ˈDhe 2024 zʋn ˈdhi ɛ, ɲʋn an muɛn -ˈvoo- ˈbhlʋɩ -duuˈˈ ˈdhii. ˈKlaa, ɲʋn -duuˈˈ se poitikɩ -nʋʋn -gwlɩˈˈ de ˈbhodhe.

•   Meikɩkɔʋn anˈ -da -duuˈˈ ɲʋn deea i ˈnaan “poitikɩ -nʋʋn anˈ -da -duuˈˈ a ziɛ ʋaˈ ˈˈjɛ ɛˈ dɩ” ɛ ye ɲʋn ʋa poa jie bho ʋaˈ dɩ -zii. a—Pew Research Center, ˈˈGulacʋ- ˈˈzaan- 19, 2023.

 -Ka nɩan dhueˈ ɛ, ɲʋnjhae- -duuˈˈ se poitikɩ -nʋʋn -gwlɩˈˈ de ˈbhodhe.

•   “Ɲmai- -mɩɩnˈˈ -e ˈɲnʋnkpaeˈ -mɩɩnˈˈ anˈ -dheinˈˈ -nɩn ˈe ˈkledɩ nɩan zɩanˈ bho ˈmɛn, ˈklaa ɲʋn deea ʋbʋ i ɛ, ʋʋ ˈnaan poitikɩ -nʋʋn anˈ dɩ se dhɩ kman ʋbʋ ˈˈbhli aˈ dɩˈ -nɩn.”—The New York Times, ˈˈCɛcʋ- 29, 2024.

•   “Ɲʋn -deea ɲʋn in ɛn, ʋʋ ˈnaan ɲʋnjhae- deɛ ɲʋn -ʋa- poa videe ˈbho Ɛntɛnɛtɩ ˈˈkpe ˈˈdhe ɲʋn -duuˈˈ a bhla ˈo ˈdhe -gwlɩˈˈ ˈjɛɛn ɛ ˈye poitikɩ -nʋʋn -zii.”—The Korea Times, ˈˈCɛcʋ- 22, 2024.

 Poitikɩ -nʋʋn ˈbhɛɛˈ ʋʋ ˈyeɛ nʋn ˈkmʋn ˈye ˈdhɔɛeˈ ˈmʋn -nɩn ˈdhe ɲan? Ɲɔnwɛ- -a ˈbhɛɛˈ -a ˈye -gwlɩˈˈ de -ɛ?

 Ɛ -nmɔn ˈo ˈdhi ɲʋn ˈye -ˈgwlɩi ˈsroo- ˈdhe ɲʋn ʋa dea -gwlɩˈˈ aˈ dɩ ˈdhi. Biiblʋ ˈnaan ɲɔn sea ˈˈjhrii cɛɛn ɔɔ poɛ ˈghwlu aˈ klɛɛ tɔˈ, ˈklaa ɲɔn cɛan ˈˈjhrii ɛ, -bho ɔ ˈye dhɛ nun ɛnˈ ɔɔ naan tɔˈ i -kajɔɔnka.”—Proverbes 14:15.

•   -Bho aʋ ˈye -manɩanˈ nɩan tɔˈdɩ -e sɩ ˈˈkpei zela- ˈbhɛɛ- ɛˈ,-ˈmɛn aʋ zro ˈcɩaandhɛ- “Protégez-vous de la mésinformation.”

 ˈBho -ˈmɛn ˈdhe ɛ, Poitikɩ -nʋʋn- -ʋa- ˈtmʋan tɔˈdɩ ˈˈdhe -ʋa- ˈbɔan -ʋʋ ˈyea dhɩ ˈdhɔɛeˈ nʋn ɛn, dhɩ -ˈnɩɩn -nɩn ˈo ʋʋ se kwai ˈbhɛɛ-. Ɛɛˈ dɩ Biiblʋ ˈnaan:

•   “Aʋ ˈbhɔ ɲʋn -klaeˈˈ nɩan ˈnɔn ˈkmʋn nʋn ˈdhi -gwlɩˈˈ -deɛ. Ʋʋ -nɩɛn -glɔɲiɔn-, ʋʋ se ˈbhɛɛ- ʋʋ ˈye ɲɔn ˈpʋʋ-.”—Psaume 146:3, Parole de Vie.

 Biiblʋ ˈnaan Ɲɔnsoa deɛ ˈo ɲʋnbhlei dhueˈ i -nɩn -gwlɩˈˈ -de ka ˈˈdhe -ɔ ˈbhle ˈˈɩkman-: Zezi Klisɩ. (Luc 1:32, 33) Zezi -nɩɛn Ɲɔnsoa aˈ ˈBheɔglɔ- -ɔ nɩan ɲʋnbhleglibha- ˈdhe jhaʋn ˈdhi ɔˈ ˈBheɔ.—Matthieu 6:10.

•   Dhɛ nɩan ˈo -wɛeˈ aʋ ˈyea Zezi -gwlɩˈˈ de ˈˈdhe -ka ɔɔ muan nʋn- -wɛeˈ ɔ ˈyea ˈkledɩ- -aa ˈjhea ˈˈjhibhaˈ i -za a, aʋ ˈcɩɛn. Aʋ zro ˈcɩaandhɛ “Qui est le Roi du royaume de Dieu?” -e “Qu’accomplira le royaume de Dieu?”