ˈCƖAANDHƐ- 24
Dhɛ -a jhibho- ˈdhe dhbhoozii- aˈ dɩ ˈdhi -ɛ?
Zoova a ˈbɔn -a ˈye ɔɔˈ ˈˈgbuzɔncɛ nɩan ˈe jhaʋn ˈdhi jhibho-. Dhbhoozii- -nɩɛn- ˈdhe ʋbʋ ˈˈklu, Biiblʋ a ˈdhaaɩ “Ɲɔnsoa aˈ ˈˈɲnuun-.” (Job 38:7) Dhɛwɛ- Biiblʋ ˈtmʋn ˈdhe ɩanˈ dɩ ˈdhi -ɛ? Dhɛwɛ- ɩan nʋn ˈdhe ɲʋn anˈ ˈkmʋn ˈdhi -ɛ? Dhbhoozii- aˈ klɛɛ man Ɲɔnsoa aˈ ˈˈgbuzɔncɛ?
1. -Ɛ -nɩn dhbhoozii- -ɛ?
Zoova nʋɛn dhbhoozii- -tɛnˈˈ -wɛeˈ ɔɔ ye ˈbhlʋa -nʋn. -Ka Zoova ˈˈtia ˈe jhaʋn ˈdhi ˈˈdhe ɲʋn sea ˈbhɛɛ- ɲʋn ˈyeɔ ˈjhe ɛ, ˈkamɔn- ɩn -nɩn -ke. (Hébreux 1:14) Ɩn -nɩɛn- mliɔn -duuˈˈ ˈˈdhe ɩn se dhɛ dhueˈ -nɩn. (Révélation 5:11) ‘Zoova a dhbhoɩˈ, ˈˈdhe ɩan ˈjheɛ ɔɔˈ ghwlu ŋwɔn.’ (Psaume 103:20) ˈDhe -tɛnˈˈ kmʋn ˈdhi ɛ, Zoova dhbhoɩˈ ɩn ye ˈdhe ɔɔˈ ˈcɛ bho -ghwlu, ɩn yʋbʋ sʋn bho po ˈˈdhe ɩn yʋbʋ zeie- ˈdhe ˈkledɩ ˈdhi. ˈZɩan an, dhbhoozii- a poɛ kletiɛn -ˈˈwe jie bho ˈdhe -bobhlaaˈ.
2. -Ɔ -nɩn Satan ˈˈdhe -ɛ -nɩn -ziisaɩn -ɛn?
Dhbhoozii -ˈnɩɩn ˈse ˈo Zoova ˈˈbun in kpʋn. Dhbhoozuu- kɔan ɲan -ʋn -bhlaa Ɲɔnsoa aˈ ˈtee ŋwɔn, ʋmʋn ɲɔn ɔn ˈdhaa “Ɲɔnsaʋn Satan, -ɔɔ ˈˈbhiia ˈbhlʋa- -jhriɛ- ɛˈ klɛɛ ˈˈjhrii.” (Révélation 12:9) Ɔɔ ˈbɔn ɔ ˈye ɲʋn ˈbhle ɛɛˈ dɩ ɔ -poo Adan -e Ɛvʋ -e -zii -ˈnɩɩn ˈsrɛ i ʋʋ ye Zoova aˈ ghwlu ŋwɔn -bhlaa. Dhbhoozii- bhla ˈbho ɔ ˈdhe -mɩn ɲɔn ɔn ˈdhaa -ziisaɩn. Zoova nʋɩn in ye ˈdhe jhaʋn ˈdhi ˈghwlʋ ɩn ye da ˈbhlʋa ˈˈkpe jhi. Ɔɔ muɩn in -za ˈdhe nɔnˈˈ -dhɛzaanˈˈ ˈdhi.—Zro Révélation 12:9, 12.
3. -Kawɛ Satan -e -ziisaɩn an nʋn -wɛeˈ ɩn ˈye -aʋ ˈsrɛ i -poo -ɛ?
Satan an jhiiɛ gupoɛ -e dhɩziɛ i ɔɔ yea ɲʋn -duuˈˈ ˈsrɛ i poo. Ɲʋn -an nʋan ɩanˈ dhɩ tu ɛ, ʋa ghwluɛ ˈe -ziisaɩn bho. Ɲʋn -ˈnʋʋn an muɛn gʋɔn bho, -ˈnʋʋn an muɛn dhɩziʋn bho, -ˈnʋʋn an muɛn kwɛinjhibhoʋn- -klaɩˈˈ bho. Kwɛin- ɲʋn -ˈnʋʋn an nʋan -wɛeˈ ʋʋ ˈyea kuzɔin -flɔn ɔn, -ziisaɩn- -nɩn ˈdhe ɩn ˈzɔn. -Ziisaɩn an pooɛ ɲʋn -ˈnʋʋn ˈsrɛ i ʋa yeɛ -gwlɩˈˈ de -ka ʋʋ ˈbhɛɛa ʋʋ ˈ yea ˈe ɲʋn ˈmɛan bho -ghwlu ɛ. ˈKlaa Zoova ˈnaan: “Aʋaˈ mun -e gʋɔnbʋ bho -dhe, aʋaˈ mun -e dhɩziʋn ˈˈjhibhaˈ -dhe.” (Lévitique 19:31). Ɔɔ ˈtmʋʋn -aʋ dɩ -ˈnɩn ˈmɛn -wɛeˈ Satan -e -ziisaɩn saˈ -aʋ dhɛsaʋn ˈˈdhrui nʋn. Ɩn -nɩɛn- Ɲɔnsoa aˈ ˈmʋnɲɛʋn- ˈˈdhe ɩan ˈbɔn ɩn ˈye -aʋ dhɛsaʋn ˈˈdhrui nʋn.
KPA DHƐ I ˈŊWƆƐN ƝAN
Dhɩjɛɩn- dhbhoozii- a nʋan -e -ka gupoɛ- -e dhɩziɛ nɩan dhɛsaʋn ˈˈdhe dhɛ -a ˈbhɛɛa -a ˈyea nʋn -wɛeˈ Satan -e -ziisaɩn ˈse -aʋ dhɛsaʋn ˈˈdhrui -nʋn in ɛn, ɩmɩn- -aa mun ˈcɩan-.
4. Dhbhoozii- a poɛ ɲʋn sʋn bho ʋa yea Zoova jhibho
Ɛ se dhbhoozii- aˈ ˈˈjɛ -ɛ bhla bo ˈdhe ɲʋn bho -nɩn. ˈKlaa ɩn ˈbhɛɛˈ ɩn ˈye Zoova aˈ ˈcɛ jie bho po ˈˈdhe ʋʋ ˈye ɲʋn -an ˈbɔan -ʋʋ ˈyeɔ jhibho- ˈjhe. Zro Révélation 14:6, 7, -ˈmɛn aʋ ˈtmʋn ideedɩ- nɩn anˈ dɩ:
-
Dhɛɛdɩ- ɛ -kɔn dɩ dhbhoozii ˈye -aʋ sʋn bho po ˈdhe -bobhlaaˈ -a?
-
Dhɛ dhbhoozii ˈbhɛɛa ɩn ˈyea ʋn jie bho po ˈˈdhe -ˈyea ˈe ɲʋn -an ˈbɔan -ʋʋ ˈyea Biiblʋ ˈcɩan bho mun ɛn, ɛɛ po ʋn ˈkpɩ ˈmɛn? Dhɛɛdɩ- -ɛ?
5. -Tɛɛn dhɩ aˈ klɛɛ -ziisaɩn nɩan ˈe ˈdhi bho
Satan -e -ziisaɩn -nɩɛn- Zoova aˈ ˈmʋnɲɛʋn-. Ʋʋ -nɩɛn- -aaˈ ˈmʋnɲɛʋn- -ke. Zro Luc 9:38-42, -ˈmɛn aʋ ˈtmʋn ideedɩ- nɩn anˈ dɩ:
-
Dhɛwɛ- -ziisaɩn an nʋn ɲiɔʋ ˈˈdhrui -ɛ?
-Aaˈ ˈˈtai -ziisaɩn ˈin -dhe ɩanˈ pa ˈe -aaˈ ˈkmʋn ˈdhi -dhe. Zro Deutéronome 18:10-12, -ˈmɛn aʋ ˈtmʋn ideedɩ- nɩn anˈ dɩ:
-
-Bho -ziisaɩn an sa ˈbɔn ɩn ˈye ˈe -aaˈ ˈkmʋn ˈdhi pa ˈa, dhɛwɛ- ɩn ˈbhɛɛ ɩn ˈye i -jhii -ɛ? Dhɩwɛ- -ziisaɩn -nɩn ˈe ˈzɔn ɲʋn an nʋn ˈdhe -manˈ kpɔ ˈdhi -ɛ?
-
ˈBhoo- -gwlɩˈˈ ˈdhee, ɛ -nmɔn ˈo i Zoova ˈye ka nʋn -aaˈ mun -e gʋɔnbʋ -e dhɩziʋn bhoˈ -dhe? Dhɛɛdɩ- -ɛ?
Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
ˈBhoo- -gwlɩˈˈ ˈdhee, dhɛ Palesa aˈ ˈˈjhu -ɲnʋnkpaoˈ poa sʋnˈ -dhe ɛ, ɛɛ fu ˈdhe i? Dhɛɛdɩ- -ɛ?
-
Dhɛwɛ- -kɔn dɩ Palesa ˈye nʋn -dhe -wɛeˈ -ziisaɩn ˈsʋ i ˈˈkʋaan in -ɛn?
Ɛ se ˈzɩan kletiɛn ˈjɛʋn -dee -ziisaɩn bho -vɔanˈ -nɩn. Zro Actes 19:19 -e 1 Corinthiens 10:21, -ˈmɛn aʋ ˈtmʋn ideedɩ- nɩn anˈ dɩ:
-
Dhɛɛdɩ- ɛ -kɔn dɩ -ˈye dhɛ ooˈˈ dhɛ -ɛɛ ˈˈkʋaan mʋn -ziisaɩn dhi kwa i -za?
6. -ˈBhɛɛˈ -ˈye -zibhoˈ kpa ˈbho Satan -e ɔɔˈ -ziisaɩn ˈˈkpe
Satan -an po -ziisaɩn jie bho. ˈKlaa dhbhoozii- kpʋan ˈo Zoova ˈˈbuin ɛn, ɛ nɩn Zezi ɲɔn ɔn ˈdhaa Mikaɛlɩ -ɔ nɩan dhbhoozii- aˈ ˈˈdhrujhei ɛ, ɔmɔn- -ɔn pʋɩ jie bho. -Ɛɛ toɛ -ka Mikaɛlɩ kmanˈˈ -an? Zro Révélation 12:7-9, -ˈmɛn aʋ ˈtmʋn ideedɩ- nɩn anˈ dɩ:
-
Ɲɔnwɛ- ˈbhle ˈˈɩkman- -ɔ -zii -ˈnɔɔn -ɔn? Mikaɛlɩ -e ɔɔˈ dhbhoozii- -aeˈˈ Satan -e ɔɔˈ -ziisaɩn-?
-
ˈBhoo- -gwlɩˈˈ ˈdhee, Zezi ɔˈ dhɛcɩaʋn ˈye Satan -e ɔɔˈ -ziisaɩn -plee?
-ˈBhɛɛˈ -ˈye -zibhoˈ kpa ˈbho Satan -e ɔɔˈ -ziisaɩn ˈˈkpe. Zro Jacques 4:7, -ˈmɛn aʋ ˈtmʋn ideedɩ- nɩn anˈ dɩ:
-
-Bho ˈse ˈbɔn Satan -e ɔɔˈ -ziisaɩn ˈye ʋn dhɛsaʋn ˈˈdhrui nʋn ɛnˈ, dhɛwɛ- -ˈbhɛɛ -ˈye nʋn -ɛn?
ƝƲN -ˈNƲƲN ˈNAAN: “-Bho -man sa ze videe po -aeˈˈ -bho -man sa fimʋn in ˈjhe ˈˈdhe gupoɛ -nɩn ˈdhe ɩn ˈdhi ɛˈ, ɛ se dhɛsaʋn -nɩn. Ɛ -se ˈplʋjhriizaadhɩ-?”
-
Dhɛɛdɩ- tɔˈinaansʋn- -ˈnʋn ˈbhɛɛ ʋn ˈye ʋn dɩ bho -jha -a?
DHƐWƐ- ˈCƖAN-?
Dhbhoozii- kpʋan ˈo Zoova ˈˈbun in an poɛ -aʋ sʋn bho. Satan -e ɔɔˈ -ziisaɩn -nɩɛn- Zoova aˈ ˈmʋnɲɛʋn- ˈˈdhe ɩan jhiiɛ gupoɛ- -e dhɩziɛ- i ɩan yea ɲʋn ˈsrɛ i poo.
Dhɛwɛ- -ˈŋwɔn in -ɛn?
-
Ka Zoova aˈ dhbhoozii- a nʋn ɲʋn sʋn bho -po sʋn ˈzɩan -wɛeˈ ʋʋ ˈyeɔ jhibho- -ɛ?
-
-Ɔ -nɩn Satan ˈˈdhe -ɛ -nɩn -ziisaɩn -ɛn?
-
Dhɛɛdɩ- -man ˈbɔn -ˈye -ziisaɩn bho -tɛɛn?
ˈBƆN DHƖ -ˈNƖƖN ANˈ I ˈŊWƆAN IN
-Ka Zezi nɩan Mikaɛlɩ dhbhoozii- aˈ ˈˈdhrujhei ɛ, ɛmɛn- -man mun ˈcɩan- ˈnɔn ˈsɛɛ- nɛn ˈdhi.
“Qui est l’archange Michel?” (Dɩ ˈghwlʋa ˈo ɛntɛɛnɛtɩ ˈˈkpe ɛ)
-Ka Satan sea dhɛsaʋn- nɩan ˈdhe -a ˈmʋn -nɩn ɛn, ɛmɛn- ˈsɛɛ- nɛn ɛn mun ʋn -tɔɔn.
“Le Diable: principe du mal ou personne réelle?” (Dɩ ˈghwlʋa ˈo ɛntɛɛnɛtɩ ˈˈkpe ɛ)
Ka ˈɲnʋnkpaoˈ dhueˈ nʋn -ziisaɩn bho -tɛɛn sʋn -ɛn?
“Elle a trouvé un but dans la vie” (La Tour de Garde, 1er juillet 1993)
-Ka Satan an nʋan gupoɛ i -jhii sʋn ˈˈdhe ɔɔ pooa ɲʋn ˈsrɛ i ɛ, zro ˈsɛɛ- nɛn ˈdhii -wɛeˈ -ˈyeɛ jhibho-.
“Dhɛ ɲʋn ˈyea jhibho- ˈdhe jhriiˈ- -e gu aˈ dɩ ˈdhi ɛ” (ˈKmʋn sea ˈˈtian ˈbhle, ˈcɩaandhɛ- 5)
