ˈCƖAANDHƐ- 54
Dhbho “-ˈˈgwlɩde- -kʋɔn- -cɛɛan ˈˈjhrii” ɔɔ nʋan
Zezi -nɩn ɲɔnsoagbu aˈ ˈˈdhrujhei-. (Éphésiens 5:23) ˈZɩan an, ˈdhe ˈjhaʋn ˈdhi -mɔn Zezi -nɩn -wɛeˈ ɔɔ po ɔɔˈ dhɛcɩaʋn jie bho da ˈbhlʋa ˈˈkpe ˈdhe “-ˈˈgwlɩde- -Kʋɔn- -cɛɛan ˈˈjhrii” ɔˈ ˈsaa ˈmʋn. (Zro Matthieu 24:45) Zezi ɔˈ ˈˈjɛ -mɔn de “-kʋɔn” -ˈnɔn dhbho kwa. -Bho ɛ -nɩn -kʋɔn -ˈnɔn -ɔɔ sa dhbho nɔn jie bho po -mɔnˈ -dhe ɛˈ, Klisɩ -nɩn ɔɔˈ ˈbhlei ˈˈdhe ɔɔ ˈˈduɛ Klisɩ ɔˈ ˈdhoudhi -ˈˈwe aˈ dɩ. -Ɔ -nɩn -kʋɔn- -ˈnɔn -ɔn? ˈˈDhe ka ɔɔ nʋn -aaˈ dɩ ˈˈdu sʋn -ɛn?
1. -Ɔ -nɩn “-ˈˈgwlɩde- -kʋɔn- -cɛɛan ˈˈjhrii” -ɛ?
Ɲmau dhueˈ -aeˈˈ ɲmai aˈ kpɔ Zoova a za ˈo jheejhee -ʋa- po ɔɔˈ ˈcɛ jie bho. (Malachie 2:7; Hébreux 1:1) Zezi ˈmɛan, dhbhoʋn -e ɲankɔʋn nɩan Zelizalɛmʋn ɛn, ʋbʋ- po ɲɔnsoagbu jie bho. (Actes 15:2) Ɛɛˈ dhɛ tu -mɛn -ɛɛ nʋʋɛn ˈzɩan -ke. Ɲankɔʋn anˈ kpɔ ˈˈzaan- -ʋʋ nɩan Zoova aˈ -Bobhlaʋn anˈ -Glibha aˈ jiebhopoʋn ɛn, ʋbʋ -a ˈˈdu ɲɔnsoadhiidhɛ- -e -bobhlaa a dɩ. Ʋaˈ kpɔ -ˈnɔn -mɔn ɲɔn ɔn ˈdhaa ‘-ˈˈgwlɩde- -kʋɔn- -cɛɛan ˈˈjhrii Zezi dea ˈo dhi.’ (Matthieu 24:45a) Ɲʋn anˈ klɛɛ nɩan ˈe -Glibha aˈ jiebhopoʋn- ˈˈklun -nɩɛn- kletiɛn Ɲɔnsoa aˈ -zuu ˈcra i. Dhɛ nɩan ʋaˈ ˈmʋnandɩ- -mɛn -nɩn -bho ʋʋ ˈmɛn ɛnˈ, ʋʋ -nɩn Zezi ɔɔ muɛn -da dhueˈ -nɩn ˈdhe ɔɔˈ ˈbheɔglɔ ˈdhi ˈdhe jhaʋn ˈdhi.
2. Ɲɔnsoadhiidhɛ- -wɛ -ˈˈgwlɩde- -kʋɔn- ɔn ˈˈɲɩn ɲʋn -ɛn?
Zezi ˈnaan -ˈˈgwlɩde- -kʋɔn- ɔn muɛn ‘ʋaˈ dhiidhɛ ˈˈɲɩn- ˈdhe nɔnˈˈ nmɔan ˈo dhi ˈdhi.’ (Matthieu 24:45b) Dhiidhɛ ɛ nʋɛnˈ ɲɔn ɔn yea ˈkpɩ ˈbhle ˈˈdhe ɔɔ yea ku ˈzɔin flɔn. ˈKamɔn -ke, ɲɔnsoadhiidhɛ- -ɛ nɩan dhɩ Ɲɔnsoa a tɔɔan abʋ ˈdhe ɔɔˈ ghwlu ˈdhi ɛ, ɩan ˈˈɲɩɛn -aʋ ˈkpɩ -aa yea ˈo Zoova ˈˈbun in kpʋn ˈˈdhe -aa yea dhbho Zezi dea -aʋ kwa ɔɔˈ nʋanˈ ˈbhɛɛ-. (1 Timothée 4:6) ˈDhe -aaˈ ˈˈdhruigbooɛ klaeˈˈ -e -mɩɩnˈˈ ˈmʋn, ˈdhe ɲɔnsoasɛɩ -e videe -ɩn tbha ˈo Biiblʋ ˈˈkpe i ˈdhi -aa ˈjhe ɲɔnsoadhiidhɩ -ɩan po -aʋ sʋn bho -aa jhibho Ɲɔnsoa aˈ -glʋˈ dɩ ˈˈdhe -jhbhɛɛ nɩan ˈo -abʋ ˈɲnɩn ɛn ku i.
