-Bho -manˈ ɲɔn ɔnˈ dɩ ˈkpa aˈ, dhɛ ˈyea ʋn -glʋˈ kpʋn -ɛ ˈyeɛ -zii se -nɩn. Ɛ ˈbhɛɛˈ ɛ ˈyeɛ nʋn -ˈye -manˈ ˈˈjɛ i dee-: ‘-Bho ɲɔn ˈmɛn ɛnˈ, dhɛwɛ- ɔɔ ˈkpa -a? -A ˈbhɛɛˈ -a ˈyʋbʋ ˈjhe -deeˈka?’ ˈNɔn ˈcɩaandhɛ- nɛn -e -jɛn ɛn jhia ˈdhi ɛ, -man muɛn ideedɩ- Biiblʋ a za ˈe -ɩan- ˈˈdua ɲʋn dɩ -ˈgwlɩi ˈjhe-.

1. -Bho ɲɔn ˈmɛn ɛnˈ, dhɛ ɔɔ ˈkpa -a?

Zezi pooɛ- ˈmɛanˈ ˈˈɲɩɔn ˈˈɩn. -Bho ɲɔn ɔn sa ˈmʋn ɛnˈ, dhɩ ɲʋn an nʋan ˈbho ɔ ˈˈbun ɔ sɩ jhibho-. Ka ˈmɛanˈ -e ˈˈɲɩɔn nʋn goɔ- sʋn -ɛn? -Bho ɲɔn ˈmɛn ɛnˈ, ɔɔˈ ˈjhe ˈkle. Ɔɔˈ ˈcɛ -e ɔɔˈ dhaiˈˈ -ˈˈwe aˈ ˈtʋn anˈ nʋɔn -bho ɔ -kman ʋaˈ dɩ -tɛnˈˈ -mɔnˈ -dhe ɛˈ. “Ɲʋn ˈmɛan, ʋʋ se dhɛ ooˈˈ dhɛ jhibho-,” ˈkamɔn- Biiblʋ ˈdha.​—Zro Ecclésiaste 9:5.

2. -Bho -a jhibho- tɔˈdɩ ˈdhe ˈmɛanˈ anˈ dɩ ˈdhi ɛˈ, -kawɛ ɛ ˈbhɛɛ ɛ ˈye -aʋ sʋn bho po -ɛ?

Ɲʋn anˈ -da -duuˈˈ a plee ɲʋn ˈmɛan ˈmɛn, ʋa plee ˈmɛanˈ mɔn ˈmɛn -ke! ˈKlaa dhɛ Biiblʋ a ˈtmʋan ˈdhe ˈmɛanˈ anˈ dɩ ˈdhi a muɛn ʋn dɩ -ˈgwlɩi ˈˈdu-. Zezi ˈnaan: “Tɔˈdɩ a muɛn aʋ zeie-.” (Jean 8:32) Pliegbi aˈ -da -duuˈˈ ˈnaan -bho ɲɔn ˈmɛn ɛnˈ, ɔɔˈ -zuu -a sie ˈkmʋn, ˈklaa ɛ se ɛmɛn- Biiblʋ a ˈtmʋn -nɩn. Ʋn ˈnaan -bho ɲɔn ˈmɛn ɛnˈ, ɔɔˈ ˈjhe ˈkle. Ɔ se dhɛ ooˈˈ dhɛ jhibho-. -ˈMɛn ɔ se ˈbhɛɛ- ɔ ˈye -aʋ dhɛsaʋn ˈˈdhrui nʋn. Ɛɛˈ dɩ -a ˈse ka -nʋn in -bho -a sʋbʋ ˈˈɲɩn ˈˈdhe -a se dhɛ -ɛɛ nʋbʋ ˈtʋn nʋn ɛnˈ, ʋʋ ˈbhɛɛˈ ʋʋ ˈye -aʋ ˈcɛn ˈkpaa-. -A ˈse bhae i ʋaˈ dɩ -ke.

