ˈCƖAANDHƐ- 60
Kpa -manˈ ɲɔnsoadhɛ ɛˈ i -kuuɛ ɲan
ˈSɛɛ nɛn ɛnˈ ˈcɩaan poɛ ʋn sʋn bho ye dhɩ -duuˈˈ jhibho- ˈdhe Zoova aˈ dɩ ˈdhi. Dhɩ ˈcɩaan, ɩn nʋɛnˈ ɔɔˈ dɩkman- ye ˈˈkpe ˈkpa ˈdhe -e ˈmʋn ˈsʋ yeɔ -manˈ ˈkmʋn kwa de ˈˈdhe ye ˈˈnin ˈzɔn -jhii. -Bho ˈseɛ nʋn ke ɛˈ, ɛgwɛ -man poɛ -manˈ ˈˈjɛ kpɔˈˈ -wɛeˈ -ˈyeɛ nʋn. ˈKlaa dhɛ -ˈyea jhibho- -mɛn -nɩn, -bho -jhii ˈˈnin ˈzɔn -mɔnˈ -dhe ɛˈ, -ˈye jhbhɛɛ- nɩan ˈo -mɔn -e Zoova ˈɲnɩn ɛnˈ i -kuuɛ ɲan kpa. Dhɛɛdɩ- -ɛ?
1. Dhɛɛdɩ- -ˈye jhbhɛɛ- nɩan ˈo -mɔn -e Zoova ˈɲnɩn ɛnˈ i -kuuɛ ɲan kpa -a?
-A ˈye ˈe ˈkpɩ -duuˈˈ po -wɛeˈ -a ˈye jhbhɛɛ- nɩan ˈo -abʋ -e Zoova ˈɲnɩn in -kuu. Dhɛɛdɩ- -ɛ? ‘-Wɛeˈ -a -sɔˈ bho -tɛɛn.’ (Hébreux 2:1) Dhɛwɛ- -ˈye -aʋ sʋn bho po ˈˈdhe -a ˈye ˈo Zoova ˈˈbun in kpʋn -ɛn? -Bho -aa sa ˈe -bobhladhbho ˈˈjhri kpʋn ˈˈdhe -aa sa dhɩ -ˈnɩɩn -a ˈyea i -jhii -wɛeˈ -a ˈyea Ɲɔnsoa ˈˈɲɩn -kajɔɔnka aˈ nʋanˈ i ˈbɔn ɔnˈ. (Zro Philippiens 3:16) Ɲɔn -ɔɔˈ ˈkmʋn ˈyea ˈdhɔɛe ˈmʋn -nɩn -ɛ ˈyea ɲɔn -ɔɔ ˈˈɲɩan Zoova -zii ɛ, ɔ se -nɩn!—Psaume 84:10.
2. Dhɛ -ˈnɛɛn -wɛ -ɛɛˈ nʋanˈ -ˈye ɲan kpa -a?
-Bho gwɛ ˈsɛɛ nɛn ɛnˈ ˈcɩaan -mɔnˈ -dhe ɛˈ, -manˈ kletiɛn kmʋn an muɛn ɲan. Biiblʋ ˈnaan -a ˈye “-nɩnsʋn -dhee ˈmʋn -paa.” (Éphésiens 4:23, 24) -Ka -man kpa Ɲɔnsoa ghwlu ˈcɩan- -e ˈˈdhruigbooɛ- ˈmʋn -muuɛn- ɲan an, ˈkamɔn- -man mun dhɩ -dhee ˈcɩan- ˈdhe Zoova -e ɔɔˈ kplɩn anˈ dɩ ˈdhi. ˈBɔn Ɲɔnsoa aˈ kplɩn anˈ -sraan in ˈdhe -manˈ ˈkmʋn ˈdhi. Dhɛ ooˈˈ dhɛ -ˈbhɛɛa -ˈyea ˈˈɩ zian- ˈdhe -manˈ ˈkmʋn ˈdhi ˈˈdhe -ˈyea Zoova ˈmʋnan in po ɛ, ziɛnˈˈ.
3. Ka Zoova ˈye -manˈ sʋn bho -po sʋn nʋn -wɛeˈ -manˈ ɲɔnsoadhɛ ˈye i ku -ɛ?
Biiblʋ ˈnaan: “Ɲɔnsoa aˈ [...] ˈˈjɛ ɛ muɛn aʋaˈ i -kuuɛ ɲan -kpa ˈsʋ ɛ ˈye ɲnin. Ɔɔ muɛn -nʋn aʋ ˈye i ku, ɔɔ muɛn aʋ ˈkpɩ ˈˈɲɩn-, ɔɔ muɛn -nʋn aʋ ˈye ˈ -gbaˈ zi zi.” (1 Pierre 5:10) -Aaˈ klɛɛ muɛn idɩndɩ- ˈˈjhibhaˈ ˈjhe-. ˈKlaa Zoova ˈˈɲɩn -aʋ dhɩ ˈyea -aʋ sʋn bho po -wɛeˈ -a ˈsea ˈdhe ɩn ˈdhi ˈkpa i ɛ. (Psaume 139:23, 24) Ɔ cɛn ghwlu ɔ ˈnaan ɔ ˈye -aʋ dhɛjɛɛn ɛnˈ nʋanˈ anˈ ˈtʋn -e ɛɛˈ ˈkpɩ ˈˈɲɩn ˈˈdhe -a ˈye ˈbho ɔ ˈˈbun in kpʋn.—Zro Philippiens 2:13.
KPA DHƐ I ˈŊWƆƐN ƝAN
-Ka -ˈbhɛɛa -ˈyea -manˈ ɲɔnsoadhɛ ɛˈ i -kuuɛ ɲan kpa -e -ka Zoova a muan ʋn ˈˈniman -po ˈbho ɛɛˈ nʋanˈ an, ɛmɛn- -man mun ˈjhe-.
4. -Nɩn -manˈ dhaiˈˈ -ghwlu jheejhee ˈˈdhe poɔ -dheinˈˈ bho
Bhaeɛ- -e Biiblʋ ˈcɩan- poɛ ʋn sʋn bho ye Zoova aˈ dhaiˈˈ ˈkpa. -Kawɛ ɩn ˈbhɛɛ ɩn ˈye ʋn sʋn bho po -wɛeˈ -ˈyeɔ i ˈˈkʋʋan- -kenɛnˈ -ɛn?
Zro Psaume 62:8, -ˈmɛn aʋ ˈtmʋn ideedɩ- nɩn anˈ dɩ:
-
-Bho jhbhɛɛ- nɩan ˈo -mɔn -e Zoova ˈɲnɩn ˈye i ku ɛˈ, dhɛwɛ- -ˈye ˈˈɩ zian- ˈdhe -manˈ bhaeghwlu aˈ dɩ ˈdhi -ɛ?
Zro Psaume 1:2 -e note, -ˈmɛn aʋ ˈtmʋn ideedɩ- nɩn anˈ dɩ:
-
-Bho jhbhɛɛ- nɩan ˈo -mɔn -e Zoova ˈɲnɩn ˈye i ku ɛˈ, dhɛwɛ- -ˈye ˈˈɩ zian- ˈdhe -manˈ Biiblʋ ˈdhii -zroɛ ɛˈ dɩ ˈdhi -ɛ?
-Bho -ˈye -manˈ -nɩn dhueˈ Biiblʋ ˈcɩan- ˈjɛɛn ˈdhi ˈjhee- ɛˈ, dhɛwɛ- -ˈye nʋn -ɛn? -Bho -ˈye dhɩ -ˈbhɛɛa -ɩn ˈyea ʋn sʋn bho po ˈjhe ɛˈ, po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
Dhɩwɛ- ɲʋn nɩan ˈdhe video nɔn ˈdhi ˈtmʋn -ˈbhɛɛ -ˈye ˈˈjhriɛ ˈˈdu -ke -ɛ?
-
Dhɩwɛ- -ˈbhɛɛ -ˈye ˈcɩan -an?
5. ˈBɔn dhɩ -ˈnɩɩn anˈ nʋanˈ in ˈdhe ɲɔnsoadhɛ ˈdhi
-Bho -man sa dhɩ -ˈnɩɩn anˈ nʋanˈ i ˈbɔn ˈdhe Zoova aˈ dhbho ˈdhi ɛˈ, -manˈ ɲɔnsoadhɛ ɛ muɛn i -ku. Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
Dhɛ Kamelɔnɩn ˈBɔan ʋanˈ ɲɔnsoadhbho ɔɔˈ ˈˈkpe -poɛ- i ɛ, ˈjɛɛn -wɛ ʋn ˈjhee- ˈbho -ɛ?
Ɛ se ɲʋn anˈ klɛɛ -ʋʋ ˈbhɛɛ -ʋʋ ˈye ˈbhlʋa ˈsrʋ ˈdhi mun -ʋʋ ˈye bo bhla -nɩn. ˈKlaa dhbho -aaˈ sʋn -tɛɛan ˈˈkpe ˈdhe ɲɔnsoadhɛ ˈdhi ɛ, -a ˈbhɛɛ -a ˈyeɔ nʋn. Zro Proverbes 21:5, -ˈmɛn -naan dɩ nɩn tɔˈ ˈˈkpe i. Dhɛwɛ- ˈɩn ˈbhɛɛ ˈye nʋn...
-
ˈdhe ɲɔnsoagbu ˈdhi -ɛ?
-
ˈdhe -bobhladhbho ˈdhi -ɛ?
ˈSrɩn nɩan ˈe Biiblʋ aˈ ˈˈjhriɛ nɛn ˈdhi ɛ, -kawɛ ɩn ˈbhɛɛ ɩn ˈye ʋn sʋn bho po ˈdhe dhɩ -man ˈbɔan -ˈyea nʋn ɩanˈ dɩ ˈdhi -ɛ?
Dhɩ -ˈnɩɩn -ɩanˈ nʋanˈ -ˈbhɛɛa -ˈyea i ˈbɔn ɔn
-
-Manˈ bhaeghwlu aˈ ˈkpa -poɛ-.
-
Biiblʋ aˈ klɛɛ ɛɛˈ ˈdhii zroaˈ.
-
ˈDhoudhi -ˈˈwe aˈ klɛɛ nɩan ˈe ɲɔnsoagbu ˈdhi aˈ jhibhɛ- -kajɔɔnka.
-
Ɲɔn Biiblʋ -tɔɔɛn-.
-
-Jezaʋn anˈ ˈsɔɔnpoi- -aeˈˈ nɔnˈˈ ooˈˈ nɔnˈˈ ɔnˈ -jezai ˈkpa-.
-
-Bho -nɩn ˈdhoudhi ɲmau- ɛˈ, ˈbɔn ɲankɔʋn anˈ ˈsɔɔnpoi- ˈkpa- i.
6. Aʋ ˈjhe -bɔyaˈˈ sea ˈˈtianˈ ˈbhle!
Zro Psaume 22:26, -ˈmɛn aʋ ˈtmʋn ideedɩ- nɩn anˈ dɩ:
-
Dhɛwɛ- -ˈye nʋn ˈzɩan -wɛeˈ -manˈ ˈkmʋn ˈye ˈdhɔɛe ˈmʋn -nɩn ˈˈdhe ʋn ˈse ˈˈtianˈ ˈbhle i -ɛ?
DHƐWƐ- ˈCƖAN-?
Kpa jhbhɛɛ- nɩan ˈo -mɔn -e Zoova ˈɲnɩn ɛnˈ i -kuuɛ ɲan ˈˈdhe ˈbɔn dhɩ -ˈnɩɩn anˈ nʋanˈ in ˈdhe ɲɔnsoadhɛ ˈdhi. -Bho -man sɛ nʋn ɛnˈ, -manˈ ˈkmʋn ˈse ˈˈtianˈ ˈbhlei-!
Dhɛwɛ- -ˈŋwɔn in -ɛn?
-
-Ka Zoova a muan ʋn sʋn bho -po -wɛeˈ -ˈyea ˈbho ɔ ˈˈbun in kpʋn ɛn, dhɛɛdɩ- -ˈyeɛ -gwlɩˈˈ de -ɛ?
-
-Kawɛ -ˈye jhbhɛɛ- nɩan ˈo -mɔn -e Zoova ˈɲnɩn in -kuu sʋn nʋn -ɛn?
-
Dhɛɛdɩ- -bho -man sa -manˈ ɲɔnsoadhbho ˈˈkpe po ɛˈ, ɛɛˈ dhɛ tu ɛɛ mun ʋn sʋn bho -po -manˈ ɲɔnsoadhɛ ˈye i ku -ɛ?
ˈBƆN DHƖ -ˈNƖƖN ANˈ I ˈŊWƆAN IN
Dhɛwɛ- -kɔndɩ ˈdhe Zoova ˈˈjhri ˈdhe -ɛ, dhɩ klaeˈˈ aˈ nʋanˈ in ˈbɔɛn- -aeˈˈ ˈbho ɔ ˈˈbun in -kpʋɛn -ɛn?
Zoova aˈ dhbhonʋʋin kpʋan ˈbho ɔ ˈˈbun in ˈbhɛɛ ɔ ˈye ˈˈzru. -Ŋmʋn dhɛ ɔ ˈbhɛɛa ɔ ˈyea nʋn -wɛeˈ ɔ ˈyea ˈmʋnan in -nɩn -kenɛnˈ jha.
Biiblʋ ˈcɩan- -e ʋanˈ tɔˈ ˈˈkpei -naan ˈbhɛɛ ɩn ˈye ʋn sʋn bho po -ˈye mʋnan in -nɩn (5:25)
Dhɩ -ˈyea nʋn ˈdhe ɲɔnsoadhbho ˈdhi, -ka -ˈyea ɩanˈ ˈbho -za sʋn nʋn -e ɩanˈ ˈˈjhriɛ ˈˈdu sʋn nʋn ɛn.
Dhɛɛdɩ- ɲɔnsoadhɛ ɛˈ i -kuuɛ kɔan dɩ -e dhɛ -ˈyea nʋn -wɛeˈ -manˈ ɲɔnsoadhɛ ˈyea i ku -e.