NITRE NÜBAIDI JESÚS JA NIRE BIANI NGWAINTA TÖRÖ JAI YE KRÄKE
Nünanta bobre ye Jesukristo mikai krüte
Jesús nämäne kä tibienbätä ngwane, ni tare kwe ye bämikani kwe aune nitre bobre bätä nitre nämäne ja tarenike ye bäri tarebare kwe (Mateo 9:36). Ne madakäre niara ja nire biani ni ütiäre (Mateo 20:28; Juan 15:13). Ni tare kwe ye köböra bämiketa nie: rabaira reire gobran ngöbökwe yete ngwane, nünanta bobre kä jokräbiti tibien ye diankä kwe, die kwe yebiti.
Kukwe bä nuäre käbämikata Bibliabätä ne Jesukwe mikai nemen bare:
“Nitre töi bobre jutate kriemikata kwe, nitre bobre monsoi mikata kwäre kwe” (Salmo 72:4).
¿Jesukwe dre nuainbare aune dre nuaindi ni kräke yebätä debe bian raba ño ie? Jesukwe ja nire biani, ye nitre ja tötikaka kwe rabadre ngwenta törö jai niebare kwe Lucas 22:19 yekänti. Yebätä nitre testiko Jehovakwe, tä ja ükekrö kä kwatire kwatire te ja nire biani kwe ye ngwankäreta törö. Nunta mä nubaire jabe Jesús ja nire biani ni ütiäre ye ngwankäreta törö. Nuaindi marzo 2024 domingo 24 yete.