KPA DHƐ I ˈŊWƆƐN ƝAN
Dhɛɛdɩ- “-ˈˈgwlɩde- -kʋɔn- -cɛɛan ˈˈjhrii,” -ɔ nɩan -glibha aˈ jiebhopoʋn ɔɔˈ dhbho kɔandɩ ɛ, ɛmɛn- -aa mun ˈjhe-.
3. Zoova aˈ ˈcɛ ˈye kpɔˈˈ -poɛ-
Zezi -ɔɔ po -Glibha aˈ jiebhopoʋn- jie bho -wɛeˈ ʋa po dhbho Zoova aˈ -Bobhlaʋn an nʋan kpɔˈˈ. ˈKamɔn- ɔ nʋn ˈdhe kletiɛn -ˈˈwe nɩan tɛnˈˈ ɛnˈ nɔnˈˈ -ke. Po ˈo VIDEO.
Zro 1 Corinthiens 14:33, 40, -ˈmɛn aʋ ˈtmʋn ideedɩ- nɩn anˈ dɩ:
-
-Ka Zoova a ˈbɔan ɔɔˈ -Bobhlaʋn ˈyea kpɔˈˈ -poɛ- ɛ, ka Biiblʋ aˈ ˈˈjhri -ˈnɩn an nʋn ɛnˈ -to sʋn -ɛn?
4. -ˈˈGwlɩde- -kʋɔn ɔn poɛ -aaˈ -bobhladhbho kpɔˈˈ
-Bobhlaa- -kɔndɩ -dhe ˈjɛɛn- ˈdhe kletiɛn -ˈˈwe kɔan ɲan bho. Zro Actes 8:14, 25, -ˈmɛn aʋ ˈtmʋn ideedɩ- nɩn anˈ dɩ:
-
ˈDhe kletiɛn -ˈˈwe kɔan ɲan ˈˈklun ɛn, -ɔɔ po -bobhladhbho jie bho -dhe -ɛ?
-
Dhbhoʋn- toa ˈo ˈsrɩn ɛn, ka Piɛɛ -e Zan nʋn -ɛn?
Dhbho kɔandɩ -Glibha aˈ jiebhopoʋn- poa kpɔˈˈ ɔ, ɔmɔn- -nɩn -bobhladhbho-. Po ˈo VIDEO.
Marc 13:10, -ˈmɛn aʋ ˈtmʋn ideedɩ- nɩn anˈ dɩ:
Zezi ˈtmʋɩnˈ -ka -bobhladhbho kɔandɩ ɛ. Zro-
Dhɛɛdɩ- -bobhladhbho- -kɔndɩ ˈdhe -Glibha aˈ jiebhopoʋn- ˈˈjhriɛ ˈdhe -ɛ?
-
Dhɛɛdɩ- “-ˈˈgwlɩde- -kʋɔn- -cɛɛan ˈˈjhrii” ˈye -bobhladhbho- -ˈnɔn jie bho po -ɛ?
5. -ˈˈGwlɩde- -kʋɔn ɔn poɛ dhɩ jie bho
-Glibha aˈ jiebhopoʋn -an ˈˈɲɩn Zoova aˈ -Bobhlaʋn anˈ klɛɛ nɩan da ˈbhlʋa ˈˈkpe ˈsrɩn. Ka ʋa nʋn dhɩ ʋʋ ˈyea nʋn anˈ ˈbho -za sʋn -ɛn? -Ka -Glibha aˈ jiebhopoʋn- nɩan ˈdhe kletiɛn -ˈˈwe kɔan ɲan an nɔnˈˈ ɔn nʋan, ɛmɛn- -aa mun ˈjhe-. Zro Actes 15:1, 2, -ˈmɛn aʋ ˈtmʋn ideedɩ- nɩn anˈ dɩ:
-
ˈBho dɩwɛ- ˈˈkpe kletiɛn -ˈˈwe kɔan ɲan ˈse ghwlu i ˈŋwɔɔn-?