Ɲʋn -ˈnʋʋn ˈnaan ʋʋ ˈbhɛɛˈ ʋʋ -nɩn ɲʋn ˈmɛan ˈye -ghwlu. Ɛ se ˈbhɛɛ- ɛ ˈye -nʋʋɛn-. -Ka -a nʋan ɛɛ ˈcɩan sʋn ɛn, “ʋʋ se dhɛ ooˈˈ dhɛ jhibho-.” Ɲʋn -ʋʋ ˈnaan ʋʋ -nɩn ɲʋn ˈmɛan an ˈghwlu ɛ, ɛ nɩn -ziisaɩn -ɩn poa ɩanˈ ˈˈjɛ ˈbho ɲʋn ˈmɛan anˈ gɔˈˈ -nɩn ʋbʋ a ghwlu. ˈMɛn -bho -a jhibho- tɔˈdɩ ˈdhe -ziisaɩn- anˈ dɩ ˈdhi ɛ, ɛɛ muɛn -nʋn ɩn ˈse -aʋ dhɛsaʋn ˈˈdhrui -nʋn in. Zoova ˈnaan -aaˈ ghwlu ˈe ɲʋn ˈmɛan bho -dhe. Dhɛ nɩan ˈo -mɛn -nɩn ɔ jhibhiˈ -ka -ziisaɩn ˈbhɛɛa ɩn ˈyea ˈo -cɛɛn ˈˈdhe ɩn ˈyea -aʋ dhɛsaʋn ˈˈdhrui nʋn ɛn.​—Zro Deutéronome 18:10-12.

3. ˈCɩan tɔˈdɩ ˈdhe ɲʋn ˈmɛan anˈ dɩ ˈdhi

Dhɩ ɲʋn dea -gwlɩˈˈ ˈdhe ɲʋn ˈmɛan anˈ dɩ ˈdhi se dhɛ dhueˈ -nɩn ˈbhlʋɩ aˈ klɛɛ ˈdhii. ˈˈDhe dhɩ ʋʋ dea -gwlɩˈˈ ɛ, ɩanˈ klɛɛ se ˈbhɛɛ- ɩn ˈye tɔˈdɩ -nɩn.

• Dhɩwɛ- ɲʋn de -gwlɩˈˈ ˈdhe ɲʋn ˈmɛan anˈ dɩ ˈdhi ˈdhe -manˈ kpɔ ˈdhi -ɛ?

 4. -Bho -a jhibho- tɔˈdɩ ˈdhe ˈmɛanˈ anˈ dɩ ˈdhi ɛˈ, ɛɛ poɛ -aʋ sʋn bho

-Bho -a jhibho- tɔˈdɩ ˈdhe ˈmɛanˈ anˈ dɩ ˈdhɩ ɛˈ, ɛɛ muɛn -nʋn ɲʋn ˈmɛan anˈ -faʋn ˈse -aʋ -nʋn in. Zro Ecclésiaste 9:10, -ˈmɛn aʋ ˈtmʋn ideedɩ- nɩn anˈ dɩ:

• Ɲʋn ˈmɛan ˈbhɛɛˈ ʋʋ ˈye -aʋ dhɛsaʋn ˈˈdhrui nʋn?

-Bho -a de tɔˈdɩ- nɩan ˈe Biiblʋ ˈdhi -gwlɩˈˈ ɛˈ, sɩ -ɩn nɩan ɲʋn ˈbhɛɛˈ ɲʋn ˈye ɲʋn ˈmɛan anˈ -pɛɛ -bhlua -aeˈˈ -a ˈbhɛɛˈ -a ˈyʋbʋ ˈˈjhibhaˈ -gbɛɛ ɛ, -a ˈsɩ -gwlɩˈˈ -de i dhee ˈka. Zro Isaïe 8:19 -e Révélation 4:11, -ˈmɛn -aʋ ˈtmʋn ideedɩ- nɩn anˈ dɩ:

• ˈBhoo- -gwlɩˈˈ ˈdhee, ɲɔn -ɔn za ˈsraa -ɔɔ ˈˈɲɩan ɲɔn ˈmɛan -aeˈˈ -ɔɔ ˈbɔan ʋʋ ˈyeɔ sʋn bho po ɛ, -kawɛ Zoova a ˈjheɔ-?

