ˈCƖAANDHƐ- 49
Ka ɲɔn ɔn nʋn -bɔyaˈˈ ˈjhe sʋn ˈdhe ˈˈgbuzɔnˈˈ -ɔn?—ˈFɔ 1
Ɲʋn -an ˈˈtiia ˈˈbhli ɛ, ˈmʋnan- ʋa ˈjhea ˈbho ʋaˈ ˈˈbhli ˈˈtii- zɔn ˈˈkpe ɛ, ʋa ˈbɔn ɔ ˈse ˈˈtianˈ ˈbhle i. Ɛɛn, ɔ ˈbhɛɛˈ ˈjɛɛn- ɔ ˈse ˈˈtianˈ ˈbhle i! Kletiɛn -ˈˈwe ˈˈtiia ˈˈbhli ɛ gwlea ˈo ˈˈdhe -ʋa- poa ˈe ˈkpɩ -ʋa- ˈjhea Biiblʋ aˈ ˈsrɩn ŋwɔn ɔn, ʋʋ jhibhiˈ -ka ɛɛˈ dhɛ tu ˈbhɛɛa ɛ ˈyea -nʋʋɛn- ɛn.
1. ˈSrɩn -wɛ Biiblʋ a ˈˈɲɩn -kʋan -ˈˈwe -ɛ?
Zoova ˈnaan -kʋan -mɔn -nɩn ˈˈgbuzɔnˈ ˈcɛ ɛˈ ˈˈdhrujhei-. (Zro Éphésiens 5:23.) Dhɩ ˈyea ɔɔˈ ˈˈgbuzɔnˈ ˈcɛ ˈjɛɛn ˈˈdhrui nʋn ɛn, ɩmɩn- Zoova a ˈbɔn ɔ ˈye ˈo -za ɔ ˈye nʋn. Dhɛ Biiblʋ a ˈtmʋan -kʋan -ˈˈwe ˈyea nʋn ɛn, ɛ ka: “Aʋ kpa aʋaˈ ˈɲnʋnkpaeˈ aˈ dɩ -kman ɲan.” (Éphésiens 5:25) -Kawɛ ɔ ˈyeɛ -to -ɛ? -Kʋan kman ɔɔˈ ˈɲnɔn ɔnˈ dɩ ɛ, -bho ɔ -nɩn ʋn -nɩn ˈsɔɔn -aeˈˈ -bho ʋʋ -nɩn ˈo ɲʋn ˈˈjhibhaˈ aˈ, ɔɔ ˈbhlʋʋ -dhɛ -dhɛ. Ɔɔ poɛ ˈe ˈkpɩ ɔɔ yʋ ˈdhei fuo, ɔɔ yʋ ˈmʋnan in po ˈˈdhe ɔɔ yea ʋanˈ dɩ ˈˈdu. (1 Timothée 5:8) -Jɛn kɔan dɩ -mɛn -nɩn ɔɔ pʋ sʋn bho -jhbhɛɛ nɩan ˈo ʋmʋn -e Zoova ˈɲnɩn ɛn yea i ku. (Matthieu 4:4) Ɛɛˈ kpɔ dhueˈ -mɛn -nɩn, ɔ -nɩn ɔɔˈ ˈɲnɔn ɔn zroɛ Biiblʋ ˈdhii ˈˈdhe ʋa bhaeˈ -da dhueˈ. -Kʋan -an ˈˈdua ɔɔˈ ˈɲnɔn ɔnˈ dɩ ˈdhe dɩkman- ˈmʋn ɛn, -jhbhɛɛ nɩan ˈbho ɔmɔn -e Zoova ˈɲnɩn ɛɛ kuɛ i.—Zro 1 Pierre 3:7.
2. ˈSrɩn -wɛ Biiblʋ a ˈˈɲɩn ˈɲnʋnkpaeˈ -ɛ?
