ˈZɩan an, dhɩ ɲʋn an ˈŋwɔan -manɩanˈ ˈsɛɩ ˈdhii ɛ, ɛ nɩn ˈˈkudhbha -e ˈcɛn ˈˈmlanɩɛn- ˈbho ɲʋn -ʋaˈ poa ghwlu dhueˈ ˈɲnɩn -e tʋ ɲʋn ˈmʋɲɩɛn ɛn za ˈˈbhlo ɛ.

•   “Dhɩ ɲʋn an ˈtmʋan ˈdhe tʋ -ʋan- ˈkpaa ˈbho Israɛlɩ -e Amasɩ ˈɲnɩn ɛmɛn -e dhɩ ɲʋn -ˈnʋʋn an ˈtmʋan -ɩan- poa jɛaˈ a, ɩmɩn- ɲʋn an tbha ˈo ˈˈkpei ʋa ˈtmʋn dhɩ - ɲʋn ˈmʋɲɩɛn -nɩn ˈe ˈzɔn ˈbho rezo sosio ˈˈkpe.”—The New York Times, 2023 anˈ ˈGbaacʋ- 15.

•   “-Ɛ tbha ˈo ˈGulacʋ- klaaˈˈ aˈ ˈghwɩ 7 ˈˈkpe ɛ, dhɩ ɲʋn an ˈtmʋan ɲʋn ˈmʋɲɩɛn- nɩan ˈe ˈdhi -e tʋ ɲʋn ˈmʋɲɩɛn za ˈˈbhlo ˈkpa ˈˈkpe.”—Dennis Francis, ONU anˈ ˈˈdhruigbooɛ klaaˈˈ aˈ jiebhopoi-, 2023 anˈ ˈGbaacʋ- 3.

 Dhɩ ɲʋn an ˈtmʋan ɲʋn ˈmʋɲɩɛn nɩan ˈe ˈdhi -e ˈcɛn ˈˈmlanɩɛn- -e tʋ ˈse -dee ˈzɩan. Biiblʋ a ˈtmʋɛn ɲʋn -ˈnʋʋn nɩan tɛnˈˈ ɛnˈ dɩ. Ʋn ˈnaan, ‘-bho ʋa sa ghwlu ɛˈ, ɛ nɩn -ka ɲʋn anˈ poa plusɩn ɛn’, ˈˈdhe ʋʋ -kman ˈcɛn ˈˈmlanɩɛn -e tʋvɔɛn ɛnˈ dɩ. (Psaume 64:3; 120:7; 140:1) ˈKlaa Biiblʋ ˈnaan ɲʋn ˈmʋɲɩɛn- -ɛ nɩan ˈnɔn -aaˈ ˈnɔn ˈzɩan an, ɛ nɩn ɛnˈ -nɛn -ka.

 Biiblʋ a ˈtmʋɛn dhɩ aˈ kpɛ ˈsɔɔn -ɩan- nʋɛn -wɛeˈ ɲʋn ˈmʋɲɩɛn- ˈˈjhia dhɛ ˈzɩan anˈ dɩ.

1.  1. Ʋn ˈtmʋɛn nɔnˈˈ dhueˈ ɔˈ dɩ. Ʋn ˈnaan ˈdhe ɔɔˈ nɔnˈˈ tu ˈdhi ɛ, ɲʋndɩkman- nɩan ˈe ɲʋn anˈ -da -duuˈˈ ˈmʋn ɛn muɛn ˈˈkpe -cɛn.” (Matthieu 24:12) Ɲʋndɩkman- ˈse ˈo ɲʋn ˈɲnɩn -nɩn in. Dhɩ -ɩn ˈyea ɲʋn ˈmʋɲiɛn- ˈˈbhlo -za a, ɩmɩn- ʋa mun -nʋn.—2 Timothée 3:1-5.

2.  2. Dhɛ ˈkmʋn nʋn nɩan ˈe Satan anˈ sʋn ˈzɔn ɔnˈ, ɛɛˈ dɩ ɲʋn ˈmʋɲɩɛn- ˈˈjhi dhɛ ˈzɩan. Biiblʋ ˈnaan: “ˈKmʋn nʋn anˈ klɛɛ -nɩɛn- ˈe Ɲɔnsaʋn ɔnˈ ˈˈɩkman -an ˈzɔn.”—1 Jean 5:19; Révélation 12:9, 12.

 Biiblʋ ˈnaan dhɩ aˈ klɛɛ -ɩn nɩan ˈe ɲʋn ˈmʋɲɩɛn- ˈzɔn ˈzɩan an, Ɲɔnsoa aˈ muɩn in -za. ˈˈDhe dhɩ aˈ klɛɛ ɛ za ˈˈbhlo ɛ, ɔɔ muɩn ˈkpa -po. Dhɩ Biiblʋ ˈtmʋan -ɩn ˈyea -nʋʋɛn ɩn ka:

•   Ɲɔnsoa a “muɛn ˈˈmiinin anˈ klɛɛ nɩan ˈdhe ʋbʋ ˈˈjhrii ˈsran-, ˈmɛan ˈse i -nɩn in -dheeka, ˈkwɛ ˈse i -nɩn in, zrɛ -e ipʋʋa ˈse i -nɩn in. Dhɩ nɩan tɛnˈˈ -dhe ɛ, ɩn se i -nɩn -dheeˈ ka.”​—Révélation 21:4.