Copa Mundial FIFA, nuaindi 20 noviembre nemen 18 diciembre 2022 ye nitre 5,000 millone bäsi käkwe tuadi mikata gare. Jadaka ne kwrere köböire nitre kwati raba ja kete bäri kwin jabe aune ye ñan aibe raba nemen bare nitre tä nütüre.

•   “Jadaka ye die tärä nitre käbiti tibien töi kwitakäre, die tärä nitre töi mikakäre jondron nuainkäre, die tärä nitre mikakäre ja kete kwin jabe aune kukwe ye erere ñaka nemen bare jondron keta kabrebätä” (Nelson Mandela, nämäne gobrane Sudáfrica).

•   “Fútbol [...] ye köböire nitre tä nemen tö ngwen, käta nemen juto bätätre, töita nemen gwairebe kukwe keteitibätä, tätre nemen ja tarere, nitre jene jene akwa tä nementre keteitibe” (Gianni Infantino, presidente de la FIFA). a

 ¿Kukwe kwin ye erere raba nemen bare nitrebätä fútbol o jadaka mada mada ye köböire? ¿Nitre nünain jäme jabe aune keteitibe ye ie ni raba tö ngwen?

 Mundial nuainta kä nete yete jadakata ye ñan aibe kädrieta. Ñakare aune jadaka ye käkwe nitre töi mikani blite bäri política aune nitre kä madakänti nüne ño yebätä. Ñodre, derecho nitrekwe, nitre kitateta aune nitre kä ruäre känti tätre nüne bobre.

 Akwa yebiti ta, jadaka ne kwrere nuainta kä jökräbiti tibien, ñodre fútbol mundial tä kä mike juto nitrebätä ruin ietre. Nitre tö kukwe kwin tuai nemen bare akwa kukwe ne erere nuainta käbiti tibien ye ñaka tä nitre töi mike ja kete kwin jabe kärekäre. Ñakare aune nitre töita ño aune ja ngwen ño ye tä nemen gare metre ta ye köböite tä nitre kwati ñäkebiti. Nitre ja ngwanka ye erere yebätä Biblia käkwe kukwe mikanina gare, nitre jatai ja ngwen ye erere “kä krüte näire” mikani gare Bibliakwe (2 Timoteo 3:1-5).

 Nitre kä tibienbätä raba nüne keteitibe ye ie ni raba tö ngwen ye Biblia tä käbämike. Nitre kä jökräbiti tibien rabai nüne keteitibe gobran kä kwinbiti rabadi gobrane ngwane, ye käbämikata Bibliakwe. Gobran ye kädekata “Gobran Ngöbökwe” (Lucas 4:43; Mateo 6:10).

 Kä jäme rabadre kä jökräbiti tibien ye, Jesukristo, gobranka Gobran Ngöbökwe yete käkwe mikai nemen bare. Biblia tä mike gare:

•   “Nitre töi kwin ye rabai kwati krubäte, aune nüna jäme ye rabai käre” (Salmo 72:7).

•   “Niarakwe nitre bobre tä ja di ribere ye mikai kwäre [...]. Ngwanta ja tare nike aune kukwe tare nuaintabätä yebätä niarakwe mikai kwäre” (Salmo 72:12, 14).

 Kukwe driebare Jesukwe ye käkwe nitre kwati nünanka juta 239 te ye dimikanina nüne keteitibe aune brukwä ñan ja kräke. Mä tö kukwe mikai gare bäri jai ngwane, kukwe kädekata “Rompamos el ciclo del odio” yebätä mäkwe ñäkä.