ˈCƖAANDHƐ- 46
Dhɛɛdɩ- -a ˈye -aaˈ ˈkmʋn Ɲɔnsoa kwa de ˈˈdhe -a ˈye ˈˈnin ˈzɔn -jhii -ɛ?
-Bho -man sa ˈbɔn -ˈye -manˈ ˈkmʋn Zoova kwa de ɛˈ, -ˈmɛn -ˈyeɔ ˈtmʋʋn- ˈdhe bhaeghwlu ˈdhi -ˈye ka nʋn ɔɔˈ ˈsʋ -man ˈbɔn -ˈye ˈˈɲɩn ˈˈdhe ɔɔˈ glʋˈdɩ- -man ˈbɔn -ˈye ɲan -kɔɔn ˈdhe -manˈ ˈkmʋn anˈ klɛɛ ˈdhi. (Psaume 40:8) ˈBho -ˈmɛn ˈdhe -mɔn -ˈye ˈˈnin ˈzɔn -jhii. -Bho nʋn ɛnˈ dhɛ tu ɛˈ, -man muɛn -to -ka dea -manˈ ˈkmʋn Ɲɔnsoa kwa. Dhɛ -ɛ ˈyea dhɛ ˈdha -ɛ ˈyea de -manˈ ˈkmʋn Zoova kwa -zii ɛ, ɛ se -nɩn. ˈˈJɛ ɛˈ ˈkmʋn Zoova kwa -deɛ -e ˈˈninzɔnjhiiɛ ɛ muɛn -manˈ ˈkmʋn ˈˈɩn zian-. -ˈMɛn dhɛwɛ- -ˈye ʋn ˈˈtun ˈˈdhe -ˈyeɛ nʋn -ɛn?
1. Dhɛwɛ- -ɛɛ ˈˈtun ɲɔn ˈˈdhe ɔɔ de ɔɔˈ ˈkmʋn Ɲɔnsoa kwa -a?
Zoova aˈ dɩkman- -an ˈˈtun ɲɔn -wɛeˈ ɔɔ deɔ ɔɔˈ ˈkmʋn kwa. (1 Jean 4:10, 19) Biiblʋ ˈnaan: “-ˈYe Zoova -manˈ Ɲɔnsoa aˈ dɩkman- ˈdhe -manˈ -pɛɛ ɛˈ klɛɛ ˈmʋn, ˈdhe -manˈ ɲiɔn -jhɔɛ- ɛˈ klɛɛ ˈmʋn, ˈdhe -manˈ tɔˈ ɔˈ klɛɛ ˈmʋn ɛmɛn- -e ˈdhe -manˈ ˈkpɩ ˈa klɛɛ ˈmʋn.” (Marc 12:30) Ɛ se dhɩ -aa ˈtmʋan anˈ ˈsʋ ˈyeɛ -to -ka -a kman Ɲɔnsoa aˈ dɩ -nɩn, -a ˈyeɛ -to -ke ˈdhe -aaˈ nʋʋndhɩ ˈdhi. -Ka -bho ɛɛ sa ˈo ˈbhɔɔ ˈɲnʋnkpaoˈ -e ɲmau -kman bha aˈ dɩ a ˈˈtiia ˈˈbhli ɛ, ˈkamɔn- -ke Zoova aˈ dɩkman- ˈye -aʋ ˈˈtun -a ˈyeɔ -aaˈ ˈkmʋn kwa de ˈˈdhe -a ˈye ˈˈnin ˈzɔn -jhii.
