ˈCƖAANDHƐ- 47
-ˈGba ˈe ˈmɛn ˈˈnin ˈzɔn -jhii dɩ?
Dhɩ ˈcɩan ˈdhe Biiblʋ ˈdhi poɛ ʋn sʋn bho ye dhɩ -duuˈˈ jhibho- ˈdhe Zoova aˈ dɩ ˈdhi ˈˈdhe ye dhɩ -duuˈˈ ˈˈɩ zian- ˈdhe -manˈ ˈkmʋn ˈdhi. ˈBhoo- -gwlɩˈˈ ɛ, ɛgwɛ dhɛ -nɩn ˈo -ɛɛˈ dɩ se ˈe gbaˈ -manˈ ˈkmʋn Zoova kwa -de dɩ -e ˈˈnin ˈzɔn -jhii dɩ. -ˈMɛn dhɩ -ɩan- nʋɛn -wɛeˈ ɲʋn -ˈnʋʋn ˈsea ˈbɔn ʋʋ ˈyea ˈˈnin ˈzɔn -jhii -e -ka -ˈyea nʋn ˈˈdhe -ˈyɩ ˈˈdhru ˈjha a, ɩmɩn- -aa mun ˈjhe-.
1. Dhɩwɛ- -ˈye jhibho- ˈˈdhe -ˈye ˈˈnin ˈzɔn -jhii -ɛ?
-Bho -ˈye ˈˈnin ˈzɔn -jhii ɛˈ, ɛ -kɔn dɩ -ˈye “tɔˈdɩ jhibho- -kajɔɔnka.” (1 Timothée 2:4) Ɛ se -ˈmɛn dhɩ aˈ klɛɛ nɩan ˈe Biiblʋ ˈdhi ɛ, -ˈyɩ jhibho- kpɔˈˈ kpɔˈˈ ˈˈdhe -ˈye ˈˈnin ˈzɔn -jhii. Kletiɛn -ˈˈwe -jhiia ˈˈnin ˈzɔn ɛɛ nʋan -zɩn -duuˈˈ ɛ, ʋa kpa dhɛ ˈcɩaan ɲan. (Colossiens 1:9, 10) Dhɛ kɔan dɩ ɛmɛn -nɩn, tɔˈdɩ kɔan ɲan -ɩn nɩan ˈe Biiblʋ ˈdhi ɛ, -ˈyɩ i ˈŋwɔn. Ɲankɔʋn an muɛn ʋn sʋn bho -po -wɛeˈ -bho -man sa dhɛ i ˈŋwɔn -kajɔɔnka aˈ, -ˈyɩ jhibho-.
2. Dhɩwɛ- -ˈye nʋn -wɛeˈ -ˈye ˈˈnin ˈzɔn -jhii -ɛ?
-Bho -ˈye ˈˈnin ˈzɔn -jhii ɛˈ, -ˈye “-manˈ dhɩsaɩn ˈˈɩn jhibho- ˈˈdhe -ˈye kplɩn ˈˈɩn zian-.” (Zro Actes 3:19) Dhɛ -ˈmɛn ˈdhaa ɛmɛn -nɩn -ˈye -manˈ dhɩsaɩn anˈ ˈgɩn cɛn ˈˈdhe -ˈye Zoova i dee- ɔ ˈyɩ ˈˈkpe ˈghwlʋ. ˈBho -ˈmɛn ˈdhe ɛ, -ˈye dhɩsaɩn anˈ klɛɛ bho -tɛɛn ˈˈdhe dhɛ -ɛɛ nʋan Ɲɔnsoa ˈtʋn ɛnˈ, ɛmɛn- -ˈye ˈe ˈkpɩ po -ˈye nʋn. Dhɛ -ˈnɛɛn kɔan dɩ -ˈyea nʋn -mɛn -nɩn, -ˈye ˈˈdhruigbooɛ ˈmʋn mun ˈˈdhe -nɩn ɲɔnsoagbu ˈye bo bhla.
