ˈCƖAANDHƐ- 50
-Bɔyaˈˈ ˈdhe ˈˈgbuzɔn: ˈFɔ 2
ˈˈƝnuun- -nɩɛn- -baanˈ- -ɔ ˈghwlʋ ˈe Zoova bho. Dhɛ ɔɔ ˈbɔan ˈˈɲnuunbhleʋn ˈyea nʋn -mɛn -nɩn, ʋʋ ˈye -baanˈ- -ˈnɔn ɔnˈ dɩ ˈˈdu -kajɔɔnka. Zoova ˈˈɲɩɛn ˈˈɲnuunbleʋn ˈsrɩn -wɛeˈ ʋʋ ˈye ɛɛˈ nʋanˈ ˈbhɛɛ-. ˈSrɩn -ˈnɩn an poɛ ˈˈɲnuun sʋn bho -ke -wɛeˈ dhɛ ʋʋ yea nʋn ˈˈdhe -bɔyaˈˈ ˈyea ˈo ˈˈgbuzɔnˈ -nɩn ɛn, ʋa yeɛ jhibho-.
1. ˈSrɩn -wɛ Zoova ˈˈɲɩn ˈˈɲnuunbleʋn -ɛn?
Zoova a ˈbɔn ˈˈɲnuunbleʋn ˈye ʋaˈ ˈˈɲnuun anˈ dɩ -kman ˈˈdhe ʋʋ -nɩn ʋbʋ ˈye nɔnˈˈ -duuˈˈ nʋn -da dhueˈ. Ɔɔ ˈbɔn ʋʋ ˈye ʋaˈ ˈˈɲnuun ˈdhei -fuo- ˈˈdhe dhɩ ʋa tɔɔan ʋbʋ ˈye ˈo Biiblʋ aˈ ˈsrɩn ˈˈkpei tbha. (Proverbes 1:8) Dhɛ ɔ ˈtmʋan ˈˈbho -ˈˈwe ka: “Aʋ kpa ʋbʋ aˈ ˈbhɔɔa ɲan ˈdhe Zoova aˈ [...] ˈtee ˈdhi.” (Zro Éphésiens 6:4.) -Bho ˈˈɲnuunbhleʋn an sa ˈo Zoova aˈ ɲʋnjiebhopoɛ- ˈˈkpe tbha -wɛeˈ ʋa sa ʋaˈ ˈˈɲnuun ˈbhɔɔa ˈˈdhe ʋaˈ deɛ ɲɔn -dhee -ˈnɔɔn kwa aˈ, ɛɛ nʋɔn ˈtʋn.
2. ˈSrɩn -wɛ Zoova ˈˈɲɩn ˈˈɲnuun -ɛn?
ˈSrɩn Zoova ˈˈɲɩan ˈˈɲnuun ɩn ka: ‘Aʋ ˈjhe aʋaˈ ˈˈbho -e ˈdhou ŋwɔn.’ (Zro Colossiens 3:20) -Bho ˈˈɲnuun an sa ʋaˈ ˈˈbho -e ˈdhou ŋwɔn ˈjhe ɛˈ, ʋa poɛ Zoova -e ʋaˈ ˈˈbho -e ˈdhou ˈmʋnan in. (Proverbes 23:22-25) Zezi -toɛ- ˈo ˈgɔ ˈdhɔɛe ˈdhe ɛɛˈ dɩ ˈdhi -da ɔ nɩan ˈˈjhu ˈˈzaan -dhe ɛ. -Bho ɔ ˈgba ˈˈɩ mɔn -dhe ɛˈ, ɔ ˈjheɛ ɔɔˈ ˈcɛ ŋwɔn ˈˈdhe ɔ ˈˈduɛ ʋaˈ ˈsrɩn ˈˈjhriɛ-.—Luc 2:51, 52.
