ˈCƖAANDHƐ- 01

-Kawɛ Biiblʋ ˈbhɛɛ ʋn ˈye ʋn sʋn bho po -ɛ?

BHLƐ

-Aaˈ klɛɛ ɛ ˈbɔn -a ˈye dhɩ -duuˈˈ i ˈŋwɔn ˈdhe ˈkmʋn -e ˈklejheɛ- -e ˈmɛan -e dhɩ ˈyea -nʋʋɛn- ˈdhe ˈkmʋn anˈ ɲan anˈ dɩ ˈdhi. -Ka -a ˈyea nʋn -ke -wɛeˈ -a ˈyea ˈghwɛiɛ ˈjhe ˈˈdhe -a ˈyea -aaˈ ˈˈjɛ ɛˈ dɩ ˈˈdu -e -ka -a ˈyea nʋn -a ˈyea -bɔyaˈˈ ˈjhe ɛ, ɩmɩn- anˈ -zɔnˈ -aa ˈˈdu. Ɲʋn anˈ -da -duuˈˈ ˈnaan ɛ se dɩ ʋa deea ʋaˈ ˈˈjɛ i aˈ ˈsʋ -mɩn Biiblʋ a za ˈe -nɩn, ʋan ˈˈdubʋ ˈsrɩn ˈdhɔɛe -ke -ɩan- pʋbʋ sʋn bho zɔn ooˈˈ zɔn ˈdhe ʋaˈ ˈkmʋn ˈdhi. ˈBhoo- -gwlɩˈˈ ˈdhee, Biiblʋ ˈbhɛɛˈ ʋn ˈye ɲɔn ooˈˈ ɲɔn sʋn bho po?

1. Ideedɩ- -wɛ Biiblʋ a za ˈe -ɛ?

Ideedɩ- kɔandɩ Biiblʋ a za ˈe ɛ, ɩanˈ -ˈnɩɩn ka: -Kawɛ ˈkmʋn nʋn -dee sʋn -ɛn? Dhɛɛdɩ- -a jhi ˈnɔn ˈkmʋn -ɛn? Dhɛɛdɩ- ɲʋn an ˈjhe ˈkle -ɛ? -Bho ɲiɔn ˈmɛn, da ɔɔ mun -ɛn? Ɲʋn anˈ klɛɛ ɛ ˈbɔan ˈflɛ ˈdhee, dhɛɛdɩ- tʋ siie- i -ɛ? -Kawɛ ˈbhlʋa a mun -nɩn ˈdhe ˈkmʋn anˈ ɲan -an? Dɩ nɩn anˈ i -deeɛ se dhɛsaʋn -nɩn ˈˈdhe Biiblʋ ˈbhɛɛˈ ʋn ˈye -aʋ sʋn bho po -a ˈye ɩanˈ ˈdhezaaˈ ˈjhe. Ɲʋn anˈ mliɔn ˈjhea ideedɩ- -ˈnɩn anˈ ˈdhezaaˈ a, ʋaˈ -pɛɛ bhluˈ.

2. -Kawɛ Biiblʋ ˈbhɛɛ ʋn ˈye -aʋ sʋn bho po -wɛeˈ -a ˈye ˈmʋnan nʋn zɔn ooˈˈ zɔn ˈdhe -aaˈ ˈkmʋn ˈdhi -ɛ?

Biiblʋ a ˈˈduɛ -aʋ ˈsrɩn ˈdhɔɛe. Ʋanˈ ˈsrɩn an poɛ -aʋ sʋn bho -wɛeˈ -a ˈye -bɔyaˈˈ ˈjhe ˈdhe ˈˈgbuzɔnˈ. Ɩan poɛ -aʋ sʋn bho -aa yea -aaˈ -ˈzɔndɩ ˈˈdhru ˈjha. Ɩan nʋɛnˈ -aa yea -aaˈ dhbho ɔˈ dɩ kman. Dhɛ Biiblʋ a tɔɔan ɲʋn ˈdhe dɩ -ˈnɩn anˈ dɩ ˈdhi ɛ, -man muɛn ˈcɩan- ˈˈdhe -man muɛn dhɩ -duuˈˈ i ˈŋwɔn -kenɛnˈ ˈnɔn ˈsɛɛ- nɛn ˈdhi. -Man muɛn ˈˈkpe i ˈjhe- -ka ‘ˈcreedhɩ aˈ klɛɛ [dhɩ aˈ klɛɛ nɩan ˈdhe Biiblʋ ˈdhi] ˈdha dhɛ.’—2 Timothée 3:16.

