Organización Naciones Unidas tä ne mike gare:

•   Köbö 7 octubre 2023 nükebe nengwane, juta Gaza aune Israel tä rüre jabe ye köböite nitre 6,400 kämikanina aune nitre15,200 nuainbarera tare. Nitre ye bäsi jökrä ñan ja kitaka rübätä. Arato ni kwati ngitiani.

•   Köbö 24 septiembre 2023 ye ngwane ne rababa gare: juta Rusia aune Ucrania tä rüre jabe ye köböite nitre 9,701 kämikanina aune 17,748 nuainbarera tare Ucrania yete. Nitre bäsi jökrä ñan ja kitaka rübätä.

 ¿Kukwe tärä Bibliabätä nitre tä ja tare nike rü ye köböite ye töi mikakäre jäme?

 Ngöbö köböire ñan rü nuaindi mada nieta Bibliakwe (Salmo 46:9). Ye rabadre bare yekäre niarakwe gobran kä nebätä ye diainkä jökrä aune täte Gobran kwe kä kwinbiti ye mikai (Daniel 2:44). Gobran Ngöbökwe ye kisete ni jökrä nünain jäme.

 Jesukristo, Rei Gobran Ngöbökwe, käkwe ne nuaindi:

•   “Niarakwe nitre bobre tä ja di ribere ye mikai kwäre, aune nitre tä ulire bätä nitre dimikaka ñaka ye mikai kwäre kwe arato. Ni töi bobre aune ni ñaka jondron bökäne ye rabai tuin bobre ie aune nitre bobre ye mikai kwäre kwe. Nitre ngwanta ja tare nike aune kukwe tare nuaintabätä yebätä niarakwe mikai kwäre, aune nitre ye därie rabai ütiäte niara okwäkänti” (Salmo 72:12-14).

 Rü aune ni mada nuainta tare ye köböite ja tare nikata, ye ulire krubäte. Akwa Ngöbökwe kukwe tare jökrä ne diainkä Gobran kwe yebiti.

•   “Angwane Ngöbökwe niaratre okwä ñöi sökadite jökrä ietre amne ni ñan krütadre jire iti mda amne ñan ja müaidre jire chi mda amne ñan ja müaidre ja tare nikabtä, ñobtä ñan angwane kukwe nämane ükaninte ño känekäne, erere nikanina jökrä ta” (Apocalipsis 21:4).

 Gwä ngwane, Gobran Ngöbökwe kä ne ükaite. ¿Ye ñokänti gare nie? “Nitre tädi rüre” aune blita rabai “kabre rübätä” ye Biblia mikanina gare (Mateo 24:6). Kukwe ne aune jökrä mada tä mike gare nita nüne kä mrä gobran kä nebätä ye näire (2 Timoteo 3:1).