Biiblʋ ˈnaan -glɔɲiɔn ɔnˈ ˈkmʋn ‘ˈˈkʋan ˈˈjhrii, ˈˈdhe ɔɔ ˈjheɛ ˈkledɩ- -duuˈˈ.’ (Job 14:1) Ʋanˈ ˈkmʋn tu -mʋn Ɲɔnsoa a ˈbɔn -a ˈye ˈbhle -dhe? -Bho ɛ seɛ -nɩn ɛnˈ, -kawɛ ɔɔ ˈbɔn -aaˈ ˈkmʋn ˈye -nɩn -ɛn? Dhɛ ɔɔ naan tɔˈ i ˈdhe -aaˈ dɩ ˈdhi ɛ, ɛɛ muɛn ˈo -ɲnin? Dhɛ Biiblʋ a ˈtmʋan ˈdhe ɛɛˈ dɩ ˈdhi -ɛɛ ˈˈdua ɲʋn dɩ -ˈgwlɩi -mɛn -aa mun ˈjhe-.

1. -Kawɛ Zoova a ˈbɔn -aaˈ ˈkmʋn ˈye -nɩn -ɛn?

Zoova a ˈbɔn -a ˈye ˈkmʋn ˈdhɔɛeˈ ˈbhle. Ɔ nʋan Adan -e Ɛvʋ ɛ, ɔ pʋbʋ ˈdhe -bɔyaˈˈ -deɩn- dhueˈ ˈdhi. -Wɛeˈ Ɲɔnsoa pʋbʋ ˈˈniman ˈˈdhe ɔ ˈnaan: “Aʋ ˈghwlʋ ˈˈɲnuun, aʋ -dɩˈˈ, aʋ ˈˈjhi ˈbhlʋa, aʋ -nɩn ˈbho dhɩ aˈ klɛɛ ˈˈdhru.’” (Genèse 1:28) Zoova a ˈbɔn -dhe ʋʋ ˈye ˈˈɲnuun ˈghwlʋ, ʋʋ ˈyeɛ nʋn ˈbhlʋa aˈ klɛɛ ˈye -bɔyaˈˈ -deɩn ˈkpa ˈˈdhe ʋʋ ˈye nmian anˈ dɩ ˈˈdu. Zoova a ˈbɔn ɲʋn anˈ klɛɛ ˈye kuzɔn in -flɔn -dhe ˈˈdhe ʋʋ ˈye ˈkmʋn -nɩn jheejhee da ˈbhlʋa ˈˈkpe.

-Bho dhɛ Ɲɔnsoa a ˈbɔan se ˈo ɲnin mɔn -dhe ɛˈ, a ɔɔˈ -ˈglʋdɩ se ˈˈɩ zian-. (Isaïe 46:10, 11) ˈZɩan -ke ɛ, ɔɔ ˈbɔn ɲʋn -an ˈjheɔ ŋwɔn ˈye ˈkmʋn ˈsea ˈˈtianˈ ˈbhle ˈjhe ˈdhe -bɔyaˈˈ -deɩn ˈdhi.​—Zro Révélation 21:3, 4.

2. -Kawɛ -a ˈye nʋn -wɛeˈ -aaˈ ˈkmʋn ˈye dhɛ ˈdha ˈzɩan -an?

Zoova nʋn -aʋ ˈmɛn ɔ ˈye -aʋ jie bho po, ɛmɛn- dɩ -a ˈyeɔ jhibho- ˈˈdhe -a ˈyeɔ ˈˈɲɩn. (Zro Matthieu 5:3-6.) Ɔɔ ˈbɔn -a ˈye ɔɔˈ -jhbhɛʋn -nɩn, “dhɩ ɔɔ tɔɔan -abʋ ɛ, ɔɔ ˈbɔn -a ˈye ˈdhe ɩn ˈdhi -naan, -a ˈye ɔɔˈ dɩ -kman” ˈˈdhe -a ˈye ɔɔˈ dhbho nʋn “ˈdhe -aaˈ -pɛɛ ɛˈ klɛɛ ˈmʋn.” (Deutéronome 10:12; Psaume 25:14) -Bho -aa sɛ nʋn ɛnˈ, -aa muɛn ˈmʋnan in -nɩn -ka ˈkledɩ- -aa cɛɛan ˈdhe ˈdhi ˈjhe ɩn -nɩn -mɔnˈ -dhe ɛˈ. -Bho -aa sa Zoova ˈˈɲɩn ɛnˈ, -aa ˈjheɛ ˈˈkpe i -ka -aaˈ ˈkmʋn an ˈkpa taˈˈ dhɛbhleɛ, dhɩ ɔɔ tɔɔan -abʋ ɛ, ɩmɩn- -aa naan ˈdhe ˈdhi.

 4. Zoova aˈ -ˈglʋdɩ ˈse ˈˈɩ zian-

Zro Psaume 37:11, 29 -e Isaïe 55:11, -ˈmɛn aʋ ˈtmʋn ideedɩ- nɩn anˈ dɩ:

• -Ka dhɩ Zoova a ˈbɔan ɔ ˈyea nʋn ˈdhe -aaˈ dɩ ˈdhi ˈsea ˈˈɩ zian, ka -a nʋn ɛnˈ jhibho- sʋn -ɛn?

5. -Bho -aa sa Zoova ˈˈɲɩn ɛnˈ, -aaˈ ˈkmʋn an ˈkpa taˈˈ

 DHƐWƐ- ˈCƖAN-?

Zoova a ˈbɔn -aaˈ ˈkmʋn ˈse ˈˈtianˈ ˈbhle i ˈdhe -bɔyaˈˈ -deɩn ˈdhi. -Bho -aa sɔ ˈˈɲɩn ˈdhe -aaˈ -pɛɛ ɛˈ klɛɛ ˈmʋn ɛnˈ, -aaˈ ˈkmʋn an ˈkpa taˈˈ ˈzɩan.

Dhɛwɛ -ˈŋwɔn in -ɛn?

• -Kawɛ Zoova a ˈbɔn Adan -e Ɛvʋ aˈ ˈkmʋn ˈye -nɩn -dhe -ɛ?

• -Ka dhɩ Zoova a ˈbɔan ɔ ˈyea nʋn ˈdhe -aaˈ ˈkmʋn ˈdhi ˈsea ˈˈɩ zian- an, ka -aa nʋn ɛnˈ jhibho- sʋn -ɛn?

• Ka -ˈye nʋn -wɛeˈ -manˈ ˈkmʋn ˈye taˈˈ ˈkpa -a?