2. Ka Zoova a nʋn ɔɔˈ -Bobhlaʋn- -jhiia ˈˈnin ˈzɔn ˈˈniman -po sʋn -ɛn?
Zoova aˈ ˈˈgbuzɔncɛ -nɩɛn- ˈmʋnan in. -Zɔn -man jhiia ˈˈnin ˈzɔn ɔn, -man ˈkpa ʋaˈ dhueˈ. -Man muɛn ˈˈkpei ˈjhe- ˈdhe dhɩ -duuˈˈ ˈdhɩ -ka ɔ kman -manˈ dɩ ˈˈdhe -jhbhɛɛ nɩan ˈbho aʋ ˈɲnɩn ɛn muɛn i -ku, ɛ ˈye -ka ɛ nɩan ˈzɩan -zii. (Zro Malachie 3:16-18.) Zoova a muɛn -manˈ ˈˈBho -nɩn. ˈBho -ˈmɛn ˈdhe ɛ, ˈdhoudhi -ɲmai -e ˈdhoudhi -ɲnʋnkpaeˈ nɩan da ˈbhlʋa aˈ klɛɛ ˈˈkpe -ʋʋ kman ɔɔˈ dɩ ˈˈdhe -ʋʋ kman -manˈ dɩ a muɛn -manˈ ˈˈgbuzɔncɛ ˈkpa-. (Zro Marc 10:29, 30.) ˈKlaa dhɩ -ˈnɩɩn -nɩn ˈo -ˈye nʋn ˈˈdhe -ˈye ˈˈnin zɔn -jhii. Ɛ -kɔn dɩ -ˈye Zoova jhibho-, -ˈye ɔɔˈ dɩ -kman ˈˈdhe -ˈye ɔmɔn -e ɔɔˈ ˈˈJhu -gwlɩˈˈ de. -Bho ɛɛ sa ˈo ˈbhɔɔ ɔˈ, -ˈye -manˈ ˈkmʋn Zoova kwa de. -Bho nʋn ɩanˈ dhɩ tu ˈˈdhe -jhii ˈˈnin ˈzɔn ɔnˈ, -ˈbhɛɛˈ -ˈye ˈkmʋn sea ˈˈtianˈ ˈbhle ˈjhe. Ɲɔnsoa aˈ Ghwlu ˈnaan: “ˈˈNinzɔnjhiiɛ ɛɛ [...] ˈpʋʋ aʋ ˈmɛn -ke ˈzɩan.”—1 Pierre 3:21.
KPA DHƐ I ˈŊWƆƐN ƝAN
Dhɛɛdɩ- ɛ kɔan dɩ -ˈyea -manˈ ˈkmʋn Zoova kwa de ˈˈdhe -ˈyea ˈˈnin ˈzɔn -jhii ɛ, ɛmɛn- -man mun ˈcɩan-.
3. -Aaˈ klɛɛ ˈye ˈo ɲɔn -a ˈyea ˈˈɲɩn -za
ˈDhe tɛnˈˈ ˈkmʋn ˈdhi ɛ, ˈbho Israɛkɔʋn -ˈnʋʋn -gwlɩˈˈ ɛ, ʋʋ ˈbhɛɛˈ ʋʋ ˈye Zoova -e -baadhɛ- dhueˈ ɲʋn an ˈdhaa Baalɩ ˈˈɲɩn -da dhueˈ. Ɛmɛn- ˈˈtun Zoova -wɛeˈ ɔ dhbho ɔɔˈ ghwlukwajhaai- Eli ˈˈdhe ɔ ˈye ʋaˈ tɔˈinaansʋn -saʋn- -ˈnʋn ˈˈɩn zian-. Zro 1 Rois 18:21, -ˈmɛn aʋ ˈtmʋn ideedɩ- nɩn anˈ dɩ:
-
Dhɛwɛ- Israɛkɔʋn ˈye ˈo -za ʋʋ ˈye nʋn -dhe ɛ?
-Ka ɛ nɩan ˈdhe Israɛkɔʋn anˈ dɩ ˈdhi ɛ, -abʋ -ke ɛ, -a ˈye ˈo ɲɔn -a ˈyea ˈˈɲɩn -za. Zro Luc 16:13, -ˈmɛn aʋ ˈtmʋn ideedɩ- nɩn anˈ dɩ:
-
-Bho -aa sa Zoova ˈˈɲɩn ɛnˈ, dhɛɛdɩ- -a ˈse ɲɔn -ˈnɔɔn -aeˈˈ dhɛ -ˈnɛɛn ˈˈɲɩn ɩn -ɛn?
-
-Ka -a za ˈo Zoova aˈ ˈsʋ ɔɔˈ ˈˈɲɩan an, -kawɛ -a ˈyeɛ -to -ɛ?
