ˈCƖAANDHƐ- 26

Dhɛɛdɩ- ˈklejheɛ -e dhɩsaɩn siie- i -ɛ?

BHLƐ

-Bho dhɛsaʋn -jhii ɲɔn in ɛnˈ, ɛ -nmɔn ˈo i ɔ ˈye ɔɔˈ ˈˈjɛ i dee-: “Dhɛɛdɩ- ɛɛˈ dhɛ tu ˈjhe ˈʋn -ɛn?” Dhɛ ˈbhlea -aaˈ ˈmʋnan bhla ɛmɛn- -nɩn Biiblʋ a za ˈe ideedɩ- -ˈnɩn ˈmɛn.

1. Ka Satan nʋn dhɛsaʋn ˈnɔn ˈkmʋn -po sʋn -ɛn?

Ɲɔnsaʋn- Satan ˈse Ɲɔnsoa ŋwɔn ˈjhe. Satan an ˈbɔn ɔ ˈye ɲʋn ˈbhle. Ɔ -pooɛ- Adan -e Ɛvʋ ˈˈsrɛi -wɛeˈ ʋʋ ˈse Ɲɔnsoa aˈ Ghwlu ŋwɔn ˈjhe i. Satan ˈyeɛ nʋn ɛn, ɔ ˈtmʋɛn sɩ ˈdhe Ɛvʋ bho. (Genèse 3:1-5) Ɔ nʋɛnˈ -weɛˈ ʋʋ ˈye ka nʋn Zoova ˈse ʋaˈ dhɛjɛɛn ˈbɔn. Ɔ ˈnaan -bho -glɔɲiɔn se Ɲɔnsoa ŋwɔn ˈjhe ɛˈ, ɔɔˈ ˈkmʋn ˈbhɛɛˈ ʋn ˈye -kajɔɔnka -nɩn. Sɩ kɔan ɲan Satan ˈtmʋan ɩmɩn- -nɩn Ɛvʋ ˈse ˈmɛn in. Ɛɛˈ dɩ Biiblʋ a ˈdhaa Satan “sɩ ˈtmʋin- -e sɩ aˈ ˈˈbho.”—Jean 8:44.

2. Dhɛwɛ- Adan -e Ɛvʋ -za ˈo ʋʋ nʋn -ɛn?

Zoova ˈˈɲɩn Adan -e Ɛvʋ dhɩ aˈ klɛɛ ˈmɛn. Ɔ ˈnaan ʋʋ ˈbhɛɛˈ ʋʋ ˈye ti aˈ klɛɛ nɩan ˈe Edɛnɩn gle ˈdhi aˈ ˈˈbhi dhi, ˈklaa tu dhueˈ -nɩn ˈo -ʋanˈ ˈˈbhuo ʋʋ ˈse -dhi i. (Genèse 2:15-17) ˈKlaa tu -ʋanˈ ˈˈbhuo ɔ ˈnaan ʋaˈ dhiˈ -dhe ɛ, ɔmɔn- ʋʋ dhi. Ɛvʋ “ˈˈdhuo- tu aˈ ˈˈbhuo -ˈnɔn ˈmɛn ʋn yeɔ dhi.” Ɛ ˈyea ˈo ˈbhɔɔ- ɔ, Adan “dhiɔˈ” -ke. (Genèse 3:6) Ʋbʋ- nɩan ˈsɔɔn ɔn, ʋʋ -bhlaa Ɲɔnsoa aˈ ˈtee ŋwɔn. Adan -e Ɛvʋ -gwɛ i -dhe, ʋʋ ˈbhɛɛˈ ʋʋ ˈye dhɛ ˈsrɛaˈˈ nʋn. ˈKlaa ʋʋ -za ˈo Ɲɔnsoa aˈ ghwlu ŋwɔn -bhlaa, ʋʋ nʋɛn dhɛsaʋn- ˈˈdhe ʋʋ ˈse ɔɔˈ ɲʋnbhleɛ- ˈŋwɔɔn- ˈjhe. Dhɛ ʋʋ za ˈo ʋʋ nʋan jhʋbʋ ˈkledɩ- -duuˈˈ bho.—Genèse 3:16-19.