5. -Bho -a jhibho- tɔˈdɩ ˈdhe ˈmɛanˈ anˈ dɩ ˈdhi ɛ, ɛɛ ˈˈduɛ -aʋ dɩ -ˈgwlɩi

Dhɩ ɲʋn -tɔɔan ɲʋn anˈ -da -duuˈˈ -mɩn -nɩn -bho ʋʋ ˈmɛn ɛnˈ, Ɲɔnsoa ˈbhɛɛˈ ɔ ˈyʋbʋ ˈkle ˈˈdu dhɩsaɩn- ʋʋ nʋan ɩanˈ dɩ. -Bho ɲɔn nʋn dhɛsaʋn -mɔnˈ -dhe ˈˈdhe ɔ ˈmɛn ɛnˈ, dhɛ -a ˈŋwɔɛn in -ka Ɲɔnsoa aˈ ˈˈduɔ ˈkle ɛ, ɛɛ ˈˈduɛ -aʋ dɩ -ˈgwlɩi. Zro Romains 6:7, -ˈmɛn aʋ ˈtmʋn ideedɩ- nɩn anˈ dɩ:

• -Biiblʋ ˈnaan -bho ɲɔn ˈmɛn ɛnˈ, Ɲɔnsoa a ˈghwlʋɛ ɔɔˈ dhɩsaɩn anˈ klɛɛ ɔ nʋan ˈˈkpe. -ˈMɛn ˈbhoo- -gwlɩˈˈ ˈdhee, ɲɔn ˈmɛan, ɔɔ ˈjheɛ ˈkle dhɩsaɩn- ɔ nʋan ɩanˈ dɩ?

-Ka -aa jhibha dhɩ -duuˈˈ ˈdhe Zoova aˈ dɩ ˈdhi ɛ, ˈkamɔn- -aa ˈŋwɔɛn in -ke -ka ɔ sea ˈbhɛɛ- ɔ ˈyea ɲʋn ˈmɛan ˈkle ˈˈdu ɛ. Zro Deutéronome 32:4 -e 1 Jean 4:8, -ˈmɛn aʋ ˈtmʋn ideedɩ- nɩn anˈ dɩ:

• Ɲɔnsoa -ɔ ˈbhlea kplɩn -ɩanˈ dɩ ˈtmʋan ˈnɔn Biiblʋ aˈ ˈˈjhri nɩn ˈdhi ɛ, ɔ ˈbhɛɛˈ ˈmɛn ɔ ˈye ɲʋn ˈmɛan ˈkle ˈˈdu?

• Tɔˈdɩ- ˈŋwɔan in ˈdhe ɲʋn ˈmɛan anˈ dɩ ˈdhi ɛ, ɩn ˈˈdu ʋn dɩ -ˈgwlɩi ˈmɛn? Dhɛɛdɩ- -ɛ?

 DHƐWƐ- ˈCƖAN-?

-Bho ɲɔn ˈmɛn ɛnˈ, ɔ se ˈkmʋn -nɩn -da -dhee -ˈnɔɔn. Ɲʋn ˈmɛan anˈ ˈjhe ˈkle, ʋʋ se ˈbhɛɛ- ʋʋ ˈye ɲʋn nɩan ˈkmʋn dhɛsaʋn ˈˈdhrui nʋn.

Dhɛwɛ -ˈŋwɔn in -ɛn?

• -Bho ɲɔn ˈmɛn ɛnˈ, dhɛ ɔɔ ˈkpa -a?

• Tɔˈdɩ- -aa ˈghwlʋa i ˈŋwɔan ˈdhe ˈmɛanˈ anˈ dɩ ˈdhi ɛ, ka ɩan nʋn -aʋ sʋn bho -po sʋn -ɛn?

• Tɔˈdɩ- -aa ˈghwlʋa ˈcɩaan ˈdhe ˈmɛanˈ anˈ dɩ ˈdhi ɛ, ka ɩan nʋn -aʋ dɩ -ˈgwlɩi ˈˈdu sʋn -ɛn?