Zoova a ˈbɔn -a ˈye ˈkmʋn anˈ trɔnˈ ˈdhi ˈˈdhe -a ˈye fɛtɩ po -zɔn -dhee -ˈnɔɔn. -ˈMɛn Fɛtɩ aˈ klɛɛ ɛɛ nʋn Ɲɔnsoa ˈtʋn? Ka -a ˈbhɛɛ -a ˈyeɛ -to -ka -a kman Zoova aˈ dɩ ˈdhe ɩanˈ dɩ ˈdhi -ɛ?

1. Dhɛɛdɩ- fɛtɩ aˈ -da -duuˈˈ aˈ nʋn Zoova ˈtʋn -ɛn?

Dhɛ -a ˈyea jhibho- -mɛn -nɩn ɲʋn -ˈnʋʋn anˈ ˈˈbhli dhɩ -e dhɩ Pliegbi -saɩn an nʋan -mɩn fɛtɩ -ˈnɩn tbha ˈo ˈˈkpe i. Gupoɛ- -nɩn ˈdhe ɩn ˈzɔn -aeˈˈ sɩ -dɩ -ˈnɩɩn ɩn tbha ˈo ˈˈkpei ɩmɩn -nɩn, -bho ɲɔn ˈmɛn ɛnˈ dhɛ -ɛɛ ˈghwlʋ ˈdhe ɔ ˈmʋn -ɛɛ sie ˈkmʋn. Fɛtɩ -ˈnɩɩn tbha ˈo ˈˈbhli dhɩ -saɩn -ˈnɩɩn ˈˈkpe i. (Isaïe 65:11) Ɛɛˈ dɩ Zoova ˈtmʋʋn ɔɔˈ dhbhonʋʋn- ɔ ˈnaan: “Aʋ ˈghwlʋ ˈdhe ʋbʋ ˈɲnɩn bho... ˈˈdhe aʋ -tɛɛn ʋbʋ bho, dhɛ ooˈˈ dhɛ sea i -gwɛ ɛ, aʋaˈ ˈtʋɛn in -dhe.”​—2 Corinthiens 6:17 a

2. Fɛtɩ ɲʋn an poa -ɩan- ˈbhɛɛa -glɔɲiɔn ˈˈɩn ɛn, -kawɛ Zoova a ˈjhɩ -ɛ?

Zoova ˈse ˈbɔn “-a ˈye -glɔɲiɔn -gwlɩˈˈ de.” (Zro Jérémie 17:5.) Fɛtɩ -ˈnɩɩn ɲʋn an po -wɛeˈ ʋʋ ˈye ɲʋnbhleʋn- -e ˈsʋlɩˈˈ ˈˈɩ ˈbhɛɛ-. Ɲʋn -ˈnʋʋn an ˈjhaa drapo -aeˈˈ ʋa poɛ ɛndepandansɩ ɛˈ fɛtɩ. (1 Jean 5:21) Fɛtɩ -ˈnɩɩn -nɩn ˈo -ɩn -nɩn poitikɩ -glibhɩ- aˈ fɛtɩ. -Glibha- -aeˈˈ ɲɔn -ɔɔˈ nʋan Zoova aˈ -glʋˈdɩ ɛ, -bho ɲʋn an sa ɔɔˈ fɛtɩ po ɛˈ, ka ɛ -nɩn ˈbho Zoova -gwlɩˈˈ -ɛ?

3. Dhɩwɛ- ɲʋn an nʋn ˈbho fɛtɩ -ˈnɩn ˈmʋn -ɩn se -kajɔɔnka -nɩn -ɛn?

Biiblʋ ˈnaan “nmɔn ˈnan- anˈ -jieˈˈ -ziiɛ, fɛtɩ aˈ -jieˈˈ -ziiɛ- -e nmɔn ˈˈdhru -pooɛ-” -nɩɛn- dhɛsaʋn-. (1 Pierre 4:3) ˈDhe fɛtɩ -ˈnɩn ˈmʋn ɛn, ɲʋn an -ziiɛ nmɔn ˈnan- -jieˈˈ ˈˈdhe ʋa nʋɛn ˈɲnɩnzanˈ- -ke. -Bho -aa sa ˈbɔn -a ˈye Zoova aˈ -jhbhɛɛi -nɩn ɛnˈ, -ˈmɛn dhɩ -ɩan- kpʋʋan ɲʋn -vlɛnˈˈ ɛn, -a ˈyɩ bho -tɛɛn.

