ˈCƖAANDHƐ- 03
-ˈBhɛɛ -ˈye dhɛ Biiblʋ a ˈtmʋan -gwlɩˈˈ de?
Biiblʋ ˈtmʋɛn dhɩ -duuˈˈ aˈ dɩ -ɩn ˈye -nʋʋɛn- ˈdhe ˈkmʋn anˈ ɲan ˈˈdhe ʋan ˈˈɲɩɛn ɲʋn ˈsrɩn -duuˈˈ -ke. Ɛgwɛ -man ˈbɔn -ˈye dhɩ -duuˈˈ i ˈŋwɔn ˈdhe ʋanˈ dɩ ˈdhi, ˈklaa -man ˈsrooɛ -ˈgwlɩi. Dhɩ -ɩanˈ ghwlu ˈsɛɛ- -soa- -ˈnɛn cɛan -e ˈsrɩn nɩan ˈdhe ɛ ˈdhi ɛ, -ˈbhɛɛˈ -ˈyɩ -gwlɩˈˈ de? Dɩ Biiblʋ a ˈtmʋan, ɩn ˈbhɛɛˈ ɩn ˈye -aʋ sʋn bho po ˈzɩan? Dhɩ ˈyea -nʋʋɛn- ˈdhe ˈkmʋn anˈ ɲan -ɩanˈ dɩ ʋan ˈtmʋan, ɩn -nɩn -gwlɩˈˈ -de ka ˈmɛn? Ɲʋn anˈ mliɔn deɛ -gwlɩˈˈ ˈmɛn. -Manˈ ˈˈjɛ ˈbhɛɛˈ -ˈye dhɛ Biiblʋ a ˈtmʋan anˈ i ˈŋwɔan i ˈbɔn ˈˈdhe -ˈyeɛ -gwlɩˈˈ de -ke.
1. -Bo nɩan ˈe Biiblʋ ˈdhi ɛ, ɩn -nɩɛn- tɔˈdɩ- ˈjɛɛn-?
Biiblʋ ˈnaan, “dɩ nɩan ˈe ʋn ˈdhi -nɩɛn- tɔˈdɩ-.” (Ecclésiaste 12:10) Dhɩ -ɩanˈ dɩ Biiblʋ a ˈtmʋan ɩn -nʋʋɛnˈ ˈjɛɛn-. (Zro Luc 1:3; 3:1, 2.) ˈˈDhe ɲʋn -anˈ dɩ ʋan ˈtmʋan, ʋʋ -nɩn ˈkmʋn ˈmɛn -dhe. Nɔnˈˈ -e ɲiɔʋ -e -deɩn- -e -tɛnˈˈ -bo -ɩanˈ dɩ Biiblʋ a ˈtmʋan, -ˈˈtɛnbocɩaʋn anˈ -da -duuˈˈ ˈnaan ɩn -nɩɛn- tɔˈdɩ-.
2. Dhɛɛdɩ- -a ˈbhɛɛ -a ˈye ka nʋn Biiblʋ aˈ nɔnˈˈ ˈse zi -ɛ?
Dhɩ -dhee -ˈnɩɩn ɲʋn sea jhibho- -dhe ɛ, ɩmɩn- -anˈ dɩ Biiblʋ sie nɔnˈˈ ɲan ʋn ˈtmʋn. Ɛɛˈ kpɔ dhueˈ -mɛn -nɩn ʋan ˈtmʋɛn dhɩ jhia -aʋ ˈdhei aˈ dɩ. Dhɩ -duuˈˈ ʋn ˈtmʋan ˈdhe ɩanˈ dɩ ˈdhi -dhe ɛ, ɲʋn anˈ -da -duuˈˈ sɩ -gwlɩˈˈ de -dhe. ˈKlaa ˈnɔn -aaˈ nɔnˈˈ, ˈsɛɛjhibhoʋn toɛˈ -ka dɩ Biiblʋ a ˈtmʋan nɩan tɔˈdɩ ɛ. “Ɩn -nɩɛn- -gwlɩˈˈ -de -ka jheejhee, ˈzɩan -e ˈnɔn ˈkmʋn ɔnˈ klɛɛ.”—Psaume 111:8.
3. Dhɩ ˈyea -nʋʋɛn- ˈdhe ˈkmʋn anˈ ɲan -ɩanˈ dɩ Biiblʋ a ˈtmʋan, dhɛɛdɩ- -a ˈyɩ -gwlɩˈˈ de -ɛ?
ˈDhe Biiblʋ ˈdhi ɛ, ɲanzaadɩ- a -nɩn ˈe “-ɩn ˈse -nʋʋɛn- ke” -ɩanˈ dɩ ʋn ˈtmʋn. (Isaïe 46:10) Dhɩ -a nʋʋan ˈnɔn -aaˈ nɔnˈˈ ɔn, Biiblʋ ˈtmʋɛn dɩ -duuˈˈ ˈdhe ɩanˈ dɩ ˈdhi. ˈNɔn ˈcɩaandhɛ- nɛn ˈdhi ɛ, -aa muɛn Biiblʋ aˈ ɲanzaadɩ- -ˈnɩɩn anˈ dɩ ˈtmʋn-. -Ka ɩn nʋan ˈo ɲnin sʋn ɛn ˈˈmaan ɲʋn -taiˈ!
KPA DHƐ I ˈŊWƆƐN ƝAN
Dhɛɛdɩ- dhɛ Biiblʋ a ˈtmʋan -e -jɛn ˈsɛɛjhibhoʋn an ˈtmʋan an kpa -jie- dhueˈ ɛ, ˈbɔn ɛnˈ i ˈŋwɔanˈ in. -ˈMɛn po ˈe ˈkpɩ -wɛeˈ dhɩ -a ˈˈmaan ɲʋn -taiˈ ˈdhe Biiblʋ aˈ ɲanzaadɩ ˈdhi ɛ, -ˈyɩ jhibho-.
4. ˈSɛɛjhibhoʋn an ˈjheɛ dɩ Biiblʋ a ˈ tmʋan tɔˈ ˈmʋn
-Tɛnˈˈ -dhe ɛ, ɲʋn -dhee -ˈnʋʋn ˈnaan ˈbhlʋa -deɛ- i ˈbho dhɛ ˈˈkpe. Po ˈo VIDEO.
-Ŋmʋn dhɛ Zɔbʋ ɔˈ ˈsɛɛ sia zɩn anˈ 3.500 ɲan ɔ ˈtmʋan jha. Zro Job 26:7, -ˈmɛn aʋ ˈtmʋn ideedɩ- nɩn anˈ dɩ:
-
Dhɛ Zɔbʋ ɔˈ ˈsɛɛ ˈnaan ˈbhlʋa se ˈo dhɛ ooˈˈ dhɛ ˈˈkpe -nɩn ɛn, dhɛɛdɩ- ɛɛ ˈˈmaan ɲʋn -taiˈ -ɛ?
Ɛ nɩn ˈdhe 1800 zɩn ˈdhi -wɛeˈ ɲiɔʋ ˈŋwɔn ˈˈnin ɛnˈ ˈdhejhiisʋn ɛnˈ dɩ i. -Ŋmʋn dhɛ Biiblʋ ˈtmʋan ɛɛ nʋan zɩn anˈ ˈˈghwluu -ghwluu ˈzɩan an. Zro Job 36:27, 28, -ˈmɛn aʋ ˈtmʋn ideedɩ- nɩn anˈ dɩ:
-
Dhɛ Biiblʋ aˈ ˈˈjhriɛ- nɛn ˈtmʋan ˈdhe ˈˈnin ɛnˈ ˈdhejhiisʋn anˈ dɩ ˈdhi ɛ, dhɛɛdɩ- ɛɛ ˈˈmaan ɲʋn -taiˈ -ɛ?
-
Dɩ Biiblʋ aˈ ˈˈjhriɛ- nɛn ˈtmʋan, ɩan nʋɛnˈ -man yeɛ -gwlɩˈˈ de -ka Biiblʋ a ˈtmʋan tɔˈdɩ ɛ?
5. Biiblʋ -zaa dɩ ɲan ʋn yɩ ˈtmʋn
Zro Isaïe 44:27–45:2, -ˈmɛn aʋ ˈtmʋn ideedɩ- nɩn anˈ dɩ:
-
Dɩ -duuˈˈ -wɛ Biiblʋ sie zɩn anˈ 200 ɲan ʋn ˈtmʋn ˈdhe Babilɔnɩn glɔ ɔˈ izaa- aˈ dɩ ˈdhi -ɛ?
ˈSɛɩ soa toɛˈ -ka Pɛsɩkɔʋn anˈ ˈbheɔ Sirisɩ -e ɔɔˈ ˈˈsʋlɩ kpʋan Babilɔnɩn glɔ ˈdhe -tɛnˈˈ ti b aˈ 539 zʋn ˈdhi. Ʋʋ nʋɛnˈ ˈˈnin -jhiia- ˈˈkwiglɔ- -ˈnɔn ˈdhei ye man. Ʋa pa ˈo ˈˈkwiglɔ- -ˈnɔn ˈdhi ɛ, -ˈmɛn ɔɔˈ -kwlui -flɔn ŋwɔn, ɛ nʋɛnˈ ʋʋ ˈse tʋ vɔn ʋʋ yeɔ kpʋn. ˈZɩan an, ɛɛ nʋɛn zɩn anˈ 2.500 bhla Babilɔnɩn glɔ ɔˈ ˈˈgbi ˈkpa -gbaiˈˈ -ka Biiblʋ nʋan ɛɛˈ ɲan -zaa sʋn ɛn.
Zro Isaïe 13:19, 20, -ˈmɛn aʋ ˈtmʋn ideedɩ- nɩn anˈ dɩ:
-
-Kawɛ dɩ Biiblʋ ˈtmʋan ˈdhe Babilɔnɩn glɔ ɔˈ dɩ ˈdhi nʋn ˈo ɲnin sʋn -ɛn?
Babilɔnɩn glɔ ɔˈ ˈˈgbi -gbaiˈˈ ˈzɩan ˈdhe Irakɩ
6. Dhɩ -aa ˈjhea ˈzɩan an, Biiblʋ -zaa ɩ ɲan ʋn ye ɩanˈ dɩ ˈtmʋn
Biiblʋ ˈnaan -a -nɩɛn- ˈnɔn “-dhebhɔɔghwɩ” ˈdhi. (2 Timothée 3:1) -Ŋmʋn dhɛ Biiblʋ ˈtmʋan ˈdhe -dhebhɔɔghwɩ aˈ dɩ ˈdhi ɛ.
Zro Matthieu 24:6, 7, -ˈmɛn aʋ ˈtmʋn ideedɩ- nɩn anˈ dɩ:
-
Dhɩwɛ- ˈye -nʋʋɛn- ˈdhe -dhebhɔɔghwɩ ˈdhi -ɩanˈ dɩ Biiblʋ ˈtmʋn -ɛn?
Zro 2 Timothée 3:1-5, -ˈmɛn aʋ ˈtmʋn ideedɩ- nɩn anˈ dɩ:
-
Biiblʋ ˈnaan -kawɛ ɲʋn anˈ kplɩn an mun -nɩn ˈdhe -dhebhɔɔghwɩ ˈdhi -ɛ?
-
ˈDhe kplɩn -ˈnɩn ˈˈklu ɛ, -jɩnwɛ -ˈjhe ɲʋn -ˈnʋʋn ˈbhle ˈzɩan -an?
ƝƲN -ˈNƲƲN ˈNAAN: “Dɩ Biiblʋ a ˈtmʋan ɩn ˈse -nʋʋɛn-, ɛ nɩn ɲiɔn ɔnˈ tɔˈinaandhɩ-.”
-
Dhɛɛdɩ- deɛ -gwlɩˈˈ -ka Biiblʋ a ˈtmʋan tɔˈdɩ -ɛ?
DHƐWƐ- ˈCƖAN-?
-Tɛnˈˈ bo -e dhɩ jhia -aʋ ˈdhei -e ɲanzaadɩ a toɛˈ -ka -a ˈbhɛɛa -a ˈyea Biiblʋ -gwlɩˈˈ de ɛ.
Dhɛwɛ- -ˈŋwɔn in -ɛn?
-
Dhɩ -ɩanˈ dɩ Biiblʋ a ˈtmʋan, ɩn -nʋʋɛnˈ -aeˈˈ ɩn ˈse -nʋʋɛn-?
-
ˈDhe dɩwɛ- ˈdhi dhɩ ˈsɛɛjhibhoʋn an ˈtmʋan -e dhɩ Biiblʋ a ˈtmʋan an kpa -jie- dhueˈ -ɛ?
-
ˈBhoo- -gwlɩˈˈ ˈdhee, Biiblʋ ˈbhɛɛˈ ʋn ˈye dɩ ɲan -zaa ʋn ˈyɩ ˈtmʋn? Dhɛɛdɩ- -man ˈdha -kaˈ -a?
ˈBƆN DHƖ -ˈNƖƖN ANˈ I ˈŊWƆAN IN
Dhɩ -dhee -ˈnɩɩn Biiblʋ a ˈtmʋn ˈdhe dhɩ jhia -aʋ ˈdhei aˈ dɩ ˈdhi -ɩn se tɔˈdɩ -nɩn?
“La science est-elle d’accord avec la Bible?” (Dɩ ˈghwlʋa ˈo ɛntɛɛnɛtɩ ˈˈkpe ɛ)
Dhɩwɛ- -ɩan- nʋʋɛn ˈnɔn “-dhebhɔɔghwɩ” ˈdhi -ɛ?
“6 Prophéties qui se réalisent sous vos yeux” (La Tour de Garde, 1er mai 2011)
-Ŋmʋn -ka Biiblʋ aˈ ɲanzaadɩ nʋan ˈo ɲnin sʋn ˈdhe Glɛkɩkɔʋn- anˈ ˈbhlʋa aˈ dɩ ˈdhi ɛ.
-Ŋmʋn -ka Biiblʋ aˈ ɲanzaadɩ nʋan ˈˈjhu dhueˈ ɔˈ dhɩjhesʋn ˈˈɩ zian- sʋn ɛn.
“Pour moi, Dieu n’existait pas” (La Tour de Garde no 5 2017)