3. Dhɛɛdɩ- ˈˈninzɔnjhiiɛ- ˈse -manˈ -faʋn ˈbhle- i -ɛ?
Dhɛ ˈbhlea -ˈnʋʋn anˈ -faʋn ɛn, ɛmɛn -nɩn dhɩ -ɩanˈ ghwlu ʋʋ cɩan ˈbho Zoova ˈˈjhibhaˈ, ʋʋ -ˈsɩ ŋwɔn bhlaa-. Ɛ tɔˈdɩ-, -zɔn -dhee -ˈnɔɔn -ˈbhɛɛ -ˈye ˈe dhɛsaʋn ˈdhi ˈkpa -ka ˈɲnʋnkpaeˈ -e ɲmai- kpʋan ˈo Ɲɔnsoa ˈˈbun in -ʋaˈ dɩ Biiblʋ a ˈtmʋan nʋan. Dhɛ -ˈyea jhibho- ɛ, ɛmɛn -nɩn Zoova ˈse ka nʋn ɔɔˈ dhbhonʋʋn ˈye ˈˈɩ ˈgba. (Zro Psaume 103:13, 14.) Dhɛ -ˈbhɛɛa -ˈyea nʋn -bho -man sɛ nʋn ɛnˈ, ɛɛ muɔn ˈmʋnan in -po! Ɔɔ muɛn ʋn sʋn bho -po -ˈye ˈdhe ɔ ˈˈjhri ˈdhei -nmɔn. Zoova a ˈbɔn -a ˈyeɛ -gwlɩˈˈ de -ka dhɛ ooˈˈ dhɛ sea ˈbhɛɛ- ɛ “ˈyea -aʋ ɔɔˈ ɲʋndɩkman- bho -tɛɛn ɛn.”—Zro Romains 8:38, 39.
KPA DHƐ I ˈŊWƆƐN ƝAN
Dhɩ -ɩan- kaan ʋn jie ˈˈninzɔnjhiiɛ- ɛˈ dɩ ɛ, -ka -ˈyea ɩanˈ ˈˈdhru ˈjha sʋn nʋn ˈbho Zoova aˈ -jhibhɛ- ɛˈ ˈˈkpe -poaˈ ˈˈdhe -ka Zoova a muan ʋn sʋn bho -po ɛ, ɩmɩn- -aa mun ˈjhe-.
4. Po ˈe ˈkpɩ -ˈye Zoova jhibho- -kajɔɔnka
Dhɛɛdɩ- ɛ -kɔn dɩ -ˈye Zoova jhibho- -kajɔɔnka -wɛeˈ -ˈye ˈˈnin ˈzɔn -jhii -ɛ? Ɛɛ muɛn -nʋn -ˈye ɔɔˈ dɩ -kman ˈˈdhe -ˈye ˈdhe ɔ ˈˈjhri ˈdhe i -nmɔɛn i ˈbɔn. Po ˈo VIDEO -wɛeˈ -ka Biiblʋ ˈcɩaʋn- -ˈnʋʋn nʋan Zoova aˈ dɩ -kman -e ˈdhe ɔ ˈˈjhri ˈdhe i -nmɔɛn i ˈbɔn sʋn ɛn, -ˈyeɛ i ˈŋwɔn. -ˈMɛn aʋ ˈtmʋn ideedɩ- nɩan da ˈzɔn da aˈ dɩ.
-
Ɲʋn -ˈjhea ˈdhe video ˈdhi ɛ, dhɩwɛ- pʋbʋ sʋn bho ˈˈdhe ʋʋ -jhii ˈˈnin ˈzɔn -ɔn?
Zro Romains 12:2, -ˈmɛn aʋ ˈtmʋn ideedɩ- nɩn anˈ dɩ:
-
Dhɩ Biiblʋ -aeˈˈ Zoova aˈ -Bobhlaʋn an tɔɔan ɲʋn ɛn, dɩ -gwlɩˈˈ ˈmɛn ˈjɛɛn-?
-
-Bho sɩ -gwlɩˈˈ de ɛˈ, dhɛwɛ- -ˈbhɛɛ -ˈye nʋn -ɛn?
