Pliegbi- aˈ klɛɛ ˈdhi i ɛ, ɲʋn -nɩn ˈe -ʋa- ˈbɔn -ʋʋ yeˈ Ɲɔnsoa jhibho- ˈjɛɛn-. Dhɛ ˈjɛɛn- nɩan ˈo ɛ, ɛmɛn- -nɩn Ɲɔnsoa a ˈjhʋbʋ ˈmɛn, ɔɔ naan ʋaˈ dɩ tɔˈ i. ˈKlaa, -jɛn -ɛn -ˈdhbha ɲʋn anˈ ˈkpɩ ɛ, ɛmɛn- -nɩn dhɩsaɩn- anˈ -da -duuˈˈ ɲʋn an nʋan ˈzɩan, pliegbi- -nɩɛn- ˈe ɩn ˈdhi. (2 Kolɛntɩ 4:3, 4; 11:13-15) ˈDhe kpaˈˈjhriɛˈdhebha -e kpadhounˈˈdhebha ˈdhi ɛ, ɲʋn an ˈtmʋɩnˈ -ka pliegbi- -duuˈˈ nɩan ˈe tʋ -e ɲʋndhbhaʋn- klaeˈˈ klaeˈˈ -e ˈcɛ i-zatʋ- aˈ dɩ ˈdhi ɛ. ˈˈPɛɛ- -kwia aˈ -da -duuˈˈ a nʋɛn ˈˈɲnuun mɩɩnˈˈ dhɩsaɩn- ˈˈjhri i, ʋa ˈkpa ˈˈɲnuun- mɩɩnˈˈ ˈˈkpe. Ɲʋn -ʋa- ˈbɔan -ʋʋ yeaˈ Ɲɔnsoa jhibho- ˈjɛɛn- -wɛeˈ ʋʋ nɩan pliegbi- -ˈnɩn ˈdhi i ɛ, ʋaˈ dhɛ ˈbhleɛ -ghwɛe-!—Zro Matie 24:3-5, 11, 12.

Pliegbu- ˈjɛʋn- an ˈbhɛɛ Ɲɔnsoa aˈ ˈɲnɩn ˈˈɩn, pliegbi- -saɩn- an ɲɔɔn dhi. Dhɩ sea ˈe Biiblʋ- ˈdhi nɩn- ɛn, ɩmɩn- ʋa ˈtmʋʋn ɲʋn. Ɩanˈ -ˈnɩɩn mɩn- -nɩn sɩ ʋa ˈtmʋan ˈdhe Ɲɔnsoa -e ˈdhe ɲʋn -ˈmɛan anˈ dɩ ˈdhi. ˈKlaa, Zoova a ˈbɔn -a yeˈ tɔˈdɩ- iˈŋwɔn ˈdhe ɔɔˈ dɩ ˈdhi.—Zro Wlɔm 6:23; 1 Timotee 2:3-5.

Dhɛ -ˈbhlea ˈmʋnan-, ɛmɛn- -nɩn pliegbi- -ˈbhlea Ɲɔnsoa aˈ ˈɲnɩn ˈˈŋwɛn in ˈˈdhe -ɩn kman Satan anˈ ˈkmʋn -saʋn- nʋn anˈ dɩ ɛ, ɩn se ˈbhɛɛ- ɩn ˈye Ɲɔnsoa ˈsrɛ i-poo. (Zakɩ 4:4) ˈDhe Ɲɔnsoa aˈ Ghlu ˈdhi ɛ, pliegbi- -saɩn- anˈ klɛɛ ɛˈ ˈɲnɩn -nɩn ‘Babilɔnɩn Klaaˈˈ.’ Babilɔnɩn ɛn, ɛ -glɔ -soa- -ɔ ˈdhe ˈdhi pliegbi- -saɩn- anˈ klɛɛ nɩan da ˈbhlʋa- ˈˈkpe ianˈ ˈˈnin tbha i. ˈDhe nɔnˈˈ dhɛ ˈˈzaan- ˈdhi ɛ, pliegbi- -saɩn- -ɩan- pooa ɲʋn ˈsrɛ i ˈˈdhe -ɩan- ˈˈdua ɲʋn ˈkle ɛ, -da ɲʋn ˈseɛ -gwlɩˈˈ -dee i ɛ, ˈbhomɔn- Ɲɔnsoa ˈyɩ iza-.—Zro Gbɔˈwlʋdhɩ- 17:1, 2, 5, 16, 17; 18:8.

ˈKlaa, -bɔyaˈˈ -dɩ -ˈnɩɩn -nɩn ˈo. Ɲʋn da ˈbhlʋa- aˈ klɛɛ ˈˈkpe -ʋa- ˈbɔan -ʋʋ yeaˈ Ɲɔnsoa jhibho- ˈjɛɛn- -wɛeˈ -ʋʋ nɩan pliegbi- -saɩn- -ˈnɩn ˈdhi i ɛ, Zoova ˈse ʋaˈ dɩ bho ˈˈmae-. Tɔˈdɩ- ɔɔ tɔɔan ɲʋn -ˈnʋn ɛn, ɩmɩn- -an pʋbʋ je bho -wɛeˈ ʋa ˈgboo i.—Zro Zan 6:45.

Ɲʋn kman tɔˈdɩ- -e dhɛ ˈjɛɛn- ɛnˈ dɩ ɛ, Zoova a naan ʋaˈ dɩ tɔˈ i ˈmɛn. Ɔɔ ˈtmʋʋn- ʋbʋ ˈmɛn ʋʋ ˈye pliegbi- -saɩn- -ˈnɩn ˈdhi i ˈghlʋ ˈˈdoo-. Ɲɔn kman Ɲɔnsoa aˈ dɩ ɛ, ɔɔˈ ɲɔn tu ɔɔ ˈbɔɔnˈ ˈjɛɛn- ɔ ˈye kplɩn ˈˈɩzian- -ka ɔ ˈyeɔ -gwliˈ i -nmɔɔn.—Zro Gbɔˈwlʋdhɩ- 18:4.

ˈDhe ˈˈɩ-zaa kletiɛn weˈˈ aˈ nɔnˈˈ, -da ɲʋn -ʋʋ kman Ɲɔnsoa aˈ dɩ ˈjɛɛn- ˈŋwɔan -bɔyaˈˈ -bo dhbhoʋn bhla, ʋʋ -kpʋɔn sɩn ˈsɔɔn. Zoova nʋɛnˈ ʋʋ ye ʋaˈ ˈkmʋn dheeˈ po, -wɛeˈ ʋʋ ˈbhle -pɛɛ ˈˈɩ-tbhadhɛ ˈˈdhe ʋaˈ ˈkmʋn ye dhɛ ˈdha. Ʋʋ -siiɛ- -abʋ ˈgɔ ˈdhɔɛe. Dhɛ nɩan ˈo ɛmɛn- -nɩn ʋʋ -kɔɔɛn- Zoova ɲan ˈdhe ʋaˈ ˈkmʋn ˈdhi ʋʋ ye -bɔyaˈˈ -dɩ -ˈnɩn sɩn ˈsɔɔn -kpʋʋn.—Zro 1 Tesalɔsɩ 1:8, 9; 2:13.

Ɲʋn -ʋa- -ˈghlʋa ˈe pliegbi- -saɩn- -ˈnɩn ˈdhi ɛ, Zoova a ˈŋwɔɔn ʋaˈ dɩ ˈmɛn ˈdhe ɔɔˈ ˈcɛ ˈˈklun. -Bho -ˈŋwɔɔn- Zoova aˈ ɲʋnˈdhaghlu- ɛ, -man muɛn ɔɔˈ -jhbhɛɛi- nɩn-, ɔɔˈ ˈcɛ kman bha aˈ dɩ ɛ, -man muɛn ˈe ʋbʋ ˈˈklun ˈkpa-, ˈˈdhe -man muɛn ˈkmʋn sea ˈˈtian ˈbhle ˈjhe-.—Zro Makɩ 10:29, 30; 2 Kolɛntɩ 6:17, 18.

Zae- Ɲɔnsoa ˈyea pliegbi- -saɩn- ˈˈdhru -jha, ɛ -bɔyaˈˈ -dɩ. Ɛɛˈ dhɛ tu ɛ muɛn nʋn- -glɔɲiɔn- ɔnˈ ˈklejheɛ- ˈye jha jhi. Ɲʋn ˈse pliegbi- -saɩn- ˈjhe -i ˈbhodhe ɩn ˈse ɲʋn ˈsrɛ i-poo i, ɩn ˈse ɲʋn izea- i -ˈnɛn da ˈbhlʋa- ˈˈkpe. Ɲʋn anˈ klɛɛ ɛ muɛn ghlu -da dhueˈ -po ʋʋ ˈye Ɲɔnsoa ˈˈɲɩn.—Zro Gbɔˈwlʋdhɩ- 18:20, 21; 21:3, 4.