ˈCƖAANDHƐ- 37
Dhɛwɛ- Biiblʋ a ˈtmʋn ˈdhe dhbho -e ˈghwɛi aˈ dɩ ˈdhi -ɛ?
Aʋ ˈˈdu zɔnˈ ˈmɛn kpɔ dhueˈ dhbho -e ˈghwɛi aˈ dɩ? -Bho -aa sa ˈbɔn -a ˈye Zoova ˈˈɲɩn ˈˈdhe -a ˈye -aa ˈˈjɛ ɛˈ dɩ ˈˈdu -ke ɛˈ, -zɔn -dhee -ˈnɔɔn, ɛ -nɩɛn- ˈkledɩ-. Biiblʋ a ˈˈɲɩɛn -aʋ ˈsrɩn -ɩn ˈbhɛɛˈ -ɩn ˈye -aʋ sʋn bho po.
1. Dhɛwɛ- Biiblʋ a ˈtmʋn ˈdhe dhbho ɔˈ dɩ ˈdhi -ɛ?
Ɲɔnsoa a ˈbɔn dhbhonʋɛn- ˈye -aaˈ ˈmʋnan ˈbhle. Biiblʋ ˈnaan “dhɛ -ɛ ˈyea dhɛ ˈdha ˈdhe -glɔɲiɔn ˈˈjhri ˈdhe [...] -ɛ ˈyea trɔnˈ ɔɔ ˈjhea ˈdhe ɔɔˈ dhbho ˈdhi -zii ɛ, ɛ se -nɩn.” (Ecclésiaste 2:24) Zoova -nɩɛn- dhbhonʋin- klaaˈˈ. -Bho -aa sa ˈe dhbho ˈˈjhri kpʋn -ka ɔɔ nʋan an, -aa muɛn ˈdhe ɔˈ ˈˈjhri ˈdhei -nmɔn ˈˈdhe -a ˈye ˈo ˈmʋnan ˈjhee-.
Dhbho -kɔn dɩ. ˈKlaa ɛ se -ˈmɛn ɛnˈ dɩ -a ˈyeɔ i ˈˈtai- ɔ ˈye ˈo Zoova aˈ ˈˈɲɩn anˈ ˈgɔ ɔˈˈ ˈˈsii-. (Jean 6:27) Ɔ cɛn ghwlu ɔ ˈnaan -bho -a -kɔɔn ɔɔˈ ˈˈɲɩanˈ ɲan ˈdhe -aaˈ ˈkmʋn ˈdhi ɛˈ, ɔɔ muɛn -aʋ dhɩ kɔandɩ ˈdhe -aa ˈkmʋn ˈdhi ˈˈɲɩn-.
2. Ka -a ˈye ˈghwɛi ˈjhe sʋn nʋn -ɛn?
Biiblʋ ˈnaan “ˈghwɛi a fuɛ ɲʋn ˈdhe i” ˈklaa ɩanˈ ˈsʋ se ˈbhɛɛ- ɩn ˈye ɲʋn ˈmʋnan in po. (Ecclésiaste 7:12) Ɛɛˈ dɩ Biiblʋ a po -aʋ ˈkpɩ -a ˈse ˈghwɛi aˈ dɩ -kman in. Ʋn ˈnaan “dhɩ nɩan -aʋ ˈkwa ˈye ˈdhe -a ˈˈjhri ˈdhe i ˈbhɛɛ-.” (Zro Hébreux 13:5.) -Bho -aa sa ˈsrɩn -ˈnɩn ˈˈjhriɛ ˈˈdu ɛˈ, ˈkledɩ- ɲʋn -an ˈbɔan dhɩ -duuˈˈ i a poa ʋaˈ ˈˈjɛ ˈdhe ˈdhi ɛ, -a ˈse ˈdhe ɩn ˈdhi ˈkpa i. ˈˈDhe -a ˈse -aaˈ ˈˈjɛ kpa ˈˈdhru -po i ˈˈjhai. (Proverbes 22:7) -A ˈse ˈdhe lotori -poɛ- -e ˈˈdoo- -ˈjhe ˈghwɛi -duuˈˈ aˈ ˈˈklɛ ˈdhi ˈkpa i.
