¡KÄRE JA NGWANDRE MOKRE!
¿Juta kä jökräbiti tibien ye raba ja ükekrö kukwe tare tä nemen bare ketabätäkäre. ¿Dre nieta Bibliakwe?
Domingo 20 Noviembre 2022 Naciones Unidas käkwe blitabare ünä käta jutra ngitiekä käbiti tibien yebätä COP27. Nitre dianinkä käkwe ngwian ükaninkrö juta jene jene tä ja tare nike desastres climático köböite ye dimikakäre. Kukwe ne kwrere ñaka nuainbarera jire, akwa kukwe nuainbare ne ñaka raba kukwe tare tä nakainkä ye ketebätä jire.
“Nitre kän jondron tä niken ngwarbe kukwe tare tä nemen bare köböite ye dimikakäre ngwian ükaninkrö ye tuin kwin krubäte tie […]. Akwa kukwe ükaninte ne ñan aibebiti kukwe tare ye rabai ükaninte […]. Ñobätä ñan aune kä tibien ne kite niken ngwarbe jankunu” (António Guterres, secretario general de las Naciones Unidas; 19 noviembre 2022).
“Kä Tibien ne täi jankunu kore ngwane kä nebera braibe ie rikakäre ngwarbe” (Mary Robinson, ex presidenta de Irlanda y ex alta comisionada de la ONU para los Derechos Humanos; 20 noviembre 2022).
Metrere dre rabai bare ja känenkäre kä tibien nebätä ye tä monsotre bati mike töbike krubäte. ¿Juta jökrä raba sribire gwairebe aune ja di ngwen cambio climático ketebätä käbämikata kwetre ye erere rabai bare ietre? ¿Dre nieta Bibliakwe?
¿Juta jökrä käkwe ja ükaikrö ye köböire kukwe rabai ükaninte?
Nitre ruäre tä sribire ja dibiti aune töi bökänbiti kukweta nakainkä käbiti tibien ye ükatekäre, akwa niaratre die ñaka kukwe ye ükatekäre mikata gare Bibliakwe. Ñobätä ye ani mike gare ketebu jai:
“Jondron tä tolene ye ükate ñaka raba metre” (Eclesiastés 1:15).
Ne gärätä: Gobrantre tä ja di ngwen kukwe ükatekäre akwa ñaka tä nemen bare ietre ñobätä ñan aune ni ñaka sribebare ja gobrainkäre akwle (Jeremías 10:23). Juta jökrä käbiti tibien käkwe ja ükadrekrö kukwe tä nemen bare käbiti tibien ne ükatekäre, ja di ngwandre krubäte kwetre akwa ñaka raba nemen ükaninte ietre.
“Ñobtä ñan angwane ni kwati rabadi ja tarere kaibe au, amne rabadi ngwian tarere bäri […], tö rabadi kukwe kämekäme nuene bätäkä ngwarbe, erere rabadi nuene jökrä” (2 Timoteo 3:2, 3).
Ne gärätä: Nengwane nitre kwati rabai ja ngwen käbäre aune ñan täi juto biare sribikäre gwairebe mikani gare Bibliakwe. ¿Ye ñan ai tuin nie?
Kukwe keteiti tö ngwankäre jankunu
Dre rabai bare ja känenkäre ye ñan tä gobrantre kä tibienbätä ne kisete ñakare aune Jehovakwe ni iti dianinkä kä tibien ne jie ngwankäre aune ükatekäre: Jesukristo. Biblia tä ne niere niarabätä:
“Gobran ye täi niara kisete. Kädekai Mäträkä kwin, Ngöbö dite, ni Rün Kärekäre, Gobran kä jäme bianka” (Isaías 9:6).
Jesús ye Rei Gobran Ngöbökwe yete, gobran ye tä kä kwinbiti (Mateo 6:10). Jehová ye dite, töbätä aune tö kä tibien aune nitre nünanka te ye ngübai kwin (Salmo 72:12, 16). Rabai gobrane ngwane “nire nire käta kä temen ne juen ngwarbe abko” gaite jökrä kwe aune kä tibien ne ükaiteta kwin kwe (Apocalipsis 11:18; Isaías 35:1, 7).
Cambio climático köböite kä tibien ne kite niken bäri ngwarbe ye ükate raba ño ye mä tö mikai gare jai ngwane, mä raba ñäke kukwe kädekata “¿Qué dice la Biblia sobre el cambio climático y nuestro futuro?” yebätä.