Ɲɔnsoa aˈ Ghwlu ˈnaan ˈɲnʋnkpaoˈ “ˈye ʋanˈ -kʋan ŋwɔn ˈjhe ˈdhe ʋanˈ -pɛɛ ɛˈ klɛɛ ˈmʋn.” (Éphésiens 5:33) -Kawɛ ʋn ˈbhɛɛ ʋn ˈyeɛ nʋn -ɛn? Kplɩn ˈdhɔɛe ʋanˈ -kʋan ˈbhlea -e ˈkpɩ ɔɔ poa ˈe -wɛeˈ ɔɔ ˈˈdua ʋmʋn -e ʋbʋ aˈ ˈˈɲnuun anˈ dɩ ɛ, ʋn ˈbhɛɛˈ ʋn ˈyɩ tɔˈ ˈˈkpei -naan. -Bho ʋan sɔ sʋn bho po -wɛeˈ dhɩ ɔɔ za ˈo ɔɔ nʋan ˈye ˈo dhɛjɛɛn po, ʋan sa ˈdhe ɔ bho ghwlu -kajɔɔnka ˈˈdhe ʋan sa ɔɔˈ ˈɲnɩn ˈjɛɩn ˈˈsi -bho ɔɔˈ ˈˈɲɩn Zoova -mɔnˈ -dhe ɛˈ, ʋan toɛˈ -ka ʋan ˈjheɔ ŋwɔn.
3. Ka ɲʋn ˈˈtiia ˈˈbhli ˈbhɛɛ ʋʋ ˈye nʋn -wɛeˈ ʋaˈ ˈˈbhlitiiɛ ˈye i ku -ɛ?
Dhɛ Biiblʋ a ˈtmʋʋan ɲʋn ˈˈtiia ˈˈbhli ɛ ka: “Ɲʋn nɩan ˈsɔɔn ɔn muɛn ɲɔn dhueˈ ˈkpa-.” (Matthieu 19:5) Dhɛ -ˈmɛn ˈdha -mɛn -nɩn, dhɛ ooˈˈ dhɛ ˈbhɛɛa -ɛ ˈyeɛ nʋn -wɛeˈ ʋʋ ˈyea bha bho -tɛɛn, ʋʋ ˈyeɛ bho vɔn. -Ka ʋa nʋan ɛɛˈ -to sʋn -mɛn -nɩn, ʋʋ ˈye nɔnˈˈ -duuˈˈ nʋn -da dhueˈ ˈˈdhe ʋʋ ˈye -pɛɛ dhe -za ʋʋ ˈye dhɛ nɩan ˈbho -ˈnɔɔn -gwlɩˈˈ -ˈnɔɔn ˈtmʋʋn-. Ʋʋ ˈye ɛɛˈ ˈtmʋn ka jhibho-. -Bho ɛ se Zoova -nɩn ɛnˈ, ʋaˈ ˈˈtai- ɲɔn ooˈˈ ɲɔn -aeˈˈ dhɛ ooˈˈ dhɛ in ɛɛˈ ˈkpa ˈbho ʋbʋ ˈɲnɩn. Ʋa ˈsrooɛ -ˈgwlɩi -wɛeˈ ʋʋ -nɩn ɲɔn -ˈnɔɔn -saˈ -jhbhɛɛ- -ɛ -saˈ ʋaˈ ˈɲnɔn -aeˈˈ -kʋan -zii.
KPA DHƐ I ˈŊWƆƐN ƝAN
Biiblʋ aˈ ˈsrɩn ˈbhɛɛa -ɩn ˈyea -manˈ ˈˈbhlitiiɛ i -kuu ɛ, ɩmɩn- -man mun ˈjhe-.
4. -Kʋan-, -kman -manˈ ˈɲnɔn ɔnˈ dɩ ˈˈdhe ˈˈdu ʋanˈ dɩ
Biiblʋ ˈnaan “-kʋan -ˈˈwe ˈye ʋaˈ ˈɲnʋnkpaeˈ aˈ dɩ -kman -ka ʋʋ -kman ʋaˈ ˈˈjɛ ɛˈ dɩ ɛ.” (Éphésiens 5:28, 29) Dhɛ -ˈmɛn ˈdha -a? Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
ˈDhe dɩwɛ- ˈdhi -kʋan ˈyeɛ -to -ka ɔ kman ɔɔˈ ˈɲnɔn ɔnˈ dɩ -ka ɔ kman ɔɔˈ ˈˈjɛ ɛˈ dɩ -ɛ?
Zro Colossiens 3:12, -ˈmɛn aʋ ˈtmʋn ideedɩ- nɩn anˈ dɩ:
-
Ka -kʋan ˈbhɛɛ ɔ ˈye kplɩn -ˈnɩn -to ˈdhe ɔɔˈ ˈɲnɔn bho -ɛ?
