¡KÄRE JA NGWANDRE MOKRE!
Nitre murie ketata kürübiti kä jökräbiti tibien ye tä ni töi mike niä. ¿Dre nieta Bibliakwe?
Sö Julio 2022 yete, kürü yebiti nitre nuainbare tare krubäte kä jökräbiti tibien:
“Politico Shinzo Abe, murie ketani ye käkwe nitre juta yete aune nitre kä jökräbiti tibien töi mikani niä, ñobätä ñan aune juta yete nitre ñaka ja murie kete krubäte aune kukwe keta kabre ükateta ne kwe kürü ñaka rabadre nitrekwe” (10 Julio , 2022, The Japan Times).
“Nitre ngwani nikenkä Dinamarca. Jondron rürübäinta Copenhage yete ni iti nämäne kürü ngwen jabätä käkwe nitre nimä murie ketani” (4 Julio 2022, noticia Reuters).
“Sudafrica: Kä Soweto jondron rürübäinta yekänti nitre kürü ngwanka jabätä käkwe nitre täkäni, yete nitre 15 murie ketani” (10 Julio 2022, periódico El Guardián).
“Köbö 4 Julio yete, bämä krüte kä ngwan nämä juto jabätä ye ngwane, nitre 220 biti bäri murie ketani Estados Unidos” (5 Julio 2022, noticia CBS)
¿Nitre nuainta tare kukwe ne kwrerebiti ye ngwandi krüte ye ie ni raba tö ngwen? ¿Dre nieta Bibliakwe?
Nitre nuainta tare ye ngwandi krüte
Nita nüne “kä krüte näire” mikata gare Bibliabätä. Kä nengwane nitre kite ja ngwen jondron nire känsenta ye kwrere aune brukwäta nemen, tä kukwe tare nuainne ni madabätä aune ñaka töibikaire (2 Timoteo 3:1, 3). Kukwe tare krubäte ne erere nuainta ye tä kä jürä mike nibätä (Lucas 21:11). Akwa ja känenkäre nitre käme tä kukwe käme nuainne ni madabätä ye ñaka rabaira käbämikata Bibliabätä. Biblia tä niere “juta tikwe nünain kä jäme te, kä yekänti ja rabai ruin kriemikani ietre aune ja dükai jäme kwetre” (Isaías 32:18). ¿Akwa ñokänti kukwe tare nemen bare ye ngwandi krüte?
Ngöbökwe nitre käme aune kürü ye gaite täte
“Nitre kukwe käme nuainkä, ye abokän tikaikä täte kä nebätä; bätä nitre ni mada kitaka ngite ngwarbe ye abokän gaikä kä nebätä” (Proverbios 2:22).
“Ngöbö tä rü ye mike krüte kä jökräbiti tibien. Tä tukwen ötöbätä aune tä buko ye tikekä ötöbu ta; karo rükäre ye tä kukwe ngise ñukwäte” (Salmo 46:9).
Dre köböite kukwe tare nuainta ye diainkä jökrä kwe. Ye erere rabai bare ñobätä ñan aune nitre nünandre jäme ye driedi kwe ietre.
“Ñaka ni mada nuaindi tare kwe aune ngutuä tikwe deme ye jökrä känti kukwe tare ñaka nuaindi kwe, ñobätä ñan aune kukwe Jehovakwe ye rabai gare kä jökräbiti tibien ñö tä mrenbiti ta ye kwrere” (Isaías 11:9).
Erametre nitre kä jökräbiti tibien ñaka kürü diandre kisete, ñaka ja metadre aune ñaka brukwä rabadre ja kräke ye Ngöböta driere ietre. Biblia tä niere “ngitra kwetre ye kwitai kwetre jondron kä muankäre kwrere aune lanza ye kwitai kwetre jondron kri mutu tikakakäre ye kwrere. Juta kwatire kwatire te ngitra rükrä ye ñaka dian rabai jai kwärikwäri aune ja kita ñaka rabaira rübätä kwetre” (Miqueas 4:3).
Mikata gare nete erere ja känenkäre kukwe käme jürä ñaka rabaira nibätä ye Biblia tä käbämike. Biblia tä dre mike gare ye mä tö mikai gare bäri jai ngwane, mä rika internet käi jw.org yete aune täräkwata suliare kädekata “Es posible librarse del miedo?” yebätä mä raba ñäke.
Nitre tä rüre jabe, nitre tä ja murie kete aune rü ye diainkä aune ñaka nuain rabai jankunu mada ye mikata gare Bibliabätä. Mä tö kukwe mikai gare bäri jai ngwane, mä raba niken jw.org yete aune täräkwata suliare kädekata Por fin paz en la Tierra!” yebätä mä raba ñäke.