4. -Naan ɲʋndɩkman- Zoova toa -manˈ dɩ tɔˈ ˈˈkpe i
-Baanˈ- ˈdhɔɛe Zoova nʋan -aʋ ˈˈdhrui ɛ, ɩn -diɛˈˈ. Dhɛwɛ- -a ˈbhɛɛˈ -a ˈyeɔ ˈˈɲɩn -ɛn? Po ˈo VIDEO.
Ka Zoova nʋn ɛɛˈ -to sʋn -ka ɔ kman -manˈ dɩ -ɛ? Zro Psaume 104:14, 15 -e 1 Jean 4:9, 10, -ˈmɛn aʋ ˈtmʋn ideedɩ- nɩn anˈ dɩ:
-
-Baanˈ- -wɛ -ɔɔˈ dɩ -man po Zoova ˈsɛ gblein -ɛn?
-
Dhɛwɛ- -baanˈ- ɔ nʋan ʋn ˈˈdhrui ɔɔ po ˈbhoo- -gwlɩˈˈ -ɛ?
-Bho ɲɔn ˈˈɲɩn -aʋ dhɛ -ɛɛˈ dɩ -a kman ˈjɛɛn, -aa ˈbɔn -a ˈyeɛ -to -ka -baanˈ- ɔ nʋan -aʋ ˈˈdhrui ˈdha dhɛ ˈdhe -a ˈˈjhri ˈdhe ɛ. Zro Deutéronome 16:17, -ˈmɛn aʋ ˈtmʋn ideedɩ- nɩn anˈ dɩ:
-
Bho -naan dhɩ aˈ klɛɛ Zoova nʋan ʋn ˈˈdhrui tɔˈ ˈˈkpe i ɛˈ, dhɛwɛ- -man ˈbɔn -ˈye nʋn -ˈyeɔ ˈˈɲɩn -ɛn?
5. Zoova a muɛn ʋn ˈˈniman -po ˈdhe dhɩ -duuˈˈ ˈdhi -bho deɔ -manˈ ˈkmʋn kwa aˈ
ˈBho ɲʋn anˈ -da -duuˈˈ -gwlɩˈˈ ɛ, ˈɲnɩn ˈghwlʋɛ -e dhbho klaaˈˈ -eˈghwɛi -duuˈˈ ˈbhleɛ- -ɛɛ po ɲʋn ˈmʋnan in. Ɛ tɔˈdɩ? Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
-Bho ˈˈjhu -ˈnɔn -kman balɔn -po dɩ -mɔnˈ -dhe ɛˈ, dhɛɛdɩ- ɔ ˈbhoɔ bho -ɛ?
-
Ɔ ˈse ɔɔˈ ˈkmʋn balɔn -poɛ kwa de, ɔ deɛ ɔɔˈ ˈkmʋn Zoova kwa. Dhɛ ɔ -za ˈo ɔ nʋan, ka -man ˈjheɛ -ɛ? Dhɛɛdɩ- -ɛ?
-Da dhbhoi Pɔʋ ˈsea kletiɛn ˈkpa a, dhɩ ɔ ˈcɩan ˈyeɛ nʋn -dhe ɔ ˈye dhbho klaaˈˈ nʋn. Ɔ pa zuifʋ -ˈˈwe aˈ ˈtee ɛˈ -klainˈˈ ˈbho ʋaˈ ɲʋndhɛtɔɔin- klaaˈˈ dhueˈ ˈˈbun. ˈKlaa ɔ ˈˈtaiɛ- dhɩ -ˈnɩn anˈ klɛɛ i ɔ ye kletiɛn ˈkpa. Pɔʋ -kpleeˈ dhɩ ɔ ˈˈtaia i ɩanˈ dɩ? Zro Philippiens 3:8, -ˈmɛn aʋ ˈtmʋn ideedɩ- nɩn anˈ dɩ:
-
Dhɩ Pɔʋ ˈˈtaia i -wɛeˈ ɔɔ ˈyea kletiɛn ˈkpa a, dhɛɛdɩ- ɔɔ ˈdhɩɩ “-sɩɩnˈ anˈ -zrɩˈ” -ɛ?
