Vɔn ˈplu bho ˈbho ˈdhaiˈˈ -ˈˈwe aˈ ˈbhleaˈ: -Ka Biiblʋ ˈbhɛɛa ʋn ˈyea -ʋn sʋn bho po ɛ
ˈDhe 2023 zʋn ˈdhi ɛ, dɔsrɔ -ˈˈwe -klaeˈˈ ˈnaan, dhɛ ɛˈ kpɔ dhueˈ -ɛɛ poa ɲʋn -duuˈˈ ˈghwɛ ʋʋ ˈyea bho vɔn ɔn, ɛ nɩn ˈplu. Ɲʋn ˈbhɛɛˈ ɲʋn ˈye -zibhoˈ kpa ˈbho ˈplu ˈˈkpe?
“ˈPlu -e -nɩn dhueˈ -dei ˈbhɛɛˈ ɩn ˈye -aʋ ˈghwɛ po,” ˈkamɔn- Dr. Vivek Murthy -ɔ nɩan Etazinin anˈ dɔsrɔ -ˈˈwe aˈ ˈˈdhrujhei ˈdha. ˈKlaa ɔ de ˈo ɔ ˈnaan: “-A ˈbhɛɛˈ -a ˈyeɛ bho vɔn.” -Kawɛ? “-A ˈbhɛɛˈ -a ˈye dhɩ -mɩɩnˈˈ nʋn zɔn ooˈˈ zɔn -wɛeˈ -a ˈye -jhbhɛɛ- nɩan ˈo -abʋ -e ɲʋn ˈɲnɩn i -kuu-.” a
Ɛ se -nɩn dhueˈ -dei ɛˈ ˈsʋ -ɛɛ jha ɲʋn ˈplu bho -nɩn. ˈPlu ˈbhɛɛˈ ʋn ye ɲʋn -ˈnʋʋn i ˈkpa -bho ʋʋ -nɩn ˈe ɲʋn -duuˈˈ ˈˈklun -mɔnˈ -dhe ɛˈ. -Ka dhɛ -ɛɛ jha -aʋ ˈplu bho ˈjhe ɛ -nɩn -mɔnˈ -dhe ɛˈ, Biiblʋ ˈbhɛɛ ʋn ˈye -aʋ sʋn bho po. ˈSrɩn ˈdhɔɛeˈ -nɩn ˈe ʋn ˈdhi -ɩan to -ka ɲʋn an nʋan -jhbhɛɛ- i -kuu sʋn. ˈSrɩn -ˈnɩn ˈbhɛɛˈ ɩn ˈye -aʋ sʋn bho po -a ˈye ˈplu bho vɔn.
Biiblʋ aˈ ˈsrɩn -ɩn ˈbhɛɛa -ɩn ˈyea -aʋ sʋn bho po
-A -nɩn ɲʋn bhla -maua -kajɔɔnka. -A ˈtmʋn dɩ nɩan ˈbho -a -gwlɩˈˈ, ˈklaa -bho ɲʋn an sa -aʋ dɩ nɩan ˈbho ʋbʋ -gwlɩˈˈ ˈtmʋʋn -ke ɛˈ, -a po ʋbʋ -dheinˈˈ bho -kajɔɔnka. -Bho -aa seɛ to ˈdhe ɲɔn bho -ka -aa ˈˈduaˈˈ ɔɔˈ dɩ ɛˈ, ɛɛ muɛn -nʋn -jhbhɛɛ- nɩan ˈo -a ˈɲnɩn ˈye i ku.
Biiblʋ aˈ ˈsrɩn: “Aʋaˈ zi -e aʋaˈ ˈsʋ ɔˈ dɩ -dhe, ˈklaa aʋ zi ɲʋn -ˈnʋʋn anˈ dɩ -ke.”—Philippiens 2:4.
Aʋ ˈbhle -jhbhɛʋn anˈ kpɛ -duuˈˈ. Aʋ ˈbɔn ɲʋn -klaeˈˈ -e ɲʋnjhae -e ɲʋn -nɩn aʋ sea -dadhueˈ ˈghwlʋ ʋaˈ -jhbhɛɛ- i.
Biiblʋ aˈ ˈsrɩn: “Aʋ kain- aʋaˈ -pɛɛ ˈˈŋwɛn.”—2 Corinthiens 6:13.
-Bho -man sa ˈbɔn -ˈye dhɩ -duuˈˈ i ˈŋwɔn ˈdhe -jhbhɛɛ ɛˈ i kuuɛ- ɛˈ dɩ ˈdhi ɛˈ, zro ˈcɩaandhɛ- “Comment combler notre besoin d’amitié” ˈdhii.
a Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.
