ˈCƖAANDHƐ- 30
-Aaˈ ɲʋn ˈmɛan, ʋʋ ˈbhɛɛˈ ʋʋ ˈye ˈkmʋn dhe jhi?
-Bho ɲɔn ˈmɛn ɛnˈ, ɛɛ kpʋɛn ɔɔˈ ˈcɛ -glʋˈ ˈˈdhe ɛɛ ˈˈzruu ʋbʋ ˈmɛn. Ɛɛˈ dɩ Biiblʋ ˈnaan ˈmɛan -nɩɛn- -aaˈ ˈmʋnɲɛin-. (1 Corinthiens 15:26) ˈDhe ˈcɩaandhɛ ɛˈ 27 ˈdhi ɛ, -a ˈŋwɔɛn in ˈmɛn -ka Zoova a muan ˈmɛanˈ nɩan -aaˈ ˈmʋnɲɛin i -za. ˈˈDhe ɲʋn ˈmɛan ɛ gwlea ˈo ˈdhe, ka ʋaˈ dɩ a mun ˈpɛn -ɛn? ˈNɔn ˈcɩaandhɛ- nɛn ˈdhi ɛ, -ka Zoova a muan ɲʋn ˈmɛan ˈkmʋn dhe -jha -wɛeˈ ʋʋ ˈyea -bɔyaˈˈ sea ˈˈtianˈ ˈbhle ˈjhe ɛ, ɛmɛn- -man mun ˈjhe-. Ɛɛn, ɔɔ mubʋ ˈkmʋn dhe -jha! Ɛɛ muɛn -nʋʋɛn- ˈjɛɛn-? Ʋbʋ a muɛn ˈkmʋn dhe -jhi ˈdhe jhaʋn ˈdhi -aeˈˈ da ˈbhlʋa ˈˈkpe?
1. Dhɛwɛ- Zoova a ˈbɔn ɔ ˈye nʋn ˈdhe -aaˈ ɲʋn ˈmɛan anˈ dɩ ˈdhi -ɛ?
Zoova a ˈbɔn ˈjɛɛn- ɔ ˈye ɲʋn ˈmɛan ˈkmʋn dhe -jha. Zɔbʋ deɛ -gwlɩˈˈ -dhe -ka -bho ɔ ˈmɛn Ɲɔnsoa ˈseɔ bho ˈˈmae- i ɛ. Ɔ -ghwluɛ- ˈe Ɲɔnsoa ˈbho ɔ ˈnaan: “-Man muɛn ˈdha-, ˈˈdhe ˈman muɛn ʋn ˈŋwɔn- [ˈdhe -drɛɛn ˈdhi].”—Zro Job 14:13-15.
2. Ka -a nʋn ɛnˈ jhibho- sʋn -ka ɲʋn ˈmɛan an muan ˈkmʋn dhe -jhi -ɛ?
-Da Zezi nɩan da ˈbhlʋa ˈˈkpe -dhe ɛ, Ɲɔnsoa ˈˈɲɩɔn ˈˈɩkman- ɔ ˈye ɲʋn ˈmɛan ˈkmʋn dhe -jha. Zezi -jha ˈɲnʋnkpaoˈ -jhu ˈˈzaan- ˈbhlea zɩn anˈ 12 -e -dɔa- ˈɲnɔn dhueˈ aˈ ˈˈjhu -ɲmau ˈkmʋn dhe. (Marc 5:41, 42; Luc 7:12-15) ˈBho -ˈmɛn ˈdhe ɛ, Zezi ɔˈ dhaiˈˈ Lazaa ˈmɛn ɛnˈ. -Bho Lazaa ˈmɛn ɔ nʋn ˈghwɩ ɲiɛn ˈdhe -drɛɛn ˈdhi -mɔnˈ -dhe ɛˈ, Zezi jhɔ ˈkmʋn dhe. Zezi -gwɛa Ɲɔnsoa bhae- ˈnan an, ɔ kpa ghwlu ˈˈjha ɔ ˈnaan: “Lazaa, ˈˈsi ˈzɔn!” ˈSʋ “ˈˈjhu ˈmɛan -dhe ɛ, ɔ ˈˈsiɛ ˈzɔn.” Lazaa jhiɛ ˈkmʋn dhe! (Jean 11: 43, 44) ˈMʋnan an nʋn Lazaa aˈ dhaiˈˈ -e ɔɔˈ ˈcɛ ˈmɛn!