ˈSɛɛ- nɛn se Biiblʋ -nɩn. Ɛɛ poɛ ʋn sʋn bho -wɛeˈ -manˈ ˈˈjɛ ˈye Biiblʋ ˈcɩan. -ˈMɛn -aa poɛ ʋn ˈkpɩ -ˈye Biiblʋ aˈ ˈˈjhri nɩan ˈnɔn ˈcɩaandhɩ- nɩn ˈdhi ˈdhii zro -wɛeˈ -ka dhɛ -man ˈcɩan -nɩn Biiblʋ a kpa -jie- dhueˈ ɛ, -ˈyeɛ ˈˈkpe i ˈjhe.

KPA DHƐ I ˈŊWƆƐN ƝAN

-Ka Biiblʋ nʋan ɲʋn -ˈnʋʋn sʋn bho -po sʋn -e -ka -ˈyea nʋn -wɛeˈ -ˈyea ʋanˈ ˈdhiizroɛ trɔnˈ ˈdhi ˈjhee- -e dhɛɛdɩ- ɲʋn -ˈnʋʋn ˈyea ʋn sʋn bho po -wɛeˈ -ˈyʋ i ˈŋwɔn, ɩmɩn- -man mun ˈcɩan-.

3. Biiblʋ ˈbhɛɛˈ ʋn ˈye -aʋ jie bho po

Biiblʋ gwɛ nɛn -ɛɛ gbaai ˈbho -jieˈˈ -wɛeˈ ɲʋn ˈye i ˈjhe. Ʋn ˈbhɛɛˈ ʋn ˈye -aʋ sʋn bho po -a ˈye ˈo dhɩjɛɩn -za -a ˈye nʋn ˈdhe -aaˈ ˈkmʋn ˈdhi ˈˈdhe -a ˈye dhɩ ˈyea -nʋʋɛn- ˈdhe ˈkmʋn anˈ ɲan jhibho-.

Zro Psaume 119:105, -ˈmɛn aʋ ˈtmʋn ideedɩ- nɩn anˈ dɩ:

-Kawɛ ɲɔn ˈcrea Psaume ɛnˈ ˈfɔ nɔn ɔn ˈjhe Biiblʋ -ɛ?
Ka -man ˈjhe Biiblʋ -ɛ?

4. Biiblʋ ˈbhɛɛˈ ʋn ˈye ˈe -aaˈ ideedɩ -za

ˈƝnʋnkpaoˈ dhueˈ ˈnaan ideedɩ- ʋan naan tɔˈ ˈˈkpe i ˈdhe zɩn ˈdhi -dhe ɛ, ɩmɩn- Biiblʋ -za ˈe. Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.

VIDEO: -Manˈ ˈmɛn -e ˈkpɩ i -dhe! (1:48)

ˈNɔn video nɔn ˈdhi ɛ, dɩwɛ- ˈɲnʋnkpaoˈ -ˈnʋn an dee ʋanˈ ˈˈjɛ i -dhe -ɛ?
-Kawɛ Biiblʋ ˈcɩan- nʋn sʋn bho -po sʋn -ɛn?

Biiblʋ a poɛ -aʋ ˈkpɩ -a ˈye dɩ i -dee. Zro Matthieu 7:7, -ˈmɛn aʋ ˈtmʋn ideedɩ- nɩn anˈ dɩ:

Ideedɩ- -wɛ -ˈbhle Biiblʋ ˈbhɛɛ ʋʋ ˈye ˈe -za?

5. Biiblʋ aˈ ˈdhiizroɛ ˈbhɛɛˈ ɛ ˈye -manˈ ˈmʋnan ˈbhle

Biiblʋ aˈ ˈdhiizroɛ ˈbhleɛ ɲʋn anˈ -da -duuˈˈ aˈ ˈmʋnan- ˈˈdhe ʋa ˈjheeɛ ˈbho dhɛjɛɛn-. Po ˈo VIDEO, -ˈmɛn aʋ ˈtmʋn ideedɩ- nɩan da ˈzɔn da aˈ dɩ.

VIDEO: Biiblʋ aˈ ˈdhiizroɛ- (2:05)

ˈDhe video nɔn ˈdhi ɛ, ka ɲʋnjhae- aˈ -da -duuˈˈ a ˈjhe dhɩ ˈdhiizroɛ-?
-Bho dhɩ ˈdhiizroɛ- ɛˈ nʋbʋ ˈtʋn mɔn -dhe ɛˈ, dhɛɛdɩ- Biiblʋ aˈ ˈdhiizroɛ ɛ nʋbʋ ˈtʋn -ɛn?

Dhɩ -aa zroa ˈdhii ˈdhe Biiblʋ ˈdhi a ˈˈduɛ -aʋ dɩ -ˈgwlɩi, ɩan ˈˈɲɩɛn -aʋ -pɛɛɩtbhadhɛ-. Zro Romains 15:4, -ˈmɛn aʋ ˈtmʋn ideedɩ- nɩn anˈ dɩ:

Dɩ Biiblʋ a ˈtmʋan ˈdhe ɲʋndɩgwlɩiduɛ- -e dhɩ ˈyea -nʋʋɛn- ˈdhe ˈkmʋn anˈ ɲan anˈ dɩ ˈdhi ɛ, ɩan nʋn ʋn ˈtʋn ˈmɛn?

6. Ɲʋn -ˈnʋʋn ˈbhɛɛˈ ʋʋ ˈye -aʋ sʋn bho po -a ˈye Biiblʋ i ˈŋwɔn

Ɲʋn -ˈnʋʋn ˈnaan -bho ʋaˈ ˈsʋ ˈbhɛɛ ʋʋ ˈye Biiblʋ ˈdhii zro mɔn -dhe ɛˈ, -bho ʋʋ -nɩn ɲʋn -ˈnʋʋn an sa ʋanˈ dɩ ˈtmʋn ɛnˈ, ɛɛ pʋbʋ sʋn bho. Zro Actes 8:26-31, -ˈmɛn aʋ ˈtmʋn ideedɩ- nɩn anˈ dɩ:

Ka -a ˈbhɛɛ -a ˈye nʋn -wɛeˈ -a ˈye Biiblʋ i ˈŋwɔn-?—-Ŋmʋn ˈdhe ˈˈjhri -mɩɩnˈˈ 30 -e 31 ˈdhi..

Etiopikɔin ɔn ˈbɔn ɲʋn ˈyeɔ sʋn bho po ɔ ˈye Ɲɔnsoa aˈ Ghwlu i ˈŋwɔn. ˈZɩan -ke ɛ, ɲʋn -ˈnʋʋn ˈnaan -bho ʋʋ -nɩn ɲʋn -ˈnʋʋn an sa ʋanˈ dɩ ˈtmʋn ɛnˈ, ɛɛ pʋbʋ sʋn bho.

ƝƲN -ˈNƲƲN ˈNAAN: “Ɲɔn -ɔn ˈcɩan Biiblʋ ɔɔ ˈkɔɔɛ ɔɔˈ nɔnˈˈ.”

Ka -man mun ˈdha -a? ˈˈDhe dhɛɛdɩ- -ɛ?

DHƐWƐ- ˈCƖAN-?

Biiblʋ a ˈˈɲɩɛn -aʋ ˈsrɩn -ɩan- po -aʋ sʋn bho ˈdhe -aaˈ ˈkmʋn ˈdhi, ʋan za ˈe ideedɩ- kɔandɩ, ʋan ˈˈduɛ ɲʋn dɩ -ˈgwlɩi, ʋan ˈˈɲɩɛn ɲʋn -pɛɛɩtbhadhɛ-.