5. ˈƝnɔn, a -kman -aaˈ -kʋan anˈ dɩ ˈˈdhe a ˈjheɔ ŋwɔn
Biiblʋ a poɛ ˈɲnʋnkpaoˈ ˈkpɩ ʋn ˈye ʋanˈ -kʋan ŋwɔn ˈjhe -bho ɔɔ sa Zoova ˈˈɲɩn -aeˈˈ ɔɔˈ ˈˈɲɩɔn -mɔnˈ -dhe ɛˈ. Zro 1 Pierre 3:1, 2, -ˈmɛn aʋ ˈtmʋn ideedɩ- nɩn anˈ dɩ:
-
-Bho aaˈ -kʋan anˈ ˈˈɲɩn Zoova aˈ, a nɩɛnˈˈ ˈjɛɛn ɔ ˈye ɔɔˈ -Bobhlai ˈkpa. -Jɛnwɛ ˈbho a -gwlɩˈˈ -ɛ -nmɔn ˈo dhi a ˈye nʋn -ɛn? A ˈye bo bhla ˈdhe ɔ bho nɔnˈˈ ooˈˈ nɔnˈˈ -aeˈˈ -ka aa nʋan dhɩjɛɩn ˈˈdhe aa ˈjheɔ ŋwɔn ɔn, a ˈyeɛ -to ˈdhe dhɩ aa nʋan ˈdhi? Dhɛɛdɩ- -ɛ?
ˈƝnɔn -e -kʋan ˈbhɛɛˈ ʋʋ ˈye ghwlu i ˈŋwɔɔn- ˈˈdhe ʋʋ ˈye ˈo dhɩ -ˈnɩɩn -za ʋʋ ˈye nʋn. -Zɔn -ˈnɔɔn ɔn, 1 Pierre 3:3-5, -ˈmɛn aʋ ˈtmʋn ideedɩ- nɩn anˈ dɩ:
ˈɲnɔn ˈbhɛɛˈ ʋn ˈse dhɛ ʋanˈ -kʋan za ˈo ɔ ˈyea nʋn ɛnˈ dɩ ˈŋwɔɔn- in. -Bho ɛ -nɩn kaˈ aˈ, ʋn ˈye dhɛ nɩan ˈbho ʋn -gwlɩˈˈ ʋanˈ -kʋan ˈtmʋʋn- ˈdhe ŋwɔnpeeɛ- -e dhɛŋwɔnjheeɛ- ˈmʋn. Ʋn ˈyeɛ ˈˈɩ jhibho- -ke -ka ɛ nɩan ʋanˈ -kʋan -mɔn Zoova de ˈo -ɔ ˈye ˈo ˈˈgbuzɔncɛ ɛˈ dhɛjɛɛn -za. Ʋn ˈye ʋanˈ -kʋan sʋn bho po -wɛeˈ dhɛ ɔ za ˈo ɔ ˈyea nʋn ˈye ˈo dhɛ po. -Bho ʋan sa kaˈ nʋn ɛnˈ, ghwluiŋwɔɛn ɛn muɛn ˈbho ʋbʋ ˈɲnɩn -nɩn. Zro-
-Bho ˈɲnʋnkpaoˈ a sa ʋanˈ -kʋan ŋwɔn ˈjhe ɛˈ, ka ɛ -nɩn ˈbho Zoova -gwlɩˈˈ -ɛ?
6. Ɲʋn ˈˈtiia ˈˈbhli ˈbhɛɛˈ ʋʋ ˈye ʋaˈ ˈkledɩ ˈˈdhru ˈjha
Ɲʋn ˈˈtiia ˈˈbhli se ˈˈɩ ˈgba, ɛɛ dɩ ʋʋ ˈye -da dhueˈ ˈkpa -wɛeˈ ʋʋ ˈye ʋaˈ ˈkledɩ ˈˈdhru ˈjha. Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
ˈDhɛwɛ- -ɛɛ toɛ -ka ˈɲnɔn -e -kʋan -ˈnʋn anˈ ˈŋwɔɔan ghwlu ˈi -dhe -ɛ?
-
Dhɩwɛ- ʋʋ nʋn -wɛeˈ ʋʋ -kuu ʋaˈ ˈˈbhlitiiɛ i -ɛ?