3. Dhɛ Adan -e Ɛvʋ za ˈo ʋʋ nʋan, ˈkledɩ- -wɛ ɛ -jha -aʋ bho -ɛ?

Dhɛ Adan -e Ɛvʋ nʋan dhɛsaʋn ɛn, ɛ nʋɛnˈ ʋʋ se i -gwɛ ˈbhodhe. Ɛɛˈ dɩ ˈˈɲnuun- ʋʋ ˈghwlʋa, ʋaˈ klɛɛ se i -gwɛ -ke. Dhɛ Biiblʋ ˈtmʋan ˈdhe Adan anˈ dhɛsaʋn ɛnˈ dɩ ˈdhi ka: “ˈDhe ɲɔn dhueˈ ɔɔˈ dɩ ˈmʋn ɛn, dhɛsaʋn ˈkpa ˈnɔn ˈkmʋn, -wɛeˈ dhɛsaʋn -za ˈmɛan ˈˈbhlo ˈˈdhe ˈmɛan -gbaa ɲʋn anˈ klɛɛ ˈˈjhrii.”—Romains 5:12.

Dhɩ -duuˈˈ -a jha -aʋ ˈkledɩ bho. Ɛ ˈbhɛɛˈ ɛ ˈye dhɩ -aa za ˈo -aa nʋan -aeˈˈ dhɩ ɲʋn -ˈnʋʋn an za ˈo ʋa nʋan -nɩn. -Zɔn -ˈnɔɔn, -da -a nɩan -e nɔnˈˈ -a nɩan ˈo ˈbhɛɛˈ ˈyeɛ nʋn -a ˈye ˈkledɩ ˈjhe.—Zro Ecclésiaste 9:11.

KPA DHƐ I ˈŊWƆƐN ƝAN

Dhɛ -ɛɛ toɛ -ka Ɲɔnsoa sea ˈe -aaˈ ˈkledɩ ˈzɔn -nɩn -e -bho -aa sa ˈkle ˈjhe -ka ɛ nɩan ˈbho ɔ -gwlɩˈˈ ɛ, ɩmɩn- -man mun ˈjhe-.

4. Ɲɔn nɩan ˈdhe -aaˈ ˈkledɩ ˈzɔn

ˈBho ɲʋn anˈ -da -duuˈˈ -gwlɩˈˈ ɛ, Ɲɔnsoa -a po ˈkmʋn nʋn jie bho. Ɛ tɔˈdɩ- ʋa ˈtmʋn? Po ˈo VIDEO.

VIDEO: Ɲɔnwɛ- ˈkmʋn nʋn -nɩn ˈe ˈkwa -a? (1:24)

Zro Jacques 1:13 -e 1 Jean 5:19, -ˈmɛn aʋ ˈtmʋn ideedɩ- nɩn anˈ dɩ:

Ɲɔnsoa -nɩn ˈe ˈklejheɛ- -e dhɩsaɩn ˈzɔn?

5. Dhɛwɛ- Satan anˈ ɲʋnbhleɛ po ˈo -ɛ?

Po ˈo VIDEO.

VIDEO: Dhɛɛdɩ- Ɲɔnsoa a ˈˈtai ˈklejheɛ- i -ɛ?: Ɛɛˈ ˈfɔ (3:07)

Zro Genèse 3:1-6, -ˈmɛn aʋ ˈtmʋn ideedɩ- nɩan da ˈzɔn da aˈ dɩ:

ˈSɩ -wɛ Satan ˈtmʋn -ɛn?—-Ŋmʋn ˈe ˈˈjhri -mɩɩnˈˈ 4 -e 5 ˈdhi.
-Ka Satan ˈnaan Zoova ˈse -glɔɲiɔn ɔnˈ dhɛjɛɛn ˈbɔn, dhɛwɛ- -ɛɛ toɛ -ɛ?
ˈBho Satan -gwlɩˈˈ ɛ, Zoova -mɔn ˈye -glɔɲiɔn jie bho po -wɛeˈ ɔ ˈye -bɔyaˈˈ ˈjhe?

Zro Ecclésiaste 8:9, -ˈmɛn aʋ ˈtmʋn ideedɩ- nɩn anˈ dɩ:

Dhɛ Zoova aˈ poa ˈbhlʋa jie bho ɛ, dhɩwɛ- -ɩan- nʋʋɛn -ɛn?

