ˈCƖAANDHƐ- 34
Dhɛwɛ- -a ˈbhɛɛˈ -a ˈye nʋn ˈˈdhe -a ˈyeɛ -to -ka -a kman Zoova aˈ dɩ -ɛ?
-Manˈ Ɲɔnsoa aˈ dɩkman- ˈkpa ˈˈkpe ɛ ye -da -deea Biiblʋ ˈcɩan- -zii? -Man ˈbɔn -ˈye -jhbhɛɛ nɩan ˈo -mɔn -e Zoova ˈɲnɩn ɛnˈ i -kuuɛ ɲan kpa? -Bho ɛ nɩɛn mɛn ɛnˈ, dhɛ -ˈyea jhibho- -mɛn -nɩn, -bho Zoova a seɛ ˈjhe -ka ɔɔˈ dɩkman an ˈkpa ˈˈkpe ˈdhee- ˈmʋn ɛn, ɔɔ muɛn -manˈ dɩkman- ˈˈdhe ɔ ˈye -manˈ dɩ ˈˈdu -ke. Ka -ˈbhɛɛ -ˈyeɛ -to -ka kman ɔɔˈ dɩ -ɛ?
1. -Ka -a kman Zoova aˈ dɩ ɛ, ka -a ˈye ɛɛˈ -to sʋn nʋn -ɛn?
-Bho -aa sa Zoova aˈ ˈtee ŋwɔn ˈjhe ɛˈ, -aa toɛˈ -ka -a kman ɔɔˈ dɩ ɛ. (Zro 1 Jean 5:3.) Ɔɔˈ kpʋn ɲʋn ˈˈglan ˈˈglan -wɛeˈ ɲʋn ˈye ɔɔˈ ˈtee ŋwɔn ˈjhe. ˈBho ɛɛˈ gɔˈˈ ɔ, ɔ ˈˈɲɩɛn -aʋ ˈˈkpeiflɔɛn- -wɛeˈ -bho -a ˈye ɔɔˈ ˈtee ŋwɔn ˈjhe -aeˈˈ -a ˈsɩ ŋwɔn ˈjhe i ɛˈ, ɛ ˈye ˈo -aaˈ ˈˈjɛ -gwlɩˈˈ ˈghwlʋ. Dhɛɛdɩ- -ɛ? Zoova a ˈbɔn ɔɔˈ “ˈtee aˈ ŋwɔnjheɛ- ˈye ˈe -aaˈ -pɛɛ bho ˈghwlʋ.” (Romains 6:17) Dhɛ -ˈmɛn ˈdhaa ɛmɛn- -nɩn, ɔɔˈ dɩkman ˈye -aʋ- ˈˈtun -wɛeˈ -a ˈye ɔɔˈ ˈtee ŋwɔn ˈjhe, dɩ ˈse -aʋ kpʋn in ɛɛˈ nʋn dɩ. ˈSɛɛ- nɛn ɛnˈ ˈfɛ 3 -e 4 ɛn muɛn ʋn sʋn bho -po ˈˈdhe -ka kman Zoova aˈ dɩ ɛ, -ˈyeɛ -to ˈbho dhɩ -ɩan- nʋɔn ˈtʋn anˈ nʋanˈ -e dhɩ -ɩanˈ nʋɔn ˈtʋn anˈ bho -tɛɛn ˈnan.
2. Dhɛɛdɩ- Zoova ˈˈbun in -kpʋɛn ˈbhɛɛ ɛ ˈye ˈkle -nɩn -ɛn?
“Ɲɔn ˈsrɛaˈˈ aˈ ˈkledɩ -diɛˈˈ.” (Psaume 34:19) -Aa vɔɛn dhɛsaʋn- bho dhɛ -a sea i -gwɛ ɛˈ dɩ. ˈBho -ˈmɛn ˈdhe ɛ, sedhɛbhleɛ -e dhɩ sea ˈˈɩ ˈsrɛ ɲʋn an nʋan -aʋ ˈˈdhrui -e ˈkledɩ- -ˈnɩɩn -aa ˈjhe ˈˈjhibhaˈ. -Bho -a -nɩn ˈe ˈkledɩ ˈdhi ɛˈ, dhɩ Zoova a deea -abʋ i ɛ, ɩanˈ nʋanˈ ˈbhɛɛˈ ɛ ˈye ˈˈɩkman-, dhɛbhleɛ Zoova aˈ ghwlu aˈ ŋwɔn -bhlaa ˈbhɛɛˈ ɛ se ˈˈɩkman- in. ˈKlaa dhɛ Zoova a deea mʋn in ɛn, -bho -man sɛ nʋn ɛnˈ, -man toɛˈ -ka kman ɔɔˈ dɩ ɛ -ziia dhɛ ooˈˈ dhɛ. ˈˈDhe -man toɛˈ -ke -ka kpʋan ˈbho ɔ ˈˈbun in ɛn. -Bho -man sa kaˈ nʋn ɛnˈ, ɔɔ muɛn ˈbhoo- ˈˈbun in -kpʋn ke. Ɔ ˈse ʋn ˈbhɔi -flɛ.—Zro Psaume 4:3.
