ˈCƖAANDHƐ- 15
-Ɔ -nɩn Zezi -ɛ?
Zezi ˈghwlʋɛ ˈɲnɩn ɔ ye ɲʋn anˈ klɛɛ ɲʋn jhibha -zii. -Bho ɲʋn anˈ -da -duuˈˈ jhibho- Zezi ɔˈ ˈɲnɩn mɔn -dhe ɛˈ, ʋʋ se dhɩ -duuˈˈ jhibho- ˈdhe ɔɔˈ dɩ ˈdhi. ˈˈDhe ɲʋn -dhee -ˈnʋʋn ɛn, dɩ ʋa ˈtmʋan ˈdhe ɔɔˈ dɩ ˈdhi se dhɛ dhueˈ -nɩn. Dhɛwɛ- Biiblʋ a ˈtmʋn ˈdhe Zezi ɔˈ dɩ ˈdhi -ɛ?
1. -Ɔ -nɩn Zezi -ɛ?
Zezi -nɩɛn- -zuu, ɔ ˈbhleɛ ˈˈɩkman-, ɔ ˈˈtiɛ ˈe jhaʋn ˈdhi. Ɔmɔn- Zoova nʋn tɛnˈˈ -wɛeˈ ɔɔ ye dhɩ aˈ klɛɛ sia ˈo -nʋn. Ɛmɛn- dɩ ɲʋn an ˈdhɔɔ “ɲɔn ˈghwlʋa tɛnˈˈ ˈbho dhɩ aˈ klɛɛ ˈˈjhibhaˈ a.” (Colossiens 1:15) -Bho Biiblʋ a sɔ ɔˈ dɩ ˈtmʋn ɛnˈ, ʋan ˈdhɔɔ Ɲɔnsoa aˈ “ˈˈjhu nɩan dhueˈ gbai,” dhɛ nɩan ˈo ɛ, Zezi ɔˈ ˈsʋ Zoova aˈ ˈˈjɛ nʋn ˈkwai. (Jean 3:16) Zezi -nɩn ɔɔˈ ˈˈBho Zoova nʋɛn dhbho -da dhueˈ. Ɔ pʋɔ sʋn bho ɔ ye dhɩ aˈ klɛɛ sia ˈo nʋn. (Zro Proverbes 8:30.) -Jhbhɛɛ nɩan ˈo Zezi -e Zoova ˈɲnɩn nʋɛnˈ ɔ ye dhɩ -duuˈˈ nʋn. Ɔmɔn- Ɲɔnsoa aˈ Ghwlu -e Ɔɔˈ ˈsrɩn an jhii ˈe ˈkwa, ɛmɛn- dɩ ɲʋn an ˈdhɔɔ “Ghwlu.”—Jean 1:14.
2. Dhɛɛdɩ- Zezi jhi da ˈbhlʋa ˈˈkpe -ɛ?
Ɛ ziɛ zɩn anˈ 2.000 i ˈzɩan Zoova ye -ˈjhrii nʋn. Ɔ -jhiiɛ- ɔɔˈ -zuu gwɛa i ˈɲnʋnkpaoˈ -jhu ˈˈzaan- sea ɲmau jhibho-, -ʋanˈ ˈɲnɩn nɩan Mai ye Zezi ɔˈ ˈˈkwli ˈbhle. ˈKamɔn- ɔ nʋn -wɛeˈ Zezi ˈkpa -glɔɲiɔn. (Zro Luc 1:34, 35.) Zoova dhbhoɛ Zezi da ˈbhlʋa ˈˈkpe ɔ ˈye Ɲʋnpʋʋi- -aeˈˈ Klisɩ -nɩn -wɛeˈ ɲiɔʋ ˈye ˈpʋʋa ˈjhe. a Dhɩ aˈ klɛɛ Biiblʋ -zaa ɲan ʋn ˈtmʋan ˈdhe Ɲʋnpʋʋi ɔˈ dɩ ˈdhi ɲnin ˈo ˈmɛn ˈdhe Zezi ˈmʋn, ɛɛˈ dhɛ tu poɛ ɲiɔʋ sʋn bho ʋʋ yeɛ -gwlɩˈˈ de -ka Zezi nɩan “Klisɩ, Ɲɔnsoa nɩan ˈkmʋn ɔnˈ ˈˈjhu ɛ.”—Matthieu 16:16.
3. -Dawɛ Zezi -nɩn ˈzɩan -an?
Zezi ˈmɛan an, Ɲɔnsoa jhɔ ˈkmʋn dhe ɔ ye -zuu ˈkpa ˈˈdhe ɔ ye ˈe jhaʋn ˈdhi dhe mun. ˈDhe jhaʋn ˈdhi ɛ, “Ɲɔnsoa pʋɔ ˈbho dhɩ aˈ klɛɛ ˈˈdhru.” (Philippiens 2:9) ˈZɩan an, Zezi -nɩɛn- dhbhoozuu-, ɔ ˈbhleɛ ˈˈɩkman- klaaˈˈ. Zoova aˈ ˈsʋ ˈbhle ˈˈɩkman -ɔ -ziiɔ.