3. -Kawɛ -a ˈbhɛɛˈ -a ˈye -aaˈ ˈghwɛi dhbho -nʋʋn -kajɔɔnka -a?
Zoova -nɩɛn- Ɲɔnsoa -ɔ -nmɔn -glʋˈ, -bho “-a -nmɔn -glʋˈ ˈˈdhe -aa sa ˈˈdoo -aa sa dhɛ kwai za aˈ,” -aa srɔɔnˈ. (1 Timothée 6:18) -A ˈbhɛɛˈ -a ˈye -aaˈ ˈghwɛi dhbho -nʋʋn -kajɔɔnka -bho -aa sa -baanˈ nʋn ˈbho ˈghwɛi aˈ ˈˈkɛsuˈˈ ˈdhi poaˈ ˈdhe ɲɔnsoagbu- ˈdhi ɛmɛn -e ˈbho ɲʋn anˈ sʋn bho -poaˈ, ˈdhe -aaˈ ˈdhoudhi -ˈˈwe nɩan kletiɛn bho -a ˈyeɛ -nʋʋn gblein. Dhɛ -ɛɛ ˈˈtun -aʋ ˈˈdhe -aa nʋan dhɛjɛɛn -mɛn Zoova a ŋmʋn jha. -Bho ɛ ˈghwlʋ ˈdhe -aaˈ -pɛɛ bho ɛˈ, ɛɛ poɛ -aʋ ˈmʋnan in ˈˈdhe ɛɛ nʋɛn Zoova ˈtʋn.—Zro Actes 20:35.
KPA DHƐ I ˈŊWƆƐN ƝAN
-Bho ɲɔn ɔn sa ɔɔˈ dhbho ˈbho ɔɔˈ -deɩnˈ po ˈˈdhe ɔɔˈ ˈbɔn dhɩ -duuˈˈ i ɛˈ, dhɩjɛɩn- ɔɔ ˈjheea ˈbho ɛ, ɩmɩn- anˈ dɩ -aa mun ˈtmʋn-.
4. -Bho -aa sa dhbho nʋn -a ˈbhɛɛ- Zoova ˈˈɩ
-Jhbhɛɛ- nɩan ˈbho -abʋ -e Zoova ˈɲnɩn ˈyeɛ nʋn -a ˈye -aaˈ dhbho ɔˈ ka jhibho-. Po ˈo VIDEO, -ˈmɛn aʋ ˈtmʋn ideedɩ- nɩan da zɔnˈ da aˈ dɩ.
-
ˈDhe video nɔn ˈdhi ɛ, dhɛwɛ- ˈtʋn -manˈ -pɛɛ i ˈdhe Jezɔnɩn ɔnˈ dhɩjhesʋn -e ɔɔˈ kplɩn anˈ dɩ ˈdhi ˈdhe dhbhoˈˈ -ɛ?
-
Dhɛwɛ- ɔɔ nʋn -wɛeˈ ɔɔ po ɔɔˈ dhbho ˈbho ɔɔˈ -deɩnˈ -ɛn?
Zro Colossiens 3:23, 24, -ˈmɛn aʋ ˈtmʋn ideedɩ- nɩn anˈ dɩ:
-
Dhɛɛdɩ- -ka -aa nʋan dhbho ˈjhe sʋn -kɔn dɩ -ɛ?
Dhbho -kɔn dɩ ˈmɛn. ˈKlaa -a seɔ i ˈˈtai- dhi ɔ ˈse dɩ -kɔn in ɔ ˈse Zoova aˈ ˈˈɲɩanˈ -zii i.
