ˈCƖAANDHƐ- 59
-Bho ɲʋn an sa ʋn ˈkle ˈˈdu ˈɛ, -ˈbhɛɛˈ -ˈye ˈkpɩi kpʋn
ˈDhe nɔnˈˈ -dhɛ ˈˈzaan ˈdhi -aeˈˈ ˈdhe ˈkmʋn anˈ ɲan an, ɲʋn an muɛn Zoova aˈ -Bobhlaʋn anˈ klɛɛ ˈkle ˈˈdu. Ɛɛˈ dhɛ tu ˈye -manˈ faʋn- ˈbhle?
1. Dhɛɛdɩ- -a ˈyeɛ -gwlɩˈˈ de -ka ɲʋn an muan -aʋ ˈkle ˈˈdu -ɛ?
Biiblʋ ˈseɛ i ˈˈdu, ʋn ˈnaan: “Ɲʋn anˈ klɛɛ -ʋa- ˈbɔan -ʋʋ ˈyea ˈo Ɲɔnsoa ˈˈbun in kpʋn ˈdhe Klisɩ Zezi ˈmʋn ɛn, ɲʋn an mubʋ ˈkle ˈˈdu.” (2 Timothée 3:12) Zezi se Satan anˈ ˈkmʋn nʋn anˈ ɲɔn -nɩn, ɛɛˈ dɩ ɲʋn ˈˈduɔ ˈkle -dhe. -Abʋ -ke ɛ, -a se ˈkmʋnkpeɲʋn -nɩn. Ɛɛˈ dɩ -bho ˈbhlʋɩbhleʋn -e pliegbi- -saɩn an sa -aʋ ˈkle ˈˈdu ɛˈ, ɛɛˈ ˈˈmaan- -abʋ tai.—Jean 15:18, 19.
2. -Kawɛ -a ˈye -aaˈ ˈˈjɛ taˈˈ po ˈkledɩ- -aa muan ˈjhe- ɩanˈ dɩ -ɛ?
-A ˈye Zoova aˈ -gwlɩˈˈ -deɛ- i -kuu ˈdhe -a ˈmʋn. -A ˈˈdhuo- nɔnˈˈ ˈmʋn zɔn ooˈˈ zɔn -a ˈyeɔ bhae- ˈˈdhe -a ˈye ɔɔˈ ghwlu ˈdhii zro. -A mun ˈˈdhruigbooɛ- ˈmʋn jheejhee. Ɩanˈ dhɩ tu a muɛn -aʋ sʋn bho -po -a ˈye ˈkledɩ ooˈˈ ˈkledɩ ˈˈdhru ˈjha. -Bho ɛ -nɩn -aaˈ ˈˈgbuzɔncɛ- -ʋa- sa -aʋ ˈkle ˈˈdu -mɔnˈ -dhe ɛˈ. Dhbhoi- Pɔʋ ɲʋn ˈˈdua ˈkle kpɛ -duuˈˈ ɛ, dhɛ ɔ ˈcrea ɛ ka: “Zoova -nɩɛn ˈman sʋnbhopoi-, faʋn ˈse ʋn nʋɩn.”—Hébreux 13:6.
-Bho -aa sa bo bhla jheejhee ɛˈ, ɛɛ muɛn -aʋ sʋn bho -po -aaˈ -pɛɛ ˈye i ku. -Bho -aa sa bo bhla aˈ, ɛɛ nʋɛnˈ -aa yea Zoova aˈ -gwlɩˈˈ -deɛ- ˈcɩan ˈˈdhe -aa yea -glɔɲiɔn ɔnˈ -plee -dɩ ˈbhɔ. (Proverbes 29:25) -Bho -aa sa -pɛɛ i -kuu ˈzɩan ˈdhe -bobhlaa aˈ, ɛɛ muɛn -nʋn -bho ˈbhlʋɩbhleʋn- ˈnaan -a -ɲnaan -bobhlaa i ɛˈ, -a ˈseɔ i -ɲnaan in.—1 Thessaloniciens 2:2.