3. Ka ˈˈgbuzɔncɛ ˈbhɛɛ ʋʋ ˈye nʋn ˈˈdhe ʋʋ -nɩn Ɲɔnsoa ˈye -jhbhɛɛ -ɛ?
-Bho aʋ ˈbhle ˈˈɲnuun ɛnˈ, aʋa ˈbɔn ʋʋ ˈye Zoova aˈ dɩ -kman -ka aʋ kman ɔɔˈ dɩ -ke ɛ. -Kawɛ aʋ ˈye nʋn -wɛeˈ ʋʋ ˈye Zoova aˈ dɩ -kman -an? Aʋ ˈbhɛɛˈ aʋ ˈye dhɛ Biiblʋ ˈtmʋan da nʋn: ‘-ˈYe Zoova aˈ ghwlu i bhla ˈdhe -manˈ ˈˈjhu bho ˈˈdhe -ˈye ʋanˈ dɩ ˈtmʋn -bho -nɩn ɔ -dei ˈbho ŋmɛinˈˈ, -bho -nɩn ɔ sa nan ˈbho -jieˈˈ.’ (Deutéronome 6:7) Ɲɔn -ɔɔ ‘bhla dhɛ ˈi’ ˈdhe ɲɔn bho ɛ, ɔɔ za dhɛ nɩan dhueˈ dhe ɔɔ ˈyea ɛɛˈ dɩ ˈtmʋn. ˈKamɔn- -ke aʋ ˈye dhɛ nɩan dhueˈ ɛˈ dɩ ˈtmʋn ˈdhe aʋaˈ ˈˈɲnuun bho, ˈˈdhe ʋʋ -saˈ ˈˈmae-. Dhɛ Biiblʋ aˈ ˈˈjhriɛ -ˈnɛn ˈdha -mɛn -nɩn, dhɩ aʋ ˈbhɛɛa aʋ ˈyea i -jhii ˈˈdhe aʋ ˈyea Zoova aˈ dɩ ˈtmʋn ˈdhe aʋaˈ ˈˈɲnuun bho ɛ, aʋ ˈyɩ i ˈbɔn. Ɛ -kɔndɩ ˈjɛɛn- aʋ ˈye -da dhueˈ ˈkpa aʋ ˈye Biiblʋ ˈcɩan ˈbho ˈˈgbuzɔnˈ ˈdhe ˈdhɔɔ ooˈˈ ˈdhɔɔ ˈdhi. -Bho -nɩn dhueˈ ˈˈdhe se ˈˈɲnuun ˈbhle ɛˈ, -za ˈo nɔnˈˈ ˈdhɔɔ ooˈˈ ˈdhɔɔ -ˈye Ɲɔnsoa aˈ Ghwlu ˈcɩan.
KPA DHƐ I ˈŊWƆƐN ƝAN
ˈSrɩn ˈbhɛɛa -ɩn ˈyea ˈˈgbuzɔncɛ sʋn bho po -wɛeˈ ʋʋ ˈyea ˈmʋnan in -nɩn ɛn, ɩmɩn- -aa mun ˈcɩan-.
4. Aʋ -za aʋaˈ ˈˈɲnuun kplɩn kwai ˈdhe ɲʋndɩkman- ˈmʋn
ˈˈJhu ˈˈzaan anˈ kplɩn kwai -za ˈbhɛɛ ˈye ˈkledɩ -nɩn. -Kawɛ Biiblʋ ˈbhɛɛ ʋn ˈye ˈˈɲnuunbhleʋn sʋn bho po -ɛ? Zro Jacques 1:19, 20, -ˈmɛn aʋ ˈtmʋn ideedɩ- nɩn anˈ dɩ:
-
Ka ˈˈɲnuunbhleʋn ˈbhɛɛ ʋʋ ˈyeɛ -to -ka ʋʋ kman ʋaˈ ˈˈɲnuun anˈ dɩ -bho ʋʋ -nɩn ʋa sa ghwlu -ɛ?
-
Dhɛɛdɩ- ˈˈɲnuunbhleʋn ˈse ʋaˈ ˈˈɲnuun kplɩn kwai -za i -da ˈcɛn ɛn nʋbʋ -ɛ? a
5. Aʋ -fuo- aʋaˈ ˈˈɲnuun ˈdhei
-Bho aʋ ˈye aʋaˈ ˈˈɲnuun ˈdhei -fuo- ɛˈ, ɛ -kɔn dɩ aʋ -nɩn ʋbʋ ˈye ˈɲnʋnkpaoˈ -e ɲmau ɔˈ i ˈpeɛn- -e dhɩ nɩan ˈbho ʋbʋ ˈˈbun anˈ dɩ ˈtmʋn. Ɩanˈ dhɩ tu aˈ ˈtmʋan ˈbhɛɛˈ ɛ ˈye ˈkle -nɩn ˈdhe aʋ bho. Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
Dhɛɛdɩ- ˈɲnʋnkpaoˈ -e ɲmau ɔˈ i ˈpeɛn ɛnˈ dɩ aˈ ˈtmʋan -nɩn ˈkle ˈdhe ˈˈɲnuunbhleʋn- -ˈnʋʋn bho -ɛ?
