ˈCƖAANDHƐ- 16
Dhɛwɛ- Zezi nʋn -da ɔ nɩan da ˈbhlʋa ˈˈkpe -dhe -ɛ?
Dhɛ ɲʋn -duuˈˈ jhibha ˈdhe Zezi ɔˈ dɩ ˈdhi -mɛn -nɩn ɔ -nɩɛn- ˈˈjhu -dhee, ghwlukwajhaai- -aeˈˈ ɲɔn -ɔ -nɩn ˈmɛan ˈbho tu -gwlɩˈˈ. ˈKlaa, -bho -a ˈcɩan dhɩ Zezi nʋan da ˈbhlʋa ˈˈkpe ɛ, -a ˈbhɛɛˈ -a ˈyeɔ jhibho- -kajɔɔnka? ˈCɩaandhɛ- nɛn ɛn muɛn -aʋ sʋn bho -po -wɛeˈ dhɩ Zezi nʋan -e -ka dhɩ ɔ nʋan ˈbhɛɛa ɩn ˈyea -aʋ sʋn bho po ɛ, -a ˈyɩ jhibho-.
1. Dhbho -wɛ -kɔn dɩ -dhe ˈdhe Zezi ˈˈjhriɛ ˈdhe -ɛ?
Dhbho kɔan dɩ -dhe ˈdhe Zezi ˈˈjhriɛ ˈdhe -mɔn -nɩn “ˈBheɔglɔ ɔˈ -bɔyaˈˈ bo ɔˈ bhla aˈ.” (Zro Luc 4:43.) Ɔ bhla -bɔyaˈˈ -bo ɔ ˈnaan, Ɲɔnsoa poɛ ɔɔˈ ˈBheɔglɔ- -aeˈˈ Ɲʋnbhleglibha kpɔˈˈ -ɔ ˈye -glɔɲiɔn ɔnˈ ˈklejheɛ i -za. a ˈDhe -zɩn taan ˈdhe ˈˈdie ˈdhi ɛ, Zezi poɛ ˈe ˈkpɩ ɔ ye -bo -ˈnɔn -ɔn poa ɲʋn ˈkpɩ bhla ˈdhe ɲʋn bho.—Matthieu 9:35.
2. Dhɛɛdɩ- Zezi nʋn -ˈjhrii -ɛ?
Biiblʋ ˈnaan, “nʋʋndhɩ- nɩan ˈˈɩkmansʋn ˈzɔn -e dhɩ -a ˈˈmaan ɲʋn tɔˈ -e -ˈjhrii- Ɲɔnsoa -jhii Zezi i ɔ nʋn.” (Actes 2:22) Ɲɔnsoa ˈˈɲɩɛn Zezi ˈˈɩkman- ɔ ye ˈˈnin -e -pʋɔˈ ˈˈŋwɛn ˈbhɛɛ-, ɔ ye ɲʋn anˈ ˈˈghwluu -ghwluu ˈdhiidhɩ ˈˈɲɩn, ɔ ye ɲʋn -ʋaˈ dhɩ a pʋa ˈpʋʋ- ˈˈdhe ɔ ye ɲʋn ˈmɛan ˈkmʋn dhe -jha. (Matthieu 8:23-27; 14:15-21; Marc 6:56; Luc 7:11-17) -ˈJhrii- Zezi nʋan an toɛˈ -ka Ɲɔnsoa dhbhoɔ da ˈbhlʋa ˈˈkpe ɛ. -ˈJhrii- -ˈnɩn an toɛˈ -ke -ka Zoova ˈbhɛɛa ɔ ˈyea -aʋ ˈdhe ˈkledɩ ˈdhi -za a.
3. Dhɛwɛ- dhɩ Zezi nʋan ˈdhe ɔɔˈ ˈkmʋn ˈdhi a tɔɔn -abʋ -ɛ?
ˈDhe dɩ ooˈˈ dɩ ˈdhi ɛ, Zezi ˈjheɛ Zoova ŋwɔn. (Zro Jean 8:29.) -Bho ɲʋn an sɔ ˈkle ˈˈdu mɔn -dhe ɛˈ, Zezi ˈjheɛ ɔɔˈ ˈˈBho ɔˈ Ghwlu ŋwɔn, ɔ kpʋɛn ˈbho ɔ ˈˈbun in ˈsʋ ɔ ye ˈmɛn. Ɔ toɛˈ -ka -glɔɲiɔn ˈbhɛɛa ɔ ˈyea ˈo Ɲɔnsoa ˈˈbun in kpʋn -ka ˈkledɩ ˈjhe ɩn -nɩn mɔn -dhe ɛˈ. -Ɛ ˈghwlʋa ˈo ɛ, Zezi ‘-siiɛ- -aʋ ˈgɔ -a ˈye ˈe ˈdhi -naan.’—1 Pierre 2:21.