3. -Bho -a kpʋn ˈo Zoova ˈˈbun in ˈdhe ˈkledɩ ˈdhi ɛˈ, ˈjɛɛn -wɛ -aa ˈjhee ˈbho -ɛ?
-Bho ɲʋn an sa -aʋ ˈkle ˈˈdu ɛˈ, ɛ se -aaˈ ˈmʋnandɩ- -nɩn. ˈKlaa -bho -aa sa ˈkpɩ i kpʋn ˈdhe ˈkledɩ- ˈdhi ɛˈ, -aaˈ dhɛgwlɩdeɛ- ɛɛ kuɛ i. Ɛɛ nʋɛnˈ -ke -aa yea Zoova i ˈˈkʋʋan. Dhɛ nɩan ˈo -mɛn -nɩn, -da -a nɩan ˈe ˈkledɩ ˈdhi ɛ, ɔ poɛ -aʋ sʋn bho. (Zro Jacques 1:2-4.) -Bho ɲʋn an sa -aʋ ˈkle ˈˈdu ɛˈ, ɛɛ kpʋɛn Zoova -glʋˈ. ˈˈDhe -bho ɔɔ sa -aʋ ˈjhe -aa sa ˈkpɩ i kpʋn ɛnˈ, ɛ ˈbhleɛ ɔɔˈ ˈmʋnan-. Biiblʋ ˈjɛɛn ɛɛ ˈtmʋn, ʋn ˈnaan: “-Bho aʋa sa ˈkle ˈjhe dhɛjɛɛn- aʋa nʋan ɛɛˈ dɩ ɛˈ, ɛ -nmɔn ˈe Ɲɔnsoa ˈˈjhriɛ ˈdhei.” (1 Pierre 2:20) Zoova a muɛn ɲʋn anˈ klɛɛ kpʋan ˈbho ɔ ˈˈbun in geiˈˈ -za. Ɔɔ mubʋ ˈkmʋn sea ˈˈtianˈ ˈbhle ˈˈɲɩn-. ˈDhe ʋanˈ ˈkmʋn tu ˈdhi ɛ, ɲʋn anˈ klɛɛ muɛn Zoova ˈˈɲɩn-. ˈˈDhe ɲɔn ooˈˈ ɲɔn ˈse ɔɔ ˈˈɲɩɛn- dɩ ˈˈbun -tbha i.—Matthieu 24:13.
KPA DHƐ I ˈŊWƆƐN ƝAN
Dhɛ ˈyea -aʋ sʋn bho po -wɛeˈ -a ˈyea ˈo Zoova ˈˈbun in kpʋn -bho ɲʋn an sa -aʋ ˈkle ˈˈdu -e geiˈˈ -aa muan ˈo ˈjhee- ɛˈ, ɛmɛn- -man mun ˈcɩan-.
4. -ˈBhɛɛ -ˈye ˈkpɩ i kpʋn -bho -manˈ ˈˈgbuzɔncɛ ɛ sa ʋn ˈkle ˈˈdu
Dhɛ -aa ˈˈɲɩan Zoova a, ka -aaˈ ˈˈgbuzɔncɛ -ˈnʋʋn an muan -aʋ ˈkle ˈˈdu ɛɛˈ dɩ ɛ, Zezi zela- -aʋ -glʋˈ ˈmɛn. Zro Matthieu 10:34-36, -ˈmɛn aʋ ˈtmʋn ideedɩ- nɩn anˈ dɩ:
-
-Bho ɲɔn ɔn sa ˈbɔn ɔ ˈye Zoova ˈˈɲɩn ɛnˈ, dhɛwɛ- ɔɔˈ ˈˈgbuzɔncɛ ˈbhɛɛˈ ʋʋ ˈye ˈtmʋn -aeˈˈ ʋʋ ˈye nʋn -ɛn?
