Ɲɔnsoa aˈ ˈɲnɩn -nɩn Zoova. Dhɛ ˈɲnɩn -ˈnɩn ˈdhaa -mɛn -nɩn “dhɩ aˈ klɛɛ ɔɔ ˈbɔan an, ɔɔ nʋɛnˈ ɩan yea ˈo ɲnin.” Zoova -nɩn ˈˈƖkmanklɛɛbhlei, ɔmɔn- nʋn dhɩ aˈ klɛɛ. Dhɛ ˈˈoo dhɛ ɔɔ ˈbɔan ɔ ˈyea nʋn ɛn, ɔɔ nʋɛnˈ.

ˈDhe Eble ghlu ˈdhi ɛ, ˈcreedhɛ ɛˈ ˈˈjhri ɲiɛn ɲɔn ɔn ˈˈdhuo ˈmʋn -wɛeˈ ɲɔn ɔn ˈcre Ɲɔnsoa aˈ ˈɲnɩn. ˈDhe ˈˈkwighlu ˈdhi ɛ, ˈcreedhɩ- -ˈnɩn mɩn- -nɩn YHWH -e JHVH. Biiblʋ aˈ ˈfɔ nɩan ˈe Eble ghlu ˈdhi ɛ, Ɲɔnsoa aˈ ˈɲnɩn ˈcreɛ- kpɛ ɛˈ 7.000 ˈdhe ɔ ˈdhi. -Ka ghlu nʋan kpɛ -deesʋn da ˈbhlʋa ˈˈkpe ɛ, ˈkamɔn- Zoova ɲnɩn anˈ ˈdhasʋn nʋn kpɛ -dee sʋn -ke.

▸ Cdhɛ. 1, § 15

Ɲɔnsoa -nɩn Biiblʋ aˈ -Jhei. Ɔmɔn- po ɲʋn tɔˈ -gwlɩˈˈ -wɛeˈ ʋʋ ˈcre ɔɔˈ Ghlu. Ɛ nɩn -ka ɲɔn ɔnˈ ˈdha klainˈˈ -jhu ˈˈzaan -wɛeˈ ɔɔˈ ˈcrea ɔɔˈ ˈsɛɛ ɛ. Ɲɔnsoa aˈ-zuu po ɲʋn -ˈcrea Biiblʋ sʋn bho ˈˈdhe ʋʋ ˈcre ɔɔˈ tɔˈinaandhɩ. Ɲɔnsoa aˈ -zuu nʋɛnˈ -ˈnʋʋn an ˈˈjhri ye dhɩ ˈjhe, ʋn nʋɛnˈ -ke -ˈnʋʋn ye jhɩ jha. Dhɩ ʋbʋ ˈjhea a, ɩmɩn- ʋʋ ˈcre.

▸ Cdhɛ. 2, § 5

ˈSrɩn -nɩn ˈe Biiblʋ aˈ ˈtee ˈdhi. Ɩanˈ kpɔ dhueˈ ka: Biiblʋ ˈnaan “bhɛiˈˈ zʋɩan ˈkɔɔ- kplɩn ˈdjɛ.” ˈSrɩn -a -ˈbhɛɛa -a -ˈyea ˈe ˈtee nɛn ˈdhi -za a, ɩmɩn- -nɩn, ɲʋn -nɩn -aa nan an, -bho ɛ nɩn- ɲʋn -ˈsrɛa ˈˈɩ oo, ɲʋn sea ˈˈɩˈsrɛ mɔn ˈdhe- ɛˈ, -aa muɛn ʋaˈ kplɩn -sraan ˈˈkpɔkpɔ. (1 Kolɛntɩ 15:33) -Kenɛnˈ ɛn, ʋn ˈnaan: “Dhɛ nyɔ ˈˈdua, ɛ mɔ ɔɔ mu ˈkpan ke-.” ˈSrɩn nɩan ˈe ˈtee nɛn ˈdhi ɛ, ɩmɩn- -nɩn, dhɛ ˈˈoo dhɛ ɲɔn ɔn nʋan an, ɔɔ muɛn ɛɛˈ geiˈˈ ˈjhe-.—Galasi 6:7.

▸ Cdhɛ. 2, § 12

Ɛ nɩn ˈtmʋʋndɩ- -ˈghlʋ ˈe Ɲɔnsoa ˈbho. ˈTmʋʋndɩ- -ˈnɩn ɛn, ɩn ˈbhɛɛˈ ɩn ˈye Ɲɔnsoa aˈ -glʋˈdɩ aˈ ˈˈkpeizela- nɩn-, ɩn ˈye ɔɔˈ ˈtee nɩn-, ɩn ˈye ɔɔˈ zae nɩn-, ˈˈdhe ɩn ˈbhɛɛˈ ɩn ˈye ɔɔˈ ˈsrɩn nɩn- -ke. ˈBho ɛ ˈdhe ɛ, -zaaɲantmʋn ˈbhɛɛˈ ɩn ˈye dhɩ -ˈyea -nʋɛn- ˈdhe ɲan nɩn-. Dhɩ -duuˈˈ Biiblʋ -zaa ɲan ʋn ˈtmʋn -ɩn ɲnin ˈo.

▸ Cdhɛ. 2, § 13

Dhɩ -zaa ɲan -ɩn ˈtmʋan ˈdhe Ɲʋnpʋʋi ɔˈ dɩ ˈdhi ɛ, Zezi nʋɛnˈ ɩanˈ -da -duuˈˈ ye ˈo ɲnin. ˈˈTɛʋn- -ʋanˈ ˈɲnɩn nɩan “ Dɩ -zaa ɲan -ɩn -ˈtmʋan ˈdhe Ɲʋnpʋʋi- ɔˈ dɩ ˈdhi ɛ,” -ŋmʋn ˈe ʋn ˈdhi.

▸ Cdhɛ. 2, § 17, ftn.

Zoova nʋn ˈbhlʋa ˈmɛn -wɛeˈ ɔ ˈye -bɔyaˈˈ -deɩn ˈkpa ˈˈdhe ɲʋn kman ɔɔˈ dɩ ˈye dɔɔ ˈˈkpe ˈˈti. Ɔɔˈ -glʋˈdɩ -ˈnɩn ˈse ˈˈɩzian-. ˈDhe nɔnˈˈ -dhɛ ˈˈzaan ˈdhi ɛ, ɔɔ muɛn dhɩsaɩn- iza- ˈˈdhe ɔ ˈye ɲʋn -ˈsrɛa ˈˈɩ ˈkmʋn sea ˈˈtian ˈbhle ˈˈɲɩn.

▸ Cdhɛ. 3, § 1

Dhbhoozuu- -deea Ɲɔnsoa aˈ ghlu ŋwɔn -bhlaa a, ʋmʋn- ɲɔn ɔnˈ dhaa Satan. Dhɛ Satan ɲnɩn ˈdhaa mɛn- -nɩn “Ɲʋnbhodooi-.” Dhɛbhleɛ ɛ, ɔɔ dooɛ Zoova bho. Ɲɔn ɔn ˈdhɔɔ “Ɲɔnsaʋn-” -ke, dhɛ nɩan ˈo ɛ, ɔɔ ˈtmʋʋɛn Ɲɔnsoa sɩ ˈˈkpei ˈˈdhe ɔɔ nʋɛnˈ -wɛeˈ ɲʋn ˈye ˈo Ɲɔnsoa ˈdhe ghlʋ.

▸ Cdhɛ. 3, § 4

Zoova nʋan dhbhoozii- ɛ, nɔnˈˈ -duuˈˈ -zii ˈbho -wɛeˈ ɔ nʋn ˈbhlʋa. Dhbhoozii- ɔ nʋan, ɩn -diɛ- ˈˈɩ ˈjɛɛn-, ɲɔn se ɩanˈ zroaˈ ˈbhɛɛ-. (Daniel 7:10) Ɩn -deeɛ- kpɛ ˈdhe jhaʋn ˈdhi. Ɩn ˈbhleɛ ɩanˈ ˈɲnɩn dhueˈ ˈdhue. Ɩanˈ ˈŋwɔɔn- ˈbho -wɛeˈ -glɔɲiɔn- ˈyɩ ˈˈɲɩn. Ɩanˈ dhbho -deeɛ- kpɛ. -ˈNɩɩn -nɩɛn- ˈo Zoova aˈ ˈbheɔ -kpaa ˈˈjhibhaˈ, -ˈnɩɩn an bhla ɔɔˈ -bo, -ˈnɩɩn an fuɛ ɔɔˈ dhbonʋʋn- ˈdhei, ɩan pʋbʋ je bho. Ɔɔ dhbhoɛ -ˈnɩɩn ɩan yea ɲʋnsaɩn- iza, -ˈnɩɩn an poɛ -bobhladhbho je bho. (Psaume 34:7; Gbɔˈwlʋdhɩ- 14:6; 22:8, 9) ˈDhe ˈkmʋn anˈ ɲan an, dhbhozii- a muɛn Zezi bho ˈkpa- -wɛeˈ ʋʋ ˈye Amagedɔnɩn tʋ vɔn.—Gbɔˈwlʋdhɩ- 16:14, 16; 19:14, 15.

▸ Cdhɛ. 3, § 5; Cdhɛ. 10, § 1

Dhɛ ˈˈoo dhɛ -aa nʋan, -aa naan tɔˈ i -wɛeˈ -ɛ -nɩn Zoova aˈ -glʋˈdɩ aˈ kpa -je dhueˈ ɛ, ɛ dhɛsaʋn-. Dhɛsaʋn- ɛn ˈkɔɔɛ -jhbhɛɛ- nɩan ˈo -abʋ -e Zoova ˈɲnɩn. Ɔ ˈˈɲɩɛn -aʋ ˈtee -e ˈsrɩn -ɩan po -aʋ sʋn bho -wɛeˈ -a -seaˈ dhɛsaʋn- nʋn. ˈDhe ˈkmʋn anˈ -deenanˈ an, dhɩ aˈ klɛɛ Zoova nʋan an, ɩn ˈsrɛ ˈˈɩ. ˈKlaa Adan -e Ɛvʋ -bhlaa Zoova aˈ ghlu ŋwɔn ʋʋ ye dhɛsaʋn nʋn, -wɛeˈ ʋaˈ ˈˈɩˈsrɛɛ ˈghlʋ ʋbʋ ˈkwa. Ʋʋ ˈkpa gɩlɩˈˈ, ʋʋ ˈmɛɛnˈ. -Abʋ nɩan ʋaˈ ˈˈɲnuun ɛn, -aa -ˈkpa gɩlɩˈˈ ˈˈdhe -aa ˈmɛɛnˈ. Dhɛbhleɛ ɛ, -a -ˈghlʋʋɛ- ˈdhe Adan anˈ dhɛsaʋn ˈdhi.

▸ Cdhɛ. 3, § 7; Cdhɛ. 5, § 3

Ɛ Ɲɔnsoa aˈ tʋ -ʋan- muan Satan anˈ ˈkmʋn nʋn -e dhɩsaɩn- anˈ klɛɛ iza- a.

▸ Cdhɛ. 3, § 13; Cdhɛ. 8, § 18

Ɛ Zoova aˈ ɲʋnbhle -glibha- nɩan ˈe jhaʋn ˈdhi ɛ. Zezi Klisɩ -nɩn ɔɔˈ ˈBheɔ. ˈDhe ˈkmʋn anˈ ɲan an, Zoova a muɛn ɔɔˈ ˈBheɔglɔ i-jhii -wɛeˈ ɔ ˈye dhɩsaɩn- iza- da ˈbhlʋa aˈ klɛɛ ˈˈkpe. Ɲɔnsoa aˈ ˈBheɔglɔ ɔ muɛn ˈbhlʋa aˈ klɛɛ ˈbhle-.

▸ Cdhɛ. 3, § 14

Ɲɔnsoa nʋn Zezi ˈmɛn ˈbho dhɩ aˈ klɛɛ ˈˈjhibha ˈˈa. Zoova -jha Zezi da ˈbhlʋa ˈˈkpe ɔ ye ˈmɛn ɲʋn anˈ klɛɛ ɛˈ dɩ. Zezi ˈmɛan an, Zoova jhɔ ˈkmʋn dhe. ˈZɩan an, Zezi -nɩɛn- Ɲɔnsoa aˈ ˈBheɔglɔ- nɩan ˈdhe jhaʋn ˈdhi ɔˈ ˈBheɔ.

▸ Cdhɛ. 4, § 2

Nɔnˈˈ Ɲʋnpʋʋi ˈyea -jha ˈdhe- ɛ, Biiblʋ -zaa ɔɔ dɩ ɲan ʋn yɩ ˈtmʋn. Ɛɛˈ nɔnˈˈ tu ɔ muɛn -ɲnin ˈdhe ˈdhɔɔ 69 ɛnˈ ˈdhe gwɛanˈ. Ɔɔ deeˈ ˈdhe 455 zʋn ˈdhi (tɛnˈˈ ti ˈdhi), ˈˈdhe ɔɔ gwɛ ˈe ˈdhe 29 zʋn ˈdhi (-kaan ti ˈdhi).

-Ka nɔnˈˈ -ˈnɔn ɔn gwɛa ˈe ˈdhe 29 (K.T.D.) zʋn ˈdhi ɛ, ka -a nʋn ɛɛˈ jhibho- sʋn -ɛn? ˈDhɔɔ 69 -ˈnɩn -deeˈ ˈdhe 455 zʋn ˈdhi (T.T.D.), -da Neemia -deea Zeluzalɛmʋn glɔ ˈkpapoaˈ a. (Daniel 9:25; Nehémia 2:1, 5-8) -Bho ɲʋn ˈnaan ˈdhɔɔ dhueˈ ɛˈ, -a jhibhiˈ -ka ɛ nɩan ˈghwɩ 7 ɔn. ˈKlaa ˈdhɔɔ ɲʋn an ˈdhaa ˈdhe ɲanzaadɩ- nɩn ˈdhi ɛ, ɛ se ˈdhɔɔ -ɔɔ nʋan ˈghwɩ -ˈˈmɛsɔn nɩn-. ɛ ˈdhɔɔ -ɔɔ nʋan -zɩn -ˈˈmɛsɔn ɔn. Dhɛbhleɛ ɛ, ˈdhe ɲanzaadɩ- -dhee -ˈnɩɩn ˈdhi ɛ, “-zɔn dhueˈ -nɩɛn- -zʋn dhueˈ.” (Nombres 14:34; Ézékiel 4:6) -ˈMɛn ˈdhɔɔ dhueˈ ˈdha -zɩn -ˈˈmɛsɔn ˈˈdhe ˈdhɔɔ 69 ˈdha zɩn anˈ 483 (69 x 7). -Bho -a -dee -zɩn nɩan 483 anˈ zroa ˈdhe 455 (T.T.D.) zʋn ˈdhi ɛˈ, ɩan kpa -aʋ ˈbho 29 (K.T.D.) zʋn bho. ˈˈJaa -jaa, ˈdhe 29 zʋn ˈdhi Zezi -jhii ˈˈnin ˈzɔn ˈˈdhe ɔ ˈkpa Ɲʋnpʋʋi!—Lukɩ 3:1, 2, 21, 22.

 Ɲanzaadɩ- nɩn ˈtmʋɛn ˈdhɔɔ dhueˈ -dhee -ˈnɔɔn ɔnˈ dɩ -kenɛnˈ, ɔɔ nʋɛn -zɩn -ˈˈmɛsɔn. ˈDhe nɔnˈˈ -kpɔ -ˈnɔn ˈdhi ɛ, ˈdhe 33 zʋn ˈdhi ɲʋn an muɛn Ɲʋnpʋʋi ˈdhbha-. ˈDhe 36 zʋn ˈdhi ɛ, ˈBheɔglɔ ɔˈ -bɔyaˈˈ bo ɔˈ bhlaaˈ ˈye -dee ˈbhlʋɩ aˈ klɛɛ ˈdhii, ɛ ˈse ˈe Zʋifʋ -ˈˈwe aˈ ˈsʋ bho nɩn- in.—Daniel 9:24-27.

▸ Cdhɛ. 4, § 7

Biiblʋ ˈnaan Zoova nʋn dhɩ aˈ ˈklɛɛ. Ɔ nʋn Zezi ˈmɛn ˈbho dhɩ aˈ klɛɛ ˈˈjhibha ˈˈa. (Kolɔsɩ 1:15, 16) Zezi se Ɲɔnsoa nɩn-. Ɔ ˈse ˈka nʋn ɔ -nɩn Ɲɔnsoa ˈbhɛɛ ˈmʋn ˈmɛn. Ɛɛˈ -dɩ ɔ ˈnaan: “ˈˈƖn Bhaˈ ˈbhɛ ˈˈi ɔ -zii ˈˈʋn.” (Zan 14:28; 1 Kolɛntɩ 15:28) ˈKlaa ɲɔnsoagbi- -saɩn- ˈnaan ɲʋn taan man Ɲɔnsoa. Dhɛ ʋa ˈtmʋan mɛn- -nɩn ˈˈBho -e ˈˈJhu -e -zuu sreeˈˈ -sree, ʋbʋ- -ˈkpa -da dhueˈ -wɛeˈ -ʋʋ -nɩn Ɲɔnsoa. ˈˈDhe Biiblʋ ˈse ˈan ˈdha dhueˈ. Dɩ ɲʋn an ˈtmʋan -ˈnɩn se tɔˈdɩ -nɩn.

-Zuu ˈˈsree -sree -nɩɛn- Ɲɔnsoa aˈ ˈˈɩ-kmaan ɔɔ ˈˈdhua ˈmʋn -wɛeˈ ɔɔ nʋan dhɩ aˈ klɛɛ ɔɔ ˈbɔan. Biiblʋ ˈnaan: Tɛnˈˈ kletiɛn -ˈˈwe “ˈˈji zreeˈˈzreeˈ zuu ˈʋn” ˈmɛn. -Kenɛnˈ ɛn, Zoova ˈnaan: “ˈˈƖn ˈye ˈˈan -zuuˈ ˈdho nyiɔ klɛɛkpɛ kɩn ˈˈjii-.”—Nʋʋdhɩ- 2:1-4, 17.

▸ Cdhɛ. 4, § 12; Cdhɛ. 15, § 17

Kletiɛn ˈjɛʋn anˈ ˈˈɲɩn Ɲɔnsoa ˈbho kloaˈ ˈˈjhibha ˈˈa. Dhɛɛdɩ- -ɛ?

1. Ɲʋn nɩan ɲɔnsoagbi -saɩn- ˈdhii ɛ, ɛ se ˈzɩan -wɛeˈ ʋʋ ˈbhle kloaˈ ˈdhe ʋaˈ ˈˈɲɩnsʋn ˈdhi nɩn-.ˈDhe tɛnˈˈ kmʋn ˈdhi ɛ, ɲʋn -an nʋan ˈɲnɩnzanˈ ˈdhe ʋaˈ ˈˈɲɩnsʋn ˈdhi -e ɲʋn -an -ˈˈɲɩan ˈˈnian -e trɩ ɛ, ʋa ˈbhleɛ kloaˈ -ti. Zezi ˈmɛan an, ˈdhe zɩn anˈ 300 -ziia- ˈbho ˈdhi ɛ, kletiɛn -ˈˈwe ˈse kloaˈ ˈbhle ˈdhe ʋaˈ ˈˈɲɩnsʋn ˈdhi. Ɲʋn ˈseɛ ˈŋwɔn dhueˈ -ke. Wlɔmʋnkɔʋn- anˈ ˈBheɔ ɲɔn ɔn ˈdhaa Kɔnsitantɛn ɛn, ɔmɔn- -jha kloaˈ dhɛ i ˈdhe ɲɔnsoadhɛ ˈdhi. Ɔɔ ˈbɔn ɲʋn anˈ -da -duuˈˈ ˈye ɲɔnsoadhɛ ɛˈ dɩ -kman. ˈKlaa kloaˈ -e Zezi ɔˈ dɩ se dhɛ dhueˈ nɩn-. ˈSɛɛ- dhueˈ ˈnaan: “Kletiɛndhɛ ˈsea ˈnɔn ˈkmʋn ˈkpa ke -dhe ɛ, -ˈmɛn kloaˈ dhɛ nɩnˈ see -dhe ˈdhe ɲʋn anˈ ˈˈbhli dhɩ ˈdhi.”—New Catholic Encyclopedia.

2.   Zezi ˈse ˈmɛn ˈbho kloaˈ -gwlɩˈˈ. Glɛkɩ -ghlu ɲʋn za gbɔ -wɛeˈ ʋʋ ˈdhaa “kloaˈ” a, ɛ se kloaˈ nɩn-. Ghlu -ˈnʋn ˈdha “tu -dɔʋnˈ,” ʋn ˈdha “ˈbɛʋn,” ʋn ˈdha “tu” -ke. Dhɛ ˈsɛɛ- dhueˈ ˈtmʋan an ɛ ka: “Dhɛ -ɛ -ˈyea kloaˈ ˈdha ˈdhe Glɛkɩ ghlu ˈdhi ɛ, ɛ se -nɩn.” Zezi ˈmɛɛn- ˈbho tu -dɔʋnˈ dhueˈ -gwlɩˈˈ.—The companion Bible.

3. Zoova ˈse ˈbɔn -a -ˈye fete -e -baadhɩ i-jhii -wɛeˈ -a -ˈyeɔ ˈˈɲɩn.—ˈZɔnˈˈSiɛɛ- ˈSɛɛ- 20:4, 5; 1 Kolɛntɩ 10:14.

▸ Cdhɛ. 5, § 12

Zezi ˈnaan ɔɔˈ dhɛcɩaʋn ˈye ɔɔˈ ˈmɛan anˈ -Gwliinaanzɔn ˈˈdu. Ʋa nʋɛnˈ zʋn ˈˈoo -zʋn ˈdhe Israɛkɔʋn anˈ ˈcʋ ʋa ˈdhaa Nizan ˈdhi, ʋanˈ ˈghwɩ aˈ 14. Ɛ nɩn -zɔn -ɔ ˈdhi Israɛkɔʋn an ˈˈdua Pakɩ gɔ ˈdhe- ɛ. -Dipɛnˈ- -e nmɔn ɲɔn ɔn jhaa ˈbho ɲʋn anˈ klɛɛ ˈˈjhibhaˈ ˈdhe Zezi ɔˈ ˈmɛan anˈ -Gwliinaanzɔn ˈmʋn ɛn, ɩn ˈdha ɔɔˈ ku -e ɔɔˈ ɲmɔn. Ɲʋn -nɩn Zezi ˈyea ˈbheɔ -nɩn ˈdhe jhaʋn ˈdhi ɛ, ʋbʋ- -a ˈdhi -dipɛnˈ- ˈˈdhe -ʋa- ˈnan nmɔn. Ɲʋn dea ˈkmʋn sea ˈˈtian ˈbhle -gwlɩˈˈ da ˈbhlʋa ˈˈkpe ɛ, ʋa mun Zezi ɔˈ ˈmɛan anˈ -Gwliinaanzɔn ˈmʋn ˈmɛn, ˈklaa ʋaˈ dhi -dipɛnˈ- ˈˈdhe ʋaˈ ˈnan nmɔn.

▸ Cdhɛ. 5, § 21

ˈBho ɲʋn -duuˈˈ -gwlɩˈˈ ɛ, -bho ɲɔn ˈmɛn ɛnˈ, dhɛɛ- -ˈghlʋ ˈe ɔ ˈmʋn -ɛɛ mun ˈˈnan -e bhaˈ bho. -ˈNʋʋn ˈnaan, ɲʋn -ˈmɛan ˈbhɛɛˈ ʋʋ ˈye -aʋ sʋn bho po ˈˈdhe ʋʋ ˈbhɛɛˈ ʋʋ ˈyea -aʋ dhɛsaʋn ˈˈjhrii nʋn -ke.

• Biiblʋ ˈnaan -bho ɲɔn ˈmɛn ɛnˈ, dhɛ ˈˈoo dhɛ ɛˈ ˈghlʋ ˈe ɔ ˈmʋn ɛɛˈ mun da.Ɲɔn -ˈmɛan se dhɛ ˈˈoo dhɛ ɛˈ nʋanˈ ˈbhɛɛ-. Dhɛ -ˈcrea ˈdhe Biiblʋ ˈdhi ɛ, ɛ ka: “Ɲʋn nɩan ˈkmʋn ɛn, ʋʋ jhibhiˈ -ka ʋa muan ˈmɛn- ɛn, ˈklaa ɲʋn -ˈmɛan se dhɛ ˈˈoo dhɛ ˈˈɩjhibho-, ʋʋ se geiˈˈ ˈbhle dheeˈka, dhɛbhleɛ ʋaˈ  tɔˈinaandhɩ ˈˈmaanˈ. Ʋaˈ ɲʋndɩkmaan- -e ʋaˈ ɲʋmʋɲɩɛn- -e ʋaˈ -gwlɛnˈ ˈmɛɛnˈ, ʋʋ se dhbho ˈbhle ˈdheeka da ˈjhrʋ ˈzɔn. [...] ˈDhe glu -man muan an, dhbho se ˈe nɩn-, poodɩ se ˈe nɩn-, dhɛjhibhɛ- se ˈe nɩn-, tɔˈ se ˈe nɩn-.” (Ecclésiaste 9:5, 6, 10) Dhɛ Biiblʋ ˈtmʋan -kenɛnˈ ˈbho ɲʋn -ˈmɛan anˈ dɩ ˈˈbhli ɛ, ɛ ka: “Ɔɔ muɛn ˈe ˈbhlʋ ˈzɔn ˈdhe, ˈdhe ɛɛˈ -zɔn tu ˈdhi ɛ, ɔɔˈ tɔˈinaandhɩ a ˈmɛɛnˈ,” ɔ se inɩn- ˈbhodhe. (Psaume 146:4; Gbɔ I Deˈan 3:19)

• Dhɛ Biiblʋ a tɔɔan ɲʋn ɛn, ɛmɛn- -nɩn ɲiɔn se -zuu ˈbhle. -ˈMɛn -bho ɔ ˈmɛɛnˈ dhɛ ɛˈ ˈghlʋ ˈe ɔ ˈmʋn. Ɲʋn ˈmɛan se ˈkmʋn -nɩn -da ˈdhee- -ˈnɔɔn, ʋʋ se ˈbhɛɛ- ʋʋ ˈye ɲʋn nɩan ˈkmʋn sʋn bho po, ʋʋ se ˈbhɛɛ- -ke ʋʋ ˈyʋbʋ dhɛsaʋn- ˈˈjhrii nʋn.

▸ Cdhɛ. 6, § 5; Cdhɛ. 15, § 17

ˈDhe Biiblʋ aˈ ˈfɔ -ˈcrea ˈdhe Eble -e Glɛkɩ ghlu ˈdhi ɛ, “-zuu” ˈdha dhɩ -duuˈˈ. Ɛ ˈbhɛɛˈ ɛ ˈye Ɲɔnsoa aˈ -zuu nɩn-, ˈˈdhe ɛ ˈ bhɛɛˈ -ke ɛ ˈye ɔɔˈ dhbhozii- aˈ dhueˈ nɩn-. ˈKlaa ɲɔn -ˈmɛan -e ɲɔn nɩan ˈkmʋn se -zuu ˈbhle. ˈKamɔn- Biiblʋ ˈdha.—ˈZɔnˈˈSiɛɛ- ˈSɛɛ- 35:21; Psaume 104:29; Matie 12:43; Lukɩ 11:13

▸ Cdhɛ. 6, § 5; Cdhɛ. 15, § 17

Ɛ ˈˈbhie klaaˈˈ dhueˈ ɲɔn ɔn po sɩɩnˈ ˈˈjhri ˈe ˈdhi ˈbho Zeluzalɛmʋn glɔ ˈˈbun. ˈDhe Zezi ɔˈ nɔnˈˈ ɔn, ɲʋn an poɛ ˈe nmian -e ɲʋnsaɩn- anˈ ˈˈkwi. ˈKlaa ɲɔn ɔnˈ ˈˈsi ˈkmʋn ˈsʋ ɲɔn ɔnˈ ˈˈvilɔ ˈdhe. Ɛɛˈ dɩ Zeɛnɩn se nɛn -ɛɛˈ ˈmʋan ɲʋn an ˈdhaa -nɩn . -Bho Zezi ˈnaan ɲʋn -dhee -ˈnʋʋn -nɩn ˈe Zeɛnɩn ˈdhi ɛˈ, ɔɔ ˈbɔn ɔ ˈye ka nʋn ɲʋn -ˈnʋʋn -ˈyea i-zaa a, ʋʋ ˈse ˈkmʋn dhe -jhi i.—Matie 5:22; 10:28.

▸ Cdhɛ. 7, § 20

ˈBho bhaeghlu- -ˈnʋn ˈˈkpe Zezi tbha -wɛeˈ ɔ -tɔɔn ɔɔˈ dhɛcɩaʋn -ka ɲɔn ɔn nʋan bhae- sʋn ɛn. Zezi ˈnaan ˈdhe -aaˈ bhaeghlu ˈdhi ɛ, -a -ˈbhɛɛˈ -a -ˈye ka ˈdha:

• “Nʋɛ nyʋ ˈye -anˈ ˈnynɩ ja de”

  -Aa bhaeˈ -wɛeˈ Zoova ˈye ɔɔˈ ˈɲnɩn -vlɛnˈˈ iza-. Ɛmɛn- -ˈyeɛ nʋn -wɛeˈ ɲʋn nɩan ˈe jhaʋn ˈdhi -e ɲʋn nɩan da ˈbhlʋa ˈˈkpe ˈye Ɲɔnsoa aˈ ˈɲnɩn jha de, ˈˈdhe ʋʋ ˈyɩ ˈˈɩˈbhɛɛ-.

• “-Anˈ ˈbheɔda ˈye ji”

  -Aa bhaeˈ Ɲɔnsoa aˈ ˈBheɔglɔ ˈye jhi ˈˈdhe ɔ ˈye Satan anˈ ˈkmʋn -saʋn- nʋn iza- -wɛeˈ ɔ ˈyeɛ nʋn ˈbhlʋa aˈ klɛɛ ˈye -bɔyaˈˈ -deɩn- ˈkpa.

• “-Anˈ wwlʋaˈ ˈbɔɔndhɛ ˈye nʋʋɛ da ˈbhlʋa- kɩn”

  -Aa bhaeˈ -wɛeˈ Ɲɔnsoa aˈ -glʋˈdɩ ˈye -nʋɛn- da ˈbhlʋa aˈ klɛɛ ˈˈkpe, ˈˈdhe ɲʋn -an -ˈjheɔ ŋwɔn ɔn, ʋʋ ˈye ˈˈɩˈgba, ʋʋ ˈye ˈkmʋn nɩn- jheejhee ˈdhe -Bɔyaˈˈ -deɩn- ˈdhi, -ka Zoova a ˈbɔan see -dhe ɛ.

▸ Cdhɛ. 8, § 2

Zoova -toɛ- ˈo zeieghwliɛ- -wɛeˈ -glɔɲiɔn ˈye ˈe dhɛsaʋn- -e ˈmɛan anˈ -kʋɔn- kwlaˈ ˈghlʋ. -Jhbhɛɛ- nɩan ˈo -glɔɲiɔn- -e Zoova ˈɲnɩn -e, ˈˈɩˈgbaa- Adan ˈˈmaan an, zeieghwliɛ- -nɩn ɩanˈ geiˈˈ. Ɲɔnsoa dhbhoɛ Zezi da ˈbhlʋa ˈˈkpe ɔ ye ˈmɛn dhɛsaʋnʋʋn- anˈ dɩ. Zezi ɔˈ ˈmɛan anˈ dɩ ɲʋn anˈ klɛɛ ˈbhɛɛˈ ʋʋ ˈye ˈkmʋn sea ˈˈtian ˈbhle -pɛɛ ˈˈɩtbha.

▸ Cdhɛ. 8, § 21; Cdhɛ. 9, § 13

Ɲanzaadɩ- nɩan ˈe Daniel ɛˈ ˈˈjhri klaeˈˈ 4 ˈdhi ɛ, ɩan toɛˈ -ka Ɲɔnsoa a muan ɔɔˈ ˈBheɔglɔ ˈˈdu- ˈdhe 1914 zʋn ˈdhi ɛ.

 Ɲanzaadɩ-: ˈDhe jha ˈdhi ɛ, Zoova -toɛ- ˈBheɔ Nebukanɛzaa tu klaaˈˈ dhueˈ ˈˈɩ, -ʋn -ɲnan in. Ɛɛ ˈbhɔɔa ˈbho ˈsʋ ɲʋn dhbhʋˈ ˈˈdhe ɲʋn bhla ʋanˈ -zooˈˈ kpuanˈ nɩɛn- paoˈ ˈdhi -wɛeˈ ʋn -seaˈ mɛn. -Bho “nɔnˈˈ -ˈˈmɛsɔn” zi -wɛeˈ ʋn ˈye mɛn bhla.—Daniel 4:1, 10-16.

Dhɛ ɲanzaadɩ- -ˈnɩn ˈdhaa: Tu -ˈnʋn ˈdha Ɲɔnsoa aˈ ˈbheɔdhɛ-. Ɲʋn -an -ˈkpa ˈbheɔ ˈbho Zeluzalɛmʋn, -wɛeˈ -ʋa- -ˈbhlea Israɛkɔʋn- ˈdhe- ɛ, Zoova -a pʋbʋ ˈbheɔ. (1 Chroniques 29:23) ˈKlaa ˈbheɔ -ˈˈwe -ˈnʋn ˈse ˈo Zoova ˈˈbun ikpʋn, ɛmɛn- nʋɛn -wɛeˈ ʋaˈ ˈbheɔdhɛ ˈˈti. ˈDhe 607 (T.T.D.) zʋn ˈdhi Zeluzalɛmʋn glɔ -zaa i. ˈBhomɔn- “nɔnˈˈ -ˈˈmɛsɔn” -ˈnɩn -dee. (2 Rois 25:1, 8-10; Ézékiel 21:25-27) Zezi ˈnaan, ‘nyʋ seazuifʋnɩ ˈye Zeluzalɛm suan-, gbɔɔˈdjɛ nyʋ seazuifʋnɩ ɛn, ʋa ti ˈye ˈgba.’ (Lukɩ 21:24) Zezi nɩan da ˈbhlʋa ˈˈkpe ɛ, -ˈmɛn “nɔnˈˈ -ˈˈmɛsɔn” -ˈnɩn ˈse ˈe -gwɛ ke ˈdhe-. Zoova cɛn ghlu ɔ ˈnaan ˈdhe “nɔnˈˈ -ˈˈmɛsɔn” ˈnɩn anˈ ˈe -gwɛanˈ an, ɔ ˈye ɔɔˈ ˈBheɔ ˈo de. ˈBheɔ -ˈnɔn ɔn, ɛ Zezi. Ɔɔˈ ˈbheɔdhɛ ɛ muɛn Ɲɔnsoa aˈ ˈcɛ nɩan da ˈbhlʋa aˈ klɛɛ ˈˈkpe -bɔyaˈˈ bho -jha.—Lukɩ 1:30-33.

Dhɛ “nɔnˈˈ -ˈˈmɛsɔn” -ˈnɔn ˈdhaa: Ɛ zɩn anˈ 2.520. -Bho -a -dee -zɩn -ˈnɩn anˈˈ zroaˈ ˈbho 607 (T.T.D.) zʋn ˈˈkpe ɛˈ, ɩan kpa -aʋ ˈdhe 1914 zʋn ˈdhi. ˈDhe -zʋn -ˈnʋn ˈdhi, Zezi nɩan Ɲʋnpʋʋi ɛ, Zoova poɔ ˈBheɔglɔ ɔˈ ˈBheɔ ˈdhe jhaʋn ˈdhi.

-Ka “nɔnˈˈ -ˈmɛsɔn” -ˈnɔn ɔn nʋan zɩn anˈ 2.520 ɔn, ka -a nʋn ɛɛˈ jhibho- sʋn -ɛn? Biiblʋ ˈnaan nɔnˈˈ taan -e nɔnˈˈ die -e, ɩan nʋɛn ˈghwɩ aˈ 1.260. (Gbɔˈwlʋdhɩ- 12:6, 14) Nɔnˈˈ taan -e nɔnˈˈ die -e, ɩanˈ kpɛ ˈsɔɔn ɔn nʋɛn nɔnˈˈ -ˈˈmɛsɔn. ˈMɛn “nɔnˈˈ -ˈˈmɛsɔn” ɔn nʋɛn ˈghwɩ aˈ 2.520. ˈGhwɩ nɩan 2.520 ɔn, ɩn ˈdha zɩn anˈ 2.520. Dhɛbhleɛ ɛ, ˈdhe ɲanzaadɩ- -dhee -ˈnɩɩn ˈdhi ɛ, “-zɔn dhueˈ -nɩɛn- -zʋn dhueˈ.”—Nombres 14:34; Ézékiel 4:6.

▸ Cdhɛ. 8, § 23

Dhbhoozii- ˈbhleɛ ‘ˈˈdhrujhei-.’ Ɔ -nɩɛn- dhueˈ gbai -ɔɔˈ dɩ Biiblʋ a ˈtmʋn. Ɔɔˈ ˈɲnɩn -nɩn Misɛlɩ.—Daniel 12:1; Zudɩ 9.

Gbɔˈwlʋdhɩ- 12:7 ˈnaan: “Misɛlɩ e ɔɔˈ dhboozuia kpa dhɔsɛ ˈˈbhli tʋˈˈ.” ˈDhe Gbɔˈwlʋdhɩ- aˈ ˈsɛɛ ˈdhi ɛ, Zezi -nɩn dhbhoozii- aˈ ˈˈdhrujhei. -ˈMɛn Misɛlɩ -nɩɛn- Zezi ɔˈ ˈɲnɩn -ˈnɩɩn.—Gbɔˈwlʋdhɩ- 19:14-16.

▸ Cdhɛ. 9, § 4

Ɛ nɩn nɔnˈˈ -ɔ ˈdhe ˈdhi dhɩ aˈ klɛɛ Biiblʋ ˈtmʋan ˈyea -nʋɛn- -wɛeˈ Ɲɔnsoa aˈ ˈBheɔglɔ ˈyea Satan anˈ ˈkmʋn -saʋn- nʋn iza- a. -Bho Biiblʋ a sea ka nʋn ‘ˈkmʋn anˈ ˈe -gwɛanˈ’ -e “Wwlɔnyiɔɔ ˈˈjua jiɛ” ɛˈ, ɛ nɔnˈˈ nɩan dhueˈ -mɔn ʋan ˈdha. (Matie 24:3, 27, 37) -Da Ɲɔnsoa aˈ ˈBheɔglɔ -deea ɲʋnbhleaˈ ˈdhe jhaʋn ˈdhi ˈdhe 1914 zʋn ˈdhi ɛ, ˈbhomɔn- “dheˈbhɔɔ-wɩ” -dee. Ɩan muɛn ˈe -gwɛ ˈdhe Amagedɔnɩn tʋ ˈdhi -da Satan anˈ ˈkmʋn nʋn ˈyea i-zaa.—2 Timotee 3:1; 2 Piɛɛ 3:3.

▸ Cdhɛ. 9, § 5

Ɲɔnsoa a muɛn ɲʋn -ˈmɛan ˈkmʋndhejha-. Ɲʋn -ˈˈmɛɲɛn jhi ˈkmʋn dhe -ʋaˈ dɩ Biiblʋ a ˈtmʋn. Eli -e Elize -e Zezi -e Piɛɛ -e Pɔʋ nʋɛn ˈjhrae ʋʋ ye ɲʋn -ˈnʋʋn -ˈmɛan ˈkmʋndhejha- ˈdhe tɛnˈˈ kmʋn ˈdhi. Ɲɔnsoa aˈ ˈˈɩ-kmaan nʋn ˈjhrae -ˈnɩn anˈ klɛɛ. Zoova cɛn ghlu ɔ ˈnaan ɔɔ muɛn “ˈˈiiˈsrɛnyʋ e, nyʋ sea ˈˈi ˈsrɛ” ˈkmʋndhejha- da ˈbhlʋa ˈˈkpe. (Nʋʋdhɩ- 24:15) Biiblʋ a ˈtmʋɛn ˈkmʋndhejhiɛ- ˈdhe jhaʋn ˈdhi ɔˈ dɩ -ke. Ɛ nɩn ɲʋn -zuu ˈcrai ɛ, ʋaˈ ˈkmʋndhejhiɛ- ˈdhe jhaʋn ˈdhi -wɛeˈ ʋʋ ˈye ide- ˈbho Zezi ˈˈbun.—Zan 5:28, 29; 11:25; Filipi 3:11; Gbɔˈwlʋdhɩ- 20:5, 6.

▸ Cdhɛ. 9, § 13

Gupoɛ- -nɩn ˈe dhɩ aˈ -da -duuˈˈ ˈdhi ˈzɩan. Ɩanˈ -ˈnɩɩn mɩn- -nɩn ˈsɛɩ- -e video -e ˈdhɩ ɲʋn an poa dheinˈˈ bho -e ˈplʋjhriizadhɩ- -e fete -e. -ˈNʋʋn an ˈbhleeɛ kwɛin- ˈˈbun -wɛeˈ ɩn -ˈyʋbʋ dhɛsaʋn- bho -tɛɛn. Dhɩziʋn- ˈbhleɛ ˈˈɩ-kmaan -an pʋbʋ sʋn bho -wɛeˈ ʋa ˈjhee dhɩ ɲan ˈˈdhe dhɩ -ˈnɩɩn ɲʋn sea ˈbhɛɛ- ɲʋn ˈyea jhibho- ɛ, ʋa ˈtmʋɩn. Ʋʋ ˈbhleɛ -jɛˈpodhɩ- -e ˈˈjhenan -e -bilɛ- -e -gbalɛ- -e. Ʋa poɛ -zrɛɛndhɩ-. -ˈNʋʋn an ŋmʋɛn ˈe ɲʋn ˈkwa -wɛeˈ ʋa ˈjhee dhɩ ɲan. Dhɛ -ziisaɩn- an ˈbɔan -a -ˈyea -gwlɩˈˈ de -ke ɛ, ɛmɛn- -nɩn ɲʋn -ˈmɛan an, ʋʋ ˈse ˈmɛn. Ɲʋn -ˈkpa ˈe ɩanˈ ˈsrɛ -ˈnɛn ˈdhi ɛ, -bho ʋaˈ ɲɔn ɔnˈ dɩ ˈkpa aˈ, ʋa ˈdha dhɩzii- -wɛeˈ ʋʋ nɩn- ʋaˈ ɲɔn -ˈmɛan ˈye ghlu bho poo-. -Bho dhɩzii- jhi ɛˈ, ɔɔ za ɲɔn -ˈmɛan ghluˈ i. -Bho ɲɔn ˈmɛn -ke ɛˈ, ɲʋn an nʋɛn dhɩ -duuˈˈ. Ʋa ˈˈduɛ gɔ, ʋa za ˈsrae-, ˈɲnʋnkpae a za -dʋa-, ɲʋn an ˈpɛɛn ˈzɔn, ʋa za ˈe ˈˈmɩɩn-, ʋa dhiɛ ˈcran -zaan -ko, ʋa ghluɛ ˈe ˈˈku bho. -Ziisaɩn- -nɩn dhɩ -ˈnɩn anˈ klɛɛ ˈzɔn in.—Galasi 5:20; Gbɔˈwlʋdhɩ- 21:8.

▸ Cdhɛ. 10, § 10; Cdhɛ. 16, § 4

Zoova -nɩn ˈˈƖkmaanklɛɛbhlei, Ɔmɔn- nʋn dhɩ aˈ klɛɛ nɩan ˈnɔn ˈkmʋn. (Gbɔˈwlʋdhɩ- 15:3) Ɛɛˈ dɩ -wɛeˈ ɔ nɩn- ɩanˈ klɛɛ ɛˈ -Jhei ˈˈdhe ɔ ˈbhle ˈbheɔdhɛ ˈbho ɩanˈ klɛɛ ˈˈdhru -ke. (Psaume 24:1; Isaïe 40:21-23; Gbɔˈwlʋdhɩ- 4:11) Dhɩ ɔ nʋan an, ɔ deɛ ɩanˈ klɛɛ ˈtee ˈˈkpe. Ɔ ˈbhɛɛˈ -ke, ɲɔn ɔɔ ˈbɔan an, ɔ ˈyeɔ ˈbheɔdhɛ ˈˈɲɩn. Zoova aˈ dɩ -kmaan -e ɔɔˈ ŋwɔnjheɛ- -e, ɛmɛn- -nɩn ɔɔˈ ˈbheɔdhɛ ɛˈ jha -deɛ-.—1 Chroniques 29:11.

▸ Cdhɛ. 11, § 10

ˈˈKwli ˈbho -zaa -e ˈˈkwli ŋwɔn ˈghlʋɛ se dhɛ dhueˈ nɩn-. -Bho ˈɲnɔnkpaoˈ aˈ ˈˈjɛˈkpa po dhɩ ˈdhi ɛˈ, ɛmɛn- ɲɔn ɔn ˈdhaa ˈˈkwli ˈbho -zaaˈ. -Bho ˈɲnɔnkpao aˈ ˈˈkwli se ˈˈɩˈbhɛ mɔn ˈdhe- ɛˈ, ˈˈjhu nɩan ˈe ʋn ˈdhi ɛ, ɔ ˈdha dhɛ. Ɛ ɲiɔn-.

▸ Cdhɛ. 13, § 5

Ɛ nɩn dhɛ ɲɔn ɔn nʋn ˈe dɔsrɔ -ŋmɛinˈˈ. Ɲɔn ɲmɔn sa ˈe ku ˈzɔn nɩn- ɛn, ʋa jhɔɔ ˈdhe ɔɔˈ -tain- ˈdhi -wɛeˈ ʋa poɔ ˈe ɔ ku ˈzɔn. -Bho ɛ seɛ nɩn- ɛnˈ, -ˈmɛn dhɩ aˈ kpɛ klaeˈˈ ɲiɛn nɩan ˈe ɲmɔn bho ɛ, ɩmɩn- ʋa zela i -wɛeˈ -ɩanˈ dhueˈ ʋa po ˈe. ˈDhe ˈˈkwighlu ˈdhi ɛ, dhɩ aˈ kpɛ ɲiɛn -ˈnɩn mɩn- ɲʋn an ˈdhaa plasma e globule rouge -e globule blanc -e plaquettes sanguines -e.

▸ Cdhɛ. 13, § 13

Dhɛ ɲɔn ɔn ˈdhaa kplɩnkwaizaa- ˈdhe Biiblʋ ˈdhi ɛ, ɛ se ɲɔn -bhlaa aˈ ˈsʋ nɩn-. -Bho ɲʋn ˈnaan ɲɔn ɔn za ɲɔn kplɩn kwai ɛˈ, ɲɔn ɔn tʋʋɔn dhɛ, ɲɔn ɔn ˈˈduɔ ˈsrɩn. -Bho Zoova a sa ɲɔn kplɩn ˈkwa i za aˈ, ɔɔˈ nʋɛn ˈdhe ˈdhiŋwɔɲniɛn- ˈdhi. (Iiˈˈbhlaadhɩ- 4:1, 2) Zoova mɔn- ˈˈɲnuunbhleʋn ˈye -sraan. Ɔ jhibhɛ- ɲʋn kplɩnkwaizaka-, ɛɛˈ dɩ -bho ɛɛ sa ˈo ˈbhɔɔ ɔˈ, ɲɔn ɔ za kplɩn ˈkwa i ɛ, ɔɔ kman kplɩnkwaizaa- aˈ dɩ. (Iiˈˈbhlaadhɩ- 12:1) Zoova -kman ɔɔˈ ˈcɛ ɛˈ dɩ, ɛmɛn- -ɛn nʋɛn -wɛeˈ ɔɔ kuu ʋbʋ i. Ɔɔ tɔɔn ʋbʋ dhɛ -wɛeˈ ʋaˈ tɔˈinaansʋn -e ʋaˈ nʋʋndhɩ ˈye ˈˈɩˈsrɛ. Ɲʋn nɩan ˈˈɲnuunbhleʋn- -ke ɛ, ʋʋ ˈye ʋaˈ ˈˈɲnuun sʋn bho po ˈˈdhe -ka ghlu ˈˈjhriɛ ˈˈduɛ- ɛˈ dɩ kman an, ʋʋ ˈyeɛ iˈŋwɔn. ˈBho ɛ ˈdhe ɛ, ʋʋ ˈye ʋaˈ ˈˈɲnuun Zoova aˈ dɩ -kmaan -e ɔɔˈ Ghlu nɩan Biiblʋ aˈ dɩkmaan -tɔɔn ˈˈdhe ʋʋ ˈyʋbʋ sʋn bho po ʋʋ ˈye ɔɔˈ ˈsrɩn iˈŋwɔn.

▸ Cdhɛ. 14, § 13

Ɛ -zii -ɩn -kman ˈˈɩn -ɩn -zii -glɔɲiɔn. Ɲʋn se ˈbhɛɛ- ɲʋn ˈyɩ ˈˈjhriɛ ˈjhee-. Ɩn -ɲniɛn- kplɩnˈ. Nɔnˈˈ ɩn -bhlaa Ɲɔnsoa aˈ ghlu ŋwɔn ɔn, ˈbhomɔn- ɩn ˈkpa Ɔɔˈ ˈmʋɲɩɛʋn. (Gbɔ I Deˈan 6:2; Zudɩ 6) Ɩn bhla ˈo Satan anˈ ˈgɔ ˈdhe.—Deutéronome 32:17; Lukɩ 8:30; Nʋʋdhɩ- 16:16; Zakɩ 2:19.

▸ Cdhɛ. 16, § 4