-Bho ˈdhou a sa ʋanˈ ˈˈjhu ɲmau- ˈˈzaan anˈ dhɩ ˈkpa po ˈˈdhe ɔ ˈye -klainˈˈ mun ɛnˈ, ʋan ˈˈduɛ ɔɔˈ ˈˈjɛ -e ɔɔˈ ˈmʋnpaadhɩ aˈ feɛn- ɛnˈ dɩ, dhɛbhleɛ ʋn jhibhiˈ ɛɛ muɛn -nʋn ɔ ˈye kuzɔin -flɔn. -Bho ˈˈjhu ˈˈzaan an sa feɛn ɛnˈ, ɛɛ toɛˈ -ke -ka ɔɔˈ ˈcɛ -ˈˈwe a ˈˈdua ɔɔˈ dɩ -kajɔɔnka. -Ka nɩan dhueˈ -ke ɛ, -aaˈ ˈˈBho Zoova kman aaˈ dɩ ɛ, ɔɔ ˈbɔn -a ˈye ˈpepe -nɩn ˈdhe -aaˈ tɔˈinaansʋn -e -aaˈ -ghwlusʋn -e -aaˈ dhɩnʋsʋn ˈdhi. -Bho -aa sa feɛn ˈˈdhe -a -nɩn ˈpepe ɛˈ, -aa flɔɛn kuzɔin, -aa ˈbhleɛ kplɩn ˈdhɔɛe ˈˈdhe -aa ˈbhɛɛ Zoova ˈˈɩ.

1. Dhɛwɛ- feɛn ɛn dee i -ɛ?

Zoova ˈtmʋʋn- -aʋ ˈmɛn ɔ ˈnaan: “Aʋ ˈye ˈpepe -nɩn.” (1 Pierre 1:16) Bho -a ˈye ˈpepe nɩn ɛnˈ, -a ˈye kplɩn dhɔɛeˈ ˈbhle ˈˈdhe -a ˈye feɛn-. -Aaˈ ɲiɔnku -e -aaˈ ˈmʋnpaadhɩ -e -aaˈ ŋmɛinˈˈ -e -aaˈ kamiɔn ˈye feɛn-. -Aaˈ klɛɛ ˈbhɛɛˈ -a ˈye ˈsrɩn nɩn ˈˈjhriɛ ˈˈdu ˈbho -aaˈ ɲɔnsoagbu- aˈ dɩ ˈˈduaˈ. -Bho -aa sa feɛn ɛnˈ, -aa ˈbhɛɛ Zoova ˈˈɩ.​—2 Corinthiens 6:3, 4.

2. -Bho -a ˈye ˈpepe -nɩn ɛnˈ, dhɩwɛ- -a ˈse -nʋn in -ɛn?

Biiblʋ ˈnaan: “-A -za -aaˈ ɲiɔnku -e -aaˈ tɔˈinaansʋn vlɛnˈˈ in.” (2 Corinthiens 7:1) Dhɛ -ˈmɛn ˈdha -mɛn -nɩn dhɩ aˈ klɛɛ -ɩn ˈbhɛɛa -ɩn ˈyea -aaˈ ɲiɔnku -e -aaˈ tɔˈinaansʋn ˈˈzraan, -a ˈsɩ -nʋn in. Dhɩ -aa naan tɔˈ i ˈye Zoova ˈtʋn nʋn ɛmɛn- dɩ -aa vɔn tɔˈinaandhɩ -saɩn bho. (Psaume 104:34) -A ˈye -aaˈ -ghwlusʋn anˈ dɩ ˈˈdu -ke.​—Zro Colossiens 3:8.