-
Ɲʋnwɛ- Pɔʋ -e Banabe -e kletiɛn -ˈˈwe -ˈnʋʋn mun ˈe bho -ʋʋ pʋbʋ sʋn bho -ɛ?
Zro Actes 15:12-18, 23-29, -ˈmɛn aʋ ˈtmʋn ideedɩ- nɩn anˈ dɩ:
-
ˈDhe dɩ -ˈnɩn ˈdhi ɛ, -glibha aˈ jiebhopoʋn- kɔan ɲan ˈyea ˈo dhɛ -za a, dhɛwɛ- ʋʋ nʋn -ɛn?—-Ŋmʋn ˈdhe ɩanˈ ˈˈjhri -mɩɩnˈˈ 12, 15 -e 28 ˈdhi.
Zro Actes 15:30, 31 -e 16:4, 5, -ˈmɛn aʋ ˈtmʋn ideedɩ- nɩn anˈ dɩ:
-
ˈSrɩn -glibha aˈ jiebhopoʋn- ˈˈɲɩan kletiɛn -ˈˈwe kɔan ɲan an, -kawɛ ʋʋ nʋn ɩanˈ kpʋn sʋn -ɛn?
-
Ʋʋ ˈjhea ˈsrɩn -ˈnɩn ŋwɔn ɔn, -kawɛ Zoova nʋn ʋaˈ ˈˈniman -po sʋn -ɛn?
Zro 2 Timothée 3:16 -e Jacques 1:5, -ˈmɛn aʋ ˈtmʋn ideedɩ- nɩn anˈ dɩ:
-
-Bho -Glibha aˈ jiebhopoʋn- nɩan ˈzɩan ˈye ˈo dhɛ -za ʋʋ ˈye nʋn ɛnˈ, -dawɛ ʋa ŋmʋn -ɛn?
ƝƲN -ˈNƲƲN ˈNAAN: “-Glibha aˈ jiebhopoʋn- -nɩɛn- ɲiɔo- -ka ʋʋ nɩan. -Mɛn dhɛɛdɩ- ʋʋ ˈye ˈo dhɛ ʋa ˈtmʋan ˈdhe bhla -a?”
-
Dhɛɛdɩ- deɛ -gwlɩˈˈ -ka ɛ nɩan Zezi -ɔɔ poa -Glibha aˈ jiebhopoʋn- jie bho -ɛ?
DHƐWƐ- ˈCƖAN-?
-Glibha aˈ jiebhopoʋn -nɩn “-ˈˈgwlɩde- -kʋɔn- -cɛɛan ˈˈjhrii” Zezi dea dhbho kwa. Ʋbʋ- -a po dhɩ jie bho ˈˈdhe -ʋa ˈˈɲɩn Zoova aˈ -Bobhlaʋn anˈ klɛɛ nɩan da ˈbhlʋa ˈˈkpe ɲɔnsoadhiidhɛ.
Dhɛwɛ- -ˈŋwɔn in -ɛn?
-
-Ɔ de “-ˈˈgwlɩde- -kʋɔn- -cɛɛan ˈˈjhrii” dhbho kwa -a?
-
Ka -Glibha aˈ jiebhopoʋn an nʋn -aaˈ dɩ ˈˈdu sʋn -ɛn?
-
Ka -Glibha aˈ jiebhopoʋn nɩan “-ˈˈgwlɩde- -kʋɔn- -cɛɛan ˈˈjhrii” ɛ, deɛ -gwlɩˈˈ ˈmɛn?
ˈBƆN DHƖ -ˈNƖƖN ANˈ I ˈŊWƆAN IN
Ka -Glibha aˈ jiebhopoʋn- nʋn kpɔˈˈ -de sʋn -ɛn?
“Quˈest-ce que le Collège central des Témoins de Jéhovah?” (Dɩ ˈghwlʋa ˈo ɛntɛɛnɛtɩ ˈˈkpe ɛ)
-Kawɛ -Glibha aˈ jiebhopoʋn an nʋn -wɛeˈ ɲɔnsoasɛɩ ʋa ˈˈsiia ˈzɔn ˈye -gwlɩˈˈ -de ka -nɩn -ɛn?
Ka -Glibha aˈ jiebhopoʋn an nʋan dhbho Zezi dʋbʋ kwa aˈ ˈjhe sʋn ɛn?
-Kawɛ -aaˈ ˈˈdhruigbooɛ -mɩɩnˈˈ -e klaeˈˈ a nʋn ɛnˈ -to sʋn -ka Zoova a poa -Glibha aˈ jiebhopoʋn- jie bho -ɛ?