KPA DHƐ I ˈŊWƆƐN ƝAN
Dhɛɛdɩ- -manˈ dhɛŋwɔnjheɛ- kɔandɩ ˈdhe Zoova ˈˈjhriɛ ˈdhe -e dhɛ -ɛ ˈyea ʋn sʋn bho po ˈˈdhe -ˈyea ɛɛˈ nʋanˈ ɲan kpa, ɩmɩn- -aa mun ˈjhe-.
3. Dɩ -ɩan- ˈdha ˈe -a bho -ke ɛ
-Ka ɛ nʋan ˈtmʋɛn- sʋn ˈdhe Zɔbʋ ɔˈ ˈsɛɛ ˈdhi ɛ, Satan ˈse Zɔbʋ ɔˈ ˈsʋ dɩ ˈˈbun tbha, ɛ nɩn ɲʋn anˈ klɛɛ -ʋa- ˈbɔan -ʋʋ ˈyea ˈo Zoova ˈˈbun in kpʋn ɛn, ʋbʋ- ɔ tbha dɩ ˈˈbun. Zro Job 1:1, 6–2:10, -ˈmɛn aʋ ˈtmʋn ideedɩ- nɩn anˈ dɩ:
-
ˈBho Satan -gwlɩˈˈ ɛ, dhɛɛdɩ- Zɔbʋ ɔ ˈjhe Zoova ŋwɔn -dhe -ɛ?—-Ŋmʋn ˈdhe Job 1:9-11 ˈdhi.
-
Dhɛwɛ- Satan ˈtmʋn -ɛ ˈdha ˈe ɲʋn anˈ klɛɛ bho, -ɛ nɩan -mɔn -ke -ɛ?—-Ŋmʋn ˈdhe Job 2:4 ˈdhi.
Zro Job 27:5b, -ˈmɛn aʋ ˈtmʋn ideedɩ- nɩn anˈ dɩ:
-
-Ka Zoova aˈ dɩkman an ˈghwlʋa ˈe Zɔbʋ ɔˈ -pɛɛ bho ɛ, ka ɔ nʋn ɛnˈ -to sʋn -ɛn?
Zɔbʋ kpʋɛn ˈo Zoova ˈˈbun in, ˈkamɔn- ɔ nʋn ɛnˈ -to sʋn -ka ɔ kman Zoova aˈ dɩ ɛ.
-Bho -a kpʋn ˈo Zoova ˈˈbun in ɛnˈ, -aa toɛˈ -ka -a kman ɔɔˈ dɩ ɛ.
4. Po Zoova aˈ -pɛɛ ˈmʋnan in
Zro Proverbes 27:11, -ˈmɛn aʋ ˈtmʋn ideedɩ- nɩn anˈ dɩ:
-
-Bho -nɩn tɔˈ ˈdhi ˈˈdhe -man sa Zoova ŋwɔn ˈjhe ɛˈ, ka ɛ -nɩn ˈbho ɔ -gwlɩˈˈ -ɛ? Dhɛɛdɩ- -ɛ?
5. -ˈBhɛɛˈ -ˈye ˈo Zoova ˈˈbun in kpʋn
-A -kman Zoova aˈ dɩ, ɛmɛn- dɩ -aa ˈtmʋn ɔnˈ dɩ ˈdhe ɲʋn -ˈnʋʋn bho. -Bho ɲʋn ˈse ˈbɔn -ˈye Zoova ˈˈɲɩn ɛnˈ, -ˈbhle -manˈ dhɛgwlɩdeɛ- ɛˈ -gbaˈ. Po ˈo VIDEO, -ˈmɛn aʋ ˈtmʋn ideedɩ- nɩan da zɔnˈ da aˈ dɩ.
-
Zoova aˈ dɩ ˈtmʋɛn- ˈdhe ɲʋn bho -nɩɛn- ˈkle -zɔn -ˈnɔɔn ˈdhee- ˈˈjhriɛ ˈdhe?
-
ˈDhe video nɔn ˈdhi ɛ, -ɛ po Glezɔnɩn sʋn bho ˈˈdhe ɔ ˈbhɔ -faan dɩ -ɛ?