-
Dhɛwɛ- ɔ ˈjhe ˈbho ɩanˈ ˈgɔ ˈˈɩ -ɛ?
-
ˈBhoo- -gwlɩˈˈ ˈdhee, Zoova aˈ ˈˈɲɩan -e -nʋʋn -manˈ ˈkmʋn dhɛ -dhee -ˈnɛɛn ɛn, dhɛwɛ- -ˈbhɛɛ -ɛ ˈye ʋn ˈmʋnan in po -ɛ?
Pɔʋ ˈkpa kletiɛn ɛn, dhɩ ɔ ˈjheea ˈbho -diɛˈˈ ɩn ye dhɩ ɔ za kwai -zii.
ƝƲN -ˈNƲƲN ˈNAAN: “Dhɩ ˈman ˈcɩan an, ˈɩn dɩ -gwlɩˈˈ ˈmɛn. Dhɛ nɩan ˈo bhla a, ˈˈninzɔnjhiiɛ ˈbhleɛ ˈman -faʋn-.”
-
ˈBhoo- -gwlɩˈˈ dhee, dhɛɛdɩ- de -manˈ ˈkmʋn Zoova kwa -nɩn dhɛjɛɛn-?
DHƐWƐ- ˈCƖAN-?
Ɲʋndɩkman- -an ˈˈtun -aʋ -wɛeˈ -aa de -aaˈ ˈkmʋn Zoova kwa ˈˈdhe -aa jhii ˈˈnin ˈzɔn.
Dhɛwɛ- -ˈŋwɔn in -ɛn?
-
Dhɛɛdɩ- Zoova -nɩn ɛnˈ ka -a ˈye ɔɔˈ dɩ -kman ˈˈdhe -a ˈyeɔ ˈˈɲɩn ˈdhe -aaˈ -pɛɛ ɛˈ klɛɛ ˈmʋn -ɛn?
-
-Kawɛ Zoova a nʋn ɔnˈ -Bobhlaʋn -jhiia ˈˈnin ˈzɔn geiˈˈ -za sʋn -ɛn?
-
-Man ˈbɔn -ˈye -manˈ ˈkmʋn Zoova kwa de ˈˈdhe -ˈye ˈˈnin ˈzɔn -jhii?
ˈBƆN DHƖ -ˈNƖƖN ANˈ I ˈŊWƆAN IN
Dhɛ nɩan ˈo -wɛeˈ ˈɲnʋnkpaoˈ dhueˈ -ʋan- bhlea -e balɔn -bhlai- dhueˈ dea ʋaˈ ˈkmʋn Zoova kwa, ɛmɛn- -man mun ˈjhe-.
Dɩ ɲʋnjhae- a deea ʋaˈ ˈˈjɛ i ɛ: Dhɛ ˈye nʋn ˈdhe ˈman ˈkmʋn ˈdhi -ɛ?: Ʋaˈ ˈkmʋn anˈ -bo (6:54)
Dhɩ -ˈnɩɩn ˈbhɛɛa -ɩn -ˈyea ʋn sʋn bho po ˈˈdhe -ˈyea -manˈ ˈkmʋn Zoova kwa de ɛ.
“Pourquoi se vouer à Jéhovah?” (La Tour de Garde, 15 janvier 2010)
ˈDhe ˈdhɩ aˈ video nɔn ˈdhi ɛ, -ŋmʋn -ka ˈɲnʋnkpaeˈ -e ɲmai- dea ʋaˈ ˈkmʋn Zoova kwa nɩan ˈmʋnan in ɛn.
ˈDhe -bo -ɔɔˈ ˈˈdhru nɩan “Pendant des années, je me suis demandé pourquoi on existe” ˈdhi ɛ, -ka ˈɲnʋnkpaoˈ dhueˈ nʋan dhɛ kɔan dɩ ˈdhe ʋanˈ ˈkmʋn ˈdhi ɲan -kɔɔn sʋn ɛn, ɛmɛn- -man mun ˈjhe-.
“La Bible transforme des vies” (La Tour de Garde, 1er novembre 2012)