5. -Bho -aaˈ ˈbɔn dhɩ -duu i dhɩjɛɩn- -aa ˈjhea ˈbho
Ɲʋn -duuˈˈ a ˈbɔn ʋʋ ˈye ˈghwɛi -duuˈˈ ˈbhle. Biiblʋ ˈnaan -aaˈ ˈbhle tɔiˈnaasʋn -ˈnʋn -dhe. Zro 1 Timothée 6:6-8, -ˈmɛn aʋ ˈtmʋn ideedɩ- nɩn anˈ dɩ:
-
Dhɛwɛ- Biiblʋ a po -aʋ ˈkpɩ -a ˈye nʋn -ɛn?
-Bho -a se ˈghwɛi -duuˈˈ ˈbhle mɔn -dhe ɛˈ, -a ˈbhɛɛˈ -a ˈye ˈmʋnan in -nɩn. Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
-Bho ˈˈgbuzɔncɛ -ˈnʋʋn se ˈghwɛi -duuˈˈ ˈbhle mɔn -dhe ɛˈ, -ɛɛ nʋɛn -wɛeˈ ʋʋ -nɩn ˈmʋnan in -ɛn?
-Bho -a ˈbhle ˈghwɛi -duuˈˈ ˈˈdhe -aa sa -ˈnɩɩn i ˈbɔn ɔnˈ, dhɛwɛ- ɛ ˈbhɛɛ ɛ ˈye -aʋ ˈˈdhrui nʋn -ɛn? Zezi -jhiiɛ ˈˈɩpoodɩ i -wɛeˈ -ka ɛɛ muan -aʋ dhɛsaʋn ˈˈdhrui -nʋn ɛn, -a ˈyɩ jhibho-. Zro Luc 12:15-21, -ˈmɛn aʋ ˈtmʋn ideedɩ- nɩn anˈ dɩ:
-
Dhɛwɛ- -ˈŋwɔn in ˈdhe Zezi ɔˈ ˈˈɩpoodɩ- -ˈnɩn ˈdhi -ɛ?—-Ŋmʋn ˈdhe ˈˈjhri -mɩɩnˈˈ 15 ˈdhi.
Zro Proverbes 10:22 -e 1 Timothée 6:10 ˈdhii ˈˈdhe -ˈyɩ ˈˈɩ poo-. -ˈMɛn aʋ ˈtmʋn ideedɩ- nɩn anˈ dɩ:
-
ˈBhoo- -gwlɩˈˈ ˈdhee, dhɛwɛ- -kɔn dɩ -ɛ? -Jhbhɛɛ nɩan ˈo -abʋ -e Zoova ˈɲnɩn -aeˈˈ ˈghwɛi -duuˈˈ ˈbhleɛ-? Dhɛɛdɩ- -ɛ?
-
-Bho -aa sa ˈghwɛi -duuˈˈ i bɔn ɔnˈ, ˈkledɩ- -wɛ -aa mun ˈjhe -ɛ?
6. Zoova a muɛn -aaˈ dɩ ˈˈdu-
-Bho -a se dhbho -aeˈˈ ˈghwɛi -duuˈˈ ˈbhle ɛˈ, Zoova -gwlɩˈˈ -deɛ ˈbhɛɛ ɛ ˈye ˈˈɩkman-. Po ˈo VIDEO -wɛeˈ -ka -a ˈyea nʋn ˈdhe ˈkledɩ- -ˈnɩn ˈdhi ɛ, -a ˈyeɛ jhibho-, -ˈmɛn aʋ ˈtmʋn ideedɩ- nɩan da zɔnˈ da aˈ dɩ.
-
ˈDhe video nɔn ˈdhi ɛ, ˈkledɩ- -wɛ -aaˈ ˈdhoudhi -ˈnɔn ˈjhe ˈˈjhibhaˈ -a?
