1. -Bho aʋ “ˈˈkʋʋan- Nyɔsoa i” ɛ, dhɛwɛ- aʋ ˈye ˈo ˈjhee- -ɛ?

 ƝƲN -an nʋan Zoova aˈ dhbho ɛ, ɔ -kman ʋaˈ dɩ. -Bho -man sɔ ˈˈɲɩn ɛnˈ, -man ye ɔɔˈ ˈˈdhiman ˈjhe- -kaan -e ˈdhe ˈkmʋn anˈ ɲan -e. Biiblʋ ˈnaan: “Ɩn ˈˈkʋʋan- Nyɔsoa i, ɔɔ mue ɩn dhii ˈˈkʋʋan-.”—Zakɩ 4:8.

2. Ka aʋ ˈye nʋn -wɛeˈ aʋ ˈye Ɲɔnsoa iˈˈkwaan- -an, ˈˈdhe kɛ ˈye aʋ sʋn bho -po sʋn nʋn ˈdhe aʋaˈ bhaeghlu ˈdhi -ɛ?

² -Bho aʋa sa ˈbɔn aʋ ˈye Ɲɔnsoa iˈˈkwaan- anˈ, aʋ ˈcɩan Biiblʋ, aʋ -naan ˈdhe ʋanˈ ˈsrɩn ˈdhi. -Bho aʋaˈ bhaeghlu nɩn- ɔɔˈ -glʋˈdɩ a sa -je dhueˈ kpa aˈ, Zoova a yʋ ikpʋn-. Dhbhoi- Zan, -ɔ nɩan kletiɛn ɛn, dhɛ ɔ ˈcrea ɛ ka: “-A ˈbhle ˈwwlii-ˈbhɛɛ- ˈdho [Ɲɔnsoa] ˈˈbun, -mɔ -a ˈjba dhɛ ˈdhe ɔɔ ˈkpɩpodhɛ ˈdhi ɛˈ, ɔɔ too -a dhoinˈˈ we. -Mɔ -a juɛ ɔ taa- dhoianˈˈ- too ˈɛ, -nɛˈ -a juɛ -ka -a ˈbhlea dhɛ -aa ˈjbaa- ɔ ɛ.”—1 Zan 5:14, 15.

3-7. Dhɛ -a -ˈbhɛɛ- -a -ˈye nʋn -wɛeˈ -a -ˈye Ɲɔnsoa aˈ tɔˈ ˈbhle -ɛ, ˈˈdhe ka ɔɔˈ tɔˈ ˈbhɛɛ ɔ ˈye -aʋ- sʋn bho -po sʋn nʋn -ɛn?

³ ˈBho ɛ ˈdhe ɛ, -ka aʋa ˈˈkwaan Ɲɔnsoa i ɛ, ˈka ɔɔ mun aʋ tɔˈ ˈˈɲɩn- -wɛeˈ aʋ ˈye iku ˈdhe aʋa ˈkmʋn anˈ klɛɛ ˈdhi. Biiblʋ ˈnaan:“-Mɔ nyɔ taa tɔɔˈ- ˈbɔn ˈdhe ɩn ˈˈkwlu ˈɛ, ɔ ˈjbaa- ɔ Nyɔsoa. Ɔɔ za wwlʋˈ ˈkwla ˈdho nyʋa wwɛɛˈ dhɩ ˈˈnyiɛ- we, ɔˈɔ djɛ. Nyɔsoaa mu ɔ tɔˈ ˈˈnyi-.”—Zakɩ 1:5.

⁴ Dhɛ ˈjɛɛn- -wɛ Ɲɔnsoa aˈ tɔˈ ˈbhɛɛ- ɔ ˈye aʋ ˈˈɲɩn -ɛn? Ɔ ˈbhɛɛˈ ɔ ˈyeɛ nʋn aʋ ˈye dhɩ -ɩan ɲaan Zoova i jhibho-. Dhɛ nɩan ˈo -ke -wɛeˈ ɩan ɲɔɔn in ɛn, ˈˈdhe -ka aʋ ˈyea nʋn -wɛeˈ aʋ ˈsɩ nʋn in ɛn, aʋ ˈyeɛ jhibho-. Dhɛ jhibhɛ- -ˈnɛn ɛn muɛn nʋn- dhɩ -ɩan- ˈˈdua ɲʋn anˈ -da -duuˈˈ ˈkle ˈzɩan an, aʋ ˈsɩ ŋwɔn ˈkpa iˈ. Ɩanˈ -ˈnɩɩn mɩn- -nɩn ˈˈkwli ˈdhe ˈˈkpae -zaa -e ˈɲnɩn -zanˈ -gwhɛ -e ˈɲnɔn -e -kʋan- anˈ jɛaˈ -e ʋaˈ ˈˈɩcɩɛn- -e. ˈKlaa ɲʋn nɩan Ɲɔnsoa aˈ ˈcɛ -wɛeˈ -ʋa- ˈˈdua ɔɔˈ ghlu ˈˈjhriɛ ɛ, ʋaˈ ˈkpa ˈe dhɩ nɩan kaˈ ˈdhi.

⁵ Dhɛ -dhee -ˈnɛɛn -wɛ Ɲɔnsoa aˈ tɔˈ ˈbhɛɛ ɔ ˈye nʋn ɔ ˈye aʋ ˈˈɲɩn -ɛn? Ɔ ˈbhɛɛˈ ɔ ˈye aʋ ˈkmʋn ˈdhɔɛe ˈˈɲɩn. Ɔ ˈbhɛɛˈ -ke ɔ ˈye aʋ tɔˈ -gwlɩˈˈ po ˈbho dhɩ nʋanˈ. Ɩanˈ dhueˈ mɩn- -nɩn ˈgwhɛi aˈ ka jhibhɛ-. Aʋa muɛn ˈo dhɩ -ɩn -ˈdha dhɛ ˈdhe -zi ˈˈdhe dhɩ -ɩanˈ poa ˈo dhɛ ˈdhe ɲɔn ɔnˈ ˈkmʋn ˈdhi ɛ, aʋa muɩn bho -tɛɛn.

⁶ Ɲɔnsoa aˈ tɔˈ ˈbhɛɛˈ ɔ ˈye -ʋn sʋn bho po -nɩn ɲʋn ˈye ghluˈ iˈŋwɔɔn-. Ɔɔ muɛn -manˈ ˈˈgbuzɔncɛ kupeɛideɛ- ˈˈɲɩn-. Tɔˈ -ˈnɔn ɔn muɛn -nʋn mɔn -e ɲʋn anˈ -jhbhɛɛ- ˈye ˈo -gwle ˈˈdhe ɲʋn -anˈ ˈˈɲɩan Ɲɔnsoa mɔn ɔn ˈˈjɛ ɛ, ʋʋ ˈye -ʋn ŋwɔn ˈjhe.

⁷ ˈBho ɛ ˈdhe ɛ, -bho -ˈbhle Ɲɔnsoa aˈ tɔˈ ɔˈ, ɛɛ muɛn -nʋn -ˈye ˈkmʋn ˈˈjhriɛ ˈjɛɛn ˈjhee-. ˈKledɩ- -e -gwlɩˈˈ ɔˈ ˈˈghweɛ- nɩan ˈnɔn ˈkmʋn ɛn, ɛɛ muɛn -nʋn -ˈye iku ˈbho ɩn ˈˈjhibhaˈ. Ɛɛ muɛn -manˈ -pɛɛ ide- ˈdhe ˈkmʋn anˈ ɲan anˈ dɩ ˈdhi. -Bho -manˈ -pɛɛ -de i ˈdhee- ˈdhi ɛ, ɛ ˈbhɛɛˈ ɛ ˈyeɛ nʋn -ke -ˈye ku ˈzɔn i-flɔn.—Iiˈˈbhlaadhɩ- 14:30; Isaïe 48:17.

8. -Bho -man sa Ɲɔnsoa ˈˈɲɩn ɛnˈ, dhɩwɛ- -ˈse -manˈ -faʋn- ˈbhle i -ɛ?

⁸ -Bho -man sa Ɲɔnsoa nɩan ˈe jhaʋn ˈdhi ˈˈɲɩn ɛnˈ, dhɩ -ɩn -bhlea ɲʋn anˈ -faʋn- ɛn, -ˈsɩ -faan in, -ˈse ɩanˈ -kʋɔn- nɩn- in ˈbhodhe. Jhibhiˈ -ka ɲʋn -ˈmɛan ʋʋ sea inɩn- ɛn, -ˈmɛn ʋaˈ -faʋn- ˈse -ʋn nʋn- in. Jhibhiˈ -ka Ɲɔnsoa ˈnaan ɔɔ muɛn ɲʋn -ˈmɛan ˈkmʋn dhejha-,  ɛɛ muɛn nʋn- -ˈse ˈmɛan -plee i. -Ka Ɲɔnsoa ˈbhlea ˈˈɩ-kmaan an, jhibhiˈ see, -ˈmɛn se ˈbhɛɛ- -ˈye guiʋn -plee.—Zan 8:32.

9-11. Ɲɔnwɛ- -ɛ mun ˈkmʋn -dhee ˈjhe- -ɛ, ˈˈdhe ɲɔnwɛ- -ˈsɩʋ ˈjhe i -ɛ?

⁹ -Bho -nɩn Ɲɔnsoa ˈˈkwaan- dhi ɛˈ, ˈdhe ˈkmʋn anˈ ɲan ˈse -manˈ -faʋn- ˈbhle iˈ. -Ka -a -ˈjheɛ ˈnɔn ˈsɛɛ- nɛn ˈdhi ɛ, ˈkledɩ aˈ -da -duuˈˈ glɔɲiɔn ɔn ˈjhea da ˈbhlʋa ˈˈkpe ˈzɩan an, Biiblʋ -zaa ɩ ɲan ˈmɛn ʋn yɩ ˈtmʋn. Zoova ˈnaan ˈkledɩ- -ˈnɩn an muɛn -zi. ˈDhe nɔnˈˈ -dhɛ ˈˈzaan ˈdhi ɛ, Ɲɔnsoa aˈ ˈBheɔglɔ ɔ muɛn -nʋn ˈbhlʋa- nɔn ɔnˈ klɛɛ ˈye -bɔyaˈˈ -deɩn- ˈkpa.—Lukɩ 21:10, 11, 31; 23:43.

¹⁰ Ɲʋn -ʋa- ˈˈkwaan Zoova i ˈˈdhe -ʋa- -ˈˈɲɩɔn ɔn, ʋaˈ ˈsʋ -ˈye ˈe ˈkmʋn -dhee ˈdhi ˈˈti. Biiblʋ ˈnaan: “Nɔnˈˈ ˈˈzaan- -si ˈo ˈˈdhe ɲʋn -saɩn- ˈye i-zaa. -Man muɛn -dɔ ˈˈtia -ŋmʋn, -ˈseɔ ˈjheiˈ. ˈKlaa ɲʋn -an piia ʋaˈ ˈˈjɛ ˈˈɩ ɛ, ʋʋ- -ʋa- mun ˈbhlʋa ˈbhle-, -wɛeˈ ʋʋ ˈye kupeɛˈ ide- -kajɔɔnka.”—Psaume 37:10, 11.

¹¹ Ɲʋn -an kmuuan ʋaˈ -pɛɛ ˈˈɩ -wɛeˈ -ʋaˈ ˈjhea Ɲɔnsoa aˈ ˈtee ŋwɔn ɔn, ʋʋ ˈse ˈkmʋn sea ˈˈtian ˈbhle ˈjhe iˈ. (2 Tesalɔsɩ 1:8, 9) Ʋʋ ˈse inɩn- in ˈbhodhe. Ʋbʋ -e Satan -e ɔɔˈ -zii -saɩn- ˈye ˈmɛn ʋʋ ˈse dhejhi- i. (Gbɔˈwlʋdhɩ- 20:10, 14) Ɲʋn -an -ˈcɩan Zoova aˈ jhibhɛ- -wɛeˈ -ʋa- -ˈˈɲɩɔn ɔn, ʋa muɛn ˈkmʋn -sie- nɔnˈˈ ˈbhlʋa nɔn ɔn muan -bɔyaˈˈ -deɩn- ˈkpa- a.

12. Dhɛwɛ- Biiblʋ ˈtmʋn -ɛ -ˈye -nʋɛn- ˈdhe ˈkmʋn anˈ ɲan -an?

¹² Zoova ˈbhleɛ dhɩ ˈjɛɩn- ɔ ˈye nʋn ɔ ˈye ɲʋn kman ɔɔˈ dɩ ˈˈɲɩn! -Ka ɔ nʋan -bɔyaˈˈ -deɩn- anˈ dɩ ˈtmʋn sʋn ˈdhe ɔɔˈ ghlu ˈdhi ɛ, aʋ ŋmʋɛn jha:

•   Dhiidhɩ ˈye isɛn: “[Dhiidhɩ] a muɛn isɛn- da ˈbhlʋa aˈ klɛɛ ˈˈkpe. ˈDhe trɩ ˈˈkpe ɛ, ɩn ˈye ban.”—Psaume 72:16.

•   ˈˈGbi ˈjɛɩn-: “Ʋa muɛn ˈˈgbi -po ʋʋ ˈyɩ ˈdhi ˈˈti.”—Isaïe 65:21.

•   Dhbho -ˈbhlea ˈmʋnan an: “Ʋa muɛn ʋaˈ sɩn anˈ nʋʋn -dhbho dhɛ ˈdhi ˈjhe-. Ʋʋ ˈse dhbho -nʋn in ˈˈjhai.”—Isaïe 65:22, 23.

•   ˈGhwɛ ɛ muɛn i-gwɛ: “Ɲɔn dhueˈ ka ˈse ka nʋn- in: ‘ˈMan -da -a poa.’”—Isaïe 33:24.

•   Ɲɔn ˈse -nɩaan- in: “ˈDhe ɛɛˈ nɔnˈˈ tu ˈdhi ɛ, ɲɔn -ˈdhɔa a, ɔɔ muɛn iˈjhe-, ɲʋn -ˈˈsuan an, ʋa muɛn iˈŋwɔn-. ˈDhe ɛɛˈ nɔnˈˈ tu ˈdhi ɲɔn -klɔa a, ɔɔ muɛn ˈdhre ɛˈ dhɩ jhai ˈjha sʋn ˈbhle- ˈˈdhe ɲɔn sea ghlu ˈbhle ɛ, ɔɔ muɛn ˈˈjha iˈˈghwɔɔ- ˈdhe ˈmʋnan ˈdhi.ˈ”—Isaïe 35:5, 6.

•   -Gwlɩˈˈ ɔˈ ˈˈghweɛ- -e ˈˈvɩan -e ˈmɛan ˈse i-nɩn in: “Nyɔsoa ˈyʋ ˈˈmii- tɛnˈˈ klɛɛkpɛ ˈˈjrii- ˈsran, -nɛˈ ˈmɛɛ- se nɩ i -nɛˈ, ˈˈviɛn- se nɩ i -nɛˈ, zrɛ se nɩ i, wwliaˈˈ ˈˈwooɛ- se nɩ i, dhɛnʋɛ -zɛiˈˈ dhɩ ziˈ.”—Gbɔˈwlʋdhɩ- 21:4.

•   Tʋ -gwɛi: “Ɲɔnsoa a za tʋ i bhla da ˈbhlʋa aˈ klɛɛ ˈˈkpe.”—Psaume 46:9.

•   ˈKmʋn sea ˈˈtian ˈbhle: “Ɲʋn -ˈˈsrɛa ˈˈɩ ɛ, ʋa muɛn ˈbhlʋa ˈbhle- ˈˈdhe ʋaˈ dɔ ˈˈkpe ˈˈtiɛ- ˈse ˈˈtianˈ ˈbhle iˈ.”—Psaume 37:29.

13. Ɲɔnwɛ- -ˈbhɛɛ- -ɔ -ˈyeɛ nʋn -wɛeˈ ˈbhlʋa ˈye -bɔyaˈˈ -deɩn ˈkpa -a? ˈˈDhe dhɛɛdɩ- -ɛ?

¹³ -Glɔɲiɔn- se -ˈbhɛɛ- ɔ ˈye dhɩ ˈjɛɩn nɩn -jha. ˈKlaa Zoova aˈ ˈˈɩ-kmaan an muɛn -nʋn -wɛeˈ dhɩ aˈ klɛɛ ɔɔ ˈbɔan an, ɔ ˈyɩ nʋn. Dhɛ -ˈyea ɔɔˈ -glʋˈ dɩ je -kaan an, ɛ se -nɩn. Biiblʋ ˈnaan: “Dhɛ weiɛ se kmu ˈdho Nyɔsoa we.”—Lukɩ 1:37.

14. Kawɛ- aʋ ˈye nʋn -wɛeˈ aʋ ˈye ˈkmʋn sea ˈˈtian ˈbhle aˈ je ˈjhe -ɛ?

¹⁴ Zoova a nʋɛnˈ ɔɔˈ -Bobhlaʋn- an yea ɲʋn sʋn bho po -wɛeˈ ʋʋ ˈye ˈo ‘ˈˈgbu aˈ ŋwɔn piia ˈˈɩ’ ɛ, ˈˈɩ-jhii ˈˈdhe ˈkmʋn sea ˈˈtian ˈbhle ɛ, ʋʋ ˈye ʋanˈ je ˈjhe. -Aa bhaeɛ aʋ dhi, -bɔyaˈˈ -cɛ -ˈŋwɔɔan ˈdhaghlu- nʋn ɛn, aʋ ˈkpa ˈe ʋbʋ ˈˈklun. Aʋ ˈbhle ˈˈɲɩnsʋn- ˈjɛʋn. -Bho aʋ nʋn -ˈmɛn ɛnˈ, aʋaˈ ˈkmʋn ˈse ˈˈtian ˈbhlei- ˈdhe Zoova aˈ ˈˈdhiman ˈdhi!—Matie 7:13, 14.