-Ka ɲʋn an muan ˈkmʋn sea ˈˈtian ˈbhle ˈjhe- da ˈbhlʋa- ˈˈkpe ɛ, ɛ ˈcreɛˈ ˈdhe Biiblʋ- ˈdhi. (Matie 5:5) ˈSɛɩ- mɩɩnˈˈ anˈ 66 man Biiblʋ-. Dhɛ -gwlɩˈˈdeʋn- anˈ 40 Ɲɔnsoa ˈcra i -wɛeˈ -ʋʋ -ˈcrɩɩ. Moizɩ -ˈcre ʋanˈ ˈsɛɩ- -mmˈˈ kɔan ɲan, ɛɛ nʋɛn zɩn anˈ 3.500 ˈzɩan. Dhbhoi- Zan -ˈcre ʋanˈ dheˈbhɔɔ- -sɛɛ, ɛ ziɛ zɩn anˈ 1.900 i bhla. Ɲʋn -ˈcrea Biiblʋ- ɛ, -ɔ pʋbʋ tɔˈ -gwlɩˈˈ -ɛ? Ɲɔnsoa nʋɛn ɔɔˈ -zuu ˈˈsree -sree -wɛeˈ ɔ po ɲʋn -ˈcrea Biiblʋ- tɔˈ -gwlɩˈˈ. (2 Samuel 23:2) Ɲɔnsoa aˈ tɔˈ ʋʋ ˈcre, ʋʋ ˈse ˈo ʋaˈ ˈˈjɛ -gwlɩˈˈ -za. -ˈMɛn Zoova- -nɩn Biiblʋ- aˈ -jhei.—Zro 2 Timotee 3:16; 2 Piɛɛ 1:20, 21.

Dhɩ yeaˈ -nʋɛn- ˈbho ɲan, -kɩn ˈyea nɩn- -gba, Biiblʋ- a ˈtmʋɩnˈ, ɛmɛn- -ɛn toɛ -ka ʋn nɩan Ɲɔnsoa aˈ Ghlu ɛ. -Glɔɲiɔn- se ˈbhɛɛ- ɔ ˈye ɛɛˈ dhɛ tu nʋn. (Josué 23:14) Ɲɔnsoa -ˈbhlea ˈˈɩ-kmaan anˈ klɛɛ ɛ, ɔɔˈ ˈsʋ -ˈbhɛɛ- -ɔ yeˈ ˈe ɲʋn anˈ ˈkmʋn anˈ ɲan iˈjhe.—Zro Titɩ 1:2, 3.

ˈSɛɛ- -ˈghlʋa Ɲɔnsoa ˈˈɩ ɛ, ɛ nɩn- ˈsɛɩ- -ˈnɩɩn se ˈbhɛɛ- ɩn ˈye goɔ-, ɛmɛn- -nɩn Biiblʋ- aˈ ka. Biiblɩ- aˈ ˈˈghluu -ghluu -gbleɛ- da ˈbhlʋa ˈˈkpe ˈdhe ghlui aˈ 450 ˈdhi ɛ ye dhɛ ˈˈkpe nɩn-. Ɲʋn ˈcrea Biiblʋ- ɛ, ɛ -gwle ˈo ˈmɛn. ˈBho ɛ ˈdhe ɛ, ʋn se klainˈˈ liivrʋ nɩn- -ke. ˈKlaa, dhɩ jhia -aʋ- ˈdhe i -gba, -ka ˈbhlʋa- nɩan -bho ʋan sa ɩanˈ dɩ ˈtmʋn ɛn, ʋanˈ ˈtmʋʋn- -dɩ -nɩɛn- kleinˈˈ. -Kenɛnˈ, ɲʋn anˈ 40 -ʋʋ -ˈcrʋʋ ɛ, ʋaˈ ˈtmʋʋn -dɩ a kpa -je dhueˈ. * Dhɛ Biiblʋ- a ˈtmʋan -ke ˈdhe ɲʋndɩkmaan- anˈ dɩ ˈdhi ɛ, Ɲɔnsoa ɔ kman ɲiɔn ɔnˈ dɩ, ˈdhe ɔɔˈ ˈsʋ bho dɩ -ˈnɩn ˈbhɛɛ- ɩn ˈye ˈghlʋ. Ʋn ˈbhɛɛˈ nɛnˈ ʋn ˈye dhbho nʋn ˈdhe ɲʋn anˈ ˈkmʋn dhi ˈsʋ ʋaˈ ˈkmʋn ˈye ˈdhɔɛe nɩn-. Dhɩ -ˈnɩn anˈ klɛɛ ɛˈ dɩ, ɲʋn anˈ -da -duuˈˈ deɛ -gwlɩˈˈ -ka Biiblʋ- nɩan Ɲɔnsoa aˈ Ghlu ɛ.—Zro 1 Tesalɔsɩ 2:13.

Dɩ Biiblʋ- a ˈtmʋan, ɩanˈ kpɔ dhueˈ kɔan dɩ ɛ, ɛ dhɩ ˈdhɔɛe Ɲɔnsoa ˈyea nʋn ɔ ˈyea -glɔɲiɔn- ˈˈɲɩn ˈdhe ɲan. Dhɛnʋɛn -wɛeˈ ˈdhe -glɔɲiɔn- ɔnˈ ˈkmʋn anˈ -deenanˈ ɔ ˈsa ˈo -bɔyaˈˈ -deɩn- ˈˈkpe -gwle -e -ka ˈbhlʋa- ˈyea -bɔyaˈˈ -deɩn- ˈkpa sʋn nʋn -kenɛnˈ, dɩ -ˈnɩn mɩn- Biiblʋ- ˈtmʋn -gba.—Zro Gbɔˈwlʋdhɩ- 21:4, 5.

ˈTee -e ˈtee aˈ ˈˈkpetbhaɩnˈ -e ˈsrɩn -nɩn ˈe Ɲɔnsoa aˈ Ghlu ˈdhi -ke. -Kenɛnˈ, Ɲɔnsoa aˈ ɲʋn ˈbhle sʋn anˈ -bo -nɩn ˈe Biiblʋ- ˈdhi, ɔmɔn- -ɔn tɔɔn -abʋ ɔɔˈ kplɩn. Dhɩ -ˈnɩn anˈ klɛɛ ɛ toɛˈ -ka Biiblʋ- ˈbhɛa ʋn ˈyea -ʋn sʋn bho po ˈˈdhe yeaˈ Ɲɔnsoa jhibho- ɛ. -Ka yeaˈ nʋn -wɛeˈ yeaˈ ɔɔˈ -jhbhɛɛi- nɩn- ɛn, ʋan ˈtmʋɛnˈ.—Zro Wlɔm 15:4; Zakɩ 2:23; 4:8.

-Da Zezi ɔ tɔɔan ɲʋn dhɛ, -ka ɔɔ ghlua ˈkamɔn- ɔɔ ˈˈsi Biiblʋ- aˈ ˈˈjhri ˈɲnɩn -wɛeˈ ɔɔ ‘za ˈCreedhɩ- gbɔ.’ -Ka nɩan dhueˈ nɔnˈ, ˈkamɔn- ˈmʋnfeesɛɛ- nɛn ɛn mun -ʋn sʋn bho -po -ke yeˈ Biiblʋ- iˈŋwɔn.—Zro Lukɩ 24:27, 45.

Dhɛ yeaˈ ˈmʋnan- ˈbhle ɛ yeaˈ -bɔyaˈˈ -dɩ -ˈghlʋa ˈe Ɲɔnsoa bho -zii ɛ se nɩn-. ˈKlaa -bho ɲʋn an sa ɩanˈ dɩ ˈtmʋn ɛn, ɲʋn -ˈnʋʋn anˈ po dheinˈˈ dhi, -ˈnʋʋn an ˈkpa ˈcɛn. -Manˈ ˈmɛn -e ˈkpɩ i -dhe. Ɲɔnsoa aˈ jhibhɛ- -ˈnɛn, ɛmɛn- yeɛˈ nʋn -wɛeˈ yeˈ ˈkmʋn sea ˈˈtian ˈbhle ˈjhe.—Zro Zan 17:3.