-Bho -ˈye -bo dhueˈ -ɔɔ toɛ ˈjhe ɛˈ, po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
Dhɛwɛ- -ˈye nʋn -bho -manˈ ˈˈgbuzɔncɛ -aeˈˈ -manˈ dhaiˈˈ ˈse ˈbɔn -ˈye Zoova ˈˈɲɩn -ɛn?
Zro Psaume 27:10 -e Marc 10:29, 30, -ˈmɛn aʋ ˈtmʋn ideedɩ- nɩn anˈ dɩ:
-
-Bho -aaˈ ˈˈgbuzɔncɛ- -aeˈˈ dhaiˈˈ -ˈˈwe -ˈnʋʋn ˈse ˈbɔn -a ˈye Zoova ˈˈɲɩn ɛnˈ, -kawɛ dɩ ˈtmʋan ˈdhe Biiblʋ aˈ ˈˈjhri -ˈnɩn ˈdhi ˈbhɛɛ ɩn ˈye -aʋ sʋn bho po -ɛ?
5. -Ka ˈkledɩ ˈye ɩn -nɩn ɛnˈ, kpa Zoova aˈ ˈˈɲɩan ɲan
-Bho ɲʋn an sa -aʋ ˈkle ˈˈdu dhɛ -aa ˈˈɲɩan Zoova ɛɛˈ dɩ ɛˈ, -a ˈye -pɛɛ i -kuu -wɛeˈ -a ˈye ɔɔˈ ˈˈɲɩan ɲan kpa. Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
Ɲʋn -an dɩ ˈtmʋʋan ˈnɔn video nɔn ˈdhi ɛ, ka ʋaˈ -bo nʋn -manˈ -pɛɛ i -kuu sʋn -ɛn?
Zro Actes 5:27-29 -e Hébreux 10:24, 25, -ˈmɛn aʋ ˈtmʋn ideedɩ- nɩn anˈ dɩ:
-
-Bho ˈbhlʋɩbhleʋn ˈnaan -a ˈbhɔ ˈˈdhruigbooɛ- -aeˈˈ -bo -bhlaa -mɔnˈ -dhe ɛˈ, dhɛɛdɩ- ɛ -kɔndɩ -a ˈye Zoova aˈ ˈˈɲɩan ɲan kpa -a?
6. Zoova a muɛn ʋn sʋn bho -po -ˈye ˈkpɩ i kpʋn
Zoova aˈ -Bobhlaʋn anˈ klɛɛ, -mɩɩnˈˈ -e klaeˈˈ -ʋʋ nɩan ˈbhlʋɩ aˈ klɛɛ ˈdhii kpʋɛn ˈbho ɔ ˈˈbun in -bho ɲʋn an sʋbʋ ˈkle ˈˈdu -mɔnˈ -dhe ɛˈ. Dhɛ pʋbʋ sʋn bho -bho -ˈyeɛ ˈjhe ɛˈ, po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
Dhɛwɛ- po Zoova aˈ -Bobhlaʋn -ˈnʋn sʋn bho ˈˈdhe ʋʋ kuu i -ɛ?
Zro Romains 8:35, 37-39 -e Philippiens 4:13. -ˈmɛn aʋ ˈtmʋn ideedɩ- nɩn anˈ dɩ:
-
-Ka -ˈbhɛɛa -ˈyea ˈkledɩ ooˈˈ ˈkledɩ ˈˈdhru ˈjha a, -kawɛ Biiblʋ aˈ ˈˈjhri nɩn an nʋn ɛnˈ -to sʋn -ɛn?
Zro Matthieu 5:10-12, -ˈmɛn aʋ ˈtmʋn ideedɩ- nɩn anˈ dɩ:
-
-Bho ɲʋn an sa -aʋ ˈkle ˈˈdu -mɔnˈ -dhe ɛˈ, dhɛɛdɩ- -a ˈbhɛɛ -a ˈye ˈmʋnan in -nɩn -ɛn?
