-Bho -manˈ dhaiˈˈ nʋn ʋn -baanˈ ˈdhɔɛe ˈˈdhrui ˈdhee, ka ɛ -nɩn ˈbhoo- -gwlɩˈˈ -ɛ? -Ka -baanˈ- -ˈnɔn ɔn nʋan ʋn ˈtʋn ɛn, -man ˈbɔn -manˈ dhaiˈˈ ˈyɩ jhibho-. -Baanˈ- ɲɔn -dhee -ˈnɔɔn sea ˈbhɛɛ- ɔ ˈyea -aʋ ˈˈdhrui nʋn -mɔn Zoova -e Zezi nʋn -aʋ ˈˈdhrui. Ɛ -baanˈ- -wɛ, ˈˈdhe -kawɛ -a ˈbhɛɛ -a ˈyeɛ -to -ka ɔ ˈdha dhɛ ˈdhe -a ˈˈjhriɛ ˈdhe -ɛ?

1. -Kawɛ -a ˈbhɛɛ -a ˈye Ɲɔnsoa -e Klisɩ ˈsɛ po -baanˈ- ʋʋ nʋan -aʋ ˈˈdhrui ɔˈ dɩ -ɛ?

Biiblʋ ˈnaan “ɲɔn ooˈˈ ɲɔn -ɔn toɛ -ka ɔ dea [Zezi] -gwlɩˈˈ” ˈbhɛɛˈ ɔ ˈye ˈkmʋn sea ˈˈtianˈ ˈbhle ˈjhe. (Jean 3:16) Dhɛwɛ- dhɛgwlɩdeɛ- ɛˈ-toaˈ ˈdha-? Ɛ ˈse Zezi ɔˈ -ˈˈgwlɩdeɛ- ɛˈ ˈsʋ -nɩn. Ɛ -kɔn dɩ -a ˈyeɛ -to ˈdhe dhɩ -aa za ˈo -e dhɩ -aa nʋan ˈdhi. (Jacques 2:17) -Bho -aa sa -aaˈ dhɛgwlɩdeɛ to ˈdhe dhɩ -aa nʋan -e dhɩ -aa ˈtmʋan ˈdhi ɛˈ, -aa kuuɛ -jhbhɛɛ nɩan ˈo -abʋ -e Zezi -e ɔɔˈ ˈˈBho Zoova ˈɲnɩn in.​—Zro Jean 14:21.

2. ˈDhe nɔnˈˈ -wɛ ˈdhi -a ˈbhɛɛ -a ˈye Zoova -e Zezi ˈsɛ po dhɛ ʋʋ nʋan -aʋ ˈˈdhrui ɛˈ dɩ -ɛ?

ˈˈMaʋnglʋ- -ʋn ˈdhe ˈdhi Zezi ˈyea ˈmɛn ɛn, ɔ ˈtmʋʋn- ɔɔˈ dhɛcɩaʋn ˈmɛn ʋʋ ˈye dhɛ -dhee -ˈnɛɛn nʋn -wɛeˈ ʋʋ ˈye ɔɔˈ ˈmɛan anˈ dɩ -glʋˈ bho po. Ɔ ˈdhʋbʋ ˈmɛn ʋʋ ˈye -da dhueˈ ˈkpa ʋʋ ˈye ɔɔˈ ˈmɛan anˈ -ˈgwlɩinaanzɔn ɔnˈ da ˈjhe. (1 Corinthiens 11:20) Zezi ɔ ˈbɔn ɔɔˈ dhbhoʋn -e kletiɛn ˈjɛʋn anˈ klɛɛ -ʋa- muan -jhi ˈdhe ˈkmʋn anˈ ɲan ˈyeɛ -glʋˈ bho po -ka ɔ toa ˈo ɔɔˈ ˈkmʋn ʋaˈ dɩ. ˈDhe ɔɔˈ ˈmɛan anˈ -glʋˈ bho -poɛ- ɛˈ dɩ ˈdhi ɛ, ɔ ˈnaan: “Aʋ nʋn -ɛ nɛn ˈdhe ˈman dɩgwlɩinaan- ˈdhi.” (Luc 22:19) -Bho -man sa Zezi ɔˈ ˈmɛan anˈ -ˈgwlɩinaanzɔn ˈmʋn ˈmun ɛnˈ, -man toɛˈ -ka ɲʋndɩkman- klaaˈˈ Zoova -e Zezi toa ˈdha dhɛ ˈdhe- ˈˈjhriɛ ˈdhe ɛ.

