Sɩ Satan ˈtmʋan ˈdhe ˈkmʋn anˈ -deenanˈ, ɩmɩn- -jha dhɛsaʋn- da ˈbhlʋa- ˈˈkpe. Satan -nɩɛn- -dadhbhoi- ˈjɔɔn- -dhe. ˈKlaa ‘ɔ ˈse ˈe tɔˈdɩ- ˈdhe i -de.’ (Zan 8:44) Ɔɔ ˈbɔn -glɔɲiɔn- ˈyeɔ ˈˈɲɩn -dhe ˈbho Ɲɔnsoa aˈ ˈgɔ ˈˈɩ. Ɛvʋ, ˈɲnɔnkpao Ɲɔnsoa -kɔan- ɲan ɔ nʋan, Satan -poo ʋ ˈsrɛ i -wɛeˈ ʋn -saˈ Ɲɔnsoa ŋwɔn ˈjhe. ˈBho ɛ ˈdhe ɛ, Adan bhla ˈo Ɛvʋ ˈdhe -ke ɔ ˈse Ɲɔnsoa ŋwɔn ˈjhe. Dhɛ Adan nʋan, ɛmɛn- -jha ˈmɛan -e ˈklejheɛ- ˈnɔn ˈkmʋn.—Zro Wlɔm 5:19; 2 Kolɛntɩ 11:3.

-Da Satan -pooa- Ɛvʋ ˈˈpɛ i -wɛeˈ ʋn ˈsea Ɲɔnsoa ŋwɔn ˈjhe ɛ, ˈbho- ɔ -dee ɲʋn -anˈ ˈdhaa Ɲɔnsoa aˈ ɲʋnˈbhleɛ- dhɛ ʋaˈ iˈgbooɛ-. Ɲʋn -duuˈˈ ˈkpa ˈe Satan ˈdhe ʋʋ ˈse ˈbɔn Ɲɔnsoa ˈyʋbʋ aˈ ˈBhlei- nɩn-. -Ka Satan nʋan ‘ˈkmʋn nʋn anˈ ˈˈdhrujhei-’ nɩn- sʋn ɛn, ɛɛˈ -bo -na ˈo.—Zro Zan 14:30; 1 Zan 5:19.

Ɲɔnsoa aˈ nʋʋndhɩ- aˈ klɛɛ ˈgba ˈˈɩ. Ɔ nʋan -glɔɲiɔn- -e -dadhbhoʋn- ɛn, ʋʋ ˈbhɛɛˈ -dhe ʋʋ ˈye ɔɔˈ -glʋˈdɩ- aˈ klɛɛ nʋn. (Deutéronome 32:4, 5) Ɲɔnsoa nʋan ɲiɔn, ɔ ˈbhɛɛˈ ɔ ˈye ˈo dhɛjɛɛn- -e dhɛsaʋn- ɛnˈ nʋanˈ -za. Dhɛ -a flɔan ˈˈkpe i ɛ, ɛ ˈyeɛ nʋn -bha -kman ɔɔˈ dɩ ɛ, -a yeɛˈ -to.—Zro Zakɩ 1:13-15; 1 Zan 5:3.

-Ɛ -ˈghlʋa ˈe Edɛnɩn -gle ɛˈ nɔnˈˈ, -ɛ -jhɛɛa- ˈzɩan, Zoova a ŋmʋɛn ɲʋn -ʋaˈ ˈdhaa ɔɔˈ ɲʋnˈbhleɛ- dhɛ jha. Dhɛɛdɩ- -ɛ? Ɔɔ nʋɛnˈ -wɛeˈ ɲʋn anˈ klɛɛ ˈyeɛ ˈjhe -ka -glɔɲiɔn- ɔnˈ ɲʋnˈbhleɛ- ɛˈ jha ɲʋn ˈjɛɛn-. (Ecclésiaste 7:29; 8:9) Zɩn anˈ 6.000 ɲiɔn nʋan da ˈbhlʋa- ˈˈkpe ɛ, ɩn toɛˈ. Ɲʋnˈbhleʋn- ˈse tʋ -e ɲʋnˈdhbhaa- -e dhɛsaʋn- -e ˈghwɛ iza-.—Zro 2 Piɛɛ 3:7-9; Wlɔm 9:17.

 ˈZɩan, -glɔɲiɔn- ˈɔn ɲʋnˈbhleɛ- ɛˈ -jha ɲʋn ˈjɛɛn-. ˈKlaa, ɲʋn -ʋa- -ˈŋwɔɔan Ɲɔnsoa ˈa ɲʋnˈbhleɛ-, ʋa ˈjheɛ -bɔyaˈˈ. (2 Timotee 3:16, 17) ˈDhe nɔnˈˈ dhɛ ˈˈzaan- ˈdhi ɛ, Zoova a muɛn -glɔɲiɔn- ɔnˈ ɲʋnˈbhleɛ- ɛˈ klɛɛ iza-. Ɲʋn -ʋa- jha ʋaˈ ˈˈjɛ jha ˈbho Ɲɔnsoa aˈ ɲʋnˈbhleɛ- ˈzɔn, ʋaˈ ˈsʋ yeˈ da ˈbhlʋa- ˈˈkpe -sie-.—Isaïe 11:9.—Zro Daniel 2:44.

Satan ˈnaan -bho -glɔɲiɔn- ɔn sa Zoova aˈ dhbho nʋn ɛn, -ˈmɛn ɔɔ ˈbɔn dhɛ. -Man ˈbɔn yeɛˈ nʋn sɩ nɩnˈ ˈye gbɔˈghwlʋ? Ɛɛn -ˈbheɛ! Nɔnˈˈ Ɲɔnsoa a poa ˈo ɛ, ɛ nɩn -bho -aa sa ɔɔˈ ɲʋnˈbhleɛ- -e -glɔɲiɔn- ɔnˈ ɲʋnˈbhleɛ- ˈbɔn, -a yeɛˈ -to. Dhɩ -aa nʋan ˈdhe -aaˈ ˈkmʋn ˈdhi ɛ, ɩmɩn- -an to ɲɔn -a nɩan ˈo ˈdhe ɛ.—Zro Job 1:8-12; Iiˈˈbhlaadhɩ- 27:11.

-Bho -aa sa ˈbɔn Ɲɔnsoa ˈye -aʋ- ˈbhle ɛ, -ˈmɛn ɔɔˈ ˈˈɲɩnsʋn- ˈjɛʋn- -ʋanˈ dɩ ˈtmʋan ˈdhe ɔɔˈ Ghlu Biiblʋ- ˈdhi ɛ, -a yʋˈ jhibho-. (Zan 4:23) -Bho -a se ˈe Satan anˈ ɲʋnˈbhleɛ- ˈdhe nɩn- ɛn, -ˈmɛn -ka Zezi ˈsa poitikɩ nʋn, ɔ ˈsa tʋ vɔn, ˈkamɔn- -a yeˈ nʋn- -ke.—Zro Zan 17:14.

Dhɩsaɩn- klaeˈˈ klaeˈˈ -e nʋʋndhɩ- -bho ɲʋn ˈkpa ˈe ˈdhi -wɛeˈ -ɩn -ˈyʋbʋ ˈkle ˈˈdu ɛ, ɩmɩn- Satan an nmɔɔn ˈˈjhri i. -Bho -aa sa ɩanˈ dhɩ tu aˈ nʋanˈ plee ɛ, ɲʋn -nɩn -a dea i ˈbheɛˈ ʋʋ ˈye -aʋ- -ghwlaa, -ˈnʋʋn ˈbheɛˈ ʋʋ ˈye -aʋ- ˈkle ˈˈdu. (1 Piɛɛ 4:3, 4) -Bho ɛ nɩn- anˈ, -ˈmɛn -a yeˈ ˈo dhɛ ɛˈ kpɔ dhueˈ -za -a yeˈ nʋn: Ɲʋn kman Ɲɔnsoa aˈ dɩ ɛ, -aa mun ʋaˈ naanˈ ˈbɔn- ˈmɛn? Ɔɔˈ ˈtee -ɩan- toa ɔɔˈ tɔˈ -e ɔɔˈ ɲʋn dɩ-kmaan, -aa muɩn ŋwɔn ˈjhe-? -Bho -a -za ˈo ɩanˈ dhɩ tu ɛ, -ˈmɛn -aa toɛˈ -ka Satan nɩan sɩ ˈtmʋin- ɛn. Dhɛ nɩan ˈo ɛ, ɔ ˈnaan -bho ɲiɔn ɔn sa ˈkle ˈjhe ɛ, ɔ se ˈbhɛɛ- ɔ ˈye Ɲɔnsoa aˈ Ghlu ˈˈjhriɛ- ˈˈdu.—Zro 1 Kolɛntɩ 6:9, 10; 15:33.

Ɲɔnsoa -kman -glɔɲiɔn- ɔnˈ dɩ, ɛ -kɔndɩ ɔ ˈye dhɛsaʋn- -e ˈklejheɛ- iza-. Ɲʋn -ʋa- toɛ ˈdhe ʋaˈ ˈkmʋn ˈdhi -ka ʋʋ dea dhɩ nɩn -gwlɩˈˈ ɛ, ʋaˈ ˈkmʋn ˈse ˈˈtian ˈbhle i da ˈbhlʋa- ˈˈkpe.—Zro Zan 3:16.