ˈCƖAANDHƐ- 09

Bhaeɛ ˈbhɛɛˈ ɛ ˈye -jhbhɛɛ nɩan ˈo mɔn -e Zoova ˈɲnɩn i -kuu

BHLƐ

-Zɔn -dhee -ˈnɔɔn -man ˈbɔn ˈsrɩn -ɩn ˈye ʋn jie bho po ˈdhe -manˈ ˈkmʋn ˈdhi? -ˈBhleɛ ideedɩ- -ɩn ˈdhe -zaaˈ -man ˈbɔn in? -Man ˈbɔn ɲʋn ˈye ʋn dɩ -ˈgwlɩi ˈˈdu -aeˈˈ ɲʋn ˈye ʋn sɩn ˈdhei de? -Man ˈbɔn -jhbhɛɛ nɩan ˈo mɔn -e Zoova ˈɲnɩn ˈye i ku? Bhaeɛ ˈbhɛɛˈ ɛ ˈye ʋn sʋn bho po -ˈye dhɩ -ˈnɩn anˈ klɛɛ -man ˈbɔan ˈjhe. -ˈMɛn ka ɲʋn an nʋn bhae- sʋn -ɛn? Ɲɔnsoa a poɛ bhaeghwlu aˈ klɛɛ -dheinˈˈ bho? Dhɛwɛ- -ˈbhɛɛ -ˈye nʋn -wɛeˈ -ka ɔɔ muan -manˈ bhaeghwlu -dheinˈˈ bho -po -ˈyɩ jhibho- -ɛ? -A ˈtmʋn ɩanˈ dɩ.

1. Ɲɔnwɛ- -a ˈye bhae- -ɛ, ˈˈdhe dhɛwɛ- -a ˈye idee- ˈdhe -aaˈ bhaeghwlu ˈdhi -ɛ?

Zezi ˈnaan -aaˈ ˈˈBho nɩan ˈe jhaʋn ˈdhi ɔˈ ˈsʋ -a ˈye bhae-. Zezi ɔˈ ˈˈjɛ ˈyea bhae- ɛ, ɔ bhaeɛ- Zoova. Ɔ ˈnaan: “-Ka aʋ ˈyea bhae- sʋn nʋn ˈka ka: ‘-Aaˈ ˈˈBho nɩan ˈdhe jhaʋn ˈdhi...’” (Matthieu 6:9) -Bho -aa sa Zoova bhae ɛˈ, ɛɛ kuuɛ -jhbhɛɛ nɩan ˈo ɔmɔn -e -abʋ ˈɲnɩn in.

-A ˈbhɛɛˈ -a ˈye bhae- dhɛ ooˈˈ dhɛ ɛˈ dɩ. -Bho -aa sa ˈbɔn Ɲɔnsoa ˈye -aaˈ bhaeghwlu aˈ kpa -za aˈ, -aaˈ bhaeghwlu -nɩn ɔɔˈ -ˈglʋdɩ ˈye -jie- dhueˈ kpa. ‘Dhɛ ooˈˈ dhɛ -aa deea i -ɛ -nɩn ɔɔˈ -ˈglʋdɩ a kpa -jie- dhueˈ ɛ, ɔɔ ˈŋwɔɔn ɛnˈ.’ (1 Jean 5:14) Dhɩ -ˈnɩɩn -a ˈyea i dee- -ɩn -nɩn Zoova aˈ -ˈglʋdɩ a kpa -jie- dhueˈ ɛ, Zezi ˈtmʋn ɩanˈ dɩ ˈmɛn. (Zro Matthieu 6:9-13.) Ɛ se dhɩ kman -aʋ ˈˈbhli aˈ ˈsʋ ɔˈ dɩ -a ˈye bhae- -nɩn, -a ˈye Ɲɔnsoa ˈsɛ po -ke dhɩ ˈjɛɩn- ɔ nʋan -aʋ ˈˈdhrui aˈ dɩ, -a ˈyeɔ bhae- ɔ ˈye ɲʋn -ˈnʋʋn sʋn bho po.

2. -Kawɛ -a ˈye bhae- sʋn nʋn -ɛn?

Biiblʋ a poɛ -aʋ ˈkpɩ -a ˈye ‘dhɩ aˈ klɛɛ nɩan ˈbho -a -gwlɩˈˈ Zoova ˈtmʋʋn-.’ (Psaume 62:8) Dɩ -aa ˈtmʋan ˈye ˈdhe -aaˈ -pɛɛ bho ˈghwlʋ. -A ˈbhɛɛˈ -a ˈye ghwlu ˈˈjha kpa -aeˈˈ -a ˈye ghwlu jha -jha, ɛmɛn -e ˈdhe i -ɲnan -sʋn -aeˈˈ i -de -sʋn -ʋan- toɛ -ka -aa ˈjheɔ ŋwɔn ˈdhi -wɛeˈ -a ˈye bhae-. -A ˈbhɛɛˈ -a ˈye bhae- nɔnˈˈ ooˈˈ nɔnˈˈ, -da ooˈˈ -da -aa ˈbɔan.

3. Ka Ɲɔnsoa a nʋn -aaˈ bhaeghwlu aˈ kpa -za sʋn -ɛn?

Ɔɔ jhiiɛ dhɩ -duuˈˈ i ɔɔ yeɛ nʋn. Zoova poɛ ɔɔˈ Ghwlu, Biiblʋ kpɔˈˈ -ʋan- za ˈe -aaˈ ideedɩ -zɔn -ˈnɔɔn. Biiblʋ aˈ ˈdhii -zroɛ ɛ nʋɛnˈ “ɲɔn sea ˈkmʋn anˈ dɩ jhibho- ɔɔ yea tɔˈ ˈdhi nɩn.” (Psaume 19:7; zro Jacques 1:5.) Ɔɔ ˈˈɲɩɛn -aʋ -pɛɛ ɛˈ bhluaˈ -bho -a -nɩn ˈbho ˈkledɩ ˈˈjhibhaˈ mɔn -dhe ɛˈ. Ɔ ˈbhɛɛˈ -ke ɔ ˈye ɔɔˈ dhbhonʋʋn ˈˈtun ʋʋ ˈye -aʋ sʋn bho -poaˈ jhi.

KPA DHƐ I ˈŊWƆƐN ƝAN

-Ka -ˈyea bhae- sʋn nʋn -wɛeˈ Ɲɔnsoa ˈyea -manˈ bhaeghwlu ˈŋwɔɔn- -e dhɛjɛɛn- bhaeɛ ˈbhɛɛa ɛ ˈyea ʋn ˈˈdhrui nʋn ɛn, ɛmɛn- -ˈye i ˈŋwɔn.

4. Dhɩ Ɲɔnsoa a ˈbɔan -a ˈyea nʋn ˈdhe bhaeɛ- ɛˈ dɩ ˈdhi ɛ

-Bho Ɲɔnsoa ˈye -aaˈ bhaeghwlu ˈŋwɔɔn- -aeˈˈ ɔ ˈsʋ ˈŋwɔɔn- in ɛnˈ, dhɛwɛ- ɔɔ ŋmʋn jha -a? Po ˈo VIDEO.

VIDEO: Ɲɔnsoa a poɛ bhaeghwlu aˈ klɛɛ -dheinˈˈ bho?: Ɛɛˈ ˈfɔ (2:42)

Zoova a ˈbɔn -a ˈyeɔ bhae-. Zro Psaume 65:2, -ˈmɛn aʋ ˈtmʋn ideedɩ- nɩn anˈ dɩ:

ˈBhoo- -gwlɩˈˈ ˈdhee, “ɲɔn -ɔn poa ɲʋn anˈ bhaeghwlu -dheinˈˈ bho” ɔɔ ˈbɔn ɔ ˈye -manˈ bhaeghwlu -dheinˈˈ bho po? Dhɛɛdɩ- -ɛ, -aeˈˈ dhɛɛdɩ- ɔ ˈseɛ ˈbɔn -ɔn?

-Bho -aa sa ˈbɔn Ɲɔnsoa ˈye -aaˈ bhaeghwlu -dheinˈˈ bho po ɛˈ, -a ˈye ɔɔˈ ˈsrɩn ŋwɔn ˈjhe. Zro Michée 3:4 -e 1 Pierre 3:12, -ˈmɛn aʋ ˈtmʋn ideedɩ- nɩn anˈ dɩ:

Dhɛwɛ- -a ˈye nʋn -wɛeˈ -bho Ɲɔnsoa ˈye -aaˈ bhaeghwlu -dheinˈˈ bho po ɛˈ, -a ˈyɩ jhibho- -ɛ?

ˈˈSʋlɩˈ -a vɔan tʋ ɛ, ʋʋ ˈbhɛɛˈ ʋʋ ˈye bhae- tʋ aˈ ˈˈdhru aˈ kpaaˈ aˈ dɩ. Ɲɔnsoa ˈbhɛɛˈ ɔ ˈye ɛɛˈ bhaeghwlu tu ˈŋwɔɔn-?

5. Dɩ -aa ˈtmʋan ˈdhe bhaeghwlu ˈdhi ˈye ˈdhe -aaˈ -pɛɛ bho ˈghwlʋ

Ɲʋn -ˈnʋʋn ɛn, bhaeghwlu- ɲʋn -tɔɔn ʋbʋ ɛ, ʋmʋn- ʋa za dhe jheejhee ˈˈdhe ʋa bhae Ɲɔnsoa. ˈKamɔn- Ɲɔnsoa aˈ ˈbɔn -a ˈyeɔ bhae-? Zro Matthieu 6:7, -ˈmɛn aʋ ˈtmʋn ideedɩ- nɩn anˈ dɩ:

-Kawɛ -ˈye nʋn -wɛeˈ ˈse “dhɩ nɩan dhueˈ aˈ ˈtmʋn -za dhe” -nʋn in ˈdhe -manˈ bhaeghwlu ˈdhi -ɛ?

ˈDhe zɔn ˈdhi ɛ, dhɛ ˈdhɔɛe Zoova a nʋan ʋn ˈˈdhrui -ɛ ˈtuan -manˈ -pɛɛ i ɛ, poɔ ɛɛˈ ˈsɛ. Nʋɛn zɔn ooˈˈ zɔn ˈdhe ˈdhɔɔ dhueˈ ˈdhi. -Bho nʋɛnˈ, -man muɛn dhɩ aˈ kpɛ -ˈˈmɛsɔnˈ ɔnˈ ˈsɛ -po.

ˈˈBho ɔ ˈbɔn ɔɔˈ ˈˈjhu ˈyeɔ dɩ nɩan ˈbho ɔ -gwlɩˈ ˈtmʋʋn-. -Ka nɩan dhueˈ -ke ɛ, Zoova a ˈbɔn -a ˈyeɔ dɩ nɩan ˈbho -a -gwlɩˈˈ ˈtmʋʋn- ˈdhe bhaeghwlu ˈdhi.

6. Bhaeɛ -nɩɛn- -baanˈ- Ɲɔnsoa ˈˈɲɩn -aʋ

-Bho -a -nɩn ˈdhe ˈkledɩ ˈdhi ɛˈ, -kawɛ bhaeɛ- ɛ nʋn -aʋ sʋn bho -po sʋn -ɛn? Po ˈo VIDEO.

VIDEO: Bhaeɛ ɛ poɛ -aʋ sʋn bho ˈdhe ˈkledɩ ˈdhi (1:32)

Biiblʋ ˈnaan bhaeɛ ˈbhɛɛ ɛ ˈye -aʋ sʋn bho po -a ˈye -glʋˈ aˈ bhluaˈ ˈjhe. Zro Philippiens 4:6, 7, -ˈmɛn aʋ ˈtmʋn ideedɩ- nɩn anˈ dɩ:

Bhaeɛ se ˈbhɛɛ- ɛ ˈye -aaˈ ˈkledɩ i -za, -ˈmɛn -kawɛ ɛɛ nʋn -aʋ sʋn bho -po sʋn -ɛn?
Dhɩwɛ- -ɩanˈ dɩ -man ˈbɔn -ˈye bhae- -ɛ?

Jhibhodɩ-

Ghwlu -ʋn nɩan “amɛnɩn” ɛn, ʋn ˈdha “ˈka- ɛ ˈye -nɩn”. -Bho Ɲɔnsoa aˈ ˈcɛ nɩan tɛnˈˈ gwɛ bhae- ˈnan anˈ, ghwlu -ˈnʋn ɛn, ʋmʋn- ʋa ˈtmʋn.—1 Chroniques 16:36.

7. ˈˈDhuo- nɔnˈˈ ˈmʋn -ˈye bhae-

-Zɔn -dhee -ˈnɔɔn dhɩ -duuˈˈ ˈbhɛɛˈ ɩn ˈyeɛ nʋn -a ˈye bhaeɛ- ɛˈ dɩ bho ˈˈmae-. Ɛɛ- toɛ -ka bhaeɛ kɔandɩ ˈdhe Zezi bho -dhe -ɛ? Zro Matthieu 14:23 -e Marc 1:35, -ˈmɛn aʋ ˈtmʋn ideedɩ- nɩn anˈ dɩ:

Dhɛwɛ- Zezi nʋn -wɛeˈ ɔ ˈye bhaeɛ- ɛˈ nɔnˈˈ ˈjhe -ɛ?
-Bhlaa -ˈbhɛɛ -ˈye bhae- -ɛ?

ƝƲN -ˈNƲƲN ˈNAAN: “Ɲɔn ɔnˈ po -aaˈ bhaeghwlu -dheinˈˈ bho.”

Ka -man mun ˈdha -a?

DHƐWƐ- ˈCƖAN-?

Bhaeɛ- -ɛɛ ˈghwlʋa ˈe -pɛɛ bho ɛɛ nʋɛnˈ -aa yea Ɲɔnsoa i ˈˈkʋaan, ɛɛ ˈˈɲɩɛn -aʋ -pɛɛ ɛˈ bhluaˈ ˈˈdhe ɛɛ ˈˈɲɩɛn -aʋ ˈkpɩ -wɛeˈ -a ˈye Zoova aˈ -ˈglʋdɩ nʋn.