Adan -e Ɛvʋ ˈse Ɲɔnsoa ŋwɔn ˈjhe, ɛɛˈ dɩ -aa nʋn dhɩsaɩn, -aa ˈjhe ˈkle ˈˈdhe -aa ˈmɛn. a ˈKlaa -aaˈ ˈkmʋn ˈse -kaˈ -sie- i. Zoova -jha ɲɔn -ɔ ˈye -aʋ zeie- ˈdhe dhɛsaʋn -e ˈmɛan ˈkwa: ɛ nɩn ɔɔˈ ˈˈJhu Zezi Klisɩ. Biiblʋ ˈnaan Zezi ɔˈ ˈmɛan -mɔn -nɩn zeieghwliɛ. Zeieghwliɛ -nɩɛn- -ˈˈghwliɛ- ɲɔn ɔn toa ˈo ˈˈdhe ɲɔn ɔn zeia ɲɔn. -ˈˈGhwliɛ- Zezi toa ˈo ɛ, ɛ nɩn ɔɔˈ ˈkmʋn gwɛa i -ʋn sea dhɛsaʋn ˈˈbun -nɩn ɛn. (Zro Matthieu 20:28.) Dhɛ Zezi ˈŋwɔɔan ˈmɛan -aaˈ dhɛsaɩn- anˈ dɩ ɛ, ɛ nʋɛnˈ dhɩ aˈ klɛɛ -ɩn ˈghwlʋa Adan -e Ɛvʋ kwa, -aa muɩn ˈjhe- -ˈdheeka. -Ka Zezi -e Zoova kman -aaˈ dɩ ˈjɛɛn- ɛn, Zezi toɛˈ ˈdhe ɔɔˈ nʋʋndhɩ ˈdhi. ˈCɩaandhɛ- nɛn ɛn muɛn -nʋn -ˈye Zezi ˈsɛ po dhɛ ɔ ˈmɛan -aaˈ dɩ.

1. -Kawɛ Zezi ɔˈ ˈmɛan an nʋn -aʋ sʋn bho -po sʋn ˈzɩan -an?

Dhɛ -a nɩan dhɛsaʋnʋʋn ɛn, ɛɛˈ dɩ -aa nʋn dhɩ -duuˈˈ -ɩan- ɲaan Zoova i. -Bho -a nɩn Zoova ˈye -jhbhɛɛ ɛˈ, -a ˈye -aaˈ dhɛsaʋn ˈˈɩn jhibho-, -a ˈye Zoova bhae- ˈdhe Zezi ɔˈ ˈɲnɩn ˈmʋn ɔ ˈye -aaˈ dhɛsaʋn ˈˈkpe ˈghwlʋ ˈˈdhe -a ˈye ˈe ˈkpɩ po -a ˈseɛ dhe -za i. (1 Jean 2:1) Biiblʋ ˈnaan: “Klisɩ ˈmɛɛnˈ -kpɔ dhueˈ ɲʋn anˈ klɛɛ ɛˈ dhɩsaɩn anˈ dɩ, ɲɔn ˈsrɛaˈˈ ˈmɛɛnˈ ɲʋn sea ˈˈɩ ˈsrɛ ɛˈ dɩ, -wɛeˈ ɔ ˈyʋbʋ ˈdhe Ɲɔnsoa bho kpa.”​—1 Pierre 3:18.

2. Dhɩjɛɩn- -wɛ Zezi ɔˈ ˈmɛan an mun -aʋ ˈˈdhrui -nʋn ˈdhe ˈkmʋn anˈ ɲan -an?

Zoova dhbhoɛ Zezi ɔ ˈye ɔɔˈ ˈkmʋn gwɛa i ˈsraa -zaa “-wɛeˈ ɲɔn ooˈˈ ɲɔn deɔ -gwlɩˈˈ ˈse ˈmɛn in, ˈklaa ɔ ˈye ˈkmʋn sea ˈˈtianˈ ˈbhle ˈjhe.” (Jean 3:16) ˈDhe Zezi ɔˈ ˈmɛan anˈ ˈsaa ˈmʋn ɛn, Zoova a muɛn dhɩsaɩn anˈ klɛɛ Adan anˈ Ɲɔnsoa aˈ Ghwlu ŋwɔn -bhlaa za ˈˈbhlo ˈkpa -po. Dhɛ -ˈmɛn ˈdhaa mɛn- -nɩn -bho -a de Zezi ɔˈ ˈsraa -gwlɩˈˈ ɛ, -aa muɛn ˈkmʋn sea ˈˈtianˈ ˈbhle ˈjhe- da ˈbhlʋa ˈˈkpe ˈdhe -bɔyaˈˈ -deɩn ˈdhi.”​—Isaïe 65:21-23.