3. Dhɛwɛ- -ˈbhɛɛ -ˈye -gwlɩˈˈ de ˈdhe -manˈ ɲʋn ˈmɛan anˈ dɩ ˈdhi -ɛ?
Dhɛ Biiblʋ -zaa ɲan ʋn ˈtmʋan, ɛ ka: “ˈKmʋndhejhiɛ- ɛɛ muɛn -nɩn.” (Actes 24:15) Ɲʋn Zezi jha ˈkmʋn dhe ˈse ˈe jhaʋn ˈdhi mun. (Jean 3:13) Dhɛ ɔ jhʋbʋ ˈkmʋn dhe da ˈbhlʋa ˈˈkpe ˈbhleɛ ʋaˈ ˈmʋnan-. ˈKamɔn- -ke Zezi ɔ mun ɲʋn anˈ mliɔn -duuˈˈ ˈkmʋn dhe -jha -wɛeˈ ɔ ˈyʋbʋ -bɔyaˈˈ sea ˈˈtianˈ ˈbhle ˈˈɲɩn da ˈbhlʋa ˈˈkpe. Ɔ ˈnaan “ɲʋn anˈ klɛɛ -ʋaˈ dɩ Ɲɔnsoa ˈsea bho ˈˈmae- a muɛn ˈkmʋn dhe -jhi, -bho ɲʋn -ˈnʋʋn ˈˈmae- ʋaˈ dɩ bho -mɔnˈ -dhe ɛˈ.—Jean 5:28, 29.
KPA DHƐ I ˈŊWƆƐN ƝAN
Zezi ˈbhɛɛˈ ɔ ˈye ɲʋn ˈmɛan ˈkmʋn dhe -jha ˈˈdhe ɔɔ muɛn nʋn. ˈCɩan dhɛ Biiblʋ aˈ ˈtmʋan ˈdhe ɛɛˈ dɩ ˈdhi ˈˈdhe -ˈyeɛ ˈˈkpe i ˈjhe. -Ka ɲʋn ˈmɛan ʋaˈ ˈkmʋndhejhiɛ ˈbhɛɛa ɛ ˈyea ʋn dɩ -ˈgwlɩi ˈˈdu ˈˈdhe ɛ ˈbhɛɛa ɛ ˈyea ʋn -pɛɛɩtbhadhɛ ˈˈɲɩn ɛn, ɛmɛn- -aa mun ˈcɩan-.
4. Zezi toɛˈ -ka ɔ ˈbhɛɛa ɔ ˈyea ɲʋn ˈmɛan ˈkmʋn dhe -jha
Dhɛ Zezi nʋan ɔ ˈˈɲɩan ɔɔˈ dhaiˈˈ Lazaa a, ˈbɔn ɛnˈ i ˈŋwɔan in. Zro Jean 11:14, 38-44, -ˈmɛn aʋ ˈtmʋn ideedɩ- nɩn anˈ dɩ:
-
-Ka Lazaa ˈmɛan ˈjɛɛn- ɛn, ka -a nʋn ɛnˈ jhibho- sʋn -ɛn? -Ŋmʋn ˈdhe ˈˈjhri -mɩɩnˈˈ 39 ˈdhi.
-
-Bho Lazaa mun ˈe jhaʋn ˈdhi -dhe ɛˈ, ˈbhoo- -gwlɩˈˈ ˈdhee, Zezi ɔ muɔn ˈkmʋn ˈdhe -jha kenɛnˈ da ˈbhlʋa ˈˈkpe?
5. Ɲʋn -duuˈˈ a muɛn ˈkmʋn dhe -jhi!
Zro Psaume 37:29, -ˈmɛn aʋ ˈtmʋn ideedɩ- nɩn anˈ dɩ:
-
Ɲʋn anˈ mliɔn -duuˈˈ -ʋa- muan ˈkmʋn dhe -jhi ɛ, -dawɛ ʋʋ ˈye ˈˈti -ɛ?
Ɛ se ɲʋn ˈˈɲɩan Zoova aˈ ˈsʋ Zezi ɔ mun ˈkmʋn dhe -jha -nɩn. Zro Actes 24:15, -ˈmɛn aʋ ˈtmʋn ideedɩ- nɩn anˈ dɩ:
-
Ɲʋnwɛ- -man ˈbɔn -ˈye ˈjhe ˈdhe ɲʋn -an muan ˈkmʋn dhe -jhi ˈˈklu -ɛ?
-Naan dɩ nɩn tɔˈ i: Zezi ˈbhɛɛˈ ɔ ˈye ɲɔn ˈmɛan ˈkmʋn dhe -jha -ka ˈˈbho ɔˈ za ɔɔˈ ˈˈjhu -ɔɔ ˈmʋan ˈˈɲiɔn ɔn.
6. Ɲʋn ˈmɛan anˈ ˈkmʋndhejhiɛ ɛɛ muɛn ʋn dɩ -ˈgwlɩi ˈˈdu- ˈˈdhe ɛ ˈye ʋn -pɛɛɩtbhadhɛ ˈˈɲɩn
Zaii ɔˈ ˈˈjhu -ɲnʋnkpaoˈ aˈ -bo nɩan ˈe Biiblʋ ˈdhi ɛ, ɔɔ ˈˈduɛ ɲʋn dɩ -ˈgwlɩi ˈˈdhe ɔɔ poɛ ɲʋn -ʋaˈ ɲɔn ˈmɛan ˈkpɩ. Zro -bo -ˈnɔn ˈdhii ˈdhe Luc 8:40-42, 49-56 ˈdhi.
