ˈCƖAANDHƐ- 17

Kplɩn -wɛ Zezi ˈbhle -ɛ?

BHLƐ

-Bho -aa sa dhɩ Zezi ˈtmʋan -e dhɩ ɔ nʋan da ˈbhlʋa ˈˈkpe aˈ bo ˈcɩan anˈ, ɛɛ nʋɛnˈ -aa ˈbɔn -a ˈye Zezi -e ɔɔˈ ˈˈBho Zoova i ˈˈkʋʋan- kplɩn ˈdhɔɛe ɔ toa ɩanˈ dɩ. Kplɩn ˈdhɔɛe Zezi toa ɩanˈ -ˈnɩɩn ˈdhe -ɛ? -Kawɛ -a ˈye Zezi -sraan sʋn nʋn ˈdhe -aaˈ ˈkmʋn ˈdhi -ɛ?

1. -Kawɛ Zezi -nɩn ɔɔˈ ˈˈBho nʋn ˈgʋɔ- sʋn -ɛn?

Zezi nɩan ˈdhe jhaʋn ˈdhi -dhe ɛ, ɔ -ŋmʋɛn- ɔɔˈ ˈˈBho ɔˈ dhɩnʋnsʋn jha ˈˈdhe ɔ ˈcɩan dhɛ ˈbho ɔ ˈˈbun ˈdhe zɩn anˈ ˈˈghwluu -ghwluu ˈdhi. Ɛmɛn- dɩ ɔ ˈbhle ɔɔˈ ˈˈBho ɔˈ tɔˈinaansʋn -e ɔɔˈ dhɩjhesʋn -e ɔɔˈ dhɩnʋnsʋn. (Zro Jean 5:19.) Zezi -sraan ɔɔˈ ˈˈBho ˈmɛn ˈdhe dhɩ aˈ klɛɛ ɔ nʋan ˈdhi. Ɛmɛn- dɩ ɔ ˈnaan: “Ɲɔn ˈjhea ˈʋn ɛn, ɔ ˈjhe ˈman ˈˈBho ˈmɛn -ke.” (Jean 14:9) -Bho -man sa Zezi ɔˈ kplɩn anˈ ˈcɩaan ɲan kpa aˈ, ɛɛ muɛn ʋn sʋn bho -po -ˈye Zoova jhibho- -kajɔɔnka. Ɛɛˈ kpɔ dhueˈ ka, dhɛ Zezi ɔ ˈjhea ɲʋn anˈ -ghwɛe ɛ, ɛɛ toɛˈ -ka Zoova a ˈjhea -manˈ -ghwɛe -ke ɛ.

2. -Ka Zezi kman ɔɔˈ ˈˈBho ɔˈ dɩ ɛ, ka ɔ nʋn ɛnˈ -to sʋn -ɛn?

Zezi ˈnaan: “Dhɛ ˈɩn kman ˈman ˈˈBho ɔˈ dɩ ɛ, ɲʋn anˈ klɛɛ ˈyɩ jhibho-, ɛmɛn- dɩ ˈman nʋn ˈdhɩ ɔ dea ˈʋn kwa.” (Jean 14:31) Zezi nɩan da ˈbhlʋa ˈˈkpe -dhe ɛ, ɔ ˈjheɛ ɔɔˈ ˈˈBho ŋwɔn -bho ɛɛˈ nʋanˈ -nɩn ˈkle mɔn -dhe ɛˈ -wɛeˈ ɔ ˈyeɛ -to -ka ɔ kman ɔɔˈ dɩ ɛ. Zezi ɔ ˈtmʋɛn ɔɔˈ ˈˈBho ɔˈ dɩ jheejhee ˈdhe ɲʋn bho ˈˈdhe ɔɔ pʋbʋ sʋn bho ʋʋ -nɩn ɔ ˈye -jhbhɛɛ.—Jean 14:23.

3. -Ka Zezi kman ɲʋn anˈ dɩ ɛ, kɔ nʋn ɛnˈ -to sʋn -ɛn?

Biiblʋ ˈnaan Zezi “-kman -glɔɲiɔn ɔnˈ dɩ.” (Proverbes 8:31) Zezi toɛˈ -ka ɔ kman ɲʋn anˈ dɩ ˈbho ʋaˈ ˈkpɩ -poaˈ -e ˈbho ʋaˈ sʋn bho -poaˈ. Ɔ nʋɛn -ˈjhrii- -ɩan- toɛ -ka ɔ ˈbhlea ˈˈɩkman. ˈKlaa ɛ se ɛɛˈ ˈsʋ -mɛn ɛn to -nɩn, ɛɛ toɛˈ -ka ɔɔ ˈjhea ɲʋn anˈ -gwɛe -ke ɛ. (Marc 1:40-42) Zezi -toɛ- ˈdhiŋwɔnmɔɛn- ˈdhe ɲʋn anˈ klɛɛ bho ˈˈdhe ɔ ˈse ɲʋn in ˈcra. Ɲʋn anˈ klɛɛ -ʋa- ˈbɔan -ʋʋ ˈyea dhɛ i ˈŋwɔn ɔn, dɩ ɔ ˈtmʋan ɩn ˈˈdubʋ dɩ -ˈgwlɩi ˈˈdhe ɩn ˈˈɲɩʋbʋ -pɛɛɩtbhadhɛ-. Zezi ˈŋwɔɔn- seaˈ -e ˈmɛan ˈmɛn -glɔɲiɔn ɔnˈ dɩkman- anˈ dɩ. Ɲʋn -ʋa- ˈjhea ɔɔˈ ˈsrɩn ŋwɔn, ʋaˈ dɩ ɔ -kman gblein.—Zro Jean 15:13, 14.