Dhɛwɛ- ˈbhɛɛ -ɛ ˈye -aaˈ ku -e -aaˈ tɔˈ vlɛnˈˈ -kpʋʋn -ɛn? Tebha- -poɛ -e ˈˈgeji -e siklai ˈnan- an kpʋʋɛn ɲɔn ɔnˈ ku vlɛnˈˈ. Ɛɛˈ dɩ -a ˈsɩ ˈnan in. -Bho -aa sɩ bho tɛɛn ɛnˈ, -aa muɛn kuzɔin -flɔn ˈˈdhe -aa toɛˈ -ka ˈkmʋn ˈdha dhɛ ˈdhe -a ˈˈjhri ˈdhe ɛ. Nʋn -manˈ ˈˈjɛ ˈɲnɔn ˈmʋn -e pɔɔno i ˈjheɛ- ɛ ˈˈzraan ɲʋn, ɛɛˈ dɩ -aa po ˈe ˈkpɩ -ke -aa tɛɛn ɩn bho. (Psaume 119:37; Éphésiens 5:5) Zoova a muɛn -aʋ sʋn bho -po -a ˈyɩ ˈˈdhru ˈjha -bho ɛɛˈ nʋanˈ -kmanˈˈ mɔn -dhe ɛˈ.​—Zro Isaïe 41:13.

 KPA DHƐ I ˈŊWƆƐN ƝAN

3. -Bho -aa sa feɛn ɛnˈ, ɛɛ ˈbhɛɛ Zoova aˈ ˈɲnɩn ˈˈɩn

Zoova a ˈbɔn Israɛkɔʋn nɩan tɛnˈˈ ˈye feɛn-, ɛmɛn- ɲʋn an ˈjhe ˈˈkpe i ˈdhe ˈtee ɔ ˈˈɲɩn ʋbʋ ˈdhi. Zro Exode 19:10 -e 30:17-19, -ˈmɛn aʋ ˈtmʋn ideedɩ- nɩn anˈ dɩ:

• -Ka feɛn- kɔandɩ ˈdhe Zoova ˈˈjhri ˈdhe ɛ, ka Biiblʋ aˈ ˈˈjhri nɩn an nʋn ɛnˈ -to sʋn -ɛn?

• Dhɛwɛ- -a ˈye nʋn jheejhee ˈˈdhe -a ˈye feɛn-?

Feɛn ɛn deɛ nɔnˈˈ -e ˈkpɩ i. -Bho -a -nɩn ˈˈghwliɛjhei- -aeˈˈ -a se ˈˈghwliɛjhei- -nɩn ɛnˈ, -da -a ˈjhe -a -nɩn mɔn -dhe ɛˈ, -a ˈbhɛɛˈ -a ˈye feɛn-. Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.

• -Bho -aa sa feɛn ɛnˈ, dhɛwɛ- ɲʋn -an ˈjhea -aʋ ˈdhe -bhobhlaaˈ a mun ˈtmʋn- -ɛn?

4. -A -tɛɛn nʋʋndhɩ- -ɩan- kpʋʋan ɲʋn vlɛnˈˈ bho

Ɲʋn -an ˈnan siklai -aeˈˈ ˈˈgeji jhibhiˈ -ka ɩanˈ bho ˈbhɔɛ- kmanˈˈ. -Bho -nɩn ˈe ɛɛˈ dɩ tu ˈdhi ɛˈ, dhɛ ɩn ˈbhɛɛa ɩn ˈyea -manˈ ˈkmʋn ˈˈdhrui nʋn ɛn, -naan ɛɛˈ dɩ tɔˈ i. Zro Matthieu 22:37-39, -ˈmɛn -aʋ ˈtmʋn dhɛ siklai -aeˈˈ ˈˈgeji ˈnaan an nʋan...

• -jhbhɛɛ nɩan ˈo ɲɔn -e Zoova ˈɲnɩn ˈˈdhru i ɛɛˈ dɩ.

• ɔɔˈ ˈˈgbuzɔncɛ -e ɲʋn nɩɔn ˈdhe i ˈˈdhru i ɛɛˈ dɩ.

Po -manˈ ˈˈjɛ kpɔˈˈ ˈˈdhe -ˈye kplɩn -saɩn- -ˈnɩn bho vɔn. a Po ˈo VIDEO.

Zro Philippiens 4:13, -ˈmɛn aʋ ˈtmʋn ideedɩ- nɩn anˈ dɩ:

• Ɲɔn -ɔɔ vɔan dhɩ -a kpʋʋan ɲʋn vlɛnˈˈ bho ɛ, -kawɛ bhaeɛ- -e Biiblʋ ˈcɩaan -e ˈˈdhruigbooɛ ˈmʋn -muɛn ˈbhɛɛ ɩn ˈyeɔ sʋn bho po -ɛ?