Zoova aˈ -Bobhlaʋn anˈ mliɔn -duuˈˈ kpʋɛn ˈbho ɔ ˈˈbun in ˈdhe ˈkledɩ ˈdhi. -ˈBhɛɛ -ˈyeɛ nʋn -ke!
ƝƲN -ˈNƲƲN ˈNAAN: “-Bho ɲʋn an sa ʋn ˈkle ˈˈdu ɛˈ, ˈɩn se ˈbhɛɛ- ˈye ˈkpɩ i kpʋn.”
-
Ɲɔn -ɔɔ ˈtmʋan ɛɛˈ dhɛ tu ɛ, Biiblʋ aˈ ˈˈjhri -wɛ -ˈbhɛɛ -ˈye i -jhii ˈˈdhe -ˈyeɔ dɩ -ˈgwlɩi ˈˈdu -ɛ?
DHƐWƐ- ˈCƖAN-?
-Bho ɲʋn an sa -aʋ ˈkle ˈˈdu ˈˈdhe -a kpʋn ˈo Zoova ˈˈbun in ɛn, ɛ ˈbhleɛ ɔɔˈ ˈmʋnan-. Ɔɔ poɛ -aʋ sʋn bho -ke -aa yea ˈkpɩ i kpʋn!
Dhɛwɛ- -ˈŋwɔn in -ɛn?
-
Dhɛɛdɩ- Zoova aˈ -Bobhlaʋn ˈyeɛ -gwlɩˈˈ de -ka ɲʋn an mubʋ ˈkle ˈˈdu -ɛ?
-
-Da ˈkledɩ ˈsea ˈˈbhlo ˈghwlʋʋ- ke ɛ, dhɛwɛ- -ˈye nʋn ˈzɩan ˈˈdhe -ˈye ˈe -gbaˈ -a?
-
-Ka ˈbhɛɛa -ˈyea ˈo Zoova ˈˈbun in kpʋn -ka ˈkledɩ ˈjhe ɩn -nɩn -mɔnˈ -dhe ɛˈ, dhɛɛdɩ- -ˈyeɛ -gwlɩˈˈ de -ɛ?
ˈBƆN DHƖ -ˈNƖƖN ANˈ I ˈŊWƆAN IN
ˈDhoudhi ɲmau- ˈˈzaan- dhueˈ ɲʋn po dhɛ i dhɛ ɔ ˈsea ˈkmʋnkpedhɩ ˈdhi ˈkpa aˈ dɩ. Ka Zoova nʋan ɔɔˈ sʋn bho -po sʋn ɛn, ɛmɛn- dɩ ɔ ˈtmʋn.
Dhɛ poa ˈɲnɔn -e -kʋan sʋn bho -wɛeˈ ʋʋ kpʋan ˈo Zoova ˈˈbun in ˈdhe ˈkledɩ ˈdhi ˈdhe -zɩn -duuˈˈ ˈdhi ɛ, ɛmɛn -man mun ˈjhe-.
Ʋʋ kpʋɛn ˈo Zoova ˈˈbun in -bho dhɩ -duuˈˈ zianˈˈ -mɔnˈ -dhe ɛˈ (7:11)
-Ka -a ˈyea -pɛɛ i -kuu sʋn nʋn ˈbho ˈklejheɛ- ˈˈjhibhaˈ a, ɛmɛn- -man mun ˈjhe-.
“Prépare-toi dès maintenant à la persécution” (La Tour de Garde, juillet 2019)
-Bho -aaˈ ˈˈgbuzɔncɛ ɛ sa -aʋ ˈkle ˈˈdu ɛˈ, ka -a ˈyeɛ ˈjhe -ɛ, ˈˈdhe dhɛwɛ- -a ˈye nʋn -ɛn?
“La vérité apporte, ‘non pas la paix, mais l’épée’” (La Tour de Garde, octobre 2017)