-
Dhɛwɛ- ɔ nʋn ˈˈdhe ɔ ˈjha ɔɔˈ ˈkledɩ- -ˈnɩn ˈˈdhru -ɛ?
Zro Matthieu 6:25-34, -ˈmɛn aʋ ˈtmʋn ideedɩ- nɩn anˈ dɩ.
-
Ɲʋn -an kɔɔan Zoova ɲan ˈdhe ʋaˈ ˈkmʋn ˈdhi ɛ, dhɛwɛ- -ɛɛ ghwlu ɔ cɛn ʋaˈ dɩ -ɛ?
ƝƲN -ˈNƲƲN ˈNAAN: “ˈYe dhbho -duuˈˈ nʋn -wɛeˈ ˈye ˈman ˈˈgbuzɔncɛ ɛˈ dɩ ˈˈdu. Ɛɛˈ dɩ ɩn se ˈbhɛɛ- ˈye ˈˈdhruigbooɛ ɛɛˈ klɛɛ ˈmʋn mun.”
-
-Ka Zoova aˈ ˈˈɲɩanˈ anˈ ɲan -kɔɔɛn ˈdha dhɛ, Biiblʋ aˈ ˈˈjhriɛ -wɛ po ʋn sʋn bho -wɛeˈ deɛ -gwlɩˈˈ -ɛ?
DHƐWƐ ˈCƖAN-?
-Bho dhbho -e ˈghwɛi -kɔn dɩ ˈdhe -aaˈ ˈkmʋn ˈdhi mɔn -dhe ɛˈ, ɩn ˈse -aaˈ ˈˈjhri ˈsɔɔn -za i ˈbho Zoova aˈ ˈˈɲɩanˈ.
Dhɛwɛ -ˈŋwɔn in -ɛn?
-
Dhɛwɛ- ˈbhɛɛˈ -ɛ ˈye ʋn sʋn bho po ˈˈdhe -ˈye dhbho ˈbho ɔˈ -deɩnˈ po -ɛ?
-
-Bho -aaˈ ˈbɔn dhɩ -duuˈˈ i ɛˈ, ˈjɛɛn- -wɛ -aa mun ˈo ˈjhee- -ɛ?
-
Ghwlu Zoova cɛan ˈdhe ɔɔˈ ˈcɛ ɛˈ dɩ ˈdhi -ʋn nɩan ɔɔ muɛn ʋaˈ dɩ ˈˈdu- ɛ, ka -ˈye ɛɛˈ -to sʋn nʋn -ka dea ʋanˈ ghwlu tu -gwlɩˈˈ -ɛ?
ˈBƆN DHƖ -ˈNƖƖN ANˈ I ˈŊWƆAN IN
Biiblʋ ˈnaan ˈghwɛi ˈbhleɛ- -nɩɛn- dhɛsaʋn-?
“L’argent est-il la racine de tous les maux?” (ˈSɛɛ- ˈghwlʋa ˈo ɛntɛɛnɛtɩ ˈˈkpe ɛ)
-Baanˈ- -wɛ -ɔɔ nʋn Ɲɔnsoa ˈtʋn -ɛn?
“Donner: qu’en dit la Bible?” (ˈSɛɛ- ˈghwlʋa ˈo ɛntɛɛnɛtɩ ˈˈkpe ɛ)
-Klati -e lotori ɲʋn an ˈjheea ˈghwɛi ˈdhi ɛ, ɩan nʋɛn ɲʋn dhɛsaʋn ˈˈdhrui?
“D’après la Bible: Les jeux d’argent” (Reveillez-vous!, mars 2015)
Dhɛ ˈˈtuan ˈˈjhu dhueˈ ˈˈdhe ɔ ˈbhɔa lotori -e ˈˈjhri dɩ ɛ, ɛmɛn- -man mun ˈjhe-.
“Les courses de chevaux étaient ma passion” (La Tour de Garde, 1er novembre 2011)