-
Ka ˈˈɲnuunbhleʋn- -ˈnʋʋn nʋn ˈɲnʋnkpaoˈ -e ɲmau ɔˈ i ˈpeɛn ɛnˈ dɩ ˈtmʋn sʋn ˈdhe ʋaˈ ˈˈɲnuun bho -ɛ?
-Ka dhɩsaɩn an muan ˈˈkpe ˈkpa- ˈnɔn Satan anˈ ˈkmʋn nʋn ˈdhi ɛ, Biiblʋ -zɛɛ ɲan ˈmɛn. Zro 2 Timothée 3:1, 13, -ˈmɛn aʋ ˈtmʋn ideedɩ- nɩn anˈ dɩ:
-
Ɲʋnsaɩn- anˈ dɩ ˈtmʋʋan ˈdhe ɛɛˈ ˈˈjhri -mɩɩnˈˈ 13 ˈdhi aˈ -ˈnʋʋn an ˈnɛn ˈˈɲnumɩɩnˈˈ ˈˈmlan ʋʋ -nɩn ʋa yea i ˈpɛn. Dhɛɛdɩ- ɛ -kɔn dɩ ˈˈɲnuunbhleʋn ˈye ʋaˈ ˈˈɲnuun ˈɲnʋnkpaoˈ -e ɲmau ɔˈ i ˈpeɛn ɛnˈ dɩ ˈtmʋʋn- ˈˈdhe -ka ʋʋ ˈyea nʋn -weɛˈ ʋʋ ˈsea ˈe ɲʋn anˈ ˈˈklɛ ˈdhi ˈkpa i ɛ, ʋʋ ˈyʋbʋ -tɔɔn?
Jhibhodɩ-
Zoova aˈ -Bobhlaʋn an ˈˈsiiɛ ˈsɛɩ -e videe ˈzɔn -ɩan- po ˈˈɲnuunbhleʋn sʋn bho -wɛeˈ ʋʋ ˈye ʋaˈ ˈˈɲnuun ˈɲnʋnkpaoˈ -e ɲmau ɔˈ i ˈpeɛn ɛnˈ dɩ ˈtmʋʋn- ˈˈdhe ʋʋ ˈyʋbʋ ˈdhei -fuo- ɲɔn -ˈsʋbʋ dhɛsaʋn ˈˈdhrui nʋn. Ɩanˈ -ˈnɩɩn ka:
-
Aʋ -fuo- aʋaˈ ˈˈɲnuun ˈdhei (video)
-
“Parler de sexualité à son enfant” (Réveillez-vous! no 5 2016)
6. -ˈJhe -manˈ ˈˈbho -e ˈdhou ŋwɔn
-Kawɛ ˈˈɲnumɩɩnˈˈ -e ɲʋnjhae a ˈjhea ʋaˈ ˈˈbho -e ˈdhou ŋwɔn ɔn, ʋʋ ˈyeɛ -to ˈdhe ʋaˈ -ghwlusʋn ˈdhi. Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
Dhɛɛdɩ- ɛ -kɔn dɩ -bho ˈˈjhu ˈˈzaan an sa ˈe ɔɔˈ ˈˈbho -e ˈdhou bho ghwlu ɛˈ, ɔ ˈyeɛ nʋn ˈdhe dhɛŋwɔnjheɛ- ˈmʋn -ɛn?
-
-Kawɛ ˈˈjhu ˈˈzaan ˈye ˈdhe ɔɔˈ ˈˈbho -e ˈdhou bho -ghwlu sʋn nʋn -wɛeˈ ɔ ˈyeɛ -to -ka ɔɔ ˈjhʋbʋ ŋwɔn -ɔn?
Zro Proverbes 1:8, -ˈmɛn aʋ ˈtmʋn ideedɩ- nɩn anˈ dɩ:
-
-Bho ˈˈbho -e ˈdhou ˈˈdu ʋaˈ ˈˈjhu ˈsrɩn ɛnˈ, dhɛwɛ- ɔ ˈye nʋn -ɛn?
