-Bho Ɲɔnsoa -kman ɲʋn anˈ dɩ ˈdhee, -ˈmɛn dhɛɛdɩ- pliegbi- ˈyea ɲʋn Ɲɔnsoa aˈ kplɩn -tɔɔn ɔn nʋn dhɩsaɩn -ɛn? Dhɛ nɩan ˈo -mɛn -nɩn ɩn -nɩɛn- pliegbi- -saɩn-. Dhɩ ɩan ˈtmʋan -e dhɩ ɩan nʋan an ˈkɔɔɛ Ɲɔnsoa aˈ ˈɲnɩn. Ka ɩan nʋn Ɲɔnsoa aˈ ˈɲnɩn ˈkɔɔ- sʋn -ɛn? Ka ɔɔ nʋn pliegbi- -ˈnɩn ˈjhe sʋn -ɛn? ˈˈDhe dhɛwɛ- ɔɔ muɩn ˈˈdhrui -nʋn -ɛn?

1. Dhɩwɛ- pliegbi- -saɩn an ˈtmʋn -ɩan- ˈkɔɔ Ɲɔnsoa aˈ ˈɲnɩn -ɛn?

Pliegbi- -saɩn “poɛ sɩ ˈbho tɔˈdɩ aˈ ˈgɔ ˈˈɩ.” (Romains 1:25) Ɛɛˈ kpɔ dhueˈ -mɛn -nɩn pliegbi aˈ -da -duuˈˈ ˈse ɲʋn Ɲɔnsoa aˈ ˈɲnɩn -tɔɔn. ˈKlaa Biiblʋ ˈnaan ɲʋn ˈye Ɲɔnsoa aˈ ˈɲnɩn ˈdha. (Romains 10:13, 14) Pliegbi- -ˈnɩɩn anˈ jiebhopoʋn ˈnaan -bho dhɛsaʋn -jhii ɲɔn in ɛnˈ, ɛ nɩn Ɲɔnsoa ˈdhaan. Ɛ se tɔˈdɩ -nɩn. Ɲɔnsoa se ˈe dhɛsaʋn ˈzɔn -nɩn. (Zro Jacques 1:13.) Dhɛ ˈbhlea -ghwɛe bhla, pliegbi- -saɩn anˈ sɩ nʋɛnˈ ɲʋn anˈ -da -duuˈˈ ˈse ˈbɔn ʋʋ ˈye Ɲɔnsoa i ˈˈkʋaan-.

2. Dhɩwɛ- pliegbi- -saɩn an nʋn -ɩan- ˈkɔɔ Ɲɔnsoa aˈ ˈɲnɩn -ɛn?

-Ka Zoova a ˈbhlea ɲʋn ɛn, ɛ se ˈkamɔn- pliegbi- -saɩn an ˈbhle ɲʋn -nɩn. Biiblʋ ˈnaan pliegbi- -saɩn anˈ “dhɩsaɩn deeɛ- ˈˈkpe ɩn ye ˈe jhaʋn ˈdhi ɲnin.” (Révélation 18:5) Ɛɛ nʋɛn -zɩn -duuˈˈ ˈzɩan pliegbi- -saɩn an nʋn poitikɩ, ɩan de ɲʋn -an vɔan tʋ sɩn ˈdhe i ˈˈdhe ɩan nʋɛnˈ ɲiɔʋ -duuˈˈ a yea ˈmɛn. Pliegbi- -saɩn- anˈ jiebhopoʋn- -ˈnʋʋn -nɩn ˈo -ʋa- ˈbɔn ˈˈghwlii- -duuˈˈ i, ɛɛˈ dɩ ʋa ˈbɔn ɲʋn ˈye ˈghwɛi -za ɲʋn ˈyʋbʋ ˈˈɲɩn. Ʋaˈ nʋʋndhɩ a toɛˈ -ka ʋʋ sea Ɲɔnsoa jhibho- ˈˈdhe ʋʋ sea ˈbhɛɛ- ʋʋ ˈyea ka nʋn ʋa nʋɛn dhɩ ˈdhe Ɲɔnsoa aˈ ˈɲnɩn ˈmʋn ɛn.​—Zro 1 Jean 4:8.