KPA DHƐ I ˈŊWƆƐN ƝAN
-Ka Zezi nʋan -bɔyaˈˈ bo ɔˈ bhla sʋn ˈdhe ɲʋn bho -e -ka ɔ nʋan -ˈjhrii -nʋn sʋn ɛn, ɛmɛn- -a ˈye ˈjhe bhla.
4. Zezi bhla -bɔyaˈˈ -bo ˈdhe ɲʋn bho
Zezi -nan ˈbhlʋɔ- i ɔ ye -gwlɛ -duuˈˈ ˈdhii mun ɔ ye -bɔyaˈˈ bo bhla ˈdhe ɲʋn bho. Zro Luc 8:1, -ˈmɛn aʋ ˈtmʋn ideedɩ- nɩn anˈ dɩ:
-
Ɲʋn -an jhia Zezi -dheinˈˈ bho -poaˈ a, ˈdhe ʋaˈ ˈsʋ bho ɔɔ bhla bo?
-
Zezi ɔ ˈbɔan ɲʋn in -wɛeˈ ɔ ˈyea -bɔyaˈˈ bo bhla ˈdhe ʋbʋ bho ɛ, dhɛwɛ- ɔ po ˈe ˈkpɩ ɔ nʋn -ɛn?
-Ka Ɲʋnpʋʋi ɔ muan -bɔyaˈˈ bo -bhla a, Biiblʋ siɛ nɔnˈˈ ɲan ʋn yeɛ ˈtmʋn. Zro Isaïe 61:1, 2, -ˈmɛn aʋ ˈtmʋn ideedɩ- nɩn anˈ dɩ:
-
Ka Zezi nʋn ɲanzaadɩ- -ˈnɩn anˈ ˈbho -ɲniian- sʋn -ɛn?
-
ˈBhoo- -gwlɩˈˈ ˈdhee, ɛ -kɔn dɩ ˈzɩan ɲʋn ˈye -bɔyaˈˈ -bo -ˈnɔn ˈŋwɔn?
5. Zezi -tɔɔɛn- ɲʋn tɔˈdɩ -ɩan- po ɲʋn sʋn bho
Zezi ˈse Ɲɔnsoa aˈ ˈBheɔglɔ ɔˈ -bɔyaˈˈ bo ɔˈ ˈsʋ bhla. Ɔ -tɔɔɛn- ɲʋn tɔˈdɩ- -ɩn ˈbhɛɛa -ɩn -ˈyea ɲʋn sʋn bho po. -A ˈtmʋn ɩanˈ -ˈnɩɩn anˈ dɩ. Ɩn -nɩɛn- ˈdhe -bo ɔ bhla ˈbho trʋ ˈˈkpe ˈdhi. Zro Matthieu 6:14, 34 -e 7:12, -ˈmɛn aʋ ˈtmʋn ideedɩ- nɩn anˈ dɩ:
-
ˈSrɩn -wɛ Zezi ˈˈɲɩn ɲʋn ˈdhe Biiblʋ aˈ ˈˈjhri nɩn ˈdhi -ɛ?
-
ˈBhoo- -gwlɩˈˈ ˈdhee, ˈsrɩn nɩn ˈbhɛɛˈ ɩn ˈye ɲʋn sʋn bho po ˈzɩan?
6. Zezi nʋɛn -ˈjhrii-
Zoova ˈˈɲɩɛn Zezi ˈˈɩkman- -wɛeˈ ɔ ˈye -ˈjhrii nʋn. -Bho -ˈye ɩanˈ dhueˈ jhibho- ɛˈ, zro Marc 5:25-34 -aeˈˈ po ˈo VIDEO. -ˈMɛn aʋ ˈtmʋn ideedɩ- nɩan da ˈzɔn da aˈ dɩ.
-
ˈDhe video nɔn ˈdhi ɛ, dhɛwɛ- ˈɲnʋnkpaoˈ ˈghwɛ ɛɛ ˈˈdua ˈkle de -gwlɩˈˈ -dhe -ɛ?
-
Dhɛwɛ- -ɛɛ ˈtʋn -manˈ -pɛɛ i ˈdhe -ˈjhrii- nɩn anˈ dɩ ˈdhi -ɛ?
Zro Jean 5:36, -ˈmɛn aʋ ˈtmʋn ideedɩ- nɩn anˈ dɩ:
-
Dhɛwɛ- -ˈjhrii- Zezi nʋan an to ˈdhe ɔˈ dɩ ˈdhi -ɛ?
Jhibhodɩ-
Dhɩ aˈ -da -duuˈˈ -a jhibha ˈdhe Zezi ɔˈ dɩ ˈdhi ɛ, ɩn ˈghwlʋɛ ˈe Biiblʋ aˈ ˈsɛɩ- nɩan Matthieu -e Marc -e Luc -e Jean ˈdhi. Dɩ ʋʋ ˈtmʋan dhueˈ dhueˈ ɛ, ɩan tɔɔɛn ɲʋn dhɩ -duuˈˈ ˈdhe Zezi ɔˈ dɩ ˈdhi. -Bho ɲʋn pʋɩ -da dhueˈ ɛˈ, ɛɛ nʋɛnˈ ɲʋn an yea Zezi ɔˈ ˈkmʋn anˈ dɩ i ˈŋwɔn -kajɔɔnka.
-
MATTHIEU
-mɔn -kɔn ɲan -ɔ ˈcre ɔɔˈ ˈsɛɛ. Dhɩ -duuˈˈ Zezi -tɔɔan- ɲʋn ˈdhe Ɲɔnsoa aˈ ˈBheɔglɔ ɔˈ dɩ ˈdhi ɛ, ɩmɩn- anˈ dɩ ɔɔˈ ˈsɛɛ ɛ ˈtmʋn gblein.
-
MARC
ɔˈ ˈsɛɛ -mɛn ˈˈkʋan ˈˈjhrii ˈdhe ɩanˈ klɛɛ ˈˈklu. -Bo -ɩanˈ -dheinˈˈ bho poɛ ˈbhlea ˈmʋnan ɩmɩn- anˈ dɩ ɔɔˈ ˈsɛɛ ɛ ˈtmʋn.
-
LUC
-ˈmɔn ɔnˈ ˈsɛɛ deɛ bhaeɛ- ɛˈ dɩ -jiɛ ˈˈkpe. -Ka Zezi nʋan ˈɲnʋnkpaeˈ ˈbhle sʋn ɛn, ɛmɛn- ɛnˈ dɩ ɔ ˈtmʋn -ke.
-
JEAN
-ˈmɔn ɛn, dhɩ -duuˈˈ Zezi -nɩn ɔɔˈ -jhbhɛɛʋn -e ɲʋn -ˈnʋʋn ˈtmʋan ɩmɩn- anˈ dɩ ɔ ˈtmʋn. Ɩan poɛ -aʋ sʋn bho -aa yea ɲɔn Zezi nɩan jhibho.
ƝƲN -ˈNƲƲN ˈNAAN: “Zezi -nɩɛn- ɲɔn ˈdhɔɛeˈ ˈklaa ɔ se Ɲʋnpʋʋi -nɩn.”
-
Ka -man ˈjheɛ -ɛ?
DHƐWƐ- ˈCƖAN-?
Zezi bhla ˈBheɔglɔ ɔˈ -bɔyaˈˈ -bo, ɔ nʋɛn -ˈjhrii-, ɔ ˈjheɛ Zoova ŋwɔn ˈdhe dɩ ooˈˈ dɩ ˈdhi.
Dhɛwɛ- -ˈŋwɔn in -ɛn?
-
Zezi nɩan da ˈbhlʋa ˈˈkpe -dhe ɛ, dhbho -wɛ -kɔn dɩ ˈdhe ɔ ˈˈjhriɛ ˈdhe -ɛ?
-
-ˈJhrii- Zezi nʋan, dhɛwɛ- ɩan to -ɛ?
-
Dhɩwɛ- Zezi -tɔɔn ɲʋn -ɩn ˈbhɛɛ -ɩn ˈye ɲʋn sʋn bho po -ɛ?
ˈBƆN DHƖ -ˈNƖƖN ANˈ I ˈŊWƆAN IN
Dhɛwɛ- -ɛɛˈ dɩ Zezi ˈtmʋn -kpɛ -duuˈˈ -ɛ?
“Le Royaume de Dieu: son importance pour Jésus” (La Tour de Garde, 1er octobre 2014)
-Ka Zezi nʋan -ˈjhrii ɛ, dhɛɛdɩ- ɲʋn ˈbhɛɛa ɲʋn ˈyeɛ -gwlɩˈˈ de ɛ, zro ˈsɛɛ- nɛn ˈdhii -wɛeˈ -ˈyeɛ i ˈŋwɔn.
“Les miracles de Jésus: que vous enseignent-ils?” (La Tour de Garde, 15 juillet 2004)
-Ka ˈˈjhu dhueˈ nʋan ɔɔˈ ˈkmʋn ˈˈɩ zɩan sʋn -da ɔ ˈjheea Zezi ɔˈ ɲʋn anˈ dɩ ˈˈduɛ ˈˈkpe i ɛ, zro ˈsɛɛ- nɛn ˈdhii -wɛeˈ -ˈyeɛ i ˈŋwɔn.
“Je ne vivais que pour moi” (La Tour de Garde, 1er octobre 2014)
Dhɩ kɔan dɩ Zezi nʋan, -ŋmʋn -ka ɩn nʋan ˈdhe dee sʋn ɛn.
a ˈCɩaandhɩ- 31-33 an muɛn dhɩ -duuˈˈ ˈtmʋn- ˈdhe Ɲɔnsoa aˈ ˈBheɔglɔ ɔˈ dɩ ˈdhi.