7. Aʋ ˈkpa -da dhueˈ aʋ ˈye Zoova ˈˈɲɩn ˈbho ˈˈgbuzɔnˈ
ˈˈGbuzɔncɛ- nɩan Zoova aˈ -Bobhlaʋn an za ˈo nɔnˈˈ ˈdhɔɔ ooˈˈ ˈdhɔɔ ʋa yea Ɲɔnsoa ˈˈɲɩn -da dhueˈ. Ka ʋa nʋn dhɩ kpɔˈˈ -po sʋn ˈbho ɔɔˈ -zɔn tu ˈˈkpe -ɛ? Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
-Kawɛ ˈˈgbuzɔncɛ ˈbhɛɛ ʋʋ ˈye ʋaˈ ˈˈjɛ kpɔˈˈ -po sʋn nʋn ˈˈdhe ʋʋ ˈye Ɲɔnsoa ˈˈɲɩn jheejhee -ɛ?
-
-Kawɛ ˈˈɲnuunbhleʋn anˈ dhueˈ ˈbhɛɛ ɔ ˈye nʋn -wɛeˈ ˈˈgbuzɔncɛ ɛˈ Ɲɔnsoa ˈˈɲɩɛn- ˈye trɔnˈ ˈbhle -ɛ?—Ŋmʋn foto nɩan ˈbho ˈcɩaandhɛ- nɛn ɛnˈ -deenanˈ jha.
-
-Bho -man sa ˈbɔn -nɩn -manˈ ˈˈgbuzɔncɛ ˈye Biiblʋ ˈcɩan anˈ, dhɛwɛ- ˈbhɛɛ -ɛ ˈyeɛ nʋn ˈˈdhe ɛɛˈ nʋanˈ ˈye ˈˈɩ -kman?
ˈDhe Israɛ -bhlʋaˈ tɛnˈˈ -dhe ɛ, Zoova a ˈbɔn ˈˈgbuzɔncɛ ˈye ˈcreedhɩ aˈ dɩ ˈtmʋn jheejhee. Zro Deutéronome 6:6, 7, -ˈmɛn aʋ ˈtmʋn ideedɩ- nɩn anˈ dɩ:
-
-Kawɛ ˈbhɛɛ -ˈye srɩn nɩn ˈˈjhriɛ ˈˈdu sʋn nʋn -ɛn?
Dhɩ ɲʋn ˈbhɛɛa ɲʋn ˈyea nʋn ˈbho ˈˈgbuzɔncɛ ɛˈ Ɲɔnsoa ˈˈɲɩnzɔn- ˈˈkpe ɛ:
-
Dhɩ ɲʋn ˈyea ˈcɩan ˈdhe ˈˈdhruigbooɛ ˈmʋn anˈ kpɔˈˈ -poɛ-.
-
Biiblʋ aˈ -bo -manˈ ˈˈgbuzɔncɛ ˈyea ˈmʋnan ˈdhi ˈjhee- -mɔn aʋ ˈye ˈdhii zro ˈˈdhe -ɔɔˈ dɩ aʋ ˈye ˈtmʋn.
-
-Bho -manˈ ˈˈɲnuun -nɩn -mɩɩnˈˈ ɛnˈ, -ˈmɛn jri dhɩ ˈdha ˈe ˈˈɲnumɩɩnˈˈ bho ˈbho jw.org ˈˈkpe.
-
-Bho -manˈ ˈˈɲnuun -nɩn ɲʋnjhae ɛˈ, -ˈmɛn aʋ mun ˈo jw.org ˈˈkpe ˈˈdhe ˈsɛɛ -ɛɛ ˈtmʋan ɲʋnjhae aˈ dɩ ɛ, aʋ ˈye ɛɛˈ dɩ ˈtmʋn.
-
-Nɩn -manˈ ˈˈɲnuun -sraan ɲʋn nɩan ˈe Biiblʋ ˈdhi.
-
Aʋ ˈjhe video dhueˈ i ˈbho jw.org ˈˈkpe -ˈmɛn aʋ ˈtmʋn ɔɔˈ dɩ.
ƝƲN -ˈNƲƲN ˈNAAN: “ˈˈƝnunmɩɩnˈˈ se ˈbhɛɛ- ʋʋ ˈye Biiblʋ i ˈŋwɔn.”
-
Ka -man mun ˈdha -a?
