ˈCƖAANDHƐ- 48
-Naan tɔˈi -kajɔɔnka -wɛeˈ -ˈye ˈo -manˈ dhaiˈˈ -ˈˈwe -za
Dhaiˈˈ -ˈˈwe kpʋan ˈbho -a ˈˈbun in -nɩn -aa nʋɛn ˈmʋnan- ˈˈdhe ʋa poɛ -aʋ ˈkpɩ -ke -bho -aa sa ˈkle ˈjhe. ˈKlaa Biiblʋ a zela -aʋ -glʋˈ -ka ɛ sea ɲʋn anˈ klɛɛ nɩn dhaiˈˈ -ˈˈwe ˈjɛʋn -nɩn ɛn. -ˈMɛn ka -ˈye nʋn -wɛeˈ -ˈye ˈo dhaiˈˈ -ˈˈwe ˈjɛʋn -za? -A ˈtmʋn ideedɩ- nɩan da ˈzɔn da aˈ dɩ.
1. Dhɛɛdɩ- -a ˈye ˈo dhaiˈˈ ˈjɛʋn -za -a?
Ɲʋn -nɩn -aa gwlea -da dhueˈ ɛˈ, -bho ɛɛ sa ˈo ˈbhɔɔ ɔˈ, -aa sraan ʋaˈ kplɩn. Ʋaˈ ˈˈdhaidhɛ ˈbhɛɛ ɛ ˈyea -aʋ dhɛjɛɛn -aeˈˈ dhɛsaʋn ˈˈdhrui nʋn, -bho ɛ -nɩn ˈbho ɛntɛɛnɛtɩ ˈˈkpe mɔn -dhe ɛˈ. Biiblʋ ˈnaan, “ɲɔn -nɩn ɲʋn nɩan tɔˈ ˈdhi a nan ɔɔ muɛn tɔˈ ˈdhi -nɩn, ˈklaa ɲɔn -nɩn kpɛɛnˈ ɲʋn an nan [ɲʋn sea Zoova aˈ dɩ -kman] ɔɔ muɛn ˈkledɩ ˈjhe-.” (Proverbes 13:20) Dhaiˈˈ -ˈˈwe kman Zoova aˈ dɩ ˈˈdhe -ʋa- ˈˈɲɩɔn ˈbhɛɛˈ ʋʋ ˈye ʋn sʋn bho po -ˈye ˈbho ɔ ˈˈbun in kpʋn ˈˈdhe -ˈye ˈo dhɛjɛɛn- -za -ˈye nʋn. ˈKlaa dhaiˈˈ -ˈˈwe sea Zoova aˈ dɩ -kman ˈbhɛɛˈ ʋʋ ˈyeɛ nʋn -ˈyeɔ bho -tɛɛn. Biiblʋ a poɛ -aʋ ˈkpɩ -a ˈye tɔˈ i -naan -kajɔɔnka -wɛeˈ -a ˈye ˈo -aaˈ dhaiˈˈ -ˈˈwe -za! -Bho -aaˈ dhaiˈˈ -ˈˈwe -kman Zoova aˈ dɩ ɛˈ, ʋa muɛn -aʋ dhɛjɛɛn ˈˈdhrui -nʋn ˈˈdhe -aa muɛn ʋbʋ dhɛjɛɛn ˈˈdhrui -nʋn -ke. -A ˈbhɛɛˈ -a ˈye ‘bha ˈkpɩ po ˈˈdhe -a ˈye bha i -kuu dhueˈ dhueˈ -ke.’—1 Thessaloniciens 5:11.
2. Ka Zoova aˈ -pɛɛ ɛɛ mun -nɩn dhaiˈˈ -ˈˈwe -man za ˈo ʋaˈ dɩ -ɛ?
Ɲɔn ooˈˈ ɲɔn ɔn -nɩn Zoova aˈ dhaiˈˈ. “Ɲʋn ˈsrɛaˈˈ ʋbʋ- -nɩn ɔ jhbhɛɛ.” (Proverbes 3:32) Ɲʋn sea Zoova aˈ dɩ -kman -bho ʋʋ -nɩn -aaˈ dhaiˈˈ -ˈˈwe ɛˈ, ka ɛɛ mun -nɩn ˈbho ɔ -gwlɩˈˈ -ɛ? Ɛɛ muɔn ˈˈzruu-! (Zro Jacques 4:4.) Zoova a muɛn ˈmʋnan in -nɩn ˈˈdhe -aa muɛn ɔɔˈ dhaiˈˈ -ˈˈwe -nɩn -ke -bho -a -nɩn ɲʋn kman ɔɔˈ dɩ a sa nan -wɛeˈ -aa sa ɲʋn sea ɔɔˈ dɩ -kman bho tɛɛn ɛnˈ.—Psaume 15:1-4.