KPA DHƐ I ˈŊWƆƐN ƝAN
Ɲɔn Zezi nɩan gblei -e dhɛɛdɩ- ɔɔˈ jhibhɛ- kɔan dɩ ɛ, ˈbɔn dhɩ -ˈnɩɩn anˈ i ˈŋwɔan in ˈdhe ɩanˈ dɩ ˈdhi.
4. Zezi se Ɲɔnsoa ˈbhlea ˈˈɩkman- anˈ klɛɛ -nɩn
-Bho Biiblʋ ˈnaan Zezi ˈbhleɛ ˈˈɩkman- mɔn -dhe ɛˈ, ɔɔ jha ɔɔˈ ˈˈjɛ jha ˈbho ɔɔˈ ˈˈBho Ɲɔnsoa Zoova aˈ sʋn ˈzɔn. Dhɛɛdɩ- -aa ˈdha kaˈ -a? Po ˈo VIDEO -wɛeˈ dhɛɛdɩ- Biiblʋ ˈnaan Zoova -e Zezi sea dhɛ dhueˈ -nɩn ɛn, -ˈyeɛ i ˈŋwɔn.
Biiblʋ aˈ ˈˈjhri nɩn an poɛ -aʋ sʋn bho -wɛeˈ dhɛɛdɩ- Zoova -e Zezi sea dhɛ dhueˈ -nɩn ɛn, -a ˈyeɛ i ˈŋwɔn. Zro Biiblʋ aˈ ˈˈjhri nɩn dhueˈ dhueˈ, -ˈmɛn aʋ ˈtmʋn ideedɩ- nɩn anˈ dɩ:
Zro Luc 1:30-32.
-
-Ka Ɲɔnsoa Zoova nɩan “ˈbho dhɩ aˈ klɛɛ ˈˈdhru” -nɩn Zezi sea dhɛ dhueˈ -nɩn ɛn, ka dhbhoozuu- -ˈnʋn nʋn ɛnˈ dɩ ˈtmʋn sʋn -ɛn?
Zro Matthieu 3:16, 17.
-
Zezi gwɛa ˈˈnin zɔnˈ -jhii ˈnan an, ka ghwlu ˈghwlʋa ˈe jhaʋn ˈdhi ˈdha -a?
-
ˈBhoo- -gwlɩˈˈ ɛ, ɲɔnwɛ- -ghwlu ˈdhe jhaʋn ˈdhi -ɛ?
Zro Jean 14:28.
-
Ɲɔnwɛ- -nɩn klaaˈˈ ˈˈdhe -ɔ ˈbhle ˈo ɲɔn -ɔn? Ɛ ˈˈbho -ae ˈˈjhu?
-
Zezi ɔ ˈdhaa Zoova ɔɔˈ ˈˈBho. Dhɛwɛ- -ˈmɛn ɛn tɔɔn -abʋ -ɛ?
Zro Jean 12:49.
-
ˈBho Zezi -gwlɩˈˈ -dhe ɛ, ɔmɔn -e ɔɔˈ ˈˈBho -nɩɛn- dhɛ dhueˈ? Ka -man ˈjheɛ -ɛ?
5. Zezi toɛˈ -ka ɔ nɩan Ɲʋnpʋʋi ɛ
Ɲanzaadɩ- -duuˈˈ -nɩn ˈe Biiblʋ ˈdhi -ɩan- ˈtmʋn Ɲʋnpʋʋi ɔˈ dɩ. Ɔɔˈ ˈsʋ Ɲɔnsoa -za ˈo -ɔ ˈye -glɔɲiɔn ˈpʋʋ-. Ɲanzaadɩ- -ˈnɩn an poɛ -aʋ sʋn bho -aa yea Ɲʋnpʋʋi jhibho. Po ˈo VIDEO -wɛeˈ ɲanzaadɩ- Zezi -ɲnian- ˈbho -da ɔ jhia da ˈbhlʋa ˈˈkpe ɛ, -ˈye ɩanˈ -ˈnɩɩn jhibho-.
Zro Biiblʋ aˈ ɲanzaadɩ- nɩn ˈdhii, -ˈmɛn aʋ ˈtmʋn ideedɩ- nɩan da ˈzɔn da aˈ dɩ:
Zro Michée 5:2 -wɛeˈ -ˈye -da Ɲʋnpʋʋi ˈyea ˈghwlʋʋ- -dhe jhibho-. b
-
-Da Zezi ˈghwlʋʋa, ɛ -ɲnian ˈbho ɲanzaadɩ- nɩn ˈmɛn?—Matthieu 2:1.
Zro Psaume 34:20 -e Zacharie 12:10 -wɛeˈ ɲanzaadɩ- -a ˈtmʋan Ɲʋnpʋʋi ɔˈ dɩ ɛ, -ˈyɩ jhibho-.
-
Ɲanzaadɩ- -ˈnɩn ɲnin ˈo ˈmɛn?—Jean 19:33-37.
-
ˈBhoo- -gwlɩˈˈ ˈdhee, Zezi ɔˈ ˈˈjɛ -mɔn nʋɛn -wɛeˈ ɲanzaadɩ- -ˈnɩn ɲnin ˈo?
