Zoova ˈˈɲɩn -aʋ Biiblʋ. ˈSɛɩ aˈ 66 man -baanˈ- ˈdhɔɛe -ˈnɔn. ˈKlaa -ˈbhɛɛˈ -ˈye -manˈ ˈˈjɛ i dee-: ‘ka Biiblʋ nʋn ˈcreɛ- sʋn -ɛn?’ -Ɔ -nɩn ʋanˈ -jhei -ɛ? -Bho -a ˈye ideedɩ- -ˈnɩn ˈe -za aˈ, -ˈmɛn -ka Biiblʋ nʋan ˈcreɛ- sʋn ˈˈdhe ʋn ˈkpa ˈdhe -a ˈkwa ˈzɩan an, -a ˈtmʋn ɛnˈ dɩ ke -tɛnˈˈ.

1. Ɲiɔʋ ˈcrea Biiblʋ ˈdhee, -ˈmɛn dhɛɛdɩ- ɲʋn ˈnaan ɛ nɩn Ɲɔnsoa -nɩn ʋanˈ -Jhei -ɛ?

Biiblʋ aˈ ˈcrea poɛ ˈo zɩn anˈ 1.600 -ɛ -nɩn dhɛ ˈˈkpe. Ʋanˈ ˈcrea -deeˈ ˈdhe -tɛnˈˈ ti aˈ 1513 zʋn ˈdhi ɛ ye -kaan ti aˈ 98 zʋn -jhɛɛ. Ɲʋn anˈ 40 ˈcre Biiblʋ. -Da ʋaˈ -ˈnʋʋn nɩan ˈkmʋn -dhe ɛ, -ˈmɛn ʋaˈ -ˈnʋʋn ˈse ˈghwlʋ ke. -Bho ɛ -nɩn -kaˈ mɔn -dhe ɛˈ, dɩ ʋan ˈtmʋan, ɩan kpa -jie- dhueˈ. Ka ɛɛˈ dhɛ tu ˈbhɛɛˈ ɛ ˈye -nʋʋɛn-? Dhɛ nɩan ˈo -mɛn -nɩn Ɲɔnsoa -mɔn -nɩn ʋanˈ -Jhei. (Zro 1 Thessaloniciens 2:13.) Ɲʋn ˈcrea Biiblʋ ˈse dhɩ ˈghwlʋa ˈbho ʋaˈ ˈˈjɛ -gwlɩˈˈ ˈcre. “Ɲɔnsoa aˈ -zuu a ˈˈtun ɲiɔʋ -wɛeˈ ʋʋ ˈtmʋn dhɩ Ɲɔnsoa ˈtmʋan.” (2 Pierre 1:21) Ɲɔnsoa aˈ -zuu pʋbʋ tɔˈ -gwlɩˈˈ -wɛeˈ ʋʋ ˈcre ɔɔˈ ghwlu.​—2 Timothée 3:16.

2. Ɲɔnwɛ- ˈbhɛɛ -ɔ ˈye Biiblʋ ˈjɛɛn ˈdhi ˈjhee- -ɛ?

“Ɲʋn ˈghwlʋa ˈbhlʋɩdhri -e ˈcɛdhri ˈdhi i, -ʋʋ sea ghwlu dhueˈ ˈbhle ˈˈdhe -ʋʋ sea ˈcɛ dhueˈ man,” ʋʋ ˈbhɛɛˈ ʋʋ ˈye -bɔyaˈˈ -bo nɩan ˈe Biiblʋ ˈdhi ˈjɛɛn ˈdhi ˈjhee-. (Zro Révélation 14:6.) Ɛɛˈ dɩ Ɲɔnsoa nʋɛn ɲʋn -jhaa Biiblʋ ˈdhe ghwlu -duuˈˈ ˈdhi ɛ ye ˈsɛɛ ooˈˈ ˈsɛɛ -zii da ˈbhlʋa ˈˈkpe. Ɲʋn anˈ -da -duuˈˈ ˈbhɛɛˈ ˈzɩan ʋʋ ˈye Biiblʋ ˈdhii zro -aeˈˈ ʋʋ ˈyʋ -dheinˈˈ bho po -da ʋʋ ˈjhe ʋʋ ˈˈti -aeˈˈ -ka ghwlu ʋa poa ˈjhe ʋn -nɩn mɔnˈ -dhe ɛˈ.

3. Ka Zoova nʋn Biiblʋ aˈ dɩ ˈˈdu sʋn -wɛeˈ ɔɔˈ ˈmʋnɲɛʋn ˈsʋ i -za?

Ʋʋ ˈˈdhuɛ- nmiian anˈ kwi -e ˈsɛɩ- -ɩanˈ gwlea ˈo ˈmʋn ʋʋ ye Biiblʋ ˈcre -dhe. Ɛɛˈ dɩ ɲʋn kman Biiblʋ aˈ dɩ nʋn ʋanˈ ˈcre -za dhe -wɛeˈ ʋn saˈ i -za. -Bho ˈbhlʋɩbhleʋn -e pliegbi aˈ ˈˈdhrujheʋn an sa ˈbɔn ʋʋ ˈye Biiblʋ i -za -dhe ɛˈ, ɲʋn -ˈnʋʋn ˈse ˈmɛan -plee ʋʋ ˈye Biiblʋ aˈ dɩ ˈˈdu -wɛeˈ ɲʋn -saˈ i -za. Dhɛ ooˈˈ dhɛ Zoova ˈbhɛɛa ɔ ˈyea nʋn ɛn, ɔ nʋɛnˈ -wɛeˈ ɔ ˈye ˈdhe -a bho -ghwlu jheejhee. Biiblʋ ˈnaan, “-aaˈ Ɲɔnsoa aˈ Ghwlu a muɛn ˈkmʋn -nɩn jheejhee.”​—Isaïe 40:8.

 KPA DHƐ I ˈŊWƆƐN ƝAN

5. Ɲʋn -an ˈbɔan -ʋʋ ˈyea Biiblʋ i -za ˈsʋ i -za

 6. Biiblʋ -nɩɛn- ɲʋn anˈ klɛɛ ɛˈ ˈsɛɛ-

Ɲʋn -jhaa Biiblʋ ˈdhe ghwlu -duuˈˈ ˈdhi ˈˈdhe ɲʋn gblʋ ɲʋn ˈˈjhrii i ɛ ye ˈsɛɛ ooˈˈ ˈsɛɛ -zii. Zro Actes 10:34, 35, -ˈmɛn aʋ ˈtmʋn ideedɩ- nɩn anˈ dɩ:

• Dhɛɛdɩ- Ɲɔnsoa a ˈbɔn ɲʋn ˈye ɔɔˈ Ghwlu ˈdhe ghwlu -duuˈˈ ˈdhi -jhaa ˈˈdhe ɲʋn ˈyʋ ɲʋn ˈˈjhrii gble -ɛ?

• Dhɛwɛ- -ɛɛ nʋn ʋn ˈtʋn ˈdhe Biiblʋ aˈ dɩ ˈdhi -ɛ?

 DHƐWƐ- ˈCƖAN-?

Biiblʋ -nɩɛn- Ɲɔnsoa aˈ Ghwlu, ɔ nʋɛnˈ -wɛeˈ ɲʋn anˈ klɛɛ nɩan da ˈbhlʋa ˈˈkpe ˈyʋ ˈbhle.

Dhɛwɛ- -ˈŋwɔn in -ɛn?

• -Bho ɲʋn ˈnaan Ɲɔnsoa poɛ ɲiɔʋ tɔˈ -gwlɩˈˈ -wɛeˈ ʋʋ ˈcre ɔɔˈ Ghwlu ɛˈ, dhɛ ɛ ˈdha -a?

• Dhɛ ɲʋn ˈsea Biiblʋ i -za, ɲʋn -jhaaʋ ˈdhe ghwlu -duuˈˈ ˈdhi ˈˈdhe ɲʋn gblʋ ɲʋn ˈˈjhrii ɛ, dhɛɛdɩ- ɛɛ ˈtʋn -manˈ -pɛɛ i -ɛ?

• Dhɩ -duuˈˈ Ɲɔnsoa nʋan -wɛeˈ ɔ -nɩn -ˈyea -ghwlu ɛ, dhɛwɛ- ɩan po ˈbhoo- -gwlɩˈˈ -ɛ?