Ɲʋn an poɛ dhɩ ˈˈjhai poitikɩnʋʋn anˈ dɩ da ˈbhlʋa aˈ klɛɛ ˈˈkpe. ˈˈDhe ɛɛˈ dhɛ tu nʋɛn ɲʋn dhɩsaɩn -duuˈˈ ˈˈdhrui.

•   ˈDhe 2023-2024 ɛ, poitikɩnʋʋn anˈ 39 ɲʋn dhbhaˈ ˈdhe ˈcɛn mlanˈˈ -nɩɛn- poitikɩ -nʋʋɛn za bhloˈˈ aˈ dɩ ˈdhi ˈdhe Mɛsikɩ. Ɛɛˈ dhɛ tu ˈse -nʋʋɛn kpɔ dhueˈ ˈdhemɔn -dhe.

•   Ɛ ˈse ˈo -gwle ke poitikɩ ˈye dhɩ ˈˈjhaipoɛ- -duuˈˈ bhloˈˈ -za ˈdhe Elɔpʋ. ˈDhe ɩn ˈˈklun ɛn, Silovakɩ aˈ minisrɩ aˈ ˈˈdhrujhei ɔˈ ˈmɛan ˈdhe 2024 ɛnˈ Daocʋ aˈ 15 -nɩn ˈe ˈmɛn -ke.

•   ˈDhe 2024 Ɲɔɔnkpadhebhaˈ aˈ 13 ˈˈkpe ˈdhe Etazinin ɛn, ɲʋn muɛn ˈbhlʋa ˈbhlei- -soa Donalɩ Trɔnpʋ ˈdhbhaˈ a -dhe.

 Dhɛɛdɩ- poitikɩ -nʋʋn za dhɩ ˈˈjhai -poɛ -duuˈˈ bhloˈˈ ˈzɩan -an? Ɛɛ muɛn i -gwɛ ˈmɛn? Dhɛwɛ- Biiblʋ a ˈtmʋn -ɛn?

 Biiblʋ -zɛɛ ɲan ʋn ˈyɩ ˈtmʋn -ka ˈnɔn -aaˈ nɔnˈˈ ɔn, ʋan ˈdhaa “dhebhɔɔghwɩ -ke”, ɲʋn anˈ -da -duuˈˈ aˈ kplɩn ʋʋ ˈbhlea se ˈˈjhriinmɔn-.

•   “Jhibho- dɩ nɩn, ˈdhe dhebhɔɔghwɩ ˈdhi ɛ, ˈkmʋn anˈ ˈˈɩkman- an muɛn -jieˈˈ -zi [...]. -bho ɲʋn nʋbʋ ˈjɛɛn ˈˈdhrui ʋʋ seɛˈ ˈˈɩ jhibho- i, ʋʋ ˈse ˈo bha ˈˈbun in -kpʋn in, [...]. ʋʋ ˈse ghwluiŋwɔɔn- in, [...] ʋa muɛn ɲʋn anˈ ˈɲnɩn ˈkɔɔ-, [...] ʋa muɛn ɲʋn bhʋdheza-, ʋa muɛn ˈˈdhruku-, ˈˈjɛ ˈˈɩ ˈbhɛɛ- ˈyʋbʋ ˈmʋn ˈˈjhi.”—2 Timote 3:1-4.

 Biiblʋ -zɛɛ ɲan ʋn ˈyɩ ˈtmʋn -ka ɲʋn an muan ˈbhlʋɩbhleʋn -e poitikɩ -nʋʋn bho -vɔn ˈdhe dhebhɔɔghwɩ ˈdhi. (Luikɩ 21:9, Jhibhodɩ- nɩan ˈo ˈzɔn) ˈKlaa, ˈcɛn mlanˈˈ -nɩɛn -e dhɩ ˈˈjhai -poɛ poitikɩ ɛɛ za bhloˈˈ ɛ, ɛɛ muɛn in -gwɛ.

 Biiblʋ ˈnaan Ɲɔnsoa a muɛn ɔɔˈ ˈˈBheɔglɔ- ˈbho ɲʋnbhleʋn anˈ -glibhɩ aˈ klɛɛ gɔˈ ˈˈɩ po.

•   “ˈDhe ˈBheɔ -ˈˈwe -ˈnʋn anˈ nɔnˈˈ ɔn, [...] Ɔɔ muɛn ˈbheɔgwlɛ- nɩn anˈ klɛɛ i-ghwaa ˈˈdhe ɔ ˈyɩ iza- -wɛeˈ ɔɔˈ ˈsʋ ˈye ɲʋn ˈbhle jheejhee—Daniel 2:44.

 Ɲɔnsoa aˈ ˈBheɔglɔ ɔ muɛn nʋn- ɲʋn anˈ klɛɛ ˈye ghwluiˈ ˈŋwɔɔn- ˈˈdhe ʋʋ ˈye ˈflɛ ˈmʋn in -de.

•   Zezi nɩan ˈBheɔglɔ- -ˈnɔn ɔnˈ jiebhopoi ɛ, Biiblʋ a ˈdhɔɔ “ˈFlɛ ɛˈ -Taajhʋn-,” ˈˈdhe ɔɔ muɛn -nʋn “ˈflɛ ˈse ˈˈtianˈ ˈbhlei.”—Isaïe 9:6, 7.

•   Ɲʋn nɩan ˈo ˈBheɔglɔ- -ˈnɔn ɔnˈ sʋn ˈzɔn ˈzɩan an ˈcɩɛɛn -ka ʋʋ ˈyea ˈflɛ ˈmʋn inˈ -de sʋn nʋn ˈmɛn. Dhɛ Biiblʋ ˈtmʋan ɛ ka: “Ʋa muɛn ʋaˈ -blajrɩnˈ ˈkla ˈmʋn -nʋʋn ˈˈdhe ʋʋ ˈye ʋaˈ ˈˈdhi -kocɛndhɩ- ˈmʋn -nʋʋn. ˈBhlʋa dhru ˈse ˈbhlʋa dhru bho -vɔn in. ˈˈDhe ʋʋ ˈse tʋ -vɔɛn ˈcɩan in ˈbhodhe. ”​—Isaïe 2:3, 4.

 -Bho -ˈye dhɩ -duuˈˈ i ˈŋwɔn ɔnˈ, aʋ zro ˈcɩaandhɩ “Que fera le royaume de Dieu?” ˈdhii -mɛnˈ -ˈjhe video -Ɛ -nɩn Ɲɔnsoa aˈ ˈBheɔglɔ -ɔ? dhi