¡KÄRE JA NGWANDRE MOKRE!
Rü aune nitre Ngöbö mikaka täte. ¿Dre nieta Bibliakwe?
Nitre ji ngwanka kukwebätä kwati tä nitre töi mike rüre ye nemen gare metre nie rüta nemen bare Ucrania yebiti. Nitre tä rüre jabe yekri nitre ji ngwanka tä ja mike ño ja erebe kwärikwäri ye ani mike gare jai:
“Nitre nünanka Ucrania tä rüre Ucrania krie mikakäre ye ie nun tö debe biain aune nunta mike ütiäte jai […]. Käre nunta nete niaratre kräke, orakäre kräketre aune dimikakäre” (metropolitano Epifanio I de Kiev, The Jerusalem Post, 16 marzo 2022).
“Bämänte, Rusia yete nitre ji ngwanka kukwe ortodoxa yebätä käkwe misa nuainbare känti nitre rükä ruso ye käkwe Rusia krie mikadre ‘nuain gare ño ietre ye erere’, niebare kwe ietre. Moscú täbe rü gainkä Ucrania ben ye ngwane” (Reuters, 3 abril 2022).
¿Nitre kristiano rabadre niken rübätä? ¿Dre nieta Bibliabätä?
Bibliabätä kukwe ne mikata gare
Nitre tä näin erametre Jesús jiebiti ye ñaka tä ja mrite rüte siba ye Biblia tä mike gare.
“Ni rükä ngitrabti abko kämikata ngitrabti arato, aisete ngitra ye üketa” (Mateo 26:52).
Ni iti ie rü gakata ye tuin debe ie o tä niken rübätä siba ngwane, ¿erametre kukwe niebare Jesukwe ye mikata täte kwe?
“Ti bike kukwe bien nuendre btin munye, ne erere munkwe nuen abko krörö: Mun ja töitikaka tibe käkwe ja tare kwärikwäri. Tita mun tarere ño, ye kwrere munkwe ja tare kwärikwäri. Munkwe ja taredre kwärikwäri tita niere munye, ne kwrere munkwe ja taredre ne ngwane, mun abko ja töitikaka tibe ye rabadi gare ni jökräye” (Juan 13:34, 35).
¿Ni iti tädre ja mike rü yekri ngwane ni ja tötikaka Jesukwe käkwe ja taredre ño niebare kwe ye erere tädre nuainne?
Mä tö kukwe mikai gare bäri jai ngwane, mä raba ñäke kukwe kädekata “El cristianismo y la guerra: ¿son compatibles?” yebätä.
Rü aune nitre Ngöbö mikaka täte kä nengwane
¿Ni kristiano ñaka rabadre jire chi ja mike rü yebätä ye ngüba raba? Jän raba nemen bare. Jesukwe niebare ye erere arato, kä näire nita nüne abokän kädekata “kä krüte näire” yete nitre juta kwati te aune kä jene jene te “ñaka rabaitre rüre jabe” ye mikani gare Bibliabätä (Isaías 2:2, 4, nota).
Mä tö kukwe mikai gare jai ngwane, mäkwe ñäkä kukwe kädekateta jatäri täräkwata Ni Mikaka Mokre yebätä abokän kädekata “¿Ngöbö töita ño rü yebätä?”.
Jehová, a “kä jäme bäkänkä”, köböra Gobran kwe kä kwinbiti yebiti nitre ngwanta ja tare nike aune kukwe tare nuaintabätä ye mike kwäre (Filipenses 4:9; Salmo 72:14).
Nuaindi ño kwe ye mikakäre gare jai, mäkwe video ¿Dre abokän Gobran Ngöbökwe? ye tua.
a Ngöbö kä abokän Jehová (Salmo 83:18).