5. -ˈJha dɩ -ɩan- muan ˈbhoo- ˈˈjhibhaˈ ˈkpa- ˈˈdhru
-Bho ɲɔn ɔn sa ˈbɔn ɔ ˈye ɔɔˈ ˈkmʋn Zoova kwa de ˈˈdhe ɔ ˈye ˈˈnin ˈzɔn -jhii ɛˈ, dhɩ -ˈnɩɩn ˈbhɛɛˈ ɩn ˈyeɔ jie -kaan. -Ka ˈɲnʋnkpaoˈ dhueˈ nʋan ˈkledɩ- -ˈnɩn ˈˈdhru ˈjha sʋn -bho -ˈyeɛ ˈjhe ɛˈ, po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
ˈKledɩ- -wɛ Nalanzelɛlɩ ˈjha ˈˈdhru -wɛeˈ ʋan ye Zoova ˈˈɲɩn -ɛn?
-
Ka Zoova aˈ dɩkman nʋn sʋn bho -po sʋn ˈˈdhe ʋn ˈjha ʋanˈ ˈkledɩ- -ˈnɩn ˈˈdhru -ɛ?
Zro Proverbes 29:25 -e 2 Timothée 1:7, -ˈmɛn aʋ ˈtmʋn ideedɩ- nɩn anˈ dɩ:
-
Dhɛwɛ- -ɛɛ ˈˈɲɩn -aʋ ˈkpɩ -wɛeˈ -aa ˈjha -aaˈ ˈkledɩ ˈˈdhru -ɛ?
6. De Zoova aˈ ɲʋn sʋn bho -poɛ -gwlɩˈˈ
Zoova a muɛn ʋn sʋn bho -po -ˈye ˈdhe ɔ ˈˈjhri ˈdhei -nmɔn. Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
ˈDhe video nɔn ˈdhi ɛ, dhɛɛdɩ- Biiblʋ ˈcɩain -ˈnɔn ɔnˈ -pɛɛ ɛɛ zee i ˈˈnin ˈzɔn -jhii dɩ -dhe -ɛ?
-
Dhɛwɛ- ɔ ˈcɩan -ɛ poɔ sʋn bho -wɛeˈ ɔɔˈ Zoova -ˈˈgwlɩdeɛ ku i -ɛ?
Zro Isaïe 41:10, 13, -ˈmɛn aʋ ˈtmʋn ideedɩ- nɩn anˈ dɩ:
-
Dhɛɛdɩ- -ˈyeɛ -gwlɩˈˈ de -ka ghwlu cɩan -zɔn dea -manˈ ˈkmʋn Ɲɔnsoa kwa, -ˈbhɛɛa -ˈyʋ ˈo -ɲnian?
7. Po Zoova ˈsɛ ɔɔˈ ɲʋndɩkman- anˈ dɩ
-Ka -man naan ɲʋndɩkman- Zoova toa ˈdhe -manˈ dɩ ˈdhi tɔˈ ˈˈkpe i ɛ, ˈkamɔn- -man muɔn ˈsɛ -po ˈˈdhe ɛɛ muɛn ʋn ˈˈtun- -ke -ˈye ɔɔˈ ˈˈɲɩan in ˈbɔn jheejhee. Zro Psaume 40:5, -ˈmɛn aʋ ˈtmʋn ideedɩ- nɩn anˈ dɩ:
-
Dhɩ Zoova nʋan ɔ ˈˈɲɩan ʋn ɛn, -jɩnwɛ ˈtʋn -manˈ -pɛɛ i gblein -ɛn?