Dhɩ -ɩanˈ dɩ Zoova kman -bho -a -kman ɩanˈ dɩ ˈˈdhe ˈdhɩ ɔ ˈɲɩan ˈmʋn -bho -a ˈɲɩn ˈmʋn ɛnˈ, ˈbho ɔ ˈˈbun in kpʋɛn ˈse ˈkle -nɩn in ˈdhe -a bho. Zro Psaume 97:10, -ˈmɛn aʋ ˈtmʋn ideedɩ- nɩn anˈ dɩ:
-
Dhɩwɛ- jhibho- -ɩanˈ dɩ Zoova -kman? -Jɩnwɛ- ɔ ˈɲɛn ˈmʋn -ɛn?
-
-Kawɛ -ˈye nʋn ˈˈdhe -ˈye dhɛjɛɛn ɛnˈ dɩ -kman -e dhɛsaʋn ɛnˈ ˈmʋn ˈɲɩɛn- jhibho- -ɛ?
6. Zoova aˈ ŋwɔnjheɛ ɛɛ nʋɛn -aʋ dhɛjɛɛn ˈˈdhrui
Zoova aˈ ŋwɔnjheɛ- ˈdha dhɛ ɛ ye dhɛ ooˈˈ dhɛ -zii. Zro Isaïe 48:17, 18, -ˈmɛn aʋ ˈtmʋn ideedɩ- nɩn anˈ dɩ:
-
ˈBhoo- -gwlɩˈˈ ˈdhee, -ka Zoova jhibha dhɛ nɩan -aaˈ dhɛjɛɛn, -a ˈbhɛɛˈ -a ˈyeɛ -gwlɩˈˈ de? Dhɛɛdɩ- -ɛ?
-
-Deea Biiblʋ ˈcɩaan ˈˈdhe jhibha tɔˈdɩ ˈdhe Ɲɔnsoa Zoova aˈ dɩ ˈdhi ɛ, ˈjɛɛn- -wɛ -ˈjhee- ˈbho -ɛ?
ƝƲN -ˈNƲƲN ˈNAAN: “Dhɩ ˈman nʋan se dɩ -kɔn ˈdhe Ɲɔnsoa ˈˈjhriɛ ˈdhe.”
-
Biiblʋ aˈ ˈˈjhriɛ -wɛ -ˈbhɛɛ -ˈye i -jhii -wɛeˈ -ˈyeɛ -to -ka dhɩ -aa nʋan ˈbhɛɛa ɩn ˈyea Zoova ˈmʋnan in po -aeˈˈ ɩn ˈyeɔ ˈˈzruu- -ɛ?
DHƐWƐ- ˈCƖAN-?
-Bho -man sa Zoova aˈ ghwlu ŋwɔn ˈjhe ˈˈdhe -man sa ˈbho ɔ ˈˈbun in kpʋn -ka dɩ ˈjhe ɩn -nɩn mɔn -dhe ɛˈ, -man toɛˈ -ka kman ɔɔˈ dɩ ɛ.
Dhɛwɛ- -ˈŋwɔn in -ɛn?
-
Dhɛwɛ- ˈcɩan ˈdhe Zɔbʋ ɔˈ bo ˈdhi -ɛ?
-
Ka -ˈye ɛɛˈ -to sʋn nʋn -ka kman Zoova aˈ dɩ -ɛ?
-
Dhɛwɛ- -ˈye ʋn sʋn bho po ˈˈdhe -ˈye ˈo Zoova ˈˈbun in kpʋn -ɛn?
ˈBƆN DHƖ -ˈNƖƖN ANˈ I ˈŊWƆAN IN
-Ŋmʋn -ka -ˈbhɛɛa -ˈyea ˈo Zoova -e ɲɔnsoagbu ˈˈbun in kpʋn ɛn.
“Ɲɔn kpʋan ˈbhoo- ˈˈbun in ɛn, -man muɛn ˈbho ɔ ˈˈbun in -kpʋn” (16:49)
Dɩ Satan bhla ˈo -glɔɲiɔn ˈˈkpe aˈ dɩ -aa mun ˈtmʋn-.
“L’intégrité de Job” (La Bible: quel est son message?, partie 6)
Ka ɲʋnjhae- ˈbhɛɛˈ ʋʋ ˈyeɛ -to -ka ʋʋ kman Zoova aˈ dɩ -ɛ?
Dhɛwɛ- ɲɔnjhao- kpʋan ˈo Zoova ˈˈbun in ˈye nʋn -bho ɲʋnjhae- -ˈnʋʋn an sɔ ˈˈtun ˈdhe dhɛsaʋn- ˈdhi -ɛ?