 KPA DHƐ I ˈŊWƆƐN ƝAN

 5. Po ɲʋn -ˈnʋʋn sʋn bho ʋʋ ˈye dhɩ dea -gwlɩˈˈ ŋwɔn ˈjhe

6. Zoova a ˈbɔn -a ˈye ˈmʋnan in -nɩn

Zoova a ˈbɔn -a -nɩn -aaˈ ˈˈgbuzɔncɛ -e -aaˈ dhaiˈˈ -ˈˈwe ˈye nɔnˈˈ ˈdhɔɛe nʋn -da dhueˈ. Zro Ecclésiaste 8:15, -ˈmɛn aʋ ˈtmʋn ideedɩ- nɩn anˈ dɩ:

• -Kawɛ Biiblʋ aˈ ˈˈjhriɛ nɛn ɛn nʋn ɛnˈ -to sʋn -ka Zoova a ˈbɔan -a ˈyea ˈmʋnan in -nɩn -ɛn?

Zoova a ˈbɔn ɔɔˈ dhbhonʋʋn ˈye ˈplʋ ˈˈjhrii -za ˈˈdhe ʋʋ ˈye nɔnˈˈ ˈdhɔɛe nʋn -da dhueˈ. Po ˈo VIDEO -wɛeˈ -ka ɛɛˈ dhɛ tu ɛɛ nʋan -nʋʋɛn- sʋn ˈdhe -aaˈ ˈˈdhruigbooɛ klaeˈˈ ˈmʋn ɛn, -ˈyeɛ ˈjhe.

Zro Galates 6:10, -ˈmɛn aʋ ˈtmʋn ideedɩ- nɩn anˈ dɩ:

• -A ˈye fɛtɩ -fuo- ˈˈkpɔ ˈˈkpɔ -wɛeˈ -a ˈye ɲʋn -ˈnʋʋn “dhɛjɛɛn ˈˈdhrui nʋn”?

• Ɲʋn dhɛjɛɛn ˈˈdhrui -nʋnsʋn -wɛ -ɛɛ po ɲʋn ˈmʋnan in -ɛn, -jɛn fɛtɩ a ˈˈtuan ɲɔn ɔɔ nʋan -aeˈˈ -jɛn ɔɔ za ˈo ɔɔˈ ˈˈjɛ -gwlɩˈˈ ɔɔ nʋan?

• Zoova aˈ -Bobhlaʋn anˈ -da -duuˈˈ a za ˈo nɔnˈˈ ˈdhɔɛe ʋʋ -nɩn ʋaˈ ˈˈɲnuun an yea ˈplʋ ˈˈjhrii za ˈˈdhe ʋa nʋn ʋbʋ -baanˈ ˈˈdhrui -da ʋʋ seɛ -gwlɩˈˈ -dee ɛ. -Bho -ˈbhle ˈˈɲnuun ɛnˈ, dhɩwɛ- -ˈbhɛɛ -ˈye nʋn -ɩn ˈye ʋaˈ ˈmʋnan ˈbhle -ɛ?

 DHƐWƐ- ˈCƖAN-?

Zoova a ˈbɔn -a -nɩn -aaˈ ˈˈgbuzɔncɛ -e -aaˈ dhaiˈˈ -ˈˈwe ˈye nɔnˈˈ ˈdhɔɛe nʋn -da dhueˈ. ˈKlaa ɔ ˈse ˈbɔn -a ˈye fɛtɩ -ɩanˈ nʋɔn ˈtʋn po.

Dhɛwɛ -ˈŋwɔn in -ɛn?

• Fɛtɩ -ɩanˈ nʋan Zoova ˈtʋn ɛn, -bho -a ˈyɩ jhibho- ɛˈ, dɩwɛ- -a ˈye -aaˈ ˈˈjɛ i dee -ɛ?

• Ka -aa nʋan fɛtɩ ˈjhe sʋn ɛn, -kawɛ -a ˈbhɛɛˈ -a ˈye -aaˈ ˈcɛ -e dhaiˈˈ -ˈˈwe sʋn bho po ˈˈdhe ʋʋ ˈyeɛ i ˈŋwɔn -ɔn?

• Ka -aa nʋn ɛnˈ jhibho- sʋn -ka Zoova a ˈbɔan -a ˈyea ˈmʋnan in -nɩn ˈˈdhe -a ˈyea ˈplʋ ˈˈjhrii -za -a?