Ghwlukwajhaai Zelemi -kman Zoova -e ɔɔˈ ghwlu aˈ dɩ ˈˈdhe dhɛ ɔ nɩan ɔɔˈ ghwlukwajhaai -ke ɛ, ɔ ˈjheɛ ˈˈkpei -ka ɛ nɩan ˈˈɩ -nmɔɛn- klaaˈˈ a. Ɔ ˈnaan: “-Manˈ ghwlu aˈ dɩ ˈman nʋn ˈmʋnan, -manˈ ˈɲnɩn -nɩɛn- ˈbhoo ˈˈkpe, oo Ɲɔnsoa Zoova.” (Jérémie 15:16) Aʋ ˈtmʋn ideedɩ- nɩn anˈ dɩ:
-
Dhɛɛdɩ- Zoova aˈ -Bobhlai -nɩɛn- -nɩn ˈˈɩ -nmɔɛn- klaaˈˈ -a?
-
-Man ˈbɔn -ˈye ˈˈnin ˈzɔn -jhii ˈˈdhe -ˈye Zoova aˈ -Bobhlai ˈkpa?
-
Dhɛwɛ- -ɛɛ kaan mʋn jie ˈbho ɛɛˈ nʋanˈ -an?
-
ˈBhoo- -gwlɩˈˈ ˈdhee, dhɛwɛ- -kɔn dɩ -ˈye nʋn ˈˈdhe -ˈye ˈˈnin ˈzɔn -jhii -ɛ?
ƝƲN -ˈNƲƲN ˈNAAN: “Dhɛ ˈbhlea ˈman -faʋn -mɛn -nɩn dhɩ -ɩanˈ ghwlu ˈman muan -cɛn ˈˈdhe ˈyea ˈˈnin ˈzɔn -jhii ɛ, ɛgwɛ ˈɩn ˈse ɩanˈ nʋanˈ ˈbhɛɛ i.”
-
ˈKamɔn- ɛ -nɩn ˈbhoo- -gwlɩˈˈ?
DHƐWƐ- ˈCƖAN-?
Zoova a muɛn ʋn sʋn bho -po -ˈye dhɩ aˈ klɛɛ -ɩan- kaan mʋn jie ˈˈdhru ˈjha ˈˈdhe -ˈye ˈˈnin ˈzɔn -jhii.
Dhɛwɛ- -ˈŋwɔn in -ɛn?
-
Dhɩwɛ- -ˈye jhibho- ˈˈdhe -ˈye ˈˈnin ˈzɔn -jhii -ɛ?
-
Dhɩwɛ- -ˈye ˈˈɩ zian- ˈdhe -manˈ ˈkmʋn ˈdhi -wɛeˈ -ˈye ˈˈnin ˈzɔn -jhii -ɛ?
-
Dhɛɛdɩ- ˈˈninzɔnjhiiɛ- ɛˈ -faʋn ˈse ʋn -nʋn in -ɛn?
ˈBƆN DHƖ -ˈNƖƖN ANˈ I ˈŊWƆAN IN
Dhɛ -manˈ ˈˈninzɔnjhiiɛ ˈyea ˈo ˈˈkpe tbha, ɛmɛn- ˈsɛɛ- nɛn ɛn mun ʋn sʋn bho -po -ˈye tɔˈ ˈˈkpei -naan.
-Ka -ˈyea nʋn -wɛeˈ -ˈyea dhɩ a kaan mʋn jie dhe ˈˈdhru ˈjha ˈˈdhe -ˈyea ˈˈnin ˈzɔn -jhii ɛ, ɛmɛn- ˈsɛɛ- nɛn ɛn mun ʋn sʋn bho -po -ˈye jhibho-.
“Qu’est-ce qui m’empêche de me faire baptiser?” (La Tour de Garde, mars 2019)
-Ŋmʋn -ka ˈˈjhu dhueˈ nʋan ɔɔˈ ˈkledɩ ˈˈdhru ˈjha sʋn -wɛeˈ ɔɔ ˈyea ˈˈnin ˈzɔn -jhii ɛ.
ˈBho -deenanˈ an, ˈˈjhu dhueˈ -ɔɔˈ ˈɲnɩn nɩan Ata ˈse ˈbɔn ɔ ˈye ˈˈnin ˈzɔn -jhii -dhe. -Ŋmʋn dhɛ poɔ sʋn bho ˈˈdhe ɔ -jhiia ˈˈnin ˈzɔn ɔn.