-
Dhɛwɛ- -ˈmɛn ɛn to ˈdhe Zezi ɔˈ dɩ ˈdhi -ɛ?
6. Dhɩ -aa ˈcɩan ˈdhe Zezi ɔˈ dɩ ˈdhi a jha -aʋ dhɩjɛɩn bho
Biiblʋ ˈnaan ɛ -kɔn dɩ -a ˈye dhɩ -duuˈˈ ˈcɩan ˈdhe Zezi ɔˈ dɩ ˈdhi ˈˈdhe dhbho Ɲɔnsoa dea -aʋ kwa, -a -ˈyeɔ jhibho- -ke. Zro Jean 14:6 -e 17:3, -ˈmɛn aʋ ˈtmʋn ideedɩ- nɩn anˈ dɩ:
-
Dhɛɛdɩ- ɛ -kɔn dɩ ˈjɛɛn- -ˈye Zezi jhibho- -ɛ?
Zezi kain- jie ˈˈŋwɛn -wɛeˈ -a ˈbhɛɛˈ -a ˈye Ɲɔnsoa aˈ -jhbhɛʋn -nɩn. Ɔ -tɔɔn -abʋ tɔˈdɩ- ˈdhe Zoova aˈ dɩ ˈdhi ˈˈdhe ˈdhe ɔ ˈsaa ˈmʋn -a ˈbhɛɛˈ -a ˈye ˈkmʋn sea ˈˈtianˈ ˈbhle ˈjhe.
ƝƲN -ˈƝƲƲN ˈNAAN: “Zoova aˈ -Bobhlaʋn se Zezi -gwlɩˈˈ de.”
-
Ka -man mun ˈdha -a?
DHƐWƐ- ˈCƖAN-?
Zezi -nɩɛn- -zuu. Ɔ ˈbhleɛ ˈˈɩkman-, ɔ -nɩɛn- Ɲɔnsoa aˈ ˈˈJhu ˈˈdhe ɔ -nɩɛn- Ɲʋnpʋʋi-.
Dhɛwɛ- -ˈŋwɔn in -ɛn?
-
Dhɛɛdɩ- ɲɔɔn ˈdhaa Zezi “ɲɔn ˈghwlʋa tɛnˈˈ ˈbho dhɩ aˈ klɛɛ ˈˈjhibhaˈ” -a?
-
Dhɛwɛ- Zezi nʋn -wɛeˈ ɔɔ ye da ˈbhlʋa ˈˈkpe -jhi -ɛ?
-
-Ka Zezi nɩan Ɲʋnpʋʋi ɛ, ka -a nʋn ɛnˈ jhibho- sʋn -ɛn?
ˈBƆN DHƖ -ˈNƖƖN ANˈ I ˈŊWƆAN IN
Dhɩ -ɩan- toɛ -ka Zezi nɩan Ɲʋnpʋʋi ɛ, ˈbɔn ɩanˈ i ˈŋwɔan in
-Ka ɲiɔn ɔn nʋan ˈˈɲnuun ˈghwlʋ sʋn ɛn, ˈkamɔn- Zoova nʋn Zezi ˈghwlʋ sʋn? Zro ˈsɛɛ- nɛn ˈdhii -wɛeˈ -ˈye dhɛ i ˈŋwɔn.
“Pourquoi Jésus est-il appelé le Fils de Dieu?” (Dɩ ˈghwlʋa ˈo ɛntɛɛnɛtɩ ˈˈkpe ɛ)
Dhɛɛdɩ- ɲʋn taan anˈ Ɲɔnsoa -man -nɩn dhɛ Biiblʋ a tɔɔan ɲʋn ɛnˈ kpa -jie- dhueˈ ɛ, zro ˈsɛɛ- nɛn ˈdhii -wɛeˈ -ˈye dhɛ i ˈŋwɔn.
-Ka ˈɲnʋnkpaoˈ dhueˈ aˈ ˈkmʋn nʋan ˈˈɩn zian- sʋn -da ʋn ˈbɔan dhɛ i ˈŋwɔɛn- in ˈdhe Zezi ɔˈ dɩ ˈdhi ɛ, zro ˈsɛɛ- nɛn ˈdhii -wɛeˈ -ˈyɛ jhibho-.
“Une femme juive explique pourquoi elle a remis sa foi en question” (Réveillez-vous!, mai 2013)
a Dhɛɛdɩ- Zezi ˈyea -aʋ ˈpʋʋ- -e -ka ɔ ˈyea nʋn -wɛeˈ ɔ ˈyea -aʋ ˈpʋʋ- ɛ, -aa muɛn ɛnˈ dɩ ˈtmʋn- ˈdhe ˈcɩaandhɛ 26 -e 27 nɛn ˈdhi.
b -Ŋmʋn ˈe dhebhɔɔjhibhodhɛ- 2 ˈdhi -wɛeˈ ɲanzaadɩ- -ɩan- ˈtmʋan Zezi ɔˈ da ˈbhlʋa ˈˈkpe -jhiɛ- ɛˈ dɩ ɛ, -ˈyɩ jhibho-.