 KPA DHƐ I ˈŊWƆƐN ƝAN

3. -Kawɛ -a ˈbhɛɛ -a ˈyeɛ -to -ka ˈsraa- Zezi za ˈdha dhɛ -ɛ?

-Naan tɔˈ i keaˈ, -bho ɲɔn -za ʋn ˈdhe ˈmɛan ˈŋwɔn ɔnˈ, -man muɛn dhɛ -ˈnɛn ɔ nʋan ʋn ˈˈdhrui bho ˈˈmae- ˈˈdoo-? -Aeˈˈ -man muɛn -to -ka dhɛ -ˈnɛn ɔ nʋan ʋn ˈˈdhrui ˈtʋan -manˈ -pɛɛ i ɛ?

Zoova -mɔn nʋɛn -wɛeˈ -a -nɩn ˈkmʋn. Zro 1 Jean 4:8-10, -ˈmɛn aʋ ˈtmʋn ideedɩ- nɩn anˈ dɩ:

• Dhɛɛdɩ- Zezi ɔˈ ˈsraa -nɩn -baanˈ- -ɔ -nɩn ɔɔˈ -nɛn ka -a?

• Dhɛ Zoova -e Zezi nʋan ʋʋ ˈˈɲɩan ʋn ɛn, ka ɛ -nɩn ˈbhoo- -gwlɩˈˈ -ɛ?

Ka -a ˈbhɛɛ -a ˈye Zoova -e Zezi ˈsɛ po dhɛjɛɛn- ʋʋ nʋan ʋʋ ˈˈɲɩan -aʋ ɛˈ dɩ -ɛ? Zro 2 Corinthiens 5:15 -e 1 Jean 4:11; 5:3. -Bho aʋ gwɛ Biiblʋ aˈ ˈˈjhri nɩn anˈ ˈdhii -zroaˈ aˈ, -ˈmɛn aʋ ˈtmʋn ideedɩ- nɩn anˈ dɩ:

• -Bho -a -ŋmʋn dɩ ˈtmʋan ˈdhe Biiblʋ aˈ ˈˈjhri nɩn ˈdhi jha aˈ, -kawɛ -a ˈbhɛɛ -a ˈyeɛ -to -ka ˈsraa- Zezi za ˈdha dhɛ -ɛ?

4. -A -sraan Zezi

-Ka -dhee -ˈnɔɔn -a ˈbhɛɛa -a -ˈyeɛ -to -ka zeieghwliɛ ˈdha dhɛ ˈdhe -a ˈˈjhriɛ ˈdhe -mɛn -nɩn -a ˈye Zezi -sraan. Zro 1 Pierre 2:21, -ˈmɛn aʋ ˈtmʋn ideedɩ- nɩn anˈ dɩ:

• -Kawɛ -a ˈbhɛɛ -a ˈye ˈe Zezi ɔˈ ˈgɔ ˈdhi -naan?

• Dhɛwɛ- -ɛɛ nʋʋɛn ˈbho Zezi ɔˈ ˈmɛan anˈ -ˈgwlɩinaanzɔn ɔnˈ ˈˈdhruigbooɛ ˈmʋn -ɛn?

 DHƐWƐ- ˈCƖAN-?

-Bho -a de Zezi -gwlɩˈˈ ˈˈdhe -aa sa ɔɔˈ ˈmɛan anˈ -ˈgwlɩinaanzɔn ˈmʋn mun jheejhee ɛˈ, -ˈmɛn -aa toɛˈ -ka ˈsraa ɔ za ˈtʋan -aaˈ -pɛɛ i ɛ.

Dhɛwɛ- -ˈŋwɔn in -ɛn?

• -Kawɛ -a ˈbhɛɛ -a ˈyeɛ -to -ka -a dea Zezi -gwlɩˈˈ -ɛ?

• Dhɛ Zoova -e Zezi nʋan ʋʋ ˈˈɲɩan ʋn ɛn, -kawɛ ˈbhɛɛ -ˈyeɛ -to -ka ɛ ˈdha dhɛ ˈdhe- ˈˈjhriɛ ˈdhe -ɛ?

• Dhɛɛdɩ- Zezi ɔˈ ˈmɛan anˈ -ˈgwlɩinaanzɔn ɔnˈ ˈmʋn muɛn -kɔn dɩ -ɛ?