 KPA DHƐ I ˈŊWƆƐN ƝAN

3. Zezi ɔˈ ˈmɛan zeie- -aʋ ˈmɛn ˈdhe dhɛsaʋn -e ˈmɛan ˈkwa

1. 1. Adan -gwɛ i -dhe, ˈklaa ɔ ˈse Ɲɔnsoa ŋwɔn ˈjhe, ɛɛˈ dɩ ɲʋn an nʋn dhɩsaɩn ˈˈdhe ʋa ˈmɛn.

2. 2. Zezi -gwɛ i -dhe ˈˈdhe ɔ ˈjheɛ Ɲɔnsoa aˈ ghwlu ŋwɔn, ɛɛˈ dɩ ɲʋn ˈbhɛɛ ʋʋ ˈye i -gwɛ ˈˈdhe ʋʋ ˈye ˈkmʋn sea ˈˈtianˈ ˈbhle ˈjhe.

4. Ɲʋn anˈ klɛɛ ˈbhɛɛˈ ʋʋ ˈye Zezi ɔˈ ˈmɛan ˈjɛɛn ˈdhi ˈjhee-

 5. Zeieghwliɛ -nɩɛn- -baanˈ- Zoova nʋn ʋn ˈˈdhrui

Zeieghwliɛ -nɩɛn- -baanˈ- ˈdhe Zoova aˈ -jhbhɛɛʋn ˈˈjhriɛ ˈdhe. -Bho -ˈye dhɛ -ɛɛ toɛ ˈjhe ɛˈ, zro Galates 2:20 ˈdhii, -ˈmɛn aʋ ˈtmʋn ideedɩ- nɩn anˈ dɩ:

• -Kawɛ dhbhoi- Pɔʋ nʋn ɛnˈ -to sʋn -ka zeieghwliɛ nɩan -baanˈ- Ɲɔnsoa nʋɔn ˈˈdhrui -ɛ?

-Da Adan nʋan dhɛsaʋn ɛn, ɔ ple ɔɔˈ ˈˈjɛ -e ɔɔˈ ˈˈɲnuun an klɛ ˈmɛn ˈdhe ˈmɛan ˈkwa. ˈKlaa Zoova dhbho ɔɔˈ ˈˈJhu ˈmɛn ɔ ye ˈmɛn -wɛeˈ -ˈye ˈkmʋn sea ˈˈtianˈ ˈbhle ˈjhe.

-Bho -man sa Biiblʋ aˈ ˈˈjhri nɩn ˈdhii zro ɛˈ, -da Zezi ɔ ˈjhea ˈkle ɛ, -ka ɛ nɩan ˈbho Zoova -gwlɩˈˈ -dhe ɛ, -nɛɛn tɔˈ i. Zro Jean 19:1-7, 16-18, -ˈmɛn aʋ ˈtmʋn ideedɩ- nɩn anˈ dɩ:

• Dhɩ Zoova -e Zezi nʋan ʋʋ ˈˈɲɩan ʋn ɛn, ka -man ˈjhɩ -ɛ?

 DHƐWƐ- ˈCƖAN-?

ˈDhe Zezi ɔˈ ˈmɛan anˈ ˈsaa ˈmʋn ɛn, Zoova ˈbhɛɛˈ ɔ ˈye -aaˈ dhɛsaʋn ˈˈkpe ˈghwlʋ. ˈˈDhe -a ˈbhɛɛˈ -a ˈye ˈkmʋn sea ˈˈtianˈ ˈbhle ˈjhe -ke.

Dhɛwɛ- -ˈŋwɔn in -ɛn?

• Dhɛɛdɩ- Zezi ˈmɛn -ɛn?

• Dhɛɛdɩ- Biiblʋ ˈnaan Zezi ɔˈ ˈkmʋn -nɩɛn- zeieghwliɛ- nmɔan ˈo dhi -ɛ?

• Dhɛjɛɛn- -wɛ Zezi ɔˈ ˈmɛan nʋn ʋn ˈˈdhrui -ɛ?