DHƐWƐ- ˈCƖAN-?
Zoova a ˈbɔn ˈˈɲnuunbhleʋn ˈye ʋaˈ ˈˈɲnuun anˈ dɩ -kman, ʋʋ ˈyʋbʋ dhɛ -tɔɔn ˈˈdhe ʋʋ ˈyʋbʋ ˈdhei -fuo-. ˈˈƝnuun- ˈye ʋaˈ ˈˈbho -e ˈdhou ŋwɔn ˈjhe -ke.
Dhɛwɛ- ˈŋwɔn in -ɛn?
-
Ka ˈˈɲnuunbhleʋn ˈbhɛɛ ʋʋ ˈye ʋaˈ ˈˈɲnuun dhɛ -tɔɔn ˈˈdhe ʋʋ ˈyʋbʋ ˈdhei -fuo- -ɛ?
-
Ka ˈˈɲnuun ˈbhɛɛ ʋʋ ˈyeɛ -to -ka ʋa ˈjhea ʋaˈ ˈˈbho -e ˈdhou ŋwɔn -ɔn?
-
-Bho ˈˈgbuzɔncɛ ɛɛ sa nɔnˈˈ kpɔˈˈ po ʋa sa Ɲɔnsoa ˈˈɲɩn ˈdhɔɔ ooˈˈ ˈdhɔɔ ˈbho ˈˈgbuzɔn ɔnˈ, ˈjɛɛn -wɛ ʋa ˈjhee ˈbho -ɛ?
ˈBƆN DHƖ -ˈNƖƖN ANˈ I ˈŊWƆAN IN
ˈCɩaandhɩ- -wɛ -ɩan- mun -manˈ ˈˈɲnuun sʋn bho -po -wɛeˈ ʋʋ ˈye ɲʋnjhae- -ʋaˈ ɲɔnsoadhɛ kuai ˈkpa ˈdhe ɲan -an?
“Six valeurs à transmettre aux enfants” (Réveillez-vous! no 2 2019)
Ɲʋn -an ˈˈdua ʋaˈ ˈˈbho -e ˈdhou ˈkpa -gelaˈˈ aˈ dɩ ɛ, Biiblʋ a ˈˈɲʋbʋ ˈsrɩn -ɩn ˈyʋbʋ sʋn bho po ˈbho ɛɛˈ nʋanˈ.
“Prendre soin de ses parents âgés: qu’en dit la Bible?” (Dɩ ˈghwlʋa ˈo ɛntɛɛnɛtɩ ˈˈkpe ɛ)
-Ka ˈˈjhu dhueˈ ˈyea nʋn ˈˈdhe ɔ ˈyea ɔɔˈ ˈˈɲnuun ˈbhle ɛ, ɔ seɛ jhibho- -dhe. Ɛ ˈyea ˈo ˈbhɔɔ- ɛɛˈ nʋanˈ ˈghwlʋɔ kwai.
Zoova -tɔɔn -abʋ -ka -a ˈyea -aaˈ ˈˈɲnuun ˈbhɔɔa- sʋn nʋn ˈmɛn (5:58)
-Ŋmʋn -ka ˈˈbho -ˈˈwe ˈbhɛɛa ʋʋ ˈyea -jhbhɛɛ nɩan ˈbho ʋbʋ -e ʋaˈ ˈˈɲnuun -ɲmai ˈɲnɩn i -kuu ɛ.
“Comment un père peut-il rester proche de son fils?” (La Tour de Garde, 1er novembre 2011)
a “Ɲʋn ˈsrɩn ˈˈduɛ-”-ɛɛˈ dɩ ˈtmʋan- ˈdhe Biiblʋ ˈdhi ɛ, ɛ ˈdha ˈˈjhu ˈˈzaan anˈ kplɩn kwai -za -e ɔɔˈ dhɛtɔɔɛn- -e ɔɔˈ jiebhopoɛ- -wɛeˈ ɔ ˈye tɔˈinaansʋn -saʋn in ˈˈtai- ˈˈdhe ɔ ˈye tɔˈinaansʋn ˈjɛʋn ˈbhle. Ɲʋn anˈ nʋn -e ˈˈjhu ˈˈzaan dhɛsaʋn- ˈˈdhrui ˈdhe- ˈbho ɛɛˈ nʋanˈ.—Proverbes 4:1.