Zezi ˈyea Zaii ɔˈ ˈˈjhu -ɲnʋnkpaoˈ ˈkmʋn dhe -jha a, ɔ -ghwluɛ- ˈe ʋanˈ ˈˈbho bho ɔ ˈnaan: “-Faʋn anˈ nʋn ʋn -dhe, de Ɲɔnsoa -gwlɩˈˈ.” (-Ŋmʋn ˈdhe ˈˈjhri -mɩɩnˈˈ 50 ˈdhi.) Ka ɲʋn ˈmɛan anˈ ˈkmʋndhejhiɛ ɛˈ -pɛɛɩtbha- ˈbhɛɛ ɛ ˈye ʋn sʋn bho po...
-
-bho -manˈ ɲɔn ɔnˈ dɩ ˈkpa -a?
-
-bho -nɩn ˈo ˈmɛanˈ -e ˈpʋʋa ˈɲnɩn ɛnˈ?
Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.
-
Ka ˈkmʋndhejhiɛ nʋn Felisite aˈ ˈcɛ ˈkpɩ -po sʋn ˈˈdhe ɛ nʋbʋ dɩ -ˈgwlɩi ˈˈdu sʋn -ɛn?
ƝƲN -ˈNƲƲN ˈNAAN: “Ɲɔn ˈmɛan, ɔ se ˈbhɛɛ- ɔ ˈye ˈkmʋn dhe jhi.”
-
Ka -man ˈjheɛ -ɛ?
-
-Ka ɲʋn ˈmɛan an muan ˈkmʋn dhe -jhi ɛ, Biiblʋ aˈ ˈˈjhriɛ- -wɛ -ˈbhɛɛ -ˈye i -jhii -wɛeˈ -ˈyeɛ -to -ɛ?
DHƐWƐ- ˈCƖAN-?
Biiblʋ ˈnaan ɲʋn anˈ mliɔn -duuˈˈ -a mun ˈkmʋn dhe -jhi. Zoova a ˈbɔn ɔ ˈyʋbʋ ˈkmʋn dhe -jha, ɛɛˈ dɩ ɔ ˈˈɲɩn Zezi ˈˈɩkman -wɛeˈ ɔ ˈyeɛ nʋn.
Dhɛwɛ- -ˈŋwɔn in -ɛn?
-
-Kawɛ Zoova -e Zezi ʋa ˈjhe ɲʋn ˈmɛan anˈ ˈkmʋndhejhiɛ -ɛ?
-
Ɲʋn anˈ mliɔn -duuˈˈ -ʋa- muan ˈkmʋn dhe -jhi ɛ, -dawɛ ʋʋ ˈye ˈˈti -ɛ: ˈDhe jhaʋn ˈdhi -aeˈˈ da ˈbhlʋa ˈˈkpe? Dhɛɛdɩ- -man ˈdha -kaˈ -a?
-
Dhɛɛdɩ- deɛ -gwlɩˈˈ -ka -manˈ ɲʋn -ʋaˈ dɩ ˈkpa ˈbhɛɛa ʋʋ ˈyea ˈkmʋn dhe jhi -ɛ?
ˈBƆN DHƖ -ˈNƖƖN ANˈ I ˈŊWƆAN IN
-Bho -manˈ ɲɔn ˈmɛn ɛnˈ, dhɩ -ˈbhɛɛa -ˈyea nʋn ˈˈdhe -ˈyea ˈˈzru dɩ ˈbhɔ ɔ, ɩmɩn- -man mun ˈjhe ˈnɔn ˈsɛɛ- nɛn ˈdhi.
“Quand on perd quelqu’ʋn qu’on aime” (Réveillez-vous! no 3 2018)
Ɲɔn -ɔɔˈ ɲɔn ˈmɛan, Biiblʋ aˈ ˈsrɩn ˈbhɛɛˈ ɩn ˈyeɔ sʋn bho po?
-Bho ˈˈɲnumɩɩnˈˈ anˈ ɲɔn ɔnˈ dɩ ˈkpa aˈ, -kawɛ ɲʋn ˈbhɛɛˈ ɲʋn ˈye nʋn -wɛeˈ ɲʋn ˈyʋbʋ dɩ -ˈgwlɩi ˈˈdu -ɛ?
Ɲʋn ˈmɛan, ʋa klɛɛ -ɛ mun ˈkmʋn dhe -jhi ˈdhe jhaʋn ˈdhi? Ɲʋnwɛ- ˈse ˈkmʋn dhe -jhi i -ɛ?
“Qu’est-ce que la résurrection?” (Dɩ ˈghwlʋa ˈo ɛntɛɛnɛtɩ ˈˈkpe ɛ)