 5. Vɔn tɔˈinaansʋn- -saʋn- -e kplɩn -saɩn bho

Zro Colossiens 3:5, -ˈmɛn aʋ ˈtmʋn ideedɩ- nɩn anˈ dɩ:

• -Kawɛ -aa nʋn ɛnˈ jhibho- sʋn ka pɔɔno i ˈjheɛ, mesazɩ nɩan ˈɲnɩnzanˈ -nʋɛn- ˈzɔn -e ˈˈjɛ ɛˈ ˈɲnɔnmʋnʋɛn- ɛn ˈˈzraan ɲʋn ˈdhe Zoova ˈˈjhri ˈdhe -ɛ?

• Dhɛ Zoova a ˈbɔan -a ˈyea ˈpepe -nɩn ɛn, ˈbhoo- -gwlɩˈˈ ˈdhee, ɛ -nmɔn ˈo dhi? Dhɛɛdɩ- -ɛ?

-Ŋmʋn -ka -ˈbhɛɛa -ˈyea tɔˈinaandhɩ- -ɩan- ˈˈzraan ɲʋn bho vɔn ɔn. Po ˈo VIDEO.

Dhɛ -a ˈyea nʋn ˈˈdhe -aaˈ tɔˈ ˈsea ˈˈzran in ɛn, Zezi -jhiiɛ- ˈˈɩpoodɩ i ɔ ye ɛɛˈ dɩ ˈtmʋn. Zro Matthieu 5:29, 30, -ˈmɛn aʋ ˈtmʋn ideedɩ- nɩn anˈ dɩ:

• Ɛ se -ˈmɛn Zezi ɔ ˈbɔn -a ˈye -aaˈ ˈˈjɛ dhɛsaʋn- ˈˈdhrui nʋn -nɩn. Dhɛ ɔɔ ˈbɔan ɛmɛn -nɩn -a ˈyɩ jhibho- -ka -a ˈyea ˈe ˈkpɩ -duuˈˈ po ˈbho ɛɛˈ dhɛ tu ɛˈ nʋanˈ. -ˈMɛn ˈkpɩ -wɛ ɲɔn ˈye ˈe po ˈˈdhe ɔ ˈye tɔˈinaandhɩ- -a ˈˈzraan ɲʋn ˈdhe ɔɔˈ tɔˈ bho -za -a? b

-Bho -man sa ˈe ˈkpɩ po -man sa tɔˈinaandhɩ- -a ˈˈzraan ɲʋn bho vɔn ɔnˈ, Zoova a ˈjhe ˈkpɩ -man poa ˈe ˈmɛn. Zro Psaume 103:13, 14, -ˈmɛn aʋ ˈtmʋn ideedɩ- nɩn anˈ dɩ:

• -Bho -man sa kplɩn -an ˈˈzraan ɲʋn bho vɔn ɔnˈ, -kawɛ Biiblʋ aˈ ˈˈjhriɛ- nɛn ˈbhɛɛˈ ɛ ˈye ʋn sʋn bho po ˈˈdhe -ˈye vɔanˈ ɲan kpa -a?

 DHƐWƐ- ˈCƖAN-?

-Bho -aa sa feɛn ɛnˈ, -aaˈ -naan dhɩ sea ˈˈjhriinmɔn- tɔˈ ˈˈkpe i ˈˈdhe -aaˈ nʋn dhɩ -ɩan- ˈˈzraan ɲʋn ɛnˈ, -aa ˈbhɛɛ Zoova ˈˈɩ.

Dhɛwɛ -ˈŋwɔn in -ɛn?

• Dhɛɛdɩ- ɛ -kɔn dɩ -a ˈye ˈpepe -nɩn ˈˈdhe -a ˈye i feɛn-?

• Dhɛwɛ- feɛn- ˈdha -a?

• -Kawɛ -ˈbhɛɛ -ˈye nʋn -wɛeˈ -manˈ tɔˈinaansʋn -e -manˈ dhɩnʋnsʋn ˈye ˈpepe -nɩn -ɛn?