Zro 1 Corinthiens 10:24 -e Colossiens 3:13. -Bho aʋ gwɛ Biiblʋ aˈ ˈˈjhri nɩn anˈ ˈdhii zroa aˈ, -ˈmɛn aʋ ˈtmʋn ideedɩ- nɩn anˈ dɩ:
-
Ka Biiblʋ aˈ ˈsrɩn nɩn ˈbhɛɛ ɩn ˈye ˈˈbhlitiiɛ i -kuu -ɛ?
Biiblʋ ˈnaan -a ˈye bha ˈˈɩ ˈbhɛɛ-. -Bho -man sa ˈdhiŋwɔnmɔɛn- to ˈdhe ɲɔn bho ˈˈdhe -man sɔ ŋwɔn ˈjhe ɛˈ, -man toɛˈ -ka -man ˈbheeɔ ˈˈɩ ɛ. Zro Romains 12:10, -ˈmɛn aʋ ˈtmʋn ideedɩ- nɩn anˈ dɩ:
-
ˈƝnɔn -aeˈˈ -kʋan ˈye ka nʋn ˈmɔn- -nɩn ɛnˈ -ka -ɔ -ˈye ˈˈɩ ˈbheɛ-? Dhɛɛdɩ- -man ˈdha kaˈ -a?
ƝƲN -ˈNƲƲN ˈNAAN: “-Ka -aa ˈŋwɔan ghwlu ˈi tɛnˈˈ -dhe ɛ, ɛ seanˈ -nɩn ˈbhodhe.”
-
-Ka Biiblʋ ˈbhɛɛa ʋn ˈyʋbʋ sʋn bho po ɛ, ka ˈbhɛɛ -ˈyeɛ ˈˈkpei -zela ˈdhʋbʋ bho -ɛ?
DHƐWƐ- ˈCƖAN-?
-Bho ˈɲnɔn -e -kʋan kman bha aˈ dɩ, ʋa sa bha ŋwɔn ˈjhe ˈˈdhe ʋa sa Biiblʋ aˈ ˈsrɩn ˈˈjhriɛ ˈˈdu ɛˈ, ʋʋ ˈbhɛɛˈ ʋʋ ˈye ˈmʋnan in -nɩn.
Dhɛwɛ- -ˈŋwɔn in -ɛn?
-
Dhɛwɛ- -kʋan ˈbhɛɛ ɔ ˈye nʋn ˈˈdhe ˈmʋnan ˈye ˈo ˈˈgbuzɔnˈ -nɩn -ɛn?
-
Dhɛwɛ- ˈɲnɔn ˈbhɛɛ ʋn ˈye nʋn ˈˈdhe ˈmʋnan ˈye ˈo ˈˈgbuzɔnˈ -nɩn -ɛn?
-
-Bho -nɩn ɲɔn ˈˈtii- ˈˈbhli ɛˈ, Biiblʋ aˈ ˈsrɩn -wɛ ˈbhɛɛ -ɩn ˈye aʋaˈ ˈˈbhlitiiɛ i -kuu -ɛ?
ˈBƆN DHƖ -ˈNƖƖN ANˈ I ˈŊWƆAN IN
ˈSrɩn ˈbhɛɛa -ɩn ˈyea ʋn sʋn bho po ˈˈdhe -ˈyea -bɔyaˈˈ ˈjhe ˈbho ˈˈgbuzɔnˈ ɔn, ɩanˈ dɩ -mɩn ˈsɛɛ- nɛn ɛn ˈtmʋn.
ˈDhʋ aˈ video nɔn ɔn toɛˈ -ka -bho ɲɔn ɔn sa Ɲɔnsoa aˈ ˈsrɩn ˈˈjhriɛ ˈˈdu ˈdhe ˈˈbhlitiiɛ- ɛɛˈ dɩ ˈdhi ɛˈ, ɛɛ poɛ ˈo ˈˈniman-.
Dhɛ -kʋan anˈ ŋwɔnjheɛ- ˈdha a, ɛmɛn- -man mun i ˈŋwɔn- ˈnɔn ˈsɛɛ- nɛn ˈdhi.
“Des femmes qui se soumettent à l’autorité” (La Tour de Garde, 15 mai 2010)
Biiblʋ aˈ ˈsrɩn ˈbhɛɛˈ ɩn ˈye ɲʋn ˈˈtiia ˈˈbhli sʋn bho po.