KPA DHƐ I ˈŊWƆƐN ƝAN

ˈBɔn dhɩ -duuˈˈ aˈ i ˈŋwɔan in ˈdhe Zezi ɔˈ kplɩn anˈ dɩ ˈdhi. ˈˈDhe -ka -ˈyea nʋn -wɛeˈ -ˈyea ɔɔˈ ɲʋndɩkman- -e ɲʋn anˈ dɩ ˈˈduɛ -sraan an, -ˈyeɛ jhibho-.

4. Zezi -kman ɔɔˈ ˈˈBho ɔˈ dɩ

-Ka ɲɔɔn nʋan Ɲɔnsoa aˈ dɩkman- sʋn ɛn, ɛmɛn- Zezi -tɔɔn -abʋ. Zro Luc 6:12 -e Jean 15:10; 17:26. -Bho aʋ zro Biiblʋ aˈ ˈˈjhri nɩn ˈdhii ɛˈ, -ˈmɛn aʋ ˈtmʋn ideedɩ- nɩn anˈ dɩ:

Ka -a ˈye Zezi -sraan -wɛeˈ -ka -a kman Zoova aˈ dɩ -a ˈyeɛ -to -ɛ?

Zezi -kman ɔɔˈ ˈˈBho nɩan ˈe jhaʋn ˈdhi ɔˈ dɩ ˈˈdhe ɔɔ ghwluɛ ˈe ɔ bho jheejhee.

5. Zezi ɔ ˈˈduɛ ɲʋn anˈ dɩ

Zezi -kɔɔɛn- ɲʋn anˈ dɩ ˈˈduɛ ɲan ˈbho ɔɔˈ ˈˈjɛ ɛˈ dɩ ˈˈduɛ ˈˈjhibhaˈ. -Bho ɔ sea mɔn -dhe ɛˈ, ɔɔ ˈˈdhuɛ ɔɔˈ nɔnˈˈ -e ɔɔˈ ˈkpɩ ˈmʋn ɔɔ yea ɲʋn sʋn bho po. Zro Marc 6:30-44, ˈmɛn aʋ ˈtmʋn ideedɩ- nɩn anˈ dɩ:

ˈNɔn -bo nɔn ˈdhi ɛ, ka Zezi nʋn ɛnˈ -to sʋn -ka ɔɔ ˈˈdua ɲʋn anˈ dɩ -ɛ?—Zro ˈˈjhri -mɩɩnˈˈ anˈ 31, 34, 41 -e 42 ˈdhii
Dhɛɛdɩ- Zezi ɔ po ɲʋn sʋn bho -dhe -ɛ?—Zro ˈˈjhri -mɩɩnˈˈ anˈ 34 ˈdhii
Dhɛ Zezi ˈbhlea Zoova aˈ kplɩn ɛn, dhɛwɛ- -ˈmɛn ɛn tɔɔn mʋn ˈdhe Zoova aˈ dɩ ˈdhi -ɛ?
-Kawɛ -a ˈbhɛɛ -a ˈye ɲʋn anˈ dɩ ˈˈdu -ke -ka Zezi ɔ nʋan -an?

6. Zezi -nmɔn -glʋˈ

-Bho Zezi se ˈˈghwlii- -duuˈˈ ˈbhle mɔn -dhe ˈɛ, ɔ -nmɔn -glʋˈ ˈˈdhe ɔɔ poɛ -aʋ ˈkpɩ -ke -a ˈye -glʋˈ -nmɔn. Zro Actes 20:35, -ˈmɛn aʋ ˈtmʋn ideedɩ- nɩn anˈ dɩ:

-Ka Zezi nʋan ɛnˈ ˈtmʋn sʋn ɛn, dhɛwɛ- ˈye -aʋ ˈmʋnan ˈˈɲɩn -ɛn?

Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.

VIDEO: “Dhɛkwaiza- ˈbhleɛ ˈmʋnan- -duuˈˈ”: Ɛɛˈ ˈfɔ (4:00)

-Bho -a se ˈghwɛi -duuˈˈ ˈbhle mɔn -dhe ɛˈ, dhɛwɛ- -a ˈbhɛɛ -a ˈye ˈo -to -ɛ?

Jhibhodɩ-

Biiblʋ ˈnaan -a bhae- Zoova ˈdhe Zezi ɔˈ ˈɲnɩn ˈmʋn. (Zro Jean 16:23, 24.) -Bho -aa sa bhae -kaˈ, -aa toɛˈ -ka dhɛ Zezi nʋan -wɛeˈ -a ˈbhɛɛa -a -nɩn Zoova ˈyea -jhbhɛɛ ˈdha dhɛ ˈdhe -a ˈˈjhriɛ ˈdhe ɛ.

ƝƲN -ˈNƲƲN ˈNAAN: “-Bho -aa sa sea aˈ, Ɲɔnsoa aˈ -naan aaˈ dɩ -tɔˈ i.”

Ka Zezi ɔˈ kplɩn an nʋn ɛnˈ -to sʋn -ka Zoova a naan -aaˈ dɩ tɔˈ i -ɛ?

DHƐWƐ- ˈCƖAN-?

Zezi -kman Zoova aˈ dɩ ˈˈdhe ɔ -kman ɲʋn anˈ dɩ -ke. Dhɛ Zezi ˈbhlea ɔɔˈ ˈˈBho ɔˈ kplɩn ɛn, ɛɛˈ dɩ -ka -man jhibha dhɩ -duuˈˈ ˈdhe Zezi ɔˈ dɩ ˈdhi ɛ, ˈkamɔn- -man mun dhɩ -duuˈˈ jhibho- -ke ˈdhe Zoova aˈ dɩ ˈdhi.