KPA DHƐ I ˈŊWƆƐN ƝAN
-Ka ɛ kɔan dɩ -ˈyea ˈo dhaiˈˈ -ˈˈwe ˈjɛʋn -za ˈˈdhe -ka -ˈyea nʋn -wɛeˈ aʋaˈ ˈˈdhaidhɛ ˈyea dhɛjɛɛn ˈdhe -manˈ ˈkmʋn ˈdhi po ɛ, ɛmɛn- -man mun ˈjhe-.
3. ˈSroo- -ˈgwlɩi -wɛeˈ -nɩn ‘ɲʋnsaɩn -saˈ -nan’
Ɲʋn sea Ɲɔnsoa -e ɔɔˈ ˈtee aˈ dɩ -kman se dhaiˈˈ -ˈˈwe ˈjɛʋn -nɩn. Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
-Kawɛ -a ˈbhɛɛ -a ˈseɛ ˈˈkpe i ˈjhe- i ˈsʋ -a -nɩn ɲʋnsaɩn ˈye -jhbhɛɛ?
Zro 1 Corinthiens 15:33, -ˈmɛn aʋ ˈtmʋn ideedɩ- nɩn anˈ dɩ:
-
Ɲʋnwɛ- -nɩn dhaiˈˈ -ˈˈwe -saɩn -ɛn? Dhɛɛdɩ- -ɛ?
Zro Psaume 119:63, -ˈmɛn aʋ ˈtmʋn ideedɩ- nɩn anˈ dɩ:
-
-Bho ɲɔn ˈye dhaiˈˈ ˈjɔɔn -nɩn ɛnˈ, dhɛwɛ- -ˈye jha -ŋmʋn -ɛn?
Tubhuo- ˈzɔan ˈdhe tibhi ˈˈklu ˈbhɛɛˈ ɔ ˈye -jɩn sia ˈo ˈzɔɔn-. ˈKamɔn- dhaiˈˈ -ˈˈwe -saɩn ˈbhɛɛ ʋʋ ˈye -aʋ dhɛsaʋn ˈˈdhrui nʋn.
4. Ɲʋn -nɩn -a sea dhɛ dhueˈ -nɩn ˈbhɛɛˈ ʋʋ ˈye -aaˈ dhaiˈˈ -ˈˈwe -nɩn
Biiblʋ a ˈtmʋɛn Davidɩ -e Zonatan anˈ dɩ, ɛ nɩn ɲʋn ˈsɔɔn -ʋʋ -nɩn ˈdhe Israɛ tɛnˈˈ -dhe. Zonatan anˈ zɩn -diɛˈˈ ɩn ye Davidɩ ɔˈ -nɩn -zii ˈˈdhe ɔ -nɩɛn- ˈbheɔ ɔˈ ˈˈjhu -dhe. Zro 1 Samuel 18:1, -ˈmɛn aʋ ˈtmʋn ideedɩ- nɩn anˈ dɩ:
-
-Aaˈ dhaiˈˈ -ˈˈwe -nɩn -a ˈye -zɩn dhueˈ ˈbhle -aeˈˈ -ʋʋ -nɩn -a ˈye dhɛ dhueˈ -nɩn ˈˈkpɔ ˈˈkpɔ? Dhɛɛdɩ- -ɛ?
Zro Romains 1:11, 12, -ˈmɛn aʋ ˈtmʋn ideedɩ- nɩn anˈ dɩ:
-
Ka dhaiˈˈ -ˈˈwe kman Zoova aˈ dɩ ˈbhɛɛ ʋʋ ˈye bha ˈkpɩ po -ɛ?
ˈDhe video nɔn ˈdhi ɛ, -ŋmʋn ka ˈdhoudhi dhueˈ nʋan dhaiˈˈ -ˈˈwe ˈjhe sʋn -da ɔ seɛ -gwlɩˈˈ -dee ɛ. Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
Dhɛɛdɩ- Akili ɔˈ ˈˈbho -e ˈdhou a ˈˈdu -zɔnˈ dhaiˈˈ -ˈˈwe ɔ ˈbhlea ˈdhe klainˈˈ anˈ dɩ -ɛ?
-
ˈBho -deenanˈ an, dhɛwɛ- -ɛɛ nʋɔn ˈtʋn ˈdhe ɔɔˈ dhaiˈˈ -ˈˈwe -ˈnʋn anˈ dɩ ˈdhi -dhe -ɛ?
-
Ɛɛ ˈbhɔɔa ˈbho ɛ, ka ɔ nʋn dhaiˈˈ ˈjɔɔn ˈjhe sʋn -ɛn?