3. Ka Ɲɔnsoa a ˈjhe pliegbi- -saɩn -ɛn?

-Bho dhɩ pliegbi- -saɩn an nʋan an sa ʋn ˈcɛn po ɛˈ, -ˈmɛn ka ɛɛ mun -nɩn ˈbho Zoova aˈ ˈˈjɛ -gwlɩˈˈ -ɛ? Ɔ -kman ɲʋn anˈ dɩ, ˈklaa dhɛ pliegbi aˈ jiebhopoʋn an ˈkɔɔa ɔɔˈ ˈɲnɩn ˈˈdhe ʋa ˈˈdua ɲʋn ˈkle ɛ, ɛ ˈbhleɛ ɔɔˈ ˈcɛn. Ɔ cɛn ghwlu ɔ ˈnaan, ɔɔ muɛn pliegbi- -saɩn i -za ˈˈdhe ɔ de ˈo ɔ ˈnaan ɩn “ˈse -da ooˈˈ da -nɩn in ˈbhodhe.” (Révélation 18:21) ˈDhe nɔnˈˈ dhɛ ˈˈzaan ˈdhi ɛ, Ɲɔnsoa a muɛn pliegbi- -saɩn i -za.​—Révélation 18:8.

 KPA DHƐ I ˈŊWƆƐN ƝAN

4. Pliegbi aˈ klɛɛ ɛˈ nʋn Ɲɔnsoa ˈtʋn

ˈBho ɲʋn anˈ -da -duuˈˈ -gwlɩˈˈ ɛ, pliegbi gwɛ -jiekplɩ- -ɩn se dhɛ dhueˈ -nɩn ˈˈdhe -ɩanˈ klɛɛ ɛ kpa ɲʋn ˈdhe Ɲɔnsoa bho. Ɛ tɔˈdɩ- ʋa ˈtmʋn? Zro Matthieu 7:13, 14, -ˈmɛn aʋ ˈtmʋn ideedɩ- nɩn anˈ dɩ:

• -Jie- -ɛɛ kpa ɲʋn ˈdhe ˈkmʋn sea ˈˈtianˈ ˈbhle ˈdhi ɛ, ka Biiblʋ a ˈdha ˈdhe ɛˈ dɩ ˈdhi -ɛ?

Po ˈo VIDEO, -ˈmɛn aʋ ˈtmʋn ideedɩ- nɩn anˈ dɩ.

• Biiblʋ ˈnaan pliegbi aˈ kpɛ -duuˈˈ -a nʋn Ɲɔnsoa ˈtʋn?

 6. Ɲɔnsoa a ˈbɔn ɔ ˈye ɲʋn sʋn bho po ʋʋ ˈye ˈe pliegbi- -saɩn ˈdhi ˈghwlʋ

Zro Révélation 18:4, a -ˈmɛn aʋ ˈtmʋn ideedɩ- nɩn anˈ dɩ:

• Dhɛ Ɲɔnsoa a ˈbɔan ɔ ˈyea ɲʋn sʋn bho po ˈˈdhe ʋʋ ˈyea ˈe pliegbi- -saɩn ˈdhi ˈghwlʋ ɛ, ka -man ˈjheɛ -ɛ?

7. Kpa Ɲɔnsoa aˈ jhibhɛ- ɲan

Pliegbi- -saɩn anˈ dɩ -ˈye Ɲɔnsoa ˈˈjhriɛ- -saʋn ˈjhee-? -A poo- dɩ ˈˈɩ ke aˈ, ˈˈjhu ɲmau- dhueˈ -bhlaa ɔɔˈ ˈˈbho ɔ ˈsrɩn ŋwɔn -wɛeˈ ɔ jra ˈo -ŋmɛinˈˈ ɔ mun dhɩsaɩn -nʋanˈ. Dhɛ ˈˈjhu -ɲmau- -ˈnɔn nʋan ˈse ɔɔˈ ˈˈbho ˈtʋn nʋn. Dhɛɛdɩ- ɛ ˈse ˈo i -nmɔn ɲʋn ˈye ˈˈjhu -ɲmau- -ˈnɔn ɔn ˈˈbho dɩ ˈˈbhli kpa -a?

• Pliegbi- -saɩn anˈ dhɩsaɩn- anˈ dɩ -a ˈye Zoova dɩ ˈˈbhli kpa ˈˈdhe -a -nɩn ɔn ˈse -jhbhɛɛ i?

 DHƐWƐ- ˈCƖAN-?

Dhɩ pliegbi- -saɩn an tɔɔan ɲʋn -e ɩanˈ nʋʋndhɩ a nʋɛnˈ ɲʋn an yea Ɲɔnsoa ˈˈjhriɛ- -saʋn ˈjhee. Ɲɔnsoa a muɛn pliegbi- -saɩn in -za.

Dhɛwɛ- -ˈŋwɔn in -ɛn?

• Dhɩ pliegbi- -saɩn -tɔɔan ɲʋn ˈdhe Ɲɔnsoa aˈ dɩ ˈdhi -e dhɩ ɩan nʋan, ka -man ˈjhɩ -ɛ?

• Ka Zoova a ˈjhe pliegbi- -saɩn -ɛn?

• Dhɛwɛ- Ɲɔnsoa a mun pliegbi- -saɩn ˈˈdhrui -nʋn -ɛn?