Ɲɔnsoa nʋan -aʋ- ɛ, ɔ -nɩɛn- tɔˈ ˈdhi ɔ ye -aʋ -zii. -Ka -ŋmaain- ɲʋn dɩ-kmaan ˈˈjhia ˈe ˈmʋn ɔ ˈˈdua ˈˈɲnuun- dɩ ɛ, ˈka- Ɲɔnsoa a ˈˈdu -aaˈ dɩ. Ɔ ˈse -aʋ- ˈnɔn ˈkmʋn po -wɛeˈ -a yeˈ -aaˈ ˈˈjɛ ˈbhle. (Jérémie 10:23) -Bho ˈˈjhu ɔ sa naanˈ ˈcɩan, ɔɔˈ ˈcɛ -ɛ kpʋn ɔɔˈ ˈsʋn in. ˈKamɔn- Ɲɔnsoa aˈ ɲʋn je bho -poɛ- ɛˈ dɩ kman -aʋ- ˈˈbhli. (Isaïe 48:17, 18) Biiblʋ- aˈ ˈtee aˈ ˈˈkpetbhaɩnˈ ˈghlʋɛ ˈe Ɲɔnsoa bho.—Zro 2 Timotee 3:16.

-Ka -a yeaˈ nʋn -wɛeˈ -aaˈ ˈkmʋn ˈyea ˈdhɔɛe nɩn- ˈzɩan ˈˈdhe -a yeaˈ dhɩ ˈdhɔɛe sea ˈˈtian ˈbhle ˈjhe ˈdhe ɲan, ɛmɛn- Zoova aˈ ˈtee -e ɔɔˈ ˈtee aˈ ˈˈkpetbhaɩnˈ a tɔɔn -abʋ. Zoova nʋan -aʋ- ɛ, ɔɔˈ ˈsʋ -ˈbhle -aaˈ je bho -poɛ.—Zro Wlɔm 15:4; Gbɔˈwlʋdhɩ- 4:11.

Tɔˈdɩ- nɩan ˈe Biiblʋ- ˈdhi ɛ, ɩanˈ -ˈnɩɩn -ɩan- tɔɔn -abʋ dhɛ Ɲɔnsoa a ˈbɔan -a yeaˈ nʋn ˈdhe dhɩ -duuˈˈ ˈdhi. Ɩmɩn- ɲɔn ɔn ˈdhaa Biiblʋ- aˈ ˈtee aˈ ˈˈkpetbhaɩnˈ. Dhɛ ɲʋn ˈyea nʋn ˈdhe dɩ aˈ kpɔ dhueˈ gbai ˈdhi ɛ, ɛmɛn- ˈtee ɛ ˈtmʋn. (Nʋʋdhɩ- 15:29) -Bho -a yeˈ dhɛ nʋn -wɛeˈ Biiblʋ- aˈ ˈtee aˈ ˈˈkpetbhaɩnˈ ˈye -aʋ- sʋn bho po ɛ, -a yeˈ tɔˈ i-naan -kajɔɔnka. (Iiˈˈbhlaadhɩ- 2:10-12) Dɩ aˈ kpɔ dhueˈ ka: Biiblʋ- ˈnaan ˈkmʋn -nɩɛn- -baanˈ- Ɲɔnsoa nʋn -aʋ- ˈˈjhri i. -Bha jhibhi ɛ, -ˈmɛn dhɩ -ɩn yeaˈ -aaˈ ˈˈjɛ -e ɲɔn -ˈnɔɔn ɔnˈ ˈkmʋn ˈkɔɔ-, a -ˈsɩ nʋn- in.—Zro Nʋʋdhɩ- 17:28.

Zezi ˈnaan ˈdhe ˈtee aˈ ˈˈkpetbhaɩnˈ ˈˈklun ɛn, ˈsɔɔn bhɛˈ ˈˈe -ɩn -zii ɩanˈ klɛɛ. Dhɛ -glɔɲiɔn- ˈyea nʋn ˈdhe ɔɔˈ ˈkmʋn ˈdhi ɛ, ɛmɛn- ɛnˈ dɩ -jɛn kɔan ɲan an ˈtmʋn: ɔ ˈye Ɲɔnsoa jhibho-, ɔ ˈye ɔɔˈ dɩ -kman ˈˈdhe ɔ ˈye ɔɔˈ dhbho nʋn -kajɔɔnka. -A yeˈ ˈtee  ɛˈ ˈˈkpetbhaɩnˈ -ˈnɛn tɔˈ bho sie ˈdhe -aaˈ nʋʋndhɩ- aˈ klɛɛ ˈdhi. (Iiˈˈbhlaadhɩ- 3:6) Ɲʋn -ʋa- naan ˈdhe ˈtee ɛˈ ˈˈkpetbhaɩnˈ -ˈnɩn ˈdhi ɛ, ʋa ˈjheɛ ˈo Ɲɔnsoa aˈ -jhbhɛɛ -e -bɔyaˈˈ -e ˈkmʋn sea ˈˈtian ˈbhle -e.—Zro Matie 22:36-38.

ˈTee aˈ ˈˈkpetbhaɩnˈ anˈ ˈsɔɔn nɛn ˈbhɛɛˈ ɛ ˈyeɛ nʋn -a -nɩn ɲʋn ˈye -jhbhɛɛ. (1 Kolɛntɩ 13:4-7) -Ka Ɲɔnsoa a ˈbhlea ɲʋn ɛn, -bho -aa sʋbʋ ˈbhle kaˈ, -ˈmɛn -aa ˈˈduɛ ˈtee ɛˈ ˈˈkpetbhaɩnˈ -ˈnɩn ˈˈjhriɛ-.—Zro Matie 7:12; 22:39, 40.

-Ka bha aˈ dɩ -kmaan ˈbhɛa ɛ ˈyea ˈˈgbuzɔncɛ- sʋn bho po -wɛeˈ ʋʋ ˈyea ghluˈ iˈŋwɔɔn-, ɛmɛn- Biiblʋ- aˈ ˈtee aˈ ˈˈkpetbhaɩnˈ an tɔɔn ɲʋn. (Kolɔsɩ 3:12-14) ˈTee ɛˈ ˈˈkpetbhaɩnˈ -ˈnɩɩn Ɲɔnsoa aˈ Ghlu a tɔɔn ɲʋn -wɛeˈ dhɛsaʋn- ˈye ˈˈgbuzɔncɛ- bho -tɛɛn: ʋn ˈnaan ˈˈbhlitiɛ- ˈye ˈo -gwle.—Zro Makɩ 10:7-9.

Biiblʋ- aˈ ˈtee aˈ ˈˈkpetbhaɩnˈ anˈ ˈˈjhriɛ- ˈˈduɛ- ˈbhɛɛˈ ɛ ˈyeɛ nʋn -aaˈ dhbho ˈye ˈe -a ˈkwa -gwle ˈˈdhe -a yeˈ -pɛɛ ɛˈ bhluaˈ ˈbhle. Dhbhonʋin- -ɔɔ ˈˈdua Biiblʋ- aˈ ˈtee aˈ ˈˈkpetbhaɩnˈ ˈˈjhriɛ -wɛeˈ -ɔ -ˈsrɛa ˈˈɩ ˈˈdhe -ɔ kua i ɛ, ɔɔˈ dhbhojhei- ɔ kman ɔɔˈ dɩ. (Iiˈˈbhlaadhɩ- 10:4, 26; Eble 13:18) Dhɛ Ɲɔnsoa aˈ Ghlu a tɔɔan -abʋ mɛn- -nɩn -bho -a -ˈbhle dhɩ- -ɩn kɔan dɩ ɛ, ɩn ˈye ˈe -a ˈˈjhri ˈdhe i ˈbhɛɛ-, ˈˈdhe -jhbhɛɛ nɩan ˈo ɔmɔn- -e -abʋ ˈɲnɩn ˈye dhɛ ˈdha ɛ ˈye ˈˈghwlii- ˈbhleɛ- -zii.—Zro Matie 6:24, 25, 33; 1 Timotee 6:8-10.

Biiblʋ- aˈ ˈtee aˈ ˈˈkpetbhaɩnˈ -ˈnɩɩn an tɛɛn -aʋ- poadhɩ bho. (Iiˈˈbhlaadhɩ- 14:30; 22:24, 25) Dɩ aˈ kpɔ dhueˈ -ɩan- toɛ, ɩn ka: Biiblʋ- ˈnaan -a -ˈbhɔ nmɔn ˈnaan- ˈmʋn -ziɛ-. -Bho -aa sa ˈtee -ˈnɛn ˈˈjhriɛ- ˈˈdu ɛ, ɛ ˈbhɛɛˈ ɛ ˈyeɛ nʋn poadhɩ- -saɩn- -e dhɩ -ˈnɩɩn -ɩn -ˈbhɛa -ɩn yeaˈ ɲʋn ˈdhbha ˈˈdoo- ˈye -aʋ- bho -tɛɛn. (Wlɔm 13:13) Zoova ˈnaan -a -ˈbhɛɛˈ -a yeˈ nmɔn ˈnan ˈklaa -aaˈ ziɔ ˈmʋn -dhe. (Psaume 104:15; 1 Kolɛntɩ 6:10) Ɛ se nʋʋndhɩ- ˈdhɔɛe aˈ ˈsʋ Ɲɔnsoa aˈ ˈtee aˈ ˈˈkpetbhaɩnˈ an tɔɔn -abʋ nɩn- ˈklaa ɩan ˈˈɲɩɛn -aʋ- tɔˈ i-naandhɩ- ˈjɛɩn- -ke. (Psaume 119:97-100) -Bho kletiɛn ˈjɛʋn- an sa Ɲɔnsoa aˈ ˈtee aˈ ˈˈkpetbhaɩnˈ ˈˈjhriɛ- ˈˈdu ɛ, ɛ se ˈjɛɛn- ʋa ˈjheea ˈbho ɛ ˈsʋ ɛˈ dɩ nɩn-. Ʋa nʋɛnˈ -wɛeˈ ʋʋ ˈye Zoova ˈˈɩˈbhɛɛ-.—Zro Matie 5:14-16.