ɛˈ, ɛ nɩn dhɛsaʋn- ˈdhe ɔ ˈˈjhriɛ ˈdhe.

Dhɛwɛ -ˈŋwɔn in -ɛn?

• Dhɛ Biiblʋ a ˈtmʋn ˈdhe nmɔn ˈnan- anˈ dɩ ˈdhi -ɛ?

• ˈKledɩ- -wɛ ɲɔn ˈbhɛɛ ɔ ˈye ˈjhe -bho ɔɔ sa nmɔn ˈnan- -jieˈˈ -zii -ɛ?

• Dhɛ ɲʋn -ˈnʋʋn an za ˈo ˈdhe nmɔn ˈnan- anˈ dɩ ˈdhi ɛ, dhɛɛdɩ- -a ˈyeɛ dhɛ ˈdha -a?