ˈBho ɲʋn -duuˈˈ -gwlɩˈˈ ɛ, Zoova aˈ -Bobhlaʋn- -nɩɛn- ɲɔnsoagbu- -dhee. ˈKlaa -ɛ se ˈan nɩn-. Dhɛ ʋʋ sea jhibho- ɛ, ɛmɛn- -nɩn ˈdhe tɛnˈˈ kmʋn ˈdhi ɛ, Zoova aˈ ˈˈjɛˈkpa ˈnaan ɲʋn -an nʋan ɔɔˈ dhbho ɛ, ʋʋ -nɩɛn- ɔɔˈ “-bobhlaʋn-.” Ɔ ˈdha kaˈ a, ɛɛ nʋɛn zɩn anˈ 2.700 ɩn -nɩn dhɛ ˈˈkpe. (Isaïe 43:10-12) Tɛnˈˈ -dhe ɛ, ɲʋn an ˈdhaa -aʋ Biiblʋ ˈCɩaʋn-. -Ɛ tbha ˈo 1931 zʋn ˈˈkpe ɛ, ˈbhomɔn- ɲʋn -dee -aʋ- Zoova aˈ -Bobhlaʋn- ˈdhaananˈ. Dhɛɛdɩ- -ɛ?

-Aaˈ ˈɲnɩn -ˈnɩn an tɔɔn ɲʋn Ɲɔnsoa -aa -ˈˈɲɩan. Ɲɔnsoa aˈ ˈɲnɩn ˈjɛɩn- nɩan Zoova a, ɩn nɩn- ˈe Biiblʋ aˈ ˈsɛɩ soa ˈdhi ˈmɛn kpɛ ɛˈ ˈˈghlu -ˈˈmɛsɔn. Ʋʋ -za ˈɲnɩn -ˈnɩn ˈe Biiblɩ aˈ -da -duuˈˈ ˈdhi ˈmɛn -wɛeˈ ʋʋ po ˈBhlei- -e Ɲɔnsoa ˈbho ɩanˈ ˈgɔ ˈˈɩ. Ɲɔnsoa aˈ ˈɲnɩn nɩan Zoova a, ɔɔˈ ˈˈjɛ -tɔɔn ɩn Moizɩ ˈmɛn, ɔ ˈnaan: “ˈˈAn ˈnynɩ mɔ ˈo mɔumɔu.” (ˈZɔnˈˈSiɛɛ- ˈSɛɛ- 3:15) ˈƝnɩn -ˈnɩn mɩn- -an nʋɛn -wɛeˈ ɲʋn se ˈbhɛɛ- ɲʋn ˈye ɔmɔn -e ˈˈɲɩɩndhɩ bho bhee-. Dhɛ Ɲɔnsoa aˈ ˈɲnɩn -ˈnɩn nɩan ˈo -a ˈˈkpe ɛ, ɛ nɩn ˈˈɩ-nmɔɛn- klaaˈˈ.

Dhbho -aa nʋan mɔn- ɩan tɔɔn ɲʋn. -Ɛ -deea ˈbho ˈˈɩˈsrɛi- Abɛlɩ ˈˈkpe ɛ, tɛnˈˈ -ɲʋn -duuˈˈ toɛˈ -ka ʋʋ dea Zoova -gwlɩˈˈ ɛ. ˈBho Noe -e Ablaamʋn -e Sala -e Moizɩ -e Davidɩ ˈdhe ɛ, ɲʋn -dhee -ˈnʋʋn -ˈkpa ˈe -bobhlaʋn- -duuˈˈ -ˈnʋn ˈˈklun. (Eble 11:4–12:1) -Naan dɩ nɩn tɔˈ i: -Manˈ -jhbhɛɛi-, -ɔɔˈ kplɩn nmɔan ˈˈjhrii ɛ, ɔmɔn- -ɔnˈ ˈɲnɩn ɲʋn -dhee -ˈnʋʋn an ˈkɔɔ. -Bho -ˈŋwɩɩn ɛnˈ, ka -man mun nʋn- -ɛn? -Man muɛn -manˈ -jhbhɛɛi- bho ˈghlʋ- ˈˈdhe -ka dhɩ ʋa ˈtmʋan nɩan sɩ ɛ, -ˈyeɛ -to. ˈKamɔn- -abʋ -ke ɛ, -aa ˈbɔn, tɔˈdɩ- -a -ˈŋwɔan ˈdhe Ɲɔnsoa aˈ dɩ ˈdhi ɛ, -a -ˈye ɩanˈ dɩ ˈtmʋn.

Zezi -aa sraan. Biiblʋ a ˈdhɔɔ -bobhlai- -ɔɔ -ˈtmʋan tɔˈdɩ, -ɔ nɩan -gwlɩˈˈ -de ka a. (Gbɔˈwlʋdhɩ- 3:14) Zezi ɔˈ ˈˈjɛˈkpa ˈnaan ɔ ‘-tɔɔɛn- ɲʋn Ɲɔnsoa aˈ ˈɲnɩn,’ ɔ bhla tɔˈdɩ aˈ -bo ˈdhe Ɲɔnsoa aˈ dɩ ˈdhi -ke. (Zan 17:26; 18:37) Ɛɛˈ dɩ ɲʋn nɩan kletiɛn ˈjɛʋn ɛn, Zoova aˈ ˈɲnɩn ˈye ˈo ʋbʋ ˈˈkpe nɩn- ˈˈdhe -ka Klisɩ nʋɛn -wɛeˈ ɲʋn jhibha ˈɲnɩn -ˈnɩn ɛn, ʋʋ ˈye ˈan nʋn -ke. Ɛmɛn- Zoova aˈ -Bobhlaʋn- an po ˈe ˈkpɩ ʋa nʋn.

• Ɲʋn ɲɔn ɔn ˈdhaa Biiblʋ ˈCɩaʋn- -dhe ɛ, dhɛɛdɩ- ʋʋ ˈˈdhuo- Zoova aˈ -Bobhlaʋn- ɲnɩn ˈmʋn -ɛn?

• -Bhlaa Zoova -dee -bobhlaʋn- ˈbhleɛ- da ˈbhlʋa ˈˈkpe -ɛ?

• -Ɔ -nɩn Zoova aˈ -Bobhlai- klaaˈˈ -a?