ˈCƖAANDHƐ- 11
Ka -ˈbhɛɛ -ˈye nʋn -wɛeˈ -ˈye Biiblʋ aˈ ˈdhiizroɛ ˈjɛɛn ˈdhi ˈjhee- -ɛ?
-Man ˈbɔn -ˈye dhbho klaaˈˈ nʋn -dhe -wɛeˈ ɔɔˈ nʋanˈ kmanˈˈ ˈdhee- ˈˈjhriɛ ˈdhe -dhe? Ɛgwɛ dhbho -ˈnɔn ˈyea ʋn kwa i ˈghwlʋ ɛ, nʋɔnˈ -mɩɩnˈˈ -mɩɩnˈˈ ˈdhe nɔnˈˈ -duuˈˈ ˈdhi. ˈKamɔn- ɛ -nɩn -ke ˈdhe Biiblʋ aˈ ˈdhiizroɛ- ɛˈ dɩ ˈdhi. -ˈBhɛɛˈ -ˈye ka nʋn, ‘ˈˈdhe da ˈman dee -ɛ?’ Dhɩ -man muan ˈcɩan- ˈnɔn ˈsɛɛ nɛn ˈdhi ɛ, ɩan muɛn ʋn sʋn bho -po -ˈye Biiblʋ aˈ ˈdhiizroɛ trɔnˈ -e ˈjɛɛn ˈdhi ˈjhee-.
1. Dhɛɛdɩ- -a ˈye Biiblʋ ˈdhii zro jheejhee -ɛ?
Ɲɔn -ɔn zroa Biiblʋ -aeˈˈ “Zoova aˈ ˈtee” ˈdhii jheejhee ɛ, ɔɔ muɛn ˈmʋnan in -nɩn ˈˈdhe dhɛ ooˈˈ dhɛ ɔɔ nʋan, ɛɛ muɛn -nan. (Zro Psaume 1:1-3.) -Bho -ˈye -dee ɛˈ, -ˈˈdhuo- nɔnˈˈ dhɛ ˈˈzaan mʋn -ˈyʋ ˈdhii zro zɔn ooˈˈ zɔn. -Ka -man kpɛ ɲan -mɩɩnˈˈ -mɩɩnˈˈ ɛn, ˈkamɔn- -ˈyeɛ i jhibho- ˈˈdhe ɛɛˈ nʋanˈ ˈye -manˈ ˈmʋnan ˈbhle.
2. Dhɛwɛ- -ɛɛ mun ʋn sʋn bho -po -wɛeˈ -ˈye Biiblʋ aˈ ˈdhiizroɛ ˈjɛɛn ˈdhi ˈjhee- -ɛ?
-Bho -aa sa ˈbɔn -a ˈye Biiblʋ aˈ ˈdhiizroɛ ˈjɛɛn ˈdhi ˈjhee- ɛ, ɛ -kɔn dɩ -a ˈye nɔnˈˈ ˈmʋn ˈˈdhuo- -a ˈye tɔˈ i -naan. Dhɩ aˈ kpɛ ˈsɔɔn -a ˈbhɛɛa -a ˈyea nʋn -mɩn -nɩn, -a ˈye dhɛ ˈdhii zro ˈˈdhe -a “ˈyeɛ tɔˈ ˈˈkpe i -naan.” (Josué 1:8, note) -Bho -man sa Biiblʋ ˈdhii zro ɛˈ, -ˈbhɛɛˈ -ˈye -manˈ ˈˈjɛ dɩ nɩn i dee-: ‘Dhɩwɛ- dhɩ ˈman zroa ˈdhii -kaan an tɔɔn ˈmʋn ˈdhe Zoova aˈ dɩ ˈdhi -ɛ? -Kawɛ ˈɩn ˈbhɛɛ ˈyeɛ ˈˈjhriɛ ˈˈdu ˈdhe ˈman ˈkmʋn ˈdhi -ɛ? Ka ˈyɩ i -jhii sʋn nʋn -wɛeˈ ˈye ɲʋn -ˈnʋʋn sʋn bho po -ɛ?’
3. Kawɛ- -ˈbhɛɛ -ˈye nʋn ˈˈdhe -ˈye nɔnˈˈ ˈjhe -ˈye Biiblʋ ˈdhii zro -ɛ?
Se nɔnˈˈ ˈbhle -ˈye Biiblʋ ˈdhii zro? ˈKamɔn- ɛ -nɩn ˈdhe ɲʋn anˈ -da -duuˈˈ bho. -ˈMɛn po ˈe ˈkpɩ -ˈye -manˈ “nɔnˈˈ dhbhoˈˈ nʋʋn -kajɔɔnka.” (Éphésiens 5:16) -Bho -za ˈo nɔnˈˈ ˈdhe zɔn ˈdhi -ˈye Biiblʋ ˈdhii zro ɛˈ, -man muɛn ɛnˈ nʋanˈ ˈbhɛɛ-. Ɲʋn -ˈnʋʋn an druunˈ ʋa ˈyea Biiblʋ ˈdhii zro. -ˈNʋʋn ɛn, ɛ nɩn -bho ˈjhrʋ ˈghwla, -bho ʋa sa fɔn ˈdhe dhbhoˈˈ -wɛeˈ ʋa zro Biiblʋ ˈdhii. ˈˈDhe ɲʋn -ˈnʋʋn ɛn, ɛ nɩn -bho ʋʋ ˈye i ˈpɛan mun ˈˈmaʋn -wɛeˈ ʋa zrʋ ˈdhii. Nɔnˈˈ -wɛ nmɔn ˈo dhi -man ˈbɔn -ˈye ˈo -za -ˈye Biiblʋ ˈdhii zro -ɛ?
KPA DHƐ I ˈŊWƆƐN ƝAN
-Ŋmʋn -ka -ˈbhɛɛa -ˈyea Biiblʋ aˈ ˈdhiizroɛ trɔnˈ ˈdhi ˈjhee -e -ka -ˈbhɛɛa -ˈyea -manˈ ˈˈjɛ kpɔˈˈ po -kajɔɔnka -wɛeˈ -ˈyea Biiblʋ ˈcɩan ˈjɛɛn ˈdhi ˈjhee- ɛ.
-Ka -a ˈbhɛɛa -a ˈyea dhiidhɛ- -a ˈsea dhi -kpɔ dhueˈ ɛˈ dhiaˈ aˈ dɩ -kman an, ˈkamɔn -ke -bho ɛɛ sa ˈo ˈbhɔɔ Biiblʋ aˈ ˈdhii zroɛ ˈye -aaˈ ˈmʋnan ˈbhle.
4. Biiblʋ aˈ ˈdhiizroɛ ˈbhɛɛˈ ˈye -manˈ ˈmʋnan ˈbhle
-Bho -dee Biiblʋ aˈ dhiizroɛ- ˈˈdhe ɛ -nɩn ˈkle ɛˈ, ʋanˈ ˈdhiizroɛ ɛˈ ˈtʋn ˈbhɛɛ ʋn ˈye ˈbhoo- -gwlɩˈˈ ˈkpa. Ɛ nɩn -ka ɲɔn ɔnˈ -deea dhiidhɛ- -dhee ɛˈ dhiaˈ a. -Ka ɔɔ dhiɛ ˈkamɔn- ɛɛˈ dhiaˈ a nʋɔn ˈtʋn. Zro 1 Pierre 2:2, -ˈmɛn aʋ ˈtmʋn ideedɩ- nɩn anˈ dɩ:
-
ˈBhoo- -gwlɩˈˈ ˈdhee, -bho -man sa Biiblʋ ˈdhii zro zɔn ooˈˈ zɔn ɔnˈ, ɛɛˈ nʋanˈ an muɛn -manˈ ˈmʋnan ˈbhle- ˈˈdhe -ˈye ɛɛˈ nʋanˈ ɲan kpa?
Po ˈo VIDEO -wɛeˈ -ka ɲʋn -dhee -ˈnʋʋn nʋan ˈˈdhe Biiblʋ aˈ ˈdhiizroɛ- ˈbhlea ʋaˈ ˈmʋnan bhla, -ˈyeɛ ˈjhe. -ˈMɛn aʋ ˈtmʋn ideedɩ- nɩan da aˈ dɩ.
-
ˈKledɩ- -wɛ ɲʋnjhae- nɩan ˈdhe video nɔn ˈdhi ˈjha ˈˈdhru -ɛ?
-
-Ɛ pʋbʋ sʋn bho -wɛeˈ ʋʋ kpa Biiblʋ ˈdhiizroɛ ɲan -an?
-
Dhɛwɛ- ʋʋ nʋn -wɛeˈ Biiblʋ ˈdhii -zroɛ ˈbhle ʋaˈ trɔnˈ -ɔn?
Dhɩ ˈbhɛɛa -ɩn -ˈyea ʋn sʋn bho po ˈˈdhe -ˈyea -dee ɛ:
-
-Za ˈo Biiblʋ -ʋanˈ ghwlu i -zaa sʋn ˈsrɛaˈˈ a. ˈDɩn Traduction du monde nouveau, -bho -ˈbhɛɛ -ˈyʋ ˈdhii zro ˈdhe ˈˈkwighwlu ˈdhi ɛ.
-
-Bho -ˈye -dee ɛˈ, zro Biiblʋ aˈ ˈfɔ -ɔɔ nʋan ʋn ˈtʋn ˈdhii. -Jhii ˈsɛɛ ɛˈ ˈfɔ nɔn in: “-Dee Biiblʋ aˈ ˈdhiizroɛ-.”
-
Jhibho- -da -ˈbhɔɔa ˈbho -manˈ dhɛ ˈdhii -zroaˈ. Zro ˈsɛɛ ɛˈ ˈfɔ ɲʋn an ˈdhaa -Nʋʋn ˈfɔ nɔn dhbho, “ˈMan Biiblʋ ˈdhii -zroɛ-.” Ɛ -nɩɛn- ˈnɔn ˈsɛɛ- nɛn ˈdhi.
-
-Nʋʋn JW Library®dhbho. -Bho ˈbhleɛ ɛˈ, -ˈbhɛɛ -ˈye Biiblʋ ˈdhii zro -aeˈˈ -ˈyʋ -dheinˈˈ bho po ˈbho telefɔnɩn ˈˈkpe -da ooˈˈ -da nɩan.
-
-Nʋʋn appendices nɩan ˈdhe Traduction du monde nouveau ˈdhi dhbho. ˈDhe ɛɛˈ ˈfɔ nɔn ˈdhi ɛˈ, tablo -e -desɛn -e dhɩ -duuˈˈ -ˈnɩɩn -nɩn ˈe -ɩn ˈyeɛ nʋn Biiblʋ ˈdhiizroɛ- ˈye -manˈ trɔnˈ ˈbhle.
5. Po -manˈ ˈˈjɛ kpɔˈˈ -wɛeˈ -ˈye Biiblʋ ˈcɩan
Zro Psaume 119:34, -ˈmɛn aʋ ˈtmʋn ideedɩ- nɩn anˈ dɩ:
-
-Bho -ˈye Biiblʋ ˈdhii zro -aeˈˈ -ˈye -manˈ ˈˈjɛ kpɔˈˈ po ˈˈdhe -nɩn ɲɔn ˈye Biiblʋ ˈcɩan anˈ, dhɛɛdɩ- ɛ -nmɔn ˈo i -ˈye bhae -wɛeˈ -ˈye -dee -ɛ?
Ka -ˈbhɛɛ -ˈye nʋn -wɛeˈ -ˈye -manˈ Biiblʋ ˈcɩan ˈjɛɛn ˈdhi ˈjhee- -ɛ? -Bho -man sa ˈsɛɛ- nɛn ɛnˈ ˈcɩaandhɛ- dhueˈ kpɔˈˈ po ɛˈ, -ka -ˈbhɛɛa -ˈyea nʋn -ke ˈka ka:
-
1. -Dee ˈcɩaandhɛ ɛˈ ˈfɔ kɔan ɲan anˈ ˈdhii -zroɛ.
-
2. ˈBɔn Biiblʋ aˈ ˈˈjhri i, -ˈmɛn zrʋɩ ˈdhii. ˈBho -ˈmɛn ˈdhe ɛ, -ka ɩn -nɩn dhɩ -man ˈcɩan nʋan i muun- sʋn ɛn, ˈbɔn ɛɛˈ i ˈŋwɔan in.
-
3. -Bho zro kpɔ ˈdhii -wɛeˈ -ˈjhe ideedɩ- ɲʋn poa ˈe ɩanˈ ˈdhezaaˈ aˈ, triɛ dhɛ ˈzɔn in.
Jhibhodɩ-
Zoova aˈ -Bobhlaʋn -nʋʋɛn- Biiblʋ aˈ kpɛ -duuˈˈ dhbho -tɛnˈˈ -dhe. ˈKlaa Biiblʋ -jʋn -aa nʋʋan dhbho ˈzɩan, ɛ nɩn La Bible. Traduction du mone nouveau. Dhɛ nɩan ˈo ɛmɛn- -nɩn, dhɛ ʋan ˈtmʋan ˈsrɛ ˈˈɩ, ɛɛˈ i ˈŋwɔan se ˈˈɩ -kman ˈˈdhe Ɲɔnsoa aˈ ˈɲnɩn -nɩn ˈdhe ʋn ˈdhi.—-Ŋmʋn ˈo jw.org ˈˈkpe -da ɲʋn ˈcrea “Les Témoins de Jéhovah ont-ils leur Bible à eux?”
ƝƲN -ˈNƲƲN ˈNAAN: “Biiblʋ aˈ ˈcɩaan kmanˈˈ. ˈƖn se nɔnˈˈ -aeˈˈ ˈkpɩ ˈbhle -wɛeˈ ˈyeɛ nʋn.”
-
Ka -man ˈjhe dhɛ ʋa ˈtmʋan -an?
DHƐWƐ- ˈCƖAN-?
-Bho -man sa ˈbɔn -ˈye Biiblʋ ˈdhiizroɛ ˈjɛɛn ˈdhi ˈjhee- ɛˈ, -za ˈo nɔnˈˈ -ˈyeɛ nʋn. Bhae- ˈˈdhe dhɛ -man zroa ˈdhii -ˈyeɛ i ˈŋwɔn, po -manˈ ˈˈjɛ kpɔˈˈ -ke -wɛeˈ -nɩn ɲɔn ˈye Biiblʋ ˈcɩan- -dee.
Dhɛwɛ- -ˈŋwɔn in -ɛn?
-
Dhɛwɛ- -ɛɛ mun ʋn sʋn bho -po -wɛeˈ -ˈye Biiblʋ aˈ ˈdhiizroɛ ˈjɛɛn ˈdhi ˈjhee- -ɛ?
-
-Bhlaa -ˈbhɛɛ -ˈye nɔnˈˈ ˈjhe -ˈye Biiblʋ ˈdhi zro ˈˈdhe -ˈyʋ ˈcɩan-?
-
Dhɛɛdɩ- ɛ -kɔn dɩ -ˈye -manˈ ˈˈjɛ kpɔˈˈ po -wɛeˈ -ˈye Biiblʋ ˈcɩan -dee -ɛ?
ˈBƆN DHƖ -ˈNƖƖN ANˈ I ˈŊWƆAN IN
Dhɩ ˈyea ʋn sʋn bho po ˈˈdhe -ˈyea -manˈ Biiblʋ ˈcɩan- ˈjɛɛn ˈdhi ˈjhee- ɛ, ˈbɔn ɩanˈ i ˈŋwɔan in.
“Une lecture qui vous apportera beaucoup” (La Tour de Garde no 1 2017)
Dhɩ aˈ kpɛ taan -ɩn ˈbhɛɛa -ɩn ˈyea ʋn sʋn bho po -wɛeˈ -ˈyea Biiblʋ ˈdhii zro ɛ.
-Ŋmʋn -ka -ˈbhɛɛa -ˈyea Biiblʋ aˈ ˈdhiizroɛ trɔnˈ ˈdhi ˈjhee- ɛ.
-ˈBhɛɛˈ -ˈye ɲʋn zroa Biiblʋ ˈdhii kpɛ -duuˈˈ aˈ bo ˈsrɩn ˈdhi -za.