1. Adan -e Ɛvʋ -gwɛ i -dhe ʋʋ ye ˈdhe -bɔyaˈˈ -deɩn ˈdhi ˈˈti. ˈKlaa ʋʋ poɛ Satan anˈ ghwlu -dheinˈˈ bho ʋʋ ye Zoova aˈ ˈtee ŋwɔn -bhlaa.
2. Adan -e Ɛvʋ -bhlaa Zoova aˈ ˈtee ŋwɔn, ɛ nʋɛnˈ dhɩsaɩn- -e ˈklejheɛ- -e ˈmɛan ye i siie- ˈnɔn ˈkmʋn.
3. Zoova a muɛn dhɩsaɩn- -e ˈklejheɛ- -e ˈmɛan in -za. -Ka ɛ nɩan -tɛnˈˈ -dhe ɛ, -glɔɲiɔn ɔn muɛn i -gwɛ ˈˈdhe ɔɔ muɛn ˈdhe -bɔyaˈˈ -deɩn ˈdhi ˈˈti-.

6. -Aaˈ ˈkledɩ a kpʋɛn Zoova -glʋˈ

-Bho -aa sa sea aˈ, Ɲɔnsoa a naan -aaˈ dɩ tɔˈ i ˈmɛn? Zro dhɛ ˈBheɔ Davidɩ -e dhbhoi Piɛɛ ˈcrea ˈdhii. Zro Psaume 31:7 -e 1 Pierre 5:7, -ˈmɛn aʋ ˈtmʋn ideedɩ- nɩn anˈ dɩ:

Dhɛ jhibhi -ka Ɲɔnsoa jhibha -aaˈ ˈkledɩ ˈˈdhe ɔɔ ˈˈdua -aaˈ dɩ ɛ, ka ɛ -nɩn ˈbhoo- -gwlɩˈˈ-ɛ?

7. Ɲɔnsoa a muɛn -aaˈ ˈkledɩ aˈ klɛɛ i -za

Zro Isaïe 65:17 -e Révélation 21:3, 4, -ˈmɛn aʋ ˈtmʋn ideedɩ- nɩn anˈ dɩ:

Dhɛ jhibhi -ka Ɲɔnsoa a muan -aaˈ ˈkledɩ aˈ klɛɛ i -za, ka ɛɛ nʋn ʋn dɩ -ˈgwlɩi ˈˈdu sʋn -ɛn?

Jhibhodɩ-

Ɛ Zoova aˈ ˈɲnɩn -mɩn Satan ˈkɔɔ- -da ɔ ˈtmʋan sɩ kɔan ɲan. Ɛ nʋɛnˈ ˈbho ɲʋn -gwlɩˈˈ ɛ, Zoova se ɲʋnbhlei- ˈjɔɔn -nɩn ˈˈdhe ɔ se ɲʋn anˈ dɩ -kman. Ɛmɛn- ɔ po ˈo ɲʋn anˈ -da -duuˈˈ -gwlɩˈˈ. Nɔnˈˈ Zoova a muan -aaˈ ˈkledɩ i -za a, ɔɔ muɛn ɔɔˈ ˈɲnɩn -vlɛnˈˈ in -za -ke. Dhɛ ˈmɛn ˈdha -mɛn -nɩn ɔɔ muɛn -to -ka ɔɔˈ ɲʋnbhlesʋn nmɔan ˈˈjhrii ɛ. Zoova aˈ ˈɲnɩn anˈ -vlɛnˈˈ in -za -kɔn dɩ ˈjɛɛn- ˈnɔn ˈkmʋn ɔnˈ klɛɛ.—Matthieu 6:9, 10.

ƝƲN -ˈNƲƲN ˈNAAN: “Ɲɔnsoa poɛ ˈklejheɛ ˈnɔn ˈkmʋn -wɛeˈ ɔ ˈye -aʋ i ˈdɩn.”

Ka -man mun ˈdha -a?

DHƐWƐ- ˈCƖAN-?

Satan -e Adan -e Ɛvʋ nʋɛn -wɛeˈ ˈkledɩ ˈˈjhi ˈnɔn ˈkmʋn. Dhɛ -aa ˈjhea ˈkle ɛ, ɛɛ kpʋɛn Zoova glʋˈ ˈjɛɛn- ˈˈdhe ɔɔ muɛn -aaˈ ˈkledɩ i -za ˈdhe nɔnˈˈ -dhɛ ˈˈzaan ˈdhi.