5. -Ka -a ˈyea nʋn -wɛeˈ -a ˈyea dhaiˈˈ -ˈˈwe ˈjɛʋn -nɩn ɛn
Dhɩ ˈyea ʋn sʋn bho po ˈˈdhe -ˈyea dhaiˈˈ -ˈˈwe ˈjɛʋn ˈjhe -e -ka -ˈyea nʋn ˈˈdhe -ˈyea dhaiˈˈ ˈjɔɔn -nɩn ɛn, ɩmɩn- man mun ˈjhe-. Po ˈo VIDEO.
Zro Proverbes 18:24 -e 27:17, -ˈmɛn aʋ ˈtmʋn ideedɩ- nɩn anˈ dɩ:
-
Ka dhaiˈˈ -ˈˈwe ˈjɛʋn an nʋn bha sʋn bho -po sʋn -ɛn?
-
ˈKamɔn- -jhbhɛɛ nɩan ˈo -mɔn -e -manˈ dhaiˈˈ -ˈˈwe ˈɲnɩn -nɩn -ke? -Bho ɛ seanˈ -nɩn ɛnˈ, ka -ˈye nʋn ˈˈdhe -ˈye dhaiˈˈ -ˈˈwe ˈjɛʋn ˈjhe -ɛ?
Zro Philippiens 2:4, -ˈmɛn aʋ ˈtmʋn ideedɩ- nɩn anˈ dɩ:
-
-Bho -ˈye dhaiˈˈ -ˈˈwe ˈjɛʋn ˈjhe ɛˈ, ɛ -kɔn dɩ -manˈ ˈˈjɛ ˈye dhaiˈˈ ˈjɔɔn -nɩn. Ka -ˈye nʋn ˈˈdhe -ˈye dhaiˈˈ ˈjɔɔn -nɩn -ɛn?
-Bho -man sa ˈbɔn -ˈye dhaiˈˈ -ˈˈwe ˈjɛʋn ˈbhle ɛ, ɛ -kɔn dɩ -ˈye dhaiˈˈ ˈjɔɔn -nɩn.
ƝƲN -ˈNƲƲN ˈNAAN: “Ɲɔn ooˈˈ ɲɔn ˈbhɛɛˈ ɔ ˈye ˈman dhaiˈˈ -nɩn.”
-
Ka -man mun ˈdha -a?
DHƐWƐ- ˈCƖAN-?
-Bho -a -naan tɔˈ i -kajɔɔnka -wɛeˈ -a -za ˈo -aaˈ dhaiˈˈ -ˈˈwe ɛˈ, -aa muɛn ˈdhe Zoova ˈˈjhriɛ ˈdhei -nmɔn ˈˈdhe -aa muɛn ˈo dhɛjɛɛn ˈjhee- -ke.
Dhɛwɛ- -ˈŋwɔn in -ɛn?
-
Dhɛɛdɩ- dhaiˈˈ -ˈˈwe -aa za ˈo -kɔndɩ ˈdhe Zoova ˈˈjhriɛ ˈdhe -ɛ?
-
Ɲʋnwɛ- -nɩn dhaiˈˈ -ˈˈwe -saɩn -ɛn?
-
Ka -ˈbhɛɛ -ˈye nʋn -wɛeˈ -ˈye dhaiˈˈ -ˈˈwe ˈjɛʋn ˈjhe ˈˈdhe -jhbhɛɛ nɩan ˈbho aʋ ˈˈɲnɩn ˈye i ku -ɛ?
ˈBƆN DHƖ -ˈNƖƖN ANˈ I ˈŊWƆAN IN
Dhaiˈˈ -ˈˈwe ˈjɛʋn ˈbhɛɛˈ ʋʋ ˈye ʋn sʋn bho po ˈdhe ˈkledɩ ˈdhi.
“Noue des amitiés solides avant que la fin arrive” (La Tour de Garde, novembre 2019)
Dhɩ -ˈbhɛɛa -ˈyea nʋn -wɛeˈ -ˈyea dhaiˈˈ -ˈˈwe ˈjɛʋn ˈjhe ɛ, -naan ɩn tɔˈ ˈˈkpei.
“Comment choisir mes amis?” (Les jeunes s’interrogent. Réponses pratiques [volume 1], chapitre 8)
Dhaiˈˈ -ˈˈwe ɲʋn an ˈjhea ˈbho ɛntɛɛnɛtɩ ˈˈkpe ɛ, dhɛwɛ- -ˈye jhibho- ˈdhe ʋaˈ dɩ ˈdhi -ɛ?
ˈDhe -bo -ɔɔˈ ˈˈdhru nɩan “J’avais tant besoin d’un père!” ˈdhi ɛ, -ŋmʋn -ka ˈˈjhu dhueˈ nʋan dhaiˈˈ -ˈˈwe saɩn- in ˈˈtai- sʋn ˈˈdhe ɔ ˈbɔan dhaiˈˈ -ˈˈwe ˈjɛʋn dhi ɛ.
“La Bible transforme des vies” (La Tour